Read Dagara, Northern Yele-za-pɛr-tib 29 Bible Online

Yele-za-pɛr-tib 29 - Dagara, Northern bible

Yele-za-pɛr-tib 29

¹A Zakɔb tɩ ìr'a lo a sɔ́r cere a saa-pɛrɩ́ ten lowr.

²Bibir kãw, ʋ tɩ nyɛ̃ nɩ bule a wɩ̀ɛ pʋɔ. Zawr ata píir nɩ bʋʋr tɩ gã nɩ a be, bʋ̃ʋ n'ʋ vɛ̃, be n'a a dʋn tɩ nyúur a kʋ̃ɔ. Kʋsɛ-kpɛ̃ɛ tɩ pàw nɩ a bule nʋɔr.

³A dʋn za na mɩ́ wa ɓã taa baar'a, bɛ mɩ́ bili nɩ a kʋsɩɛr bɛr, ɛ́ ƴãw a dʋn a nyũ, ɛ́ bɛ lɛb bili a kʋsɩɛr pàw a bule nʋɔr.

⁴A Zakɔb tɩ sowr'ɩ a pi-cɩ̃ɩnbɛ: «Ɩ̃ bá mɩnɛ ɛ, nyɩnɛ nyɩ yi?» Bɛ sɔw: «Tɩ yi n Haran tẽw.»

⁵Ʋ lɛb sowri bɛ: «Nyɩ bãw nɩ Nahɔɔr bidɛb Labã a?» Bɛ sɔw: «Ʋ̃ʋ, tɩ bãw ʋ na.»

⁶A Zakɔb lɛb sowri bɛ: «Ʋ kpɛmɛ na a?» Bɛ sɔw: «Ʋ kpɛmɛ na. A ʋ pɔwyaa Arasɛl'ɩ ŋan na kparɛ a píir nɩ a bʋʋr waar'ɩ a.»

⁷A Zakɔb lɛb yel: «A zie cãà na ɩ cãà zuo, a dʋn diw-ɓã-taa bɛ ta sɛr ɛ. Nyɩ ƴãw a nyũ a kʋ̃ɔ, ɛ́ nyɩ lɛb kpa a cen nɩ a tɩ 'wɔb a mʋ̃ɔ.»

⁸A pi-cɩ̃ɩnbɛ tɩ sɔw na: «A dʋn za bɛ wa ɓã taa a, tɩ kʋ̃ tʋ̃ɔ́ ɩ. Alɛ wa ɓã taa baar'a n'a bɛ mɩ́ bili a kʋsɩɛr bɛr a bule nʋɔr ƴãw, ɛ́ tɩ ƴãw a dʋn a nyũ.»

⁹A Zakɔb tɩ cãà na ƴɛ̀rɛ nɩ bɛ a lɛn daar a Arasɛl na wa ta n a ʋ sãà dʋn a, pi-cɩ̃ɩnɛ tɩ n'ʋ.

¹⁰A Zakɔb na dɛ wa nyɛ̃ a ʋ mã-dɛb pɔwyaa Arasɛl, nɩ a ʋ mã-dɛb dʋn a, ʋ taw na ta bili a kʋsɩɛr bɛr a bule nʋɔr ƴãw, ɛ́ ƴãw a kʋ̃ɔ a ʋ mã-dɛb dʋn a nyũ.

¹¹A Zakɔb tɩ nyɔw nɩ a Arasɛl weri, ɛ́ kone sìwre.

¹²Ʋ tɩ yel'a kʋ̀ a Arasɛl k'ʋʋ ɩ n a ʋ sãà nɩr kãw, k'ʋʋ ɩ n Erebeka bidɛb. A Arasɛl tɩ zɔ na cen tɩ yel kʋ̀ a ʋ sãà.

¹³A Labã na dɛ wa wõ a ʋ yeepuule bidɛb Zakɔb yele a, ʋ zɔ na tuor'ʋ tɩ nyɔw ʋ weri, ɛ́ tɛr ʋ kul'ɩ a yir. A Zakɔb tɩ man nɩ a lɛ a yele na ɩ a kʋ̀ ʋ.

¹⁴A Labã tɩ yel ʋ na: «Ɩ̃ yir nɩr sɩrɩ nɛ b, zɩ̃ɩ-been n'ɩ tɩ.» A Zakɔb tɩ kpɛ n cuw-ɓil a Labã zie.

¹⁵Bibir kãw, a Labã tɩ yel'ɩ a Zakɔb: «Ɩ̃ nɩr nɛ b, ɛcɛ al ƴãw bɛ n'a fʋ na tone a ɩ̃ tome zawla ɩ. Yel a sã-ya fʋ na bɔbr a kʋ̀ m.»

¹⁶Zɩ̃ k'aa Labã tɩ tɛr'ɩ pɔwyaar ayi. A kpɛ̃ɛ dɩ Leya, ɛ́ a bile dɩ Arasɛl.

¹⁷A Leya jɩ́rʋ ʋ na mɩ́ jɩ́r a bɛ mɩ́ tɩ damnɛ nɩr ɛ, ɛcɛ a Arasɛl ʋl tɩ vɩɛl'ɩ a nyɛ́b nɩ a jɩ́rʋ ƴãw.

¹⁸A Zakɔb tɩ nɔnɛ nɩ a Arasɛl, ɛ́ yel a Labã: «Ɩ̃ na tõ n a fʋ tome yome ayopõi, a fʋ pɔwya-bile Arasɛl kulu ƴãw.»

¹⁹A Labã tɩ sɔw na: «Mãa nɩ̃ɛ de ʋ kʋ̀ b a, alɛ sa ɩ̃ na na de ʋ kʋ̀ nɩ-yũo a. Be a ɩ̃ zie.»

²⁰A Zakɔb tɩ tõ n a Labã tome yome ayopõi, a Arasɛl kulu ƴãw. Ɛcɛ a tɩ ɩ na mɛ̃ bibie blãlɛ n'a a, ʋ na tɩ nɔnɛ a Arasɛl yaga za a ƴãw.

²¹Al pùorí ʋ yel a Labã: «A ɩ̃ tome yome nʋɔr ta na. Kʋ̀ m a ɩ̃ pɔw, ɩ̃ bɔbr'a kɛ́ tɩ lãw taa.»

²²A Labã tɩ bʋɔl'ɩ a be dem za ɓã taa ɛ́ maalɩ cuw-kpɛ̃ɛ.

²³Ɛcɛ a zie na wa sɔb a, ʋ tɛr'ɩ a ʋ pɔwyaa Leya cen nɩ tɩ kʋ̀ a Zakɔb, ʋ páw ʋ.

²⁴A Labã tɩ de nɩ a ʋ tõ-tõ-bi-pɔw Zilipa kʋ̀ a ʋ pɔwyaa Leya, k'ʋʋ tone ʋ.

²⁵A biɓaara a, a Zakɔb tɩ nyɛ̃ na ʋ ɩ Leya[71], ʋ yel a Labã: «Bʋ̃ʋ n'ʋ fʋ ɩ m à à ŋá? Arasɛl ƴãw bɛ n'a ɩ̃ tõ a fʋ tome ɩ? Bʋ̃ʋ n'ʋ so fʋ bɛlɩ mɛ̃?»

²⁶A Labã sɔw: «A tɩ ka a, a bile bɛ dier niwn kule sɩr a kpɛ̃ɛ ƴãw ɛ, a bɛ ɩrɛ a lɛ ɩ.

²⁷Dɩ a kpɛ̃ɛ da-ɓil kul-taa cuw baarɩ, ɛ́ tɩ mɩ̀ na kʋ̀ b'ɩ a bile, a ɩ̃ tome fʋ na na lɛb tõ yome ayopõi a ƴãw.»

²⁸Lɛ n'a a Zakɔb tɩ ɩ. Ʋ tɩ baar'ɩ a Leya da-ɓil kul-taa cuw, ɛ́ a Labã kʋ̀ ʋ a Arasɛl.

²⁹A Labã tɩ de nɩ a ʋ tõ-tõ-bi-pɔw Bilha kʋ̀ a ʋ pɔwyaa Arasɛl, k'ʋʋ tone ʋ.

³⁰A Zakɔb mɩ̀ tɩ páw nɩ a Arasɛl, ɛ́ nɔnɛ ʋ zuo a Leya. Ʋ tɩ tõ n a Labã tome yome ayopõi dɔwlɩ.

³¹A Sore na tɩ nyɛ̃ a Zakɔb ʋ bɛ nɔnɛ a Leya man a Arasɛl a, ʋ kʋ̀ n a Leya dɔwfʋ, ɛ́ a Arasɛl ɩ pɔw-ãan.

³²A Leya tɩ tɛr'ɩ pʋɔ dɔw dɛble por kɛ́ Urubɛn[72]. Bʋ̃ʋ n'ʋ vɛ̃, ʋ tɩ yel'a: «A Sore nyɛ̃ nɩ a ɩ̃ kpɩɛrʋ, ƴɛrɛŋa a, a ɩ̃ sɩr na nɔnɛ mɛ̃ na.»

³³Ʋ tɩ lɛb'a tɛr pʋɔ lɛb dɔw dɛble, ɛ́ yel: «A Sore bãwnɩ a na bɛ na bɛ nɔnɛ mɛ̃ a, ɛ́ lɛb kʋ̀ m bidɛble. Ʋ tɩ por ʋ nɩ Sɩmɩ̃ɔ[73].»

³⁴Ʋ tɩ lɛb'a maal tɛr pʋɔ dɔw a bidɛbli ata sob, ɛ́ yel: «Ƴɛrɛŋa ʋl a, a ɩ̃ sɩr na tu m'a, ɩ̃ na dɔw bidɛbr ata kʋ̀ ʋ a.» Lɛ n'a bɛ tɩ por a ʋ yúor kɛ́ Levi[74].

³⁵Ʋ tɩ lɛb'a tɛr pʋɔ dɔw dɛble, ɛ́ yel: «Ƴɛrɛŋa a, ɩ̃ pãa na danɛ nɩ a Sore.» Alɛ so ʋ por ʋ Zuda[75]. Lɛ n'a ʋ tɩ ŋmãa a dɔwfʋ.