Read Dagara, Northern Yele-za-pɛr-tib 32 Bible Online

Yele-za-pɛr-tib 32 - Dagara, Northern bible

Yele-za-pɛr-tib 32

¹A bio daarɩ́, a Labã tɩ dãwnɩ nɩ ìru weri a ʋ pɔwyaar nɩ a ʋ yan puori bɛ, ʋ tɩ ƴɛ̀r'ɩ nɔ-vla kʋ̀ bɛ, ɛ́ lɛb kul a ʋ tẽw.

²A Zakɔb tɩ cãà na lo a ʋ sɔ́r cere. Naaŋmɩn malkɩ mɩnɛ tɩ tuor'ʋ na.

³A Zakɔb na wa nyɛrɛ bɛ wa báarɛ a, ʋ yel'a: «Naaŋmɩn zɛbr-nɩbɛ nɛbɛ!» Ɛ́ por a zie ʋl kɛ́ Mahanayim.

⁴A Zakɔb tɩ tõ n nɩbɛ a ʋ nidaa, a ʋ yɛb Ezawu zie, a Edɔm kura[89] pʋɔ a Seyiir tẽw.

⁵À ŋá n'a ʋ tɩ ƴɛ̀r a bɛ zie: «À ŋá n'a nyɩ na tɩ ƴɛ̀r a Ezawu zie: “A fʋ tõ-tõ-bie Zakɔb yel kɛ́ tɩ yel à ŋá kʋ̀ b: Ɩ̃ kpɛ n a Labã zie cɛlɩ wa tɔ a ka.

⁶Ɩ̃ tɛr'ɩ nĩi nɩ bòn, píir nɩ bʋʋr, tõ-tõ-bi-dɛbr nɩ tõ-tõ-bi-pɔwbɛ. Ɩ̃ tõ n nɩbɛ kɛ́ bɛ wa yel a yel ŋa kʋ̀ b, ɩ̃ nɩ-kpɛ̃ɛ ɛ, fʋ tʋ̃ɔ́ tɛr pʋ-pɩɛlʋ a ɩ̃ ƴãw”.»

⁷A nɩbɛ a Zakɔb na tɩ tõ a, tɩ lɛb'a wa yel ʋ: «Tɩ cen nɩ a fʋ yɛb Ezawu zie. Ʋ mɩ̀ tuore fʋ na nɩ nɩbɛ kɔbr anaar (400).»

⁸Dɛ̃bɩ̃ɛ tɩ kpɛ n a Zakɔb yaga za, ɛ́ pʋ̀lá vʋ̃ɔ ʋ. Ʋ tɩ põ nɩ a nɩbɛ na be a ʋ zie a ziir ayi, lãwnɩ a píir nɩ a bʋʋr, nɩ a nĩi nɩ a nyɔ̃wmɩ,

⁹ɛ́ yel: «A Ezawu wa ta lo bɛ ŋa zu a, a bɛ ŋa na tʋ̃ɔ́ na zɔ cɩ̃ɛ.»

¹⁰Al pùorí, a Zakɔb puori à ŋá: «Ɩ̃ sãàkʋm Abraham nɩ ɩ̃ sãà Ɩzaakɩ Naaŋmɩn i, fʋ̃ʋ Sore e, fʋ yel mɛ̃ na: “Lɛb kul a fʋ tẽw, a fʋ nɩbɛ zie, ɩ̃ɩ na maalɩ fʋ na.”

¹¹Ɩ̃ bɛ sɛwnɩ a nɔ̃wfʋ nɩ a yel-mɩŋa ɩ-ɩrɩ fʋ na tu n mɛ̃, a mãa fʋ tõ-tõ-bie a ɩ. Bʋ̃ʋ n'ʋ vɛ̃, a ɩ̃ dabɔl yõ n'ʋ ɩ̃ tɩ tɛr gãw nɩ a Zurdɛ̃, ɛ́ wa lɛbr waar tɛr a nɩbɛ nɩ a dʋn ziir ayi á ŋá.

¹²Yãayãa, faa mɛ̃ a ɩ̃ yɛb Ezawu nũú, ɩ̃ zɔrɛ ʋ na, ɩ̃ zɔrɛ nɩ dɛ̃bɩ̃ɛ ʋ na na wa wa kʋ m, lãwnɩ a pɔwbɛ nɩ a bibiir a.

¹³A fʋ̃ʋ a, fʋ yel mɛ̃ na: “Ɩ̃ na maalɩ fʋ nɩ vla. Ɩ̃ na ɩ n a fʋ bʋʋrɛ bɛ yãwmɛ bɛ tɛr sɔ́rʋ, mɛ̃ a kʋ̃ɔ-kpɛ̃ɛ nʋɔr biire a ɩ[90]”.»

¹⁴A Zakɔb tɩ gã nɩ a be a ʋlɩ tɩ̃ɩsɔw nɛ. Ʋ tɩ kaa na ír dʋn a ʋ dʋn pʋɔ, a ʋ yɛb Ezawu ƴãw:

¹⁵bʋʋr kɔbr ayi (200) nɩ bʋrɩ lɩzɛr, pi-nyan kɔbr ayi (200) nɩ pʋ́rɩ lɩzɛr,

¹⁶nyɔ̃wmɩ lɩzɛr'ɩ pie na cãà ƴɛnɛ a bili a, na-nyan lɩz'a ayi nɩ nadɛɛ pie, bòn-nyan lɩzɛr nɩ bòn-daar pie.

¹⁷Ʋ tɩ kʋ̀ n a dʋn tɛɛ tɛɛ a ʋ tõ-tõ-biir ɛ́ yel bɛ: «Nyɩ de m niwn, ɛ́ ŋma voru ƴãw a dʋn cara pʋɔ.»

¹⁸Al pùorí ʋ yel a tõ-tõ-bi-dãw-niwn sob à ŋá: «A ɩ̃ yɛb Ezawu wa tuori fʋ sowre: “Ãa so b? Nyɩnɛ fʋ cere? Ãa so a dʋn á ŋá na de b niwn a?”

¹⁹Fʋ na sɔw na: “A fʋ tõ-tõ-bie Zakɔb so a. Bom'ʋ ʋ tɩr kɛ́ bɛ wa kʋ̀ b, ɩ̃ nɩ-kpɛ̃ɛ Ezawu u, ɛ́ a ʋ mɩŋa be n a tɩ pùorí waar”.»

²⁰A ʋlɩ nɔ-been n'ʋ ʋ tɩ ƴɛ̀r kʋ̀ a tõ-tõ-biir ayi sob, a ata sob nɩ a bɛlɩ dem za na tɩ kparɛ a dʋn a: «À à ŋá n'a nyɩ na ƴɛ̀r a Ezawu zie, nyɩmɛ wa tuor'ʋ a,

²¹ɛ́ nyɩ na yel'a ƴãw pʋɔ: “A fʋ tõ-tõ-bie Zakɔb mɩ̀ waar'ɩ a tɩ pùorí.” Bʋ̃ʋ n'ʋ vɛ̃, a Zakɔb tɩ tɩ́ɛr'ɩ ʋ pʋɔ: Ɩ̃ na ɓãá ʋ nɩ suur nɩ a bʋ̃-kʋ̀rɩ na na de m niwn a, al pùorí ɩ̃ pãa wa a ʋ niŋé, kapaw ʋ na de m'ɩ vla.»

²²Lɛ n'a a dʋn tɩ de niwn cen, ɛ́ a Zakɔb gã a laɩ pʋɔ a ʋlɩ tɩ̃ɩsɔw nɛ.

²³A Zakɔb tɩ ìr'ɩ a tɩ̃ɩsɔw, tɛr a ʋ pɔwbɛ ayi, a ʋ tõ-tõ-bi-pɔwbɛ ayi nɩ a ʋ bibiir pie nɩ been tɩ ƴãw bɛ kpɛ a gãwfʋ zie gãw a Yabɔkɩ bà-fʋɔla, lãwnɩ a ʋ bʋ̃-tɛrɩ za.

²⁵A Zakɔb tɩ cɛ nɩ ʋ yõ, ɛ́ nɩr kãw tɩ mɔ̃ nɩ ʋ a zie tɩ wɛlɛ.

²⁶A sob nɛ na tɩ nyɛ̃ ʋ kʋ̃ tʋ̃ɔ́ a Zakɔb a bɛ mɔb pʋɔ a, ʋ tɩ ŋmɛ ʋ nɩ a kpɩɩlʋ ƴãw, a kpɩɩlʋ háa.

²⁷Ʋ tɩ yel'ɩ a Zakɔb: «A zie wɛlɛ na, bɛr mɛ̃ ɩ̃ cen.» A Zakɔb lɛb yel ʋ: «Ɩ̃ kʋ̃ bɛr fʋ fʋ cen ɛ, fʋ̃ʋ bɛ wa maalɩ mɛ̃ a.»

²⁸A sob nɛ tɩ sowr'ʋ na: «A fʋ yúor dɩ na kɛ́ bo?» Ʋ sɔw: «Zakɔb.»

²⁹A sob nɛ lɛb yel: «Bɛ kʋ̃ cãà bʋɔlɛ fʋ Zakɔb ɛ, bɛ na bʋɔlɛ fʋ nɩ Ɩsɩrayɛl, bʋ̃ʋ n'ʋ vɛ̃, fʋ mɔ̃ nɩ nɩ a Naaŋmɩn nɩ a nɩsaalbɛ, ɛ́ tʋ̃ɔ́.»

³⁰A Zakɔb tɩ yel ʋ na: «Yãayãa, yel a fʋ yúor kʋ̀ m.» Ʋ sɔw: «Bʋnʋ ƴãw n'a fʋ sowre mɛ̃ a ɩ̃ yúor?» Ɛ́ tɩ maal'ʋ a be.

³¹A Zakɔb tɩ por'ɩ a zie nɛ yúor kɛ́ Penɩɛl, a pɛr lɛ kɛ́ “Naaŋmɩn Niwn”. Bʋ̃ʋ n'ʋ vɛ̃, ʋ tɩ yel'a: «Ɩ̃ càar'a nyɛ̃ a Naaŋmɩn ɛ́ cãà vʋʋrɛ[91].»

³²A mʋ̃tɔ̃w tɩ pure nɩ a lɛn daar a Zakɔb na tɩ tu a Penɩɛl gãwfʋ zie gãw a. Ʋ tɩ lore nɩ wɔblʋ a ʋ kpɩɩlʋ na tɩ háa a ƴãw.

³³Alɛ n'a so, wa tɩ tɔ a dɩ̃a a, a Ɩsɩrayɛl nɩbɛ bɛ 'wɔbr a kpɩɩlʋ jiilu ɛ. Bʋ̃ʋ n'ʋ vɛ̃, a jiilu ŋa ƴãw n'a bɛ tɩ ŋmɛ a Zakɔb ƴãw a bàalʋ.