Read Dagara, Northern Yele-za-pɛr-tib 33 Bible Online

Yele-za-pɛr-tib 33 - Dagara, Northern bible

Yele-za-pɛr-tib 33

¹A Zakɔb tɩ jɩ́r'a nyɛ̃ a Ezawu ʋ waar'ɩ a nɩbɛ kɔbr anaar (400). Ʋ tɩ bʋ́r bʋ́r'ɩ a bibiir ƴãw a Leya, a Arasɛl nɩ a tõ-tõ-bi-pɔwbɛ ayi cara pʋɔ.

²Ʋ tɩ ƴãw nɩ a tõ-tõ-bi-pɔwbɛ ayi nɩ a bɛ bibiir a nisɔw, a Leya nɩ a ʋ bibiir tu, a Arasɛl nɩ a Zuzɛb pãa tu.

³A ʋl mɩŋa tɩ de bɛ nɩ niwn. Ʋ tɩ gbĩ n dume gũu tɩ tɔ tẽw gb'a ayopõi, ɛ́ bãw ta a ʋ yɛb zie.

⁴Lɛ n'a a Ezawu tɩ zɔ tuor'ʋ tɩ nyɔw ʋ weri, ɛ́ bɛ za ayi nyɔw kon.

⁵A Ezawu na wa nyɛ̃ a pɔwbɛ nɩ a bibiir a, ʋ sowr'a: «Nɩ-tẽbowle n'ɩ a nɩbɛ bɛ ŋa fʋ na tɛr a?» A Zakɔb sɔw: «A bibiir a Naaŋmɩn na kʋ̀ a mãa fʋ tõ-tõ-bie a nɛbɛ.»

⁶A tõ-tõ-bi-pɔwbɛ nɩ a bɛ bibiir tɩ taw na ta gbĩ dume gũu tɩ tɔ tẽw.

⁷A Leya nɩ a ʋ bibiir mɩ̀ taw ta ɩ a lɛ. Al pùorí, a Zuzɛb nɩ a Arasɛl mɩ̀ ɩ a lɛ.

⁸A Ezawu tɩ sowr'a: «Bʋ̃ʋ n'ʋ fʋ tɩ tɩ́ɛrɛ kɛ́ fʋ ɩ n a dʋn al za ɩ̃ na tuori a?» A Zakɔb sɔw: «Ɩ̃ tɩ bɔbr'a k'ɩ̃ɩ ɓaalɩ fʋ.»

⁹A Ezawu lɛb yel: «Ɩ̃ tɛr'ɩ bome a man mɛ̃, ɩ̃ yɛb i, tɛr a bome fʋ na so a.»

¹⁰A Zakɔb sɔw: «Aɩ, ɩ̃ zɛlɛ fʋ na, a fʋ pʋɔ wa pɛlɩ a ɩ̃ ƴãw a, fʋ̃ʋ sàw de a ɩ̃ nũu bom. Ɩ̃ tuori fʋ na mɛ̃ a Naaŋmɩn n'ʋ ɩ̃ tuori a, fʋ na sàw de m vla za a ƴãw.

¹¹A lɛ pʋɔ a, sàw de a bom ɩ̃ na tõ kɛ́ bɛ wa kʋ̀ b a, bʋ̃ʋ n'ʋ vɛ̃, Naaŋmɩn maalɩ mɛ̃ na, ɩ̃ɩ tɛr'ɩ bom za a man mɛ̃.» A Zakɔb tɩ fɛr ʋ na ʋ wa tɩ sàw de,

¹²ɛ́ yel: «Nyɩ wob ìr tɩ cen! Ɩ̃ na bɩɛlɛ fʋ na.»

¹³Ɛcɛ a Zakɔb tɩ sɔw na: «Ɩ̃ nɩ-kpɛ̃ɛ ɛ, fʋ bãwnɩ a na, a bibiir bɛ tɛr fãw ɛ, ɛ́ a fɛr kɛ́ bɛ maal ɩrɛ a pi-mã mɩnɛ nɩ a na-mã mɩnɛ ƴãw. Fʋ̃ʋ wa yel kɛ́ fʋ ŋmʋr a bibi-been yõ a, a dʋn á ŋá za na kpi na.

¹⁴Ɩ̃ zɛlɛ fʋ na, ɩ̃ nɩ-kpɛ̃ɛ ɛ, kɛ́ fʋ de niwn cere, mãa a, ɩ̃ na cere nɩ bɩɛlbɩɛl manɛ nɩ a dʋn nɩ a bibiir tɩ ta a fʋ zie a Seyiir tẽw.»

¹⁵A Ezawu tɩ yel'a: «Ɩ̃ na bɛr fʋ nɩ a ɩ̃ nɩbɛ ŋmãa na bɩɛlɛ mɛ̃ a.» A Zakɔb sɔw: «Bʋnʋ ƴãw? Fʋ na tuori nyɔw mɛ̃ vla a, a man na.»

¹⁶A Ezawu tɩ lɛb'a lo a Seyiir sɔ́r a ʋlɩ bibir nɛ.

¹⁷A Zakɔb ʋl tɩ cen nɩ Sukotɩ. Ʋ tɩ ŋmãa nɩ yir a be a ʋl mɩŋa ƴãw, ɛ́ maalɩ sɛwr a ʋ dʋn ƴãw. Alɛ so bɛ bʋɔlɛ a zie ʋl kɛ́ Sukotɩ[92], a pɛr lɛ kɛ́ “Sɛwr.”

¹⁸A Zakɔb na tɩ yi a Mezopotami tẽw Saa-zu waar a, ʋ wa ta n Sɩsɛm tẽ-kpɛ̃ɛ na be a Kanãa tẽw a, ɛ́ bom za bɛ ɩ ʋ ɛ. Ʋ tɩ maal'ɩ a ʋ laɩ pɩɛlɩ a tẽ-kpɛ̃ɛ.

¹⁹Hamɔɔr'ʋ tɩ mɛ a Sɩsɛm tẽ-kpɛ̃ɛ ŋa. A Zakɔb tɩ dà n a zie ʋl ʋ na maalɩ a ʋ pɛn-sɛw a, a Hamɔɔr bʋʋrɛ zie. Salm-pla libie kʋba (100) n'a ʋ tɩ dà n[93].

²⁰Ʋ tɩ maal'ɩ bàwr-maal-kuur a be por kɛ́ “Ɛl, a Ɩsɩrayɛl Naaŋmɩn.”