Read Dagara, Northern Yele-za-pɛr-tib 44 Bible Online

Yele-za-pɛr-tib 44 - Dagara, Northern bible

Yele-za-pɛr-tib 44

¹A pùorí, a Zuzɛb tɩ yel'ɩ à ŋá kʋ̀ a ʋ bʋ̃-kaarɛ: «Paalɩ a nɩbɛ bɛ ŋa vʋɔrɩ, kʋ̀ bɛ bʋ̃-dɩrɩ sɛw lɛ za bɛ na na tʋ̃ɔ́ tuo a, ɛ́ lɛb ƴãw ŋa za libie a ʋ vʋɔra nʋɔrɩ́.

²A bɛ yɛ-bil-pʋrɩ vʋɔra pʋɔ a, fʋ na ƴãw nɩ a ɩ̃ salm-pla-koli-nyúura, ɛ́ mɩ̀ lɛb ƴãw ʋ a libie ʋ nãá ya a.» A Zuzɛb bʋ̃-kaarɛ tɩ ɩ n a lɛ ʋ na yel a.

³A bio daarɩ́ a zie na wa nyɛrɛ a, bɛ bɛr'ɩ a nɩbɛ bɛ ŋa nɩ a bɛ bòn bɛ lo a sɔ́r.

⁴Bɛ tɩ yi n a tẽw pʋɔ baarɩ, ɛcɛ bɛ bɛ tɩ cen zãá yaga ɩ, ɛ́ a Zuzɛb yel a ʋ bʋ̃-kaarɛ: «Ìr! Diw bɩɛrɩ a nɩbɛ bɛ ŋa, diw nyɔw bɛ sowri bɛ: “Bʋ̃ʋ n'ʋ so nyɩ maalɩ yel-faa yáa yel-vla san?

⁵Bʋ̃ʋ n'ʋ so nyɩ zu a ɩ̃ nɩ-kpɛ̃ɛ kole ʋ na nyuur'ɩ ɛ́ bãwnɛ nɩ a yele a? À à ŋá nyɩ na ɩ a, a bɛ vɩɛl ɛ”!»

⁶A bʋ̃-kaarɛ tɩ diw na nyɔw bɛ, yel a ƴɛ̀r-bie á ŋá kʋ̀ bɛ.

⁷A Zuzɛb yɛbr tɩ sɔw na: «Bʋ̃-kaarɛ ɛ, ŋmɩŋmɩn za n'a fʋ ƴɛ̀rɛ à à ŋá? Tɩ kʋ̃ tʋ̃ɔ́ sàw maalɩ a yel ŋa tɔ ɩ!

⁸A libie tɩ na tɩ nyɛ̃ a tɩ vʋɔrɩ nɛ́ɛ ƴãw a, tɩ bɛ tɩ yi n nɩ a a Kanãa tẽw lɛb wa kʋ̀ b ɛ? Ŋmɩŋmɩn za n'a tɩ na tʋ̃ɔ́ zu salm-pla bɩɩ salm-zɩɛ a fʋ nɩ-kpɛ̃ɛ yir?

⁹Bɛlɛ wa nyɛ̃ a koli-nyúura ŋa a tɩ kãw tuor pʋɔ a, bɛ kʋ ʋ! Ɛ́ a tɩɩm tɛɛ za na lɩɛb'ɩ a fʋ gbãgbaar.»

¹⁰A bʋ̃-kaarɛ tɩ sɔw na: «A vɩɛl'a! Ɩ̃ sàw nɩ a lɛ nyɩ na yel a. Ɛcɛ a sob nɛ zie bɛ nãà wa nyɛ̃ a koli-nyúura a, ʋlɛ n'ʋ na ɩ a ɩ̃ gbãgbaa, ɛ́ a ŋmaarɛ bɛ ŋa so bɛ tʋɔra.»

¹¹Ŋa za mɩ́ tɩ tow nɩ a ʋ vʋɔra bin fɔ̃wlɛ, ɛ́ yuo.

¹²A bʋ̃-kaarɛ tɩ bɛl bɛl'ɩ a bɛ vʋɔrɩ pʋɔ. A kpɛ̃ɛ zie n'a ʋ tɩ tĩ, ɛ́ tɩ baarɩ a bile zie. Bɛ̃zamɛ vʋɔra pʋɔ n'a bɛ tɩ nyɛ̃ a koli-nyúura.

¹³Lɛ n'a a Zuzɛb yɛbr tɩ taw a bɛ kparɩ cɩɛrɩ. Ŋa za mɩ́ tɩ lɛb'a tuo a vʋɔra a ʋ bõw, ɛ́ bɛ lɛb cen a tẽw pʋɔ.

¹⁴A Zuda nɩ a ʋ yɛbr tɩ ta n a Zuzɛb yir. Ʋ tɩ cãà nɩ be. Bɛ tɩ gbĩ n dume gũu tɩ tɔ tẽw a ʋ niŋé.

¹⁵A Zuzɛb tɩ yel bɛ na: «Bʋ̃ʋ n'ʋ nyɩ ɩ à à ŋá? Nyɩ bɛ bãw k'aa mãa ŋa tɔ mɩ́ tʋ̃ɔ́ na bãw bom za ɩ?»

¹⁶A Zuda tɩ sɔw na: «Tɩ lɛb yel kɛ́ bʋnʋ Eziptɩ tẽw kaarɛ ɛ? Bʋ̃ʋ n'ʋ tɩ na tʋ̃ɔ́ yel wul kɛ́ tɩ bɛ tɛr sãwna? Naaŋmɩn n'ʋ ɩ a tɩ sãwna ʋ sãá. A na ɩ à ŋá a, tɩ na ɩ n a fʋ gbãgbaar, tɩmɛ nɩ a sob nɛ vʋɔra pʋɔ bɛ na nyɛ̃ a koli-nyúura a.»

¹⁷A Zuzɛb tɩ yel'a: «Naaŋmɩn kʋ̃ sàw ɩ̃ ɩ à à ŋá ɩ! A nɩr nɛ zie bɛ na nyɛ̃ a koli-nyúura a, ʋlɛ n'ʋ na ɩ a ɩ̃ gbãgbaa. Nyɩɩm a, nyɩ na tʋ̃ɔ́ lɛb ta a nyɩ sãà zie nɩ ƴã-ɓaarʋ.»

¹⁸A Zuda tɩ taw na ta a Zuzɛb zie yel: «Eziptɩ tẽw kaarɛ ɛ, fʋ̃ʋ nɩ a Faarawɔ̃ za ɩ n been. Sàw ɩ̃ yel bom kãw ɛ́ ta sãw a fʋ suur ɛ.

¹⁹Fʋ̃ʋ n'ʋ sowri tɩ a dãw-niwn sob kɛ́ tɩ cãà na tɛr a tɩ sãà nɩ yɛb ƴen sob ɩ?

²⁰Tɩ sɔw: “Tɩ cãà na tɛr a tɩ sãà-nyãw nɩ yɛ-bile, ʋ na kor baarɩ ɛ́ dɔw a. A tɩ sãà nɔnɛ ʋ nɩ yaga, ʋ na ɩ a ʋ pɔw-nɔna bi-been na cɛ ʋ a ƴãw. A kãw kpi na.”

²¹Ɛ̀ fʋ yel tɩ: “Nyɩ tɛr ʋ wa kʋ̀ m, ɩ̃ bɔbr'a k'ɩ̃ɩ kaarɛ a ʋ zie.”

²²Tɩ sɔw: “A bie ŋa kʋ̃ tʋ̃ɔ́ yi kɛ́ bɛr a ʋ sãà ɩ, ʋlɛ wa yi kɛ́ bɛr ʋ a, a ʋ sãà na kpi na.”

²³Ɛcɛ fʋ tɩ yel tɩ na: “A nyɩ yɛ-bile bɛ wa páw nyɩ wa a, ɩ̃ bɛ nyɛrɛ nyɩ a ɩ̃ niŋé ɩ.”

²⁴Tɩ na tɩ lɛb ta a fʋ tõ-tõ-bie, a tɩ sãà zie a, tɩ yel'ɩ a lɛ fʋ na yel kʋ̀ tɩ a kʋ̀ ʋ.

²⁵Ʋ na wa yel kɛ́ tɩ lɛb wa dà bʋ̃-dɩrɩ a,

²⁶tɩ yel ʋ na: “Tɩ kʋ̃ tʋ̃ɔ́ siw a Eziptɩ a tɩ yɛ-bile bɛ wa pʋɔ a ɩ. Ʋlɛ wa páw tɩ a, tɩ na siw na. Ʋlɛ bɛ wa páw tɩ a, a Eziptɩ tẽw kaarɛ bɛ nyɛrɛ tɩ a ʋ niŋé ɩ.”

²⁷A tɩ sãà sɔw tɩ: “Nyɩ bãwnɩ a na, a ɩ̃ pɔw Arasɛl dɔw nɩ dɛbli ayi tɛwr.

²⁸A kãw bɔr'a. Ɩ̃ tɩ́ɛrɛ kɛ́ wɛ-dʋ̃-faa kãw 'wɔb ʋ na, ɩ̃ na bɛ lɛb nyɛ̃ ʋ wa tɔ dɩ̃a a.

²⁹Ɛ́ nyɩ bɔbr kɛ́ nyɩ mɩ̀ lɛb de à ŋà! Bʋ̃-kãw wa ɩ ʋ a, nyɩmɛ nɛbɛ na so ɩ̃ kpi n pʋ-sãwna, mãa na kor pɛlɩ zu à ŋá a.”

³⁰Eziptɩ tẽw kaarɛ ɛ, ŋmɩŋmɩn n'a ɩ̃ na tʋ̃ɔ́ lɛb ta a fʋ tõ-tõ-bie, a ɩ̃ sãà zie, ɛ́ a bie bɛ páw tɩ? A ɩ̃ sãà nyɔ-vʋʋrʋ nɩ a bie ŋa nyɔ-vʋʋrʋ 'lẽ nɩ taa tɩ zuo,

³¹ʋlɛ bɛ wa nyɛ̃ ʋ ʋ lɛb wa a, ʋ na kpi na. A lɛn daar a, tɩmɛ nɛbɛ na so ʋ kpi n pʋ-sãwna a ʋ koru pʋɔ.

³²Ɛ́ lɛb waar, ɩ̃ yel'ɩ a ɩ̃ sãà niŋé k'ɩ̃ɩ na kaarɛ nɩ a bie zie. Ɩ̃ yel ʋ na: “Mãa bɛ wa tɛr ʋ lɛb wa kʋ̀ b a, ɩ̃ na tɛr'ɩ sãwna a fʋ niŋé kʋralɛ.”

³³Ɩ̃ zɛlɛ fʋ nɩ yãayãa, sàw k'ɩ̃ be a ka, lɩɛrɩ a bie ɩ gbãgbaa tone a fʋ tome, ʋʋ tʋ̃ɔ́ páw a ʋ yɛbr lɛb kul.

³⁴Ŋmɩŋmɩn n'a ɩ̃ na tʋ̃ɔ́ lɛb cen a ɩ̃ sãà zie, a bie bɛ wa páw mɛ̃ a? Ɩ̃ bɛ bɔbr k'ɩ̃ɩ nyɛ̃ a kpɩɛrʋ na na páw a ɩ̃ sãà a ɩ.»