Read Dagara, Northern Yele-za-pɛr-tib 48 Bible Online

Yele-za-pɛr-tib 48 - Dagara, Northern bible

Yele-za-pɛr-tib 48

¹A yele á ŋá pùorí a, bɛ tɩ yel'ɩ a Zuzɛb: «A fʋ sãà ɩ n bàal.» Lɛ n'a a Zuzɛb tɩ tɛr a ʋ bidɛbr bɛ za ayi, a Manase nɩ a Efarayim cen nɩ.

²Bɛ tɩ yel'ɩ a Zakɔb: «A fʋ bidɛb Zuzɛb'ɩ ŋan waar a fʋ nyɛ́b.» A Zakɔb tɩ ƴãw nɩ fãw ìr zɩ̃ a ʋ gado zu.

³Ʋ tɩ yel'ɩ a Zuzɛb: «A Naaŋmɩn kpɛnʋ-za-sob ɩ na k'ɩ̃ nyɛ̃ ʋ a Luuzɩ, a Kanãa tẽw. Ʋ maalɩ mɛ̃ na,

⁴ɛ́ yel mɛ̃: “Ɩ̃ na kʋ̀ b'ɩ bibiir bɛ yãwmɛ yaga, ɛ́ ɩ fʋ ɩ nɩ-bʋʋrɛ na yãwmɛ ɓã taa a sãàkʋm. Ɩ̃ na kʋ̀ n a tẽw ŋa a fʋ bʋʋrɛ bɛ so ʋ kʋralɛ[133]”.»

⁵A Zakɔb tɩ yel'a ƴãw pʋɔ: «A fʋ bidɛbr ayi bɛl na dɔw a Eziptɩ ka, ɩ̃ɩ bãw wa páw fʋ a, mãa so bɛ. Mãa so a Efarayim nɩ a Manase, mɛ̃ a lɛ ɩ̃ na so a Urubɛn nɩ a Sɩmɩ̃ɔ a[134].

⁶Ɛcɛ a bibiir fʋ̃ʋ nãà wa dɔw a bɛ pùorí a, fʋ̃ʋ na so bɛ. A bɛ bɛrɛ ziir pʋɔ n'a bɛ mɩ̀ nãà páw a bɛ dem.

⁷Ɩ̃ na tɩ yi a Mezopotami lɛb waar a, ɩ̃ tɩ cɛ nɩ blã na ta a Efarata, a Kanãa tẽw, ɛ́ a fʋ mã Arasɛl kpi a ɩ̃ nuru pʋɔ a sɔ́r zu[135]. A be n'a ɩ̃ ũù ʋ a sɔ́r nʋɔr, a Efarata, bɛ na bʋɔlɛ ƴɛrɛŋa Bɛtɩlɛm a.»

⁸A Zakɔb tɩ nyɛ̃ nɩ a Zuzɛb bidɛbr ayi, ɛ́ sowri: «Ã-mɩnɛ n'ɩ a bɛ ŋa?»

⁹A Zuzɛb sɔw: «A bibiir a Naaŋmɩn na kʋ̀ m a Eziptɩ ka a nɛbɛ.» A Zakɔb yel: «Tɛr bɛ taw pɩɛl'ɩ mɛ̃, ɩ̃ ƴɛ̀r nɔ-vla ƴãw bɛ.»

¹⁰A Zakɔb tɩ kor'ɩ yaga, a mimie bɛ tɩ cãà maal nyɛrɛ ɩ. A Zuzɛb tɩ ɩ n a ʋ bidɛbr bɛ taw ta. A Zakɔb tɩ nyɔw bɛ na weri ɛ́ fɩɩrɩ tɛr.

¹¹Al pùorí ʋ yel a Zuzɛb: «Ɩ̃ bɛ tɩ tɩ́ɛrɛ k'ɩ̃ɩ na lɛb'a nyɛ̃ a fʋ niwn ɛ, ɛ́ Naaŋmɩn wa sàw ɩ̃ nyɛ̃ a fʋ bibiir tɛɛ za!»

¹²A Zuzɛb tɩ ɓáw nɩ a ʋ bidɛbr a ʋ sãà gbɛ́ɛ zu, ɛ́ gbĩ dume gũu tɩ tɔ tẽw.

¹³Al pùorí ʋ nyɔw a ʋ bidɛbr ayi a nuru ƴãw: a Efarayim na tɩ be a ʋ dʋrʋ lowr a tɩ be n a Zakɔb gʋba lowr, ɛ́ a Manase na tɩ be a ʋ gʋba lowr a, be a Zakɔb dʋrʋ lowr. A Zuzɛb tɩ ɩ na bɛ taw ta a Zakɔb.

¹⁴Ɛcɛ a Zakɔb tɩ garjɩr'ɩ a ʋ nuru: dɔwlɩ a ʋ dʋrʋ nũu a Efarayim na ɩ a bile a zũú, ɛ́ dɔwlɩ a ʋ gʋba nũu a Manase na nɩ̃ɛ ɩ a kpɛ̃ɛ a zũú[136].

¹⁵Ʋ tɩ ƴɛ̀r'ɩ nɔ-vla ƴãw a Zuzɛb yel: «A Naaŋmɩn ʋl niŋé a ɩ̃ sãàkʋm Abraham nɩ a ɩ̃ sãà Ɩzaakɩ na vʋʋrɩ a, a Naaŋmɩn ʋl na ɩ a ɩ̃ cɩ̃ɩnɛ, ɩ̃ na cɔ̃ kɛ́ be wa tɩ tɔ a dɩ̃a a,

¹⁶a malkɩ ʋl na faa mɛ̃ yel-faa za pʋɔ a, ʋ maalɩ a dɛbli bɛ ŋa, k'aa bɛl zũú a, a ɩ̃ yúor tʋ̃ɔ́ pore, mɛ̃ a ɩ̃ sãàkʋm Abraham nɩ a ɩ̃ sãà Ɩzaakɩ dem a! Bɛ yɛ̀r yaga za a tẽw za pʋɔ!»

¹⁷A Zuzɛb tɩ nyɛ̃ na k'aa ʋ sãà dɔwl'ɩ a ʋ dʋrʋ nũu a Efarayim zũú, ɛ́ nʋ̃ɔ̀ bɛ tɩ kpɛ ʋ ɛ. Ʋ tɩ ír'ɩ a ʋ sãà nũu a Efarayim zũú, cen nɩ k'ʋʋ tɩ dɔwlɩ a Manase zũú, ɛ́ yel:

¹⁸«Ɩ̃ sãà a, lɛ bɛ n'a ɩ, ŋa n'ɩ a kpɛ̃ɛ, dɔwlɩ a fʋ dʋrʋ nũu a ʋ zu.»

¹⁹Ɛcɛ a sãà tɩ zawr'a, ɛ́ yel: «Ɩ̃ bãwnɩ a na, ɩ̃ bidɛb i, ɩ̃ bãwnɩ a na. A Manase bʋʋrɛ mɩ̀ na yɛ̀r a tɩ ɩ nɩ-bʋʋr-yaga. Ɛcɛ a ʋ yɛ-bile na ɩ n kpɛ̃ɛ zuo ʋ, ɛ́ a ʋ bʋʋrɛ ɩ tẽ-yaga yaga nɩbɛ.»

²⁰Ʋ tɩ ƴɛ̀r'ɩ nɔ-vla ƴãw bɛ a ʋlɩ bibir nɛ yel: «A nyɩ yée n'a a Ɩsɩrayɛl nɩbɛ na pore ƴɛ̀rɛ nɩ a nɔ-vla ƴãwnɛ taa. Bɛ na yere na: “A Naaŋmɩn, ʋ maalɩ fʋ vla mɛ̃ a lɛ ʋ na maalɩ a Efarayim nɩ a Manase a[137]!”» À ŋá n'a a Zakɔb tɩ ɩ a Efarayim de niwn a Manase ƴãw.

²¹Al pùorí ʋ yel a Zuzɛb: «Ɩ̃ kʋ̃ yaa kɛ́ kpi ɛ, ɛcɛ Naaŋmɩn na be n a nyɩ zie ɛ́ ɩ nyɩ lɛb wa a nyɩ sãàkʋm-kore tẽw.

²²Mãa ƴãw a, ɩ̃ kʋ̀rɛ fʋ na zuo a fʋ yɛbr, ɩ̃ kʋ̀rɛ fʋ nɩ a Sɩsɛm[138] vuo za. Ɩ̃ zɛb'ɩ nɩ a ɩ̃ zɛbr-sɔ-kpɛ̃ɛ nɩ a ɩ̃ tam de ʋ a Amoritɩ mɩnɛ zie.»