Read Dagara, Northern Yele-za-pɛr-tib 49 Bible Online

Yele-za-pɛr-tib 49 - Dagara, Northern bible

Yele-za-pɛr-tib 49

¹A Zakɔb tɩ bʋɔl'ɩ a ʋ bidɛbr wa yel bɛ: «Nyɩ ɓã taa ɩ̃ manɩ a nyɩ nɩdaar yele kʋ̀ nyɩ.

²Nyɩ ɓã taa ɛ́ bɛrɛ wone, Zakɔb bidɛbr i, nyɩ wone a nyɩ sãà Ɩsɩrayɛl ƴɛ̀rʋ.

³Fʋ̃ʋ Urubɛn, fʋ̃ʋ n'ɩ a ɩ̃ bi-dãw, fʋ̃ʋ n'ʋ ɩ̃ de niwn dɔw, a lɛn daar ɩ̃ na tɩ cãà kpɛmɛ kpɛmɛ a. Fʋ tɛr'ɩ ƴãwfʋ nɩ fãw gãw a fʋ yɛbr.

⁴Fʋ ɩ n bà-fʋɔla kʋ̃ɔ na darɛ taa a. Ɛcɛ fʋ kʋ̃ cãà ɩ a dãw-niwn sob ɛ, fʋ ƴãw mɛ̃ nɩ vĩ, fʋ na gã nɩ a ɩ̃ pɔw kãw a ɩ̃ gado zu a[139].

⁵Sɩmɩ̃ɔ nɩ Levi ɩ n yɛbr: a bɛ wõ-taa ɩ n po-to-fãw-ɩb tɛwr ƴãw[140],

⁶ɩ̃ bɛ pʋɔrɛ a bɛ bʋ-taa pʋɔ ɩ, ɩ̃ bɛ pʋɔrɛ a bɛ lãw-zɩma pʋɔ ɩ, bʋ̃ʋ n'ʋ vɛ̃, bɛ kʋ n nɩbɛ a bɛ suur pʋɔ, ɛ́ ƴãw nadɛɛ bàalʋ, a na ɩrɛ bɛ nʋ̃ɔ̀ a ƴãw.

⁷Ɩ̃ ŋmɩɛr'a ƴãwn a bɛ su-faa faa nɩ a bɛ su-yãyaar na bɛ zɔrɛ nɩbaalʋ a! Ɩ̃ na põ nɩ a bɛ bʋʋrɛ yàarɩ a Ɩsɩrayɛl tẽw pʋɔ, ɩ̃ na diw bɛ na yàarɩ a tẽw za pʋɔ.

⁸Zuda a, a fʋ yɛbr na danɛ fʋ na[141]. A fʋ nũu na mɩ́ dĩ nɩ a fʋ dɔ̃ dem nyuru, a fʋ yɛbr tɛɛ za na mɩ́ gbĩ n dume gũu tɩ tɔ tẽw a fʋ niŋé.

⁹Ɩ̃ bidɛb Zuda a, fʋ ɩ n gbẽw-pɔl[142] na 'wɔb a dʋ̃w ʋ na nyɔw, ɛ́ lɛb cere a ʋ gaa-zie a. A gbẽw dɔm'a, ʋ gã na. Ãa n'ʋ na ɩ ʋ ìr?

¹⁰A nãà dabɔl bɛ yire zaarɛ a Zuda yir pʋɔ ɩ, a nɩ-bɛrɛ dabɔl na be n a ʋ bʋʋrɛ nuru pʋɔ, ɛ́ gù a sob nɛ na sɩrɩ so ʋ a, wa wa, a sob nɛ nʋɔr a nɩ-bʋʋrɛ na na sàwr a.

¹¹Ʋ na mɩ́ 'lẽ nɩ a ʋ bõw a divɛ̃ tɩɛ ƴãw, ɛ́ 'lẽ a bõw-bile a divɛ̃ tɩ-vla vla ƴãw. Ʋ na mɩ́ pɛ́w nɩ a ʋ kparʋ a divɛ̃ pʋɔ, ɛ́ pɛ́w a ʋ kpale a divɛ̃ tɩ-wɔmɛ kʋ̃ɔ pʋɔ.

¹²A divɛ̃ na mɩ́ mʋ̃ɔ ʋ nɩ a mimie, ɛ́ a bʋ̀rʋ ɩ a ʋ nyɩmɛ a pɛlɩ[143].

¹³Zabulɔ̃ na kpɩɛr'ɩ a kʋ̃ɔ-kpɛ̃ɛ nʋɔr, be gbee siwfʋ zie na be a. A ʋ tẽw na cen na tɩ tɔ Sɩdɔ̃.

¹⁴Ɩsakaar ɩ n bõw na kpɛmɛ a, ʋ gã nɩ zaw na tɛr dacine ayi a pʋɔ.

¹⁵Ʋ tɩ nyɛ̃ na k'aa zie vɩɛl'a, ɛ́ a tẽw ɩ tẽ-nʋ̃ɔ̀. Ʋ cɔw nɩ a ʋ bawŋman a tuor tuofʋ ƴãw, ʋ sàw nɩ a gbãgba-tome.

¹⁶Dan na dɩ n nɩ a ʋ nɩbɛ a ƴɛ̀rʋ[144] mɛ̃ a Ɩsɩrayɛl dɔwlʋ al na cɛ a.

¹⁷Dan ɩ na mɛ̃ waab a sɔ́r zu a, mɛ̃ dɔpan na gã a sɔ́r nʋɔr a: ʋ dʋ n a wur a gbɛ́rɩ́, a wur zɔmnɛ 'law tɩ lo.

¹⁸Sore e, ɩ̃ tɩ́ɛrɛ na kɛ́ fʋ na faa mɛ̃ na!

¹⁹Nɩ-farbɛ wa n Gadɩ ƴãw, ʋ mɩ̀ ír a bɛ ƴãw, ta tu bɛ.

²⁰Asɛɛr tẽw bʋ̃-dɩrɩ na ʋr a, nãà bʋ̃-dɩ-nʋʋr'a ʋ na mɩ́ tɩr.

²¹Nɛfɩtali ɩ n wal-jãgara na dɔwr bil-vɩɛlɩ a.

²²Zuzɛb ɩ n tɩ-wɔna na bul pɩɛlɩ zie kʋ̃ɔ na bule yire a. A ʋ wuli vo na do gãw a dacin bɛr.

²³Tã-tɛbrbɛ dam'ɩ a ʋ suur, bɛ tɛ n a bɛ pime, bɛ zɛb'ɩ ʋ na.

²⁴Ɛcɛ ʋ fɩɩr'ɩ a ʋ tam tɛr kpɛ̃w za, a ʋ kpãkpamɛ nɩ a ʋ nuru dɔlɛ na ɛ́ gùre vla. A Zakɔb Naaŋmɩn na bɛ tɛr tʋ̃ɔ́fʋ a fãw zũú, fʋ lɩɛb'ɩ pi-cɩ̃ɩnɛ, fʋ ɩ n a Ɩsɩrayɛl pìir.

²⁵A fʋ sãà Naaŋmɩn na ɩ a fʋ sõwne a zũú, a Naaŋmɩn kpɛnʋ-za-sob na maalɛ fʋ a zũú, de a saa na mine a salom zu siwr a maalʋ, a kʋ̃ɔ na gã a tẽsɔw pʋ̃ɔmɩ za a maalʋ, a pɔwbɛ nɩ a dʋn na dɔwr a maalʋ.

²⁶A fʋ sãà nɔ-vla zuo nɩ a dɩta-pɛ-yome za tã-bɛrɛ maalʋ, ʋ zuo nɩ a tãli-kore kore na-bome. A Zuzɛb sãà nɔ-vla, ʋ tu a Zuzɛb, ʋ tu a ʋl na ɩ a ʋ yɛbr nɩ-kpɛ̃ɛ a!

²⁷Bɛ̃zamɛ ɩ n wɛ-baa na mɩ́ dʋ̃ taw cɩɛrɩ a. Ʋ mɩ́ 'wɔb'ɩ dʋ̃w a biɓaara, ɛ́ a zaanʋɔra ʋ pone a bome ʋ na fa a.»

²⁸A bɛ ŋa za nɛbɛ ɩ a Ɩsɩrayɛl dɔwlʋ pie nɩ ayi. A ƴɛ̀rʋ á ŋá n'a a bɛ sãà tɩ ƴɛ̀r ƴãw bɛ, a lɛn daar ʋ na tɩ ƴɛ̀r a nɔ-vla ƴãw bɛ a. Ʋ tɩ ƴɛ̀r'ɩ nɔ-vla kʋ̀ ŋa za mɛ̃ a lɛ a na sɛw taa nɩ ʋ a.

²⁹Al pùorí a Zakɔb yel à ŋá kʋ̀ bɛ: «Mãa wa kpi a, nyɩɩm ũù mɛ̃ a ɩ̃ sãàkʋm-kore yaa pʋɔ. A tãw bɔw na be a Hititɩ dɔɔ Efron púo pʋɔ a n'ʋ,

³⁰ʋ tɩ be n Makɩpela na pɩɛlɩ Mamire, a Kanãa tẽw a. Abraham dà n a púo ŋa a Efron zie, k'aa yaa tʋ̃ɔ́ ɩ a ʋ sób[145].

³¹Be n'a bɛ ũù ʋ ʋlɛ nɩ a ʋ pɔw Saara, ɛ́ mɩ̀ ũù Ɩzaakɩ nɩ a ʋ pɔw Erebeka[146]. Be n'a ɩ̃ ũù a Leya.

³²A púo nɩ a tãw bɔw na be a ʋ pʋɔ a, bɛ dà a nɩ Hititɩ mɩnɛ zie.»

³³A Zakɔb na wa ƴɛ̀r a ʋ ƴɛ̀rʋ kʋ̀ a ʋ bidɛbr baar'a, ʋ lɛb'a gã ɛ́ ŋmãa a vʋʋrʋ, kpi cen tɩ páw a ʋ sãà mɩnɛ.