Read Dagara, Northern Yele-za-pɛr-tib 50 Bible Online

Yele-za-pɛr-tib 50 - Dagara, Northern bible

Yele-za-pɛr-tib 50

¹A Zuzɛb tɩ lo na nyɔw a sãà fɩɩrɩ tɛr, ɛ́ kõ cir a mʋta-kʋ̃ɔ waar'ʋ a niwn.

²Al pùorí, ʋ yel a ʋ dɔwtarɩ kɛ́ bɛ cɔbrɩ a ʋ sãà ƴã-gan a ũufʋ ƴãw. A dɔwtarɩ tɩ cɔbr'ʋ na.

³Mɛ̃ a lɛ a na mɩ́ ɩ a, bibie lɩz'a ayi n'a bɛ tɩ de zɛ a ƴã-gan nɩ kãá-nyuure k'ʋʋ ta sãw ɛ. A Eziptɩ tẽw dem tɩ kõ n a Zakɔb bibie lɩz'a ata nɩ pie.

⁴A kuor na wa baar'a, a Zuzɛb yel'ɩ a Faarawɔ̃ yir dem: «Nyɩmɛ wa nɔnɛ mɛ̃ a, nyɩɩm yãayãa yel à ŋá kʋ̀ a Faarawɔ̃:

⁵“A ɩ̃ sãà na tɩ kpiir a, ʋ ƴãw na ɩ̃ pɔ yel k'ɩ̃ɩ na ũù ʋ nɩ a Kanãa tẽw, a yàa-bɔw ʋl na cɔbrɩ a ʋl mɩŋa ƴãw a pʋɔ.” Ƴɛrɛŋa a, ɩ̃ bɔbr'a k'ɩ̃ɩ cen tɩ ũù a ɩ̃ sãà, al pùorí ɩ̃ lɛb wa.»

⁶A Faarawɔ̃ tɩ ƴãw na bɛ yel a Zuzɛb: «Cen tɩ ũù a fʋ sãà, mɛ̃ a lɛ ʋ na ƴãw fʋ pɔ yel a.»

⁷A Zuzɛb tɩ yi na lo a sɔ́r, ʋlɛ nɩ a Faarawɔ̃ tõ-tõ-bi-bɛrɛ za, a nãà yir nɩ-kore za, de nɩ a Eziptɩ nɩ-kore za.

⁸A ʋ yir dem za, a ʋ yɛbr, nɩ a ʋ sãà yir nɩbɛ bɛl na cɛ a, mɩ̀ tɩ bɩɛlɛ ʋ na. A bibiir nɩ a dʋn tɛwr'a bɛ tɩ bɛr a Gosɛn.

⁹Torkori nɩ wi-zɔmnbɛ mɩ̀ tɩ pʋɔ na, bɛ pãa tɩ tɔ̃w bɛ dɩ vuo ɩ.

¹⁰Bɛ tɩ ta n a Gʋ̀ɔ́ Gbãgbalá, a Zurdɛ̃ gãwn. Bɛ tɩ maal'ɩ ko-kpɛ̃ɛ, ko-tɩbrʋ a be. A Zuzɛb tɩ kõ n a ʋ sãà bibie ayopõi.

¹¹A Kanãa tẽw dem na kpɩɛr a be a tɩ nyɛ̃ nɩ a Gʋ̀ɔ́ Gbãgbalá kuor ɛ́ yel à ŋá: «Ko-tʋlʋ n'ʋ a Eziptɩ tɛr!» Lɛ n'a bɛ tɩ por a Zurdɛ̃ gãwn zie ʋl kɛ́ Abɛl-Mɩsɩrayim, a pɛr lɛ kɛ́ “Eziptɩ kuor.”

¹²A pùorí, a Zakɔb bidɛbr tɩ tu n a lɛ a bɛ sãà na yel kʋ̀ bɛ a:

¹³bɛ tuo nɩ a ʋ kũu cen nɩ a Kanãa tɩ ũù a Makɩpela púo pʋɔ, a tãw bɔw pʋɔ na pɩɛlɩ a Mamire a. A Hititɩ dɔɔ Efron zie n'a a Abraham tɩ dà a púo ŋa, k'ʋʋ tʋ̃ɔ́ so a bɔw[147].

¹⁴A Zuzɛb na tɩ ũù a ʋ sãà baar'a, ʋ lɛb'a cen a Eziptɩ, ʋlɛ nɩ a ʋ yɛbr nɩ a bɛlɩ dem za na tɩ bɩɛlɩ bɛ cen nɩ bɛ tɩ ũù a bɛ sãà a.

¹⁵A bɛ sãà Zakɔb na wa kpi baar'a, a Zuzɛb yɛbr tɩ tɩ́ɛr'ɩ bɛ pʋɔ: «A Zuzɛb taa nãà wa ɩrɛ tɩ mɛ̃ a ʋ dɔ̃ dem a ʋ, ɛ́ yáa a faa al za tɩ na maal'ʋ a san ʋ!»

¹⁶Lɛ n'a bɛ tɩ tõ bɛ tɩ yel à ŋá kʋ̀ a Zuzɛb: «A fʋ sãà na tɩ kpiir a, ʋ yel'ɩ à ŋá:

¹⁷“Nyɩ tɩ ƴɛ̀r à ŋá a Zuzɛb zie: Yãayãa za, dɩ a fʋ yɛbr sãwna suur kʋ̀ bɛ, a faa al za bɛ na maalɩ fʋ a!” Ʋ̃ʋ, dɩ a sãwna ŋa suur kʋ̀ tɩ, tɩɩm na ɩ a fʋ sãà Zakɔb Naaŋmɩn puor-puorbɛ a.» A Zuzɛb na tɩ wõ a ƴɛ̀r-bie á ŋá a, ʋ kõ na.

¹⁸A ʋ yɛbr tɩ wa n a pùorí wa lo gbĩ dume a ʋ pile ɛ́ yel ʋ: «Tɩ ɩ n a fʋ gbãgbaar!»

¹⁹Ɛcɛ a Zuzɛb tɩ yel bɛ na: «Nyɩ ta zɔrɛ dɛ̃bɩ̃ɛ ɩ! Bʋ̃ʋ n'ʋ vɛ̃, ɩ̃ kʋ̃ tʋ̃ɔ́ lɩɛrɩ a Naaŋmɩn ɛ.

²⁰Nyɩ tɩ bɔbr'a kɛ́ nyɩ màl mɛ̃, ɛcɛ Naaŋmɩn bɔbr'a, ɩ vla yi a pʋɔ, ʋ bɔbr'a faa nɩ-yaga yaga nyɔ-vʋʋrʋ, mɛ̃ a lɛ nyɩ na nyɛ̃ a dɩ̃a a.

²¹A na ɩ lɛ a, nyɩ ta tɛr dɛ̃bɩ̃ɛ kãw za ɩ: ɩ̃ na kaarɛ nɩ nyɩɩm nɩ a nyɩ yie dem zie.» Ʋ tɩ mɔwlɩ bɛ na nɩ a nɔ̃wfʋ ƴɛ̀r-bie á ŋá.

²²À ŋá n'a a Zuzɛb nɩ a ʋ sãà yir dem tɩ kpɩɛr a Eziptɩ. A Zuzɛb tɩ vʋʋr'ɩ yome kʋba nɩ pie (110).

²³Ʋ tɩ nyɛ̃ nɩ a ʋ bidɛb Efarayim bibiir nɩ a ʋ yan, ʋ mɩ̀ tɩ de nɩ a Manase bidɛb Makɩɩr bibiir bɛ ɩ a ʋ bibiir.

²⁴A Zuzɛb tɩ yel'ɩ a ʋ yɛbr bibir kãw: «Ɩ̃ na kpi na, ɛcɛ Naaŋmɩn na sõw nyɩ na, a bɛ tɛr à ŋá ɩ. Ʋ na ɩ na nyɩ yi a Eziptɩ, ʋʋ tɛr nyɩ tɩ ta n a tẽw ʋl ʋ na ƴãw nʋɔr k'ʋʋ na kʋ̀ n a Abraham, a Ɩzaakɩ nɩ a Zakɔb a.

²⁵Nyɩ pɔ yel mɛ̃ kɛ́ nyɩ na tuo nɩ a ɩ̃ kũu cen nɩ[148] a Naaŋmɩn wa tõ à à ŋá a nyɩ zie a.»

²⁶A Zuzɛb tɩ kpi n a Eziptɩ, ʋ tɩ tɛr'ɩ yome kʋba nɩ pie (110). Bɛ tɩ zɛ n kãá-nyuure a ʋ ƴã-gan k'ʋʋ ta sãw ɛ, ɛ́ ɓáw ʋ ƴãw kʋsɩɛr daga pʋɔ.