Read Dagara, Northern Yele-za-pɛr-tib 7 Bible Online

Yele-za-pɛr-tib 7 - Dagara, Northern bible

Yele-za-pɛr-tib 7

¹A Sore tɩ yel'ɩ a Nowe: «Kpɛ a gbor-kpɛ̃ɛ pʋɔ, fʋ̃ʋ nɩ a fʋ yir dem za, bʋ̃ʋ n'ʋ vɛ̃, ɩ̃ nyɛ̃ na kɛ́ fʋ̃ʋ yõ n'ʋ ɩ a nɩ-mɩŋa a fʋ daar nɩbɛ pʋɔ.

²A dʋ̃-vɩɛlɩ[17] pʋɔ a, fʋ na de nɩ dʋ̃-pɛ-bʋʋrɛ za pʋɔ dʋn ayiri, bʋ̃-daa nɩ ʋ pɔw, ziir ayopõi. Ɛcɛ a dʋ̃-dɛgɛ pʋɔ a, de bome ayi tɛwr, bʋ̃-daa nɩ ʋ pɔw, a bʋʋrɛ za pʋɔ.

³A lili ƴãw a, mɩ̀ de ayiri, bʋ̃-daa nɩ ʋ pɔw, a bʋʋrɛ za pʋɔ, ziir ayopõi, k'aa bʋʋrɛ tʋ̃ɔ́ cãà a tẽw zu.

⁴Bʋ̃ʋ n'ʋ vɛ̃, ka nɩ bibie ayopõi, ɩ̃ na ɩ na saa wa bibie lɩz'a ayi nɩ tɩ̃ɩsɔwr lɩz'a ayi. Ɩ̃ na ɩ na a bome za ɩ̃ na maalɩ a, a bɔr a tẽw zu.»

⁵A Nowe tɩ ɩ n a lɛ za a Sore na yel kʋ̀ ʋ a.

⁶A Nowe tɩ tɛr'ɩ yome kɔbr ayʋɔb (600) a lɛn daar a Kʋ̃ɔ-paalʋ-kpɛ̃ɛ kʋ̃ɔ na paalɩ pàw a tẽw a.

⁷Ʋ tɩ kpɛ n a gbor-kpɛ̃ɛ pʋɔ, ʋlɛ nɩ a ʋ bidɛbr nɩ a ʋ pɔw nɩ a ʋ biir-pɔwbɛ, k'aa kʋ̃ɔ ta paalɩ pàw bɛ ɩ.

⁸A dʋ̃-vɩɛlɩ, a dʋ̃-dɛgɛ, a lili nɩ bom za na vure tẽw a,

⁹a za tɩ wa n a Nowe zie a gbor-kpɛ̃ɛ pʋɔ, ayiri yiri, bʋ̃-daa nɩ bʋ̃-pɔw, mɛ̃ a lɛ a Naaŋmɩn na tɩ yel kʋ̀ a Nowe a.

¹⁰A bibie ayopõi na wa ta a, a kʋ̃ɔ-paalʋ-kpɛ̃ɛ kʋ̃ɔ tɩ paal'a pàw a tẽw.

¹¹A Nowe yome kɔbr ayʋɔb (600) daar, a cuwr ayi sob, a bibie pie nɩ ayopõi sob daar, a tẽsɔw pʋ̃ɔmɩ kʋ̃ɔnɩ tɩ tɛbr a yire nɩ fãw a bul-nɛ́ɛ za ƴãw, ɛ́ a salom zu kʋ̃ɔnɩ tu-yib-ziir yuo yuo.

¹²A saa tɩ cir'ɩ a tẽw zu bibie lɩz'a ayi nɩ tɩ̃ɩsɔwr lɩz'a ayi.

¹³A ʋlɩ bibir'a a Nowe tɩ kpɛ a gbor-kpɛ̃ɛ pʋɔ nɩ a ʋ pɔw, nɩ a ʋ bidɛbr Sɛ́m, Kam nɩ Zafɛtɩ, nɩ a ʋ biir-pɔwbɛ ata,

¹⁴de nɩ a wɛ-dʋ̃-pɛ-bʋʋrɛ za, a yir dʋ̃-bʋʋrɛ za, a dʋ̃-pʋrpʋr bʋʋrɛ za na vure a tẽw a, a lili-bʋʋrɛ za, bʋ̃-ƴawra za, bʋ̃-pɩgɛ za.

¹⁵A bʋ̃-vʋʋrɩ pɛ-bʋʋrɛ za tɩ wa n bʋ̃-daa nɩ bʋ̃-pɔw a Nowe zie a gbor-kpɛ̃ɛ pʋɔ.

¹⁶Dʋ̃-pɛ-bʋʋrɛ za, bʋ̃-daa nɩ bʋ̃-pɔw, tɩ kpɛ na mɛ̃ a lɛ a Naaŋmɩn na tɩ yel a. Al pùorí, a Sore tɩ nyɔw nɩ a pan pàw a Nowe.

¹⁷A Kʋ̃ɔ-paalʋ-kpɛ̃ɛ kʋ̃ɔ tɩ wa n a tẽw zu bibie lɩz'a ayi. A kʋ̃ɔnɩ tɩ vʋ̃ na tuo a gbor-kpɛ̃ɛ ìr'ɩ, ʋ duwre.

¹⁸A kʋ̃ɔnɩ tɩ paalɛ na dúor, ɛ́ a gbor-kpɛ̃ɛ duwre gʋɔr a kʋ̃ɔnɩ zu.

¹⁹A kʋ̃ɔnɩ tɩ cãà na vʋnɛ dúor tɩ vɔl a tan al na kɛrɩ zuo a tan za a.

²⁰A kʋ̃ɔnɩ tɩ paal'a do pàw a tan, ɛ́ cãà do tɩ gãw mɛtɩr ayopõi.

²¹Bʋ̃-vʋʋra za na damnɛ a tẽw zu a tɩ kpi na: a lili, a yir dʋn, a wɛ-dʋn, a dʋ̃-pʋrmɛ na ƴɔ̃ƴɔ̃wn a tẽw zu a, nɩ nɩsaal za.

²²Bom za na tɩ tɛr nyɔ-vʋʋrʋ ɛ́ be a tẽsɔw-kõw zu a tɩ kpi na.

²³À ŋá n'a a Sore tɩ ɩ bʋ̃-vʋʋra za bɔr a tẽw zu, a nɩsaal, a dʋ̃-bɛrɛ, a dʋ̃-pʋrmɛ nɩ a lili. A tɩ bɔr'ɩ a tẽw zu. A Nowe yõ n'ʋ tɩ cɛ, ʋlɛ nɩ a bɛlɩ dem na tɩ be a gbor-kpɛ̃ɛ pʋɔ a.

²⁴A kʋ̃ɔ tɩ paal'a pàw a tẽw bibie lɩz'a ayopõi nɩ pie (150).