Read Dagara, Northern 2 Samɩɛl 10 Bible Online

2 Samɩɛl 10 - Dagara, Northern bible

2 Samɩɛl 10

¹A bɛ tɩ kɔwrɩ ɛ, ɛ́ a Amɔ̃ tẽw dem nãà, Nahasɩ, kpi, ɛ́ a ʋ bidɛb, Hanun, lɩɛr'ʋ ɩ a nãà.

²Lɛ n'a a Daviir tɩ yel: «Ɩ̃ na ɩ n nɔ̃wfʋ ɩb a Nahasɩ bidɛb zie, mɛ̃ a lɛ a ʋ sãà na ɩ a ɩ̃ zie a.» A Daviir tɩ tõ n a ʋ tõ-tõ-bi-bɛrɛ bɛ mɩnɛ kɛ́ bɛ tɩ puor'ʋ a ʋ sãà kuor yãanɩ. Ɛcɛ a Daviir tõ-tõ-bi-bɛrɛ na tɩ ta a Amɔ̃ tẽw dem zie a,

³a Amɔ̃ tẽw nɩ-bɛrɛ tɩ yel'ɩ a bɛ zu-sob Hanun: «Fʋ tɩɛr k'aa fʋ sãà ƴãwfʋ tɛwr ƴãw n'a, a Daviir tõ tõ-tõ-bi-bɛrɛ kɛ́ bɛ wa puori fʋ a wahala bɩɩ? A tɩ tẽ-kpɛ̃ɛ piwru nɩ a ʋ ŋmɛ-lɔbrʋ ƴãw nɩ̃ɛ bɛ n'a ɩ?»

⁴Lɛ n'a a Hanun tɩ ƴãw bɛ nyɔw a Daviir tõ-tõ-bi-bɛrɛ põ bɛ a tɩɛm lõbowr-gãwn, ŋma bɛ a bʋ̃-suuri a siw ƴãw bɛ a pebinyɛɛ ƴãw, ɛ́ bɛr bɛ bɛ kule.

⁵Bɛ tɩ yel'ɩ a yel ŋa kʋ̀ a Daviir. Ʋ tɩ ƴãw nɩ nɩbɛ bɛ tuori a ʋ tõ-tõ-bi-bɛrɛ, a vĩ na tɩ faar na kʋ a. A nãà tɩ ƴãw na bɛ yel bɛ à ŋá: «Nyɩ kpɩɛr a Zeriko, ɛ́ gù a nyɩ tɩɛm tɩ lɛb bul. A lɛn daar tɛwr'a nyɩ na tʋ̃ɔ́ lɛb wa a ka.»

⁶A Amɔ̃ tẽw dem tɩ nyɛ̃ na k'aa bɛ ɩb ŋa ɩ na a Daviir bɛ cãà nɔnɛ a bɛ yele towtow ɛ. Lɛ n'a bɛ tɩ dà sojarɩ tùr-lɩzɛr (20 000) a Siiri ten Bɛtɩ-Erehovʋ nɩ Sova pʋɔ, sojarɩ túr (1 000) a nãà Maaka sojarɩ pʋɔ, nɩ sojarɩ tùr-pie nɩ ayi (12 000) a Tɔɔvʋ tẽw pʋɔ.

⁷A Daviir na tɩ wõ a a, ʋ tɩ tõ n Zowab nɩ a zɛbr-nɩbɛ za na ɩ gãdaar'a a bɛ ƴãw.

⁸A Amɔ̃ tẽw dem tɩ yi na pɩɛrɩ a zɛbr pɩɛrʋ, a bɛ tẽ-kpɛ̃ɛ dɩ̃dɔr nʋɔr. A Siiri tẽw dem na yi a Sova a, nɩ a Bɛtɩ-Erehovʋ tẽw dem, nɩ a Tɔɔvʋ tẽw nɩ a Maaka sojarɩ tɩ be n bɛ tʋɔra zie a wɩ̀ɛ pʋɔ.

⁹A Zowab tɩ nyɛ̃ na kɛ́ ziir ayi n'a, kɛ́ niŋé nɩ pùorí n'a a fɛr kɛ́ bɛ tuori bɛ. Lɛ n'a ʋ tɩ kaa ír a Ɩsɩrayɛl sojarɩ pʋɔ a soja-vɩɛlɩ zie ƴãw bɛ àr tori a Siiri tẽw dem.

¹⁰Ʋ tɩ de nɩ a zɛbr-nɩbɛ bɛl na cɛ a kʋ̀ a ʋ yɛb Avɩsaɩ, ɛ́ ƴãw bɛ àr tori a Amɔ̃ tẽw dem.

¹¹Ʋ tɩ yel'ɩ a ʋ yɛb à ŋá: «A Siiri tẽw dem wa kpɛmɛ zuo mɛ̃ a, fʋ̃ʋ wa sõw mɛ̃, ɛ́ a Amɔ̃ tẽw dem wa nɛbɛ kpɛmɛ zuo fʋ a, mãa n'ʋ na wa wa sõw fʋ.

¹²Kpɛ socir, tɩ zɛbr'ɩ soci-kpɛ̃w, a tɩ nɩ-bʋʋrɛ nɩ a tɩ Naaŋmɩn tẽ-bɛrɛ ƴãw. Ɛ́ a Sore a, ʋ ɩ lɛ na pɛlɩ a ʋ pʋɔ a.»

¹³A Zowab nɩ a ʋ nɩbɛ tɩ tawr'a pɩɛlɛ kɛ́ bɛ zɛb'ɩ a Siiri tẽw dem. A Siiri tẽw dem tɩ lɩɛb'a zɔ a bɛ niŋé.

¹⁴A Amɔ̃ tẽw dem na tɩ nyɛ̃ a Siiri tẽw dem lɩɛb zɔrɛ a, bɛl tɛɛ za mɩ̀ tɩ lɩɛb'a zɔ a Avɩsaɩ niŋé, lɛb kpɛ a bɛ tẽw. Lɛ n'a a Zowab tɩ bɛr a Amɔ̃ tẽw dem diwfʋ, ɛ́ lɛb wa a Zerizalɛm.

¹⁵A Siiri tẽw dem na tɩ nyɛ̃ k'aa Ɩsɩrayɛl nɩbɛ zɛb'a tʋ̃ɔ́ bɛ a, bɛ tɩ ɓã n a bɛ sojarɩ za taa.

¹⁶A Hadadezɛɛr tɩ tõ n nɩbɛ kɛ́ bɛ tɩ bʋɔlɩ a Siiri tẽw dem bɛl na kpɩɛr a Efaratɩ gãwn a. A Hadadezɛɛr sojarɩ nɩ-kpɛ̃ɛ, Sovakɩ, n'ʋ tɩ de bɛ niwn bɛ wa ta a Helam.

¹⁷Bɛ tɩ yel'ɩ a yel ŋa a kʋ̀ a Daviir. Lɛ n'a ʋ tɩ ɓã a Ɩsɩrayɛl zɛbr-nɩbɛ za taa, lo gãw nɩ a Zurdɛ̃, ta a Helam. A Siiri tẽw dem tɩ pɩɛr'a tori a Daviir ɛ́ zɛbr'ɩ ʋ,

¹⁸ɛcɛ a Ɩsɩrayɛl nɩbɛ tɩ diw bɛ na bɛ zɔ. A Daviir nɩ a ʋ sojarɩ tɩ kʋ n a Siiri tẽw dem wie kɔbr ayopõi (700) na tɩ tawr a zɛbr-torkori a, nɩ soja-wi-zɔmnbɛ tùr-lɩz'a ayi (40 000). Bɛ tɩ ŋmɛ n a zɛbr-nɩbɛ nɩ-kpɛ̃ɛ Sovakɩ ƴãw bàalʋ ʋ kpi a be.

¹⁹A na-mɩnɛ bɛl za a Hadadezɛɛr na tɩ so a na tɩ nyɛ̃ a Ɩsɩrayɛl nɩbɛ zɛb tʋ̃ɔ́ bɛ a, bɛ tɩ ɩ na bɛlɛ nɩ a Ɩsɩrayɛl maalɩ ƴã-ɓaarʋ wõ-taa, ɛ́ bɛ lɩɛbɩ a Ɩsɩrayɛl nɩbɛ tõ-tõ-biir. Lɛ n'a a Siiri tẽw dem tɩ zɔrɛ dɛ̃bɩ̃ɛ a Amɔ̃ tẽw dem lɛb-sõwfʋ ƴãw.