Read Dagara, Northern 2 Samɩɛl 13 Bible Online

2 Samɩɛl 13 - Dagara, Northern bible

2 Samɩɛl 13

¹A yele á ŋá pùorí a, yel ŋa n'ʋ tɩ ɩ: A Daviir bidɛb, Abɩsalɔm, tɩ tɛr'ɩ yeepuule na pɔl bɛ dɩ vuo a, ɛ́ dɩ kɛ́ Tamaar a. A Daviir bidɛb ƴen sob, a Amɩnɔ̃, tɩ nɔnɛ ʋ na.

²A tɩ wone nɩ a Amɩnɔ̃, a ʋ yeepuule Tamaar ƴãw, a tɩ ɩ ʋ bàalʋ. Bʋ̃ʋ n'ʋ vɛ̃, a Tamaar tɩ cãà bɛ páw dɛb sɛr ɛ, ɛ́ a Amɩnɔ̃ nyɛ̃ a Tamaar páwfʋ a kpɛmɛ yaga za.

³A Amɩnɔ̃ tɩ tɛr'ɩ bá, a yúor dɩ kɛ́ Yonadavʋ na tɩ ɩ a Daviir yɛb Simeya bidɛb a. A Yonadavʋ tɩ kpɛ n yã bɛ dɩ vuo ɩ.

⁴A Yonadavʋ tɩ sowr'ɩ a Amɩnɔ̃: «Nãà bie e, bʋ̃ʋ so biɓaara za fʋ mɩ́ sãá nɩr na bàl ʋ za a? Fʋ kʋ̃ tʋ̃ɔ́ yel kʋ̀ m ɛ?» A Amɩnɔ̃ sɔw: «A ɩ̃ yɛb, Abɩsalɔm yeepuule Tamaar'ʋ so, ɩ̃ nɔnɛ ʋ na.»

⁵A Yonadavʋ yel ʋ: «Gã a fʋ gado zu, ɛ́ bãw kɛ́ ɩ bàal. A fʋ sãà wa wa a fʋ nyɛ́b a, fʋ̃ʋ yel ʋ à ŋá: “Sàw a ɩ̃ yeepuule Tamaar wa ɩ bʋ̃-dɩrɩ kʋ̀ m. Ʋ wa ɩ a bʋ̃-dɩrɩ a ɩ̃ mimirí, de a kʋ̀ m ʋl mɩŋa, ɩ̃ dɩ.”»

⁶Lɛ n'a a Amɩnɔ̃ tɩ gã, bãw kɛ́ ɩ a bàal. A nãà na tɩ wa a ʋ nyɛ́b a, ʋ tɩ yel ʋ na: «Sàw a ɩ̃ yeepuule Tamaar wa maalɩ gatori ayi a ɩ̃ mimirí, de a kʋ̀ m ʋl mɩŋa ɩ̃ 'wɔb.»

⁷A Daviir tɩ tõ na bɛ tɩ yel a Tamaar à ŋá: «Cen a fʋ yɛ-dɛb Amɩnɔ̃ zie tɩ ɩ bʋ̃-dɩrɩ kʋ̀ ʋ.»

⁸A Tamaar tɩ cen nɩ a ʋ yɛ-dɛb Amɩnɔ̃ zie tɩ nyɛ̃ ʋ ʋ gã. Ʋ tɩ de nɩ a zɔ̃ naw a Amɩnɔ̃ mimirí, maal'ɩ a gatori ɛ́ cɩ̃ɩ n a bɩ.

⁹Al pùorí, ʋ tɩ de nɩ a gato nɩ a laa maal bin ʋ k'ʋʋ 'wɔb, ɛcɛ ʋ tɩ zawr'a, ɛ́ yel: «Nyɩ ƴãw a nɩbɛ za yi a ka.» A bɛlɩ dem za na tɩ be a ʋ zie be a tɩ ìr'a yi.

¹⁰Lɛ n'a a Amɩnɔ̃ tɩ yel a Tamaar: «Ɓáw a gato á ŋá kpɛ wa n a ɩ̃ di-gana pʋɔ. Be n'a fʋ na tɩ de a kʋ̀ m fʋ mɩŋa, ɩ̃ 'wɔb.» A Tamaar tɩ de nɩ a gato ʋ na maalɩ a, kpɛ n a Amɩnɔ̃ di-gana pʋɔ.

¹¹Ʋ na tɩ de a ture ʋ k'ʋʋ 'wɔb a, ʋ tɩ nyɔw ʋ nɩ a nũu ɛ́ yel ʋ: «Wa gã nɩ mɛ̃, ɩ̃ yeepuule e!»

¹²A Tamaar sɔw ʋ: «Ʋ̃ʋ'hʋ̃! Ɩ̃ yɛ-dɛb i! Ta fɛr gã nɩ mɛ̃ ɩ, bʋ̃ʋ n'ʋ vɛ̃, a lɛ bɛ ɩrɛ a Ɩsɩrayɛl tẽw pʋɔ ɩ. Ta maalɩ a yel-faa ŋa tɔ na bɛ maal'ɩ wob a ɩ!

¹³Nyɩnɛ n'a ɩ̃ na kpɛ n a ɩ̃ vĩ ŋa? Ɛ́ a fʋ̃ʋ a, fʋ na ɩ n nɩ-bɛ-tɛr-bir a Ɩsɩrayɛl nɩbɛ pʋɔ. Nɩ̃ɛ por a yúor kʋ̀ a nãà, ʋ na kʋ̀ b'ɩ sɔ́r fʋ kul mɛ̃.»

¹⁴Ɛcɛ a Amɩnɔ̃ bɛ tɩ bɛr wõ a ʋ dem ɛ. Ʋ tɩ nɛ̃ ʋ na bin nɩ fãw, ɛ́ fɛr gã nɩ ʋ.

¹⁵Al pùorí, a Amɩnɔ̃ tɩ tĩ na hɩ̃ɛn ʋ bɛ dɩ vuo ɩ. A hɛb ʋ na tɩ hɩ̃ɛn ʋ a tɩ zuo nɩ a nɔ̃wfʋ ʋ na tɩ dãw nɔ̃w ʋ a. Ʋ tɩ yel ʋ na: «Ìr, cen tɔl cen!»

¹⁶A Tamaar tɩ sɔw ʋ na: «A lɛ kʋ̃ ɩ ɛ! Fʋ̃ʋ wa diwr mɛ̃ a, a na ɩ n yel-faa kpɛ̃ɛ zuo a ʋl fʋ na maalɩ mɛ̃ a ƴɛrɛŋa a.» Ɛcɛ a Amɩnɔ̃ bɛ lɛb tɩ maal bɛr wõ ʋ ɛ.

¹⁷Ʋ tɩ bʋɔl'ɩ a ʋ tõ-tõ-bi-pɔl kãw wa yel ʋ: «Diw a powle ŋa ʋ yi a ɩ̃ zie ka, ɛ́ fʋ pàw a pan, ɛ́ kpa!»

¹⁸A tõ-tõ-bie tɩ diw ʋ na ʋ yi, ʋʋ kpa a pan. A Tamaar tɩ su n kpar-vla vla kãw, bʋ̃ʋ n'ʋ vɛ̃, lɛ n'a a nãà pɔwyaar na bɛ páw dɛb sɛr a, mɩ́ tɩ su.

¹⁹Ʋ tɩ ŋmɛ n tãpɛlʋ a zu, ɛ́ taw a ʋ kpar-vla vla cɩɛrɩ, ɛ́ tuo nuru zũú, ŋmɩɛr'ɩ cɛlsɩ cere nɩ.

²⁰A ʋ yɛ-dɛb Abɩsalɔm tɩ sowr'ʋ na: «A fʋ yɛ-dɛb Amɩnɔ̃ páw fʋ na bɩɩ? Ɩ gbili ɩ̃ yeepuule e! Ta cãà tɩɛrɛ a ɩ, fʋ yɛ-dɛb'ʋ.» Lɛ n'a a Tamaar tɩ kpɩɛr a ʋ yɛ-dɛb Abɩsalɔm yir, mɛ̃ pɔw-zawr-bɛra a.

²¹A nãà Daviir tɩ wõ n a yel ŋa, nyɛ̃ suur bɛ dɩ vuo ɩ.

²²A Abɩsalɔm tɩ hɩ̃ɛn nɩ a ʋ yɛb, Amɩnɔ̃, bɛ tɩ cãà ƴɛ̀rɛ ƴɛ̀rʋ sɔwr ʋ ɛ, ʋ na tɩ fɛr gã nɩ a ʋ yeepuule Tamaar a ƴãw.

²³Yome ayi pùorí, bɛ tɩ ŋmarɛ nɩ a Abɩsalɔm píir kɔblʋ a Baal-Hasɔɔr na pɩɛlɩ a Efarayim a. A Abɩsalɔm tɩ bʋɔl'ɩ a nãà bidɛbr za a be.

²⁴A Abɩsalɔm tɩ cen na tɩ páw a nãà Daviir yel ʋ à ŋá: «Bɛ ŋmarɛ nɩ a ɩ̃ píir kɔblʋ. Sàw wa a cuw ŋa, fʋ̃ʋ nɩ a fʋ tõ-tõ-bi-bɛrɛ.»

²⁵A nãà tɩ sɔw na: «Ʋ̃ʋ'hʋ̃ ɩ̃ bie e! Tɩ za kʋ̃ tʋ̃ɔ́ wa ɩ, a tɩ tɛrʋ na kpɛmɛ nɩ a fʋ zie.» A Abɩsalɔm tɩ fɛrɛ ʋ na, ɛcɛ a nãà tɩ zawr'a, ɛ́ ƴɛ̀r nɔ-vla kʋ̀ ʋ.

²⁶A Abɩsalɔm tɩ lɛb'a yel ʋ: «Fʋ na zawrɩ a, fʋ̃ʋ sàw a ɩ̃ yɛb Amɩnɔ̃ bɩɛlɩ mɛ̃.» A nãà yel: «Bʋnʋ ƴãw n'a ʋ na bɩɛlɩ fʋ?»

²⁷A Abɩsalɔm tɩ cãà na zɛlɛ lɛɛɛ, a nãà tɩ sàw k'aa ʋ bidɛb Amɩnɔ̃ nɩ a nãà bidɛbr bɛl na cɛ a páw a Abɩsalɔm bɛ cen.

²⁸Al pùorí, ʋ tɩ yel'ɩ a ʋ tõ-tõ-biir à ŋá: «Nyɩ piwre a Amɩnɔ̃ vla! A divɛ̃ wa ɩ nʋ̃ɔ̀ kpɩɛr ʋ a, ɩ̃ na yel nyɩ na: “Nyɩ ŋmɛ a Amɩnɔ̃!”, nyɩ ŋmɛ ʋ kʋ a lɛn daar. Nyɩ ta zɔrɛ dɛ̃bɩ̃ɛ ɩ, mãa n'ʋ yel kɛ́ nyɩ ɩ a lɛ. Nyɩ kpɛ socir, ɛ́ wul kɛ́ dɛbr n'ɩ nyɩ!»

²⁹A Abɩsalɔm tõ-tõ-biir tɩ kʋ n a Amɩnɔ̃ mɛ̃ a lɛ a Abɩsalɔm na tɩ yel kʋ̀ bɛ a. A nãà bidɛbr za tɩ ìr'a, ŋa mɩ́ ƴaw zɔm a ʋ mílɛ̀[21] bɛ zɔ bɛ za.

³⁰Bɛ tɩ cãà nɩ a sɔ́r zu, a lɛn daar a Daviir na tɩ wõ a yel ŋa a: «Abɩsalɔm kʋ n a fʋ bidɛbr za. Been bɛ cɛ ɩ.»

³¹Lɛ n'a a nãà tɩ taw a ʋ kparɩ cɩɛrɩ, ɛ́ gã tẽw. A ʋ tõ-tõ-bi-bɛrɛ za tɩ àr'a viiri koli ʋ, a bɛ kparɩ mɩ̀ cɩɛrɩ cɩɛrɩ.

³²Ɛcɛ a Daviir yɛb, Simeya bidɛb, Yonadavʋ, tɩ de nɩ a ƴɛ̀rʋ yel: «Nãà a, ta sàw k'aa fʋ bidɛbr za kpi na ɩ. Amɩnɔ̃ yõ n'ʋ kpi. A ʋlɩ daar nɛ za a Amɩnɔ̃ na tɩ fɛr gã nɩ a Abɩsalɔm yeepuule Tamaar a n'a a Abɩsalɔm tɩ yel k'ʋʋ na ɩ n à à ŋá.

³³Lɛ so, ta tɩɛrɛ k'aa fʋ bidɛbr za kpi na ɩ, a Amɩnɔ̃ yõ n'ʋ kpi,

³⁴ɛ́ a Abɩsalɔm zɔ.» A pɔlbile na tɩ piwre a zie a, tɩ zɛw nɩ zu nyɛ̃ nɩ-yaga na lo Horonayim sɔ́r a tãw sɩɛ ƴãw siwr a. Ʋ tɩ cen na tɩ yel a nãà à ŋá: «Ɩ̃ nyɛ̃ nɩ nɩbɛ bɛ lo a Horonayim sɔ́r, yi a tãw sɩɛ ƴãw waar.»

³⁵Lɛ n'a a Yonadavʋ tɩ yel a nãà: «A nãà bidɛbr nɛbɛ tarɛ! A yele za tu na, mɛ̃ a lɛ ɩ̃ na yel kʋ̀ b a.»

³⁶A ʋ ƴɛ̀rʋ bɛ tɩ lo tẽw sɛr ɛ, ɛ́ a nãà bidɛbr zɔ ta. Bɛ tɩ vaa nɩ kɔkɔr kone. A nãà nɩ a ʋ tõ-tõ-bi-bɛrɛ mɩ̀ tɩ kõ n yaga za.

³⁷A Abɩsalɔm tɩ zɔ na cen Gesuur[22] tẽw nãà, Amihuur bidɛb, Talmaɩ[23] zie, tɩ kpɛ a be yome ata. A Daviir ʋl a, ʋ tɩ kõ n a ʋ bidɛb Amɩnɔ̃ kuor a lɛn daar za.

³⁹Ɛcɛ a Amɩnɔ̃ kũu kpɩɛrʋ na wa tɩ baarɩ a Daviir zie a, a ʋ suur mɩ̀ tɩ ɓãá nɩ a Abɩsalɔm ƴãw.