Read Dagara, Northern 2 Samɩɛl 21 Bible Online

2 Samɩɛl 21 - Dagara, Northern bible

2 Samɩɛl 21

¹A Daviir naalʋ-dɩb daar, kɔ̃ tɩ lo n yome ata tu taa. A Daviir tɩ sowr'ɩ a Sore, ʋ sɔw ʋ à ŋá: «A Sawul nɩ a ʋ yir dem nɩ-kʋ yele n'a so, bɛ na kʋ a Gabaɔ̃ tẽw dem a ƴãw.»

²A nãà tɩ bʋɔl'ɩ a Gabaɔ̃ tẽw dem ɓã taa, k'ʋʋ ƴɛ̀r sɔw bɛ. A Gabaɔ̃ tẽw dem bɛ tɩ ɩ Ɩsɩrayɛl nɩbɛ ɩ, ɛcɛ bɛ tɩ ɩ n a Amɔ̃ tẽw dem na cɛ a bʋʋrɛ. A Ɩsɩrayɛl nɩbɛ tɩ pɔ na kɛ́ bɛ na bɛr bɛ na bɛ vʋʋrɛ[34]. Ɛcɛ a Sawul tɩ bɔbr'a k'ʋʋ kʋ bɛ pàw pɛr, ʋ na tɩ nɔnɛ a Ɩsɩrayɛl nɩ a Zuda nɩbɛ zuo a ƴãw.

³A Daviir tɩ sowr'ɩ a Gabaɔ̃ tẽw dem: «Bʋ̃ʋ n'ʋ a fɛr k'ɩ̃ɩ ɩ a nyɩ ƴãw? Ŋmɩŋmɩn n'a ɩ̃ na ɩ maalɩ a faa bɛ na ɩ nyɩ a san ƴãw, kɛ̀ nyɩ tʋ̃ɔ́ ƴɛ̀r nɔ-vla kʋ̀ a nɩ-bʋʋrɛ a Naaŋmɩn na so a?»

⁴A Gabaɔ̃ tẽw dem tɩ sɔw ʋ na: «A yel na be tɩɩm nɩ a Sawul, nɩ a ʋ yir nɩbɛ cara pʋɔ a, salm-zɩɛ bɩɩ salm-pla bɩɩ Ɩsɩrayɛl nɩr bɛ na kʋ a, kʋ̃ tʋ̃ɔ́ maalɩ ʋ ƴãw ɛ.» A Daviir lɛb yel bɛ: «Nyɩ yel a bom nɛ nyɩ na bɔbr a, ɩ̃ɩ na ɩ ʋ na kʋ̀ nyɩ.»

⁵A Gabaɔ̃ tẽw dem tɩ yel ʋ na: «A Sawul tɩ bɔbr'a k'aa tɩ yele baarɩ, ʋ tɩ bɔbr'a k'ʋʋ kʋ tɩ pàw pɛr ta bɛr tɩ been kãw za ʋ cãà be a Ɩsɩrayɛl tẽw za zu ɛ.

⁶Bɛ kʋ̀ tɩ a ʋ bʋʋrɛ nɩbɛ ayopõi, ɛ́ tɩ na yawlɩ bɛ na kʋ a Sore niŋé, a Givea, na ɩ a nãà Sawul a Sore na kaa ír a, tẽ-kpɩɛra a.» A nãà tɩ yel'a: «Ɩ̃ na nyɔw bɛ na kʋ̀ nyɩ.»

⁷Ɛcɛ a Daviir nɩ a Zonatã na tɩ pɔ a Sore yúor ƴãw, báalɛ taa a zũú a, a Daviir tɩ jɩɩr'ɩ a Zonatã bidɛb, Mefibosɛtɩ, na ɩ a Sawul yãw a bɛr.

⁸Ɛcɛ ʋ tɩ de nɩ Armoni nɩ Mefibosɛtɩ na tɩ ɩ a Aya pɔwyaa, Irisipa, bidɛbr ayi ʋ na tɩ dɔw kʋ̀ a Sawul a, nɩ a Sawul pɔwyaa Mɩkal bidɛbr anũu, ʋ na tɩ dɔw kʋ̀ a Mehola tẽw Barzilaɩ bidɛb Adɩrɩɛl a.

⁹Ʋ tɩ de bɛ na ƴãw a Gabaɔ̃ tẽw dem nuru pʋɔ, bɛ yawlɩ bɛ kʋ a tãw zu, a Sore niŋé. Bɛ za ayopõi tɩ lãw na kpi. A ɔɔzʋ deb daar[35] bibi-dãw-niwn sob daar'a bɛ tɩ kʋ bɛ.

¹⁰A Aya pɔwyaa, Irisipa, tɩ de nɩ ko-tuolu pɛn ʋ na suur a, yɛ̀r a pìir zu, ɛ́ be a be a bʋ̃-dieri-deb daar za, ɛ́ gù a saa tɩ wa ƴãw a kũuni. A mʋ̃tɔ̃w a, ʋ bɛ mɩ́ tɩ sàw a lili na dɔm a kũuni zu ɛ, ɛ́ a tɩ̃ɩsɔw ʋ bɛ bɛrɛ a wɛ-dʋ̃-faar pɩɛlɛ a ɩ.

¹¹Bɛ tɩ yel'ɩ à à ŋá a Aya pɔwyaa, Irisipa, na ɩ a Sawul pɔw-bile a, na tɩ ɩ a, kʋ̀ a Daviir.

¹²Lɛ n'a a Daviir tɩ cen tɩ de a Sawul nɩ a ʋ bidɛb Zonatã kɔbɛ[36], a Yavɛsɩ na be Galaadɩ tẽw a nɩbɛ zie. Bʋ̃ʋ n'ʋ vɛ̃, a ʋlɩ bibir a Filisɩtɛ̃ mɩnɛ na tɩ kʋ a Sawul a Gilbowa a, bɛ tɩ yawl'ɩ a Sawul nɩ a ʋ bidɛb kũuni a Bɛtɩ-Sean tẽw nɩbɛ tuor-taa zie. Be n'a a Yavɛsɩ na be a Galaadɩ tẽw a nɩbɛ tɩ cen tɩ zu a kũuni bɛ ŋa.

¹³A Daviir tɩ de nɩ a Sawul nɩ a Zonatã kɔbɛ a Yavɛsɩ cen nɩ. Al pùorí bɛ wob a nɩbɛ ayopõi bɛl bɛ na yawlɩ a kɔbɛ ɓã taa,

¹⁴cen nɩ tɩ lãwnɩ a Sawul nɩ a Zonatã kɔbɛ, ũù a Sawul sãà Kisɩ yaa pʋɔ a Sela, Bɛ̃zamɛ tẽw pʋɔ. Bɛ na tɩ ɩ a lɛ za a nãà na yel a baar'a, a Naaŋmɩn tɩ lɛb'a wul a ʋ nɔ̃wfʋ a tẽw.

¹⁵Zɛbr tɩ lɛb'a ír a Filisɩtɛ̃ mɩnɛ nɩ a Ɩsɩrayɛl nɩbɛ cará. A Daviir nɩ a ʋ sojarɩ tɩ siw na tɩ zɛb'ɩ a Filisɩtɛ̃ mɩnɛ. Bɛ wa bere na a Daviir bàl ʋ za.

¹⁶Harafa bʋʋrɛ kãw, Yisibi-Be-nɔvʋ, tɩ yel'a k'ʋʋ na kʋ n a Daviir. Ʋ tɩ sɛ n zɛbr-sɔ-kpɛ̃ɛ-paala a sɩɛmɩ́, ɛ́ a ʋ kafin nɔ-mɩɩlʋ na ɩ kur-zɩɛ a, tɩbrɛ zuo kilo[37] ata.

¹⁷Ɛcɛ Avɩsaɩ, a mã na tɩ dɩ kɛ́ Seruya a, tɩ sõw nɩ a nãà kʋ a Filisɩtɛ̃ dɔɔ. Lɛ n'a a sojarɩ tɩ ƴãw a Daviir pɔ, k'ʋʋ kʋ̃ lɛb páw bɛ yi a zɛbr ɛ, a naalʋ-dɩb taa báarɛ a Ɩsɩrayɛl tẽw ɛ.

¹⁸A pùorí, a Ɩsɩrayɛl nɩbɛ tɩ lɛb'a zɛb'ɩ a Filisɩtɛ̃ mɩnɛ Gɔvʋ tẽw. A be n'a a Husa tẽw Sibekaɩ tɩ kʋ a Safʋ, a Harafa bʋʋrɛ nɩr kãw.

¹⁹A Ɩsɩrayɛl nɩbɛ nɩ a Filisɩtɛ̃ mɩnɛ zɛbr kãw pʋɔ, a Gɔvʋ tẽw lɛb maal lɛ, a Bɛtɩlɛm tẽw Yaare-Oregim bidɛb, Ɛlhanan, tɩ kʋ n a Gatɩ tẽw Golɩatɩ, a kafin dàa na tɩ bɛrmɛ sɛw a pɛn-wobre dà-gbiwligi a.

²⁰Zɛbr kãw tɩ lɛb'a ír a Gatɩ tẽw. Gãdaa kãw tɩ be n be tɛr nobie ayʋɔb a nũu za ƴãw, nɩ gbɛbie ayʋɔb a gbɛ́r za ƴãw, a za ɓã taa ɩ lɩzɛr'ɩ anaar. A Harafa bʋʋrɛ nɩr kãw mɩ̀ tɩ n'ʋ.

²¹Ʋ tɩ pɔrɛ na ciere nɩ a Ɩsɩrayɛl nɩbɛ. Lɛ n'a a Simeya bidɛb, Yehonatan, tɩ ŋmɛ ʋ kʋ. A Simeya tɩ ɩ n a Daviir yɛb.

²²A nɩbɛ anaar bɛ ŋa tɩ ɩ n a Gatɩ tẽw Harafa bʋʋrɛ, ɛ́ a Daviir nɩ a ʋ sojarɩ tɩ kʋ bɛ.