Read Dagara, Northern 2 Samɩɛl 6 Bible Online

2 Samɩɛl 6 - Dagara, Northern bible

2 Samɩɛl 6

¹A Daviir tɩ lɛb'a ɓã a Ɩsɩrayɛl soja-gãdaar taa a. Bɛ tɩ ɩ n nɩbɛ tur lɩzɛr'ɩ pie (30 000).

²A zɛbr-nɩbɛ bɛ ŋa nɛbɛ a Daviir tɩ ìr lo n a Baala na be Zuda tẽw a sɔ́r, k'ʋʋ tɩ ɓáw a Naaŋmɩn wõ-taa daga do wa n, a daga ŋa zu yúor na bʋɔlɩ ƴãw a, a Sore, a Kpɛnʋ-za-sob na zɩ̃ a seribɛ̃ mɩnɛ zu-sɔw a, yúor.

³A wõ-taa daga tɩ be n a Abinadab yir, a tãw zu. Bɛ tɩ ɓáw ʋ na dɔwlɩ torko-paala zu waar'ɩ. A Abinadab bidɛbr, Uza nɩ Ahio, nɛbɛ tɩ tawr a torko.

⁴A ʋ zu n'a bɛ tɩ dɔwlɩ a wõ-taa daga, ɛ́ a Ahio tɩ de a niwn.

⁵A Daviir nɩ a Ɩsɩrayɛl nɩbɛ za tɩ ŋmɩɛr'ɩ bʋ̃-ŋmɩɛrɩ pɛ-bʋʋrɛ za, wule nɩ a bɛ nʋ̃ɔ̀ a Sore niŋé. Sɩpɩrɛ dàar bʋ̃-ŋmɩɛrɩ pɛ-bʋʋrɛ za tɩ n'a: korijom, pɛ̀nɛ́, dà'larɩ, nɩ sɛ̃sɛgɛ nɩ bʋ̃-ŋmɩɛrɩ a mɩnɛ.

⁶Bɛ na tɩ tarɛ a Nakon ble vab gbãgbalá a, a nĩi tɩ faar'a na ɩ a wõ-taa daga ʋ lo. A Uza tɩ dɔl'ɩ a nũu tɩɛ ʋ tɛr.

⁷Lɛ n'a a Sore suur tɩ ìr a Uza ƴãw: ʋ tɩ ŋmɛ ʋ nɩ a ʋ dãbol-ɩb[12] ŋa ƴãw, ʋ lo kpi, gã a be pɩɛlɩ a wõ-taa daga.

⁸A tɩ dam'ɩ a Daviir, ʋ na tɩ nyɛ̃ k'aa Sore ŋmɛ n a Uza ʋ kpi a. Ʋ tɩ por'ɩ a zie nɛ yúor kɛ́ Perɛsɩ-Uza, a yúor ŋa cãà na nɩ dɩ̃a.

⁹A ʋlɩ bibir nɛ a, a Daviir tɩ zɔ n a Sore dɛ̃bɩ̃ɛ ɛ́ yel à ŋá: «Ɩ̃ kʋ̃ tʋ̃ɔ́ de a Sore wõ-taa daga a ɩ̃ yir ɛ!»

¹⁰Lɛ n'a ʋ bɛ tɩ cãà sàw bɛ cen nɩ a wõ-taa daga a ʋ yir, a Daviir Tẽ-kpɛ̃ɛ pʋɔ ɩ, ɛ́ ƴãw bɛ cen nɩ ʋ tɩ bin Ovɛdɩ-Edɔm na ɩ Gatɩ tẽw nɩr kãw a yir.

¹¹À ŋá n'a a Sore wõ-taa daga tɩ be a Gatɩ tẽw Ovɛdɩ-Edɔm yir, tɩ maalɩ cuwr ata, ɛ́ a Sore maalɩ a Ovɛdɩ-Edɔm nɩ a ʋ yir dem za.

¹²Bɛ tɩ wa na wa yel a nãà Daviir à ŋá: «A Sore maal'ɩ a Ovɛdɩ-Edɔm yir, nɩ a ʋ bome za, a Naaŋmɩn wõ-taa daga ƴãw.» Lɛ n'a a Daviir tɩ cen tɩ ɓáw a Naaŋmɩn wõ-taa daga, a Ovɛdɩ-Edɔm yir, bɛ cɔrɩ ŋmɩɛr'ɩ nʋ̃ɔ̀ cɛlsɩ dúor'ɩ a Daviir Tẽ-kpɛ̃ɛ́.

¹³A wõ-taa daga tuor-tuorbɛ na wa gel gbɛ́r gb'a ayʋɔb a, a Daviir tɩ kʋ n nadɛr nɩ nadeli-'wɔr, maal'ɩ bàwr.

¹⁴Al pùorí, ʋ ƴaw bɩnɛ nɩ a ʋ fãw za, a Sore ƴãw. A bàwr-maalbɛ lɛ̃ pɛn gãw yõ n'ʋ ʋ tɩ sɛ.

¹⁵A Daviir nɩ a Ɩsɩrayɛl nɩbɛ tɩ tɛr'ɩ a Sore wõ-taa daga ŋmɩɛr'ɩ nʋ̃ɔ̀ cɛlsɩ, pɛlblɛ nɩ wɩɩr dúor'ɩ a Zerizalɛm.

¹⁶A Sore wõ-taa daga na tɩ kpɩɛr a Daviir Tẽ-kpɛ̃ɛ pʋɔ a, a Sawul pɔwyaa, Mɩkal, tɩ vuol'ɩ a tokoro vʋɔr ƴãw nyɛ̃ a Daviir na ƴawr viire a Sore niŋé a, lɛ n'a ʋ tɩ jewr'ʋ nɩ ʋ pʋɔ za.

¹⁷Bɛ tɩ wa n nɩ a wõ-taa daga wa bin a zie ʋl bɛ na tɩ cɔbrɩ a ʋ ƴãw a, a pɛn-sɛw ʋl pʋɔ a Daviir na tɩ ƴãw bɛ maalɩ a ʋ ƴãw a. Al pùorí, a Daviir tɩ maal'ɩ nyɩw-a-za-bagɛ nɩ ƴã-ɓaarʋ bagɛ kʋ̀ a Sore.

¹⁸Ʋ na tɩ maalɩ a bagɛ baar'a, ʋ tɩ ƴɛ̀r'ɩ nɔ-vla kʋ̀ a nɩbɛ, a Sore, a Kpɛnʋ-za-sob, yúor ƴãw.

¹⁹Al pùorí, ʋ tɩ ƴãw na bɛ põ bʋ̃-dɩrɩ a Ɩsɩrayɛl nɩbɛ za. Dɛb za nɩ pɔw za tɩ páw nɩ dipɛ̃, tɩɛ kãw bɛ na bʋɔlɛ datie a, wɔmɛ gato been, de nɩ divɛ̃ tɩ-wɔ̃-kon gato been. Al pùorí, ŋa za tɩ lɛb'a kul a ʋ yir.

²⁰A Daviir tɩ kpɛ na k'ʋʋ tɩ puori a ʋ nɩbɛ. Ɛcɛ a Mɩkal tɩ yi na tuor'ʋ yel ʋ à ŋá: «Nyɛ̃ yúor a Ɩsɩrayɛl nãà na páw a dɩ̃a, a lɛn daar ʋ na tɩ ɩ ƴã-gã-kpãkpol a ʋ tõ-tõ-biir tõ-tõ-bi-pɔwbɛ jɩ́rɛ, mɛ̃ nɩr na bɛ tɛr pɛr a!»

²¹A Daviir tɩ sɔw ʋ na: «A Sore ƴãw n'a ɩ̃ ɩ a lɛ, ʋl na kaa ír mɛ̃, ƴãw ɩ̃ ɩ a ʋ nɩ-bʋʋrɛ Ɩsɩrayɛl nɩ-kpɛ̃ɛ, ɛ́ bɛr a fʋ sãà nɩ a ʋ yir za a. Ɩ̃ na cãà na lɛb wul ʋ a ɩ̃ nʋ̃ɔ̀.

²²Ɩ̃ na cãà na siwri ɩ̃ tʋɔra, siwr'ɩ ɩ̃ tʋɔra a mãa mɩŋa niŋé, ɛcɛ, a tõ-tõ-bi-pɔwbɛ bɛl ƴɛ̀rʋ fʋ na ƴɛ̀rɛ a, ɩ̃ na cãà na nyɛ̃ ƴãwfʋ a bɛ zie.»

²³A Sawul pɔwyaa, Mɩkal, bɛ tɩ dɔw bie ɩ, ɛ́ tɩ kpi.