Read Dagara, Northern 1 Na-mɩnɛ 12 Bible Online

1 Na-mɩnɛ 12 - Dagara, Northern bible

1 Na-mɩnɛ 12

¹A Orobowam tɩ cen nɩ Sɩsɛm[24], bʋ̃ʋ n'ʋ vɛ̃, be n'a a Ɩsɩrayɛl nɩbɛ dɔwlʋ al na kpɩɛr a Saa-pɛrɩ́-gʋba-lowr a, tɩ wa kɛ́ bɛ wa zɩɩlɩ ʋ, ʋ ɩ a nãà.

²A Nevatɩ bidɛb, Zerobowam, tɩ cãà nɩ a Eziptɩ tẽw ʋ na zɔ cen zãá nɩ a nãà Salomɔ̃ a. Ʋ na tɩ wõ bɛ ƴɛ̀r a Sɩsɛm tẽw kpaarʋ ŋa ƴɛ̀rʋ a, ʋ zɩ̃ n a Eziptɩ tẽw.

³Ɛcɛ bɛ tɩ tõ n nɩbɛ bɛ tɩ bʋɔl'ʋ, ʋ wa. Lɛ n'a a Zerobowam nɩ a Saa-pɛrɩ́-gʋba-lowr Ɩsɩrayɛl lãw nɩbɛ za tɩ ƴɛ̀r a Orobowam zie yel ʋ à ŋá:

⁴«A fʋ sãà dɔwrɩ tɩ na mɛ̃ gbãgbaar a. Ʋ dɔwl'ɩ tuor na tɩbrɛ a, a tɩ bawŋmamɛ zu. Ƴɛrɛŋa a, a fʋ̃ʋ a, fʋ̃ʋ wa ɩ a tɩ tuor a ɩ zelfel blã a, tɩ na tone nɩ a fʋ tome.»

⁵A Orobowam tɩ sɔw bɛ na: «Nyɩ vɛ̃ ɩ̃ tɩɛrɩ kaa. Ka nɩ bibie ata a, nyɩ lɛb wa páw mɛ̃.» Lɛ n'a bɛ tɩ tɔl cen.

⁶A nãà Orobowam tɩ yel'ɩ a nɩ-kore na tɩ tone a ʋ sãà Salomɔ̃ tome a lɛn daar ʋ na tɩ cãà vʋʋrɛ a, kɛ́ bɛ wul ʋ yã. Ʋ tɩ sowri bɛ nɩ à ŋá: «Sɔwfʋ buor'ʋ nyɩ wule mɛ̃ k'ɩ̃ɩ sɔw kʋ̀ a nɩbɛ bɛ ŋa?»

⁷A nɩ-kore tɩ yel ʋ na: «A dɩ̃a a, fʋ̃ʋ wa sàw ɩ a nɩ-bʋʋrɛ bɛ ŋa tõ-tone a, fʋ̃ʋ wa ƴɛ̀r vla a bɛ zie a, bɛ na tone nɩ a fʋ tome kʋralɛ.»

⁸Ɛcɛ a Orobowam bɛ tɩ tu a yã ʋl a nɩ-kore na wul ʋ a ɩ. Ʋ tɩ bɛr'a, ɛ́ sowri a pɔlbili bɛl nɩ a ʋl na tɩ lãw bàa, ɛ́ bɛ tone a ʋ tome a.

⁹Ʋ tɩ yel bɛ na: «A nɩbɛ bɛ ŋa yel k'ɩ̃ɩ ɩ a tuor a ɩ̃ sãà na dĩ nɩ bɛ a, a ɩ zelfel blã. A sɔwfʋ n'ɩ buor nyɩ na wule mɛ̃ k'ɩ̃ɩ sɔw bɛ a?»

¹⁰A ʋ pɔ́l-taabɛ tɩ yel ʋ na: «A nɩbɛ bɛ ŋa kone na a fʋ sãà na ɩ bɛ mɛ̃ gbãgbaar a, ɛ́ yel kɛ́ fʋ ɩ a tuor na dĩ bɛ a, a ɩ zelfel blã. Nyɛ̃ a lɛ fʋ na na sɔw bɛ a: “A ɩ̃ nobile bɛrmɛ na zuo a ɩ̃ sãà kpãkpãw.

¹¹A ɩ̃ sãà tuo nyɩ nɩ tuor na tɩbrɛ a, mãa na tuo nyɩ nɩ tuor na tɩbrɛ zuo lɛ a. A ɩ̃ sãà fɔb'ɩ nyɩ nɩ fʋb-zawlɛ kpãà nyɩ, mãa na fɔb'ɩ nyɩ nɩ fʋbr[25] na tɛr kure a, kpãà nyɩ.”»

¹²A Zerobowam nɩ a nɩbɛ za tɩ wa n a bibie ata sob, wa páw a Orobowam, mɛ̃ a lɛ ʋ na tɩ yel kʋ̀ bɛ a.

¹³A nãà tɩ bɛr'ɩ a yã ʋl a nɩ-kore na wul ʋ a, ɛ́ sɔw sɔwfʋ na kpɛmɛ a kʋ̀ a nɩbɛ,

¹⁴tu n a yã a ʋ pɔ́l-taabɛ na wul ʋ a. Ʋ tɩ yel'a: «Ɩ̃ sãà tuo nyɩ nɩ tuor na tɩbrɛ a, mãa na tuo nyɩ nɩ tuor na tɩbrɛ zuo lɛ a. Ɩ̃ sãà fɔb'ɩ nyɩ nɩ fʋb-zawlɛ kpãà nyɩ, mãa na fɔb'ɩ nyɩ nɩ fʋbr na tɛr kure a kpãà nyɩ.»

¹⁵À ŋá n'a a nãà bɛ tɩ bɛr wõ a nɩbɛ ƴɛ̀rʋ ɛ. Alɛ ɩrɛ mɛ̃ bom'ʋ a, a Sore n'ʋ tɩ tõ a nũú, k'aa lɛ ʋ na tɩ ƴãw a ʋ ƴɛ̀r-manɛ Ahiya, na yi Silo a, ƴɛ̀r a Nevatɩ bidɛb Zerobowam zie a, tu.

¹⁶A Saa-pɛrɩ́-gʋba-lowr Ɩsɩrayɛl nɩbɛ na tɩ nyɛ̃ k'aa nãà bɛ bɛr wõ a bɛ ƴɛ̀rʋ a, bɛ yel ʋ na: «Tɩ bɛ pʋɔ Daviir yele pʋɔ ɩ, tɩɩm nɩ Zese bidɛb bɛ lãw bom za ɩ! Ɩsɩrayɛl nɩbɛ ɛ, nyɩ ɩ tɩ lɛb kul a tɩ yie pʋɔ. Ɛ́ fʋ̃ʋ, Daviir bʋʋrɛ ɛ, pãa kaarɛ a fʋ naalʋ-tẽw zie!» Lɛ n'a bɛ tɩ lɛb kul a bɛ yie pʋɔ.

¹⁷A Ɩsɩrayɛl nɩbɛ bɛl na tɩ kpɩɛr a Zuda tẽw pʋɔ a, bɛl tɛwr nɛbɛ tɩ sàw a Orobowam naalʋ.

¹⁸A na saa ɩ à ŋá a, ʋ tɩ cãà na tõ a pɔ̃tɔrɩ tome nɩ-kpɛ̃ɛ, Adoram[26], a Saa-pɛrɩ́-gʋba-lowr Ɩsɩrayɛl nɩbɛ zie. Ɛcɛ bɛ tɩ lɔb'ɩ ʋ nɩ kʋsɛbɛ kʋ. A tɩ cɛ nɩ zaa pʋrɩ, ɛ́ a Orobowam tʋ̃ɔ́ do a ʋ zɛbr-torko pʋɔ zɔ cen a Zerizalɛm.

¹⁹À à ŋá n'a a Saa-pɛrɩ́-gʋba-lowr Ɩsɩrayɛl nɩbɛ dɔwlʋ tɩ zawrɩ a Daviir yir nɩ-kpɛ̃ɛnʋ a bɛ zu, ɛ́ à à ŋá n'a a yele cãà ŋmɛ̃ a dɩ̃a.

²⁰A Saa-pɛrɩ́-gʋba-lowr Ɩsɩrayɛl nɩbɛ za na tɩ wõ k'aa Zerobowam lɛb'a wa a, bɛ mɩ̀ bʋɔl'ɩ a bɛ kpaa-taa. Bɛ tɩ ƴãw na ʋ wa, bɛ wa kaa ír ʋ k'ʋ ɩ a bɛ nãà. A Zuda dɔwlʋ yõ n'ʋ tɩ cãà tu a Daviir yir.

²¹A Orobowam na dɛ wa ta a Zerizalɛm a, ʋ bʋɔl'ɩ soja-gãdaar tùr-kʋba dɔwlɩ tùr-lɩz'a anaar (180 000), a Zuda nɩ a Bɛ̃zamɛ dɔwlʋ pʋɔ, kɛ́ bɛ cen tɩ zɛb'ɩ a Ɩsɩrayɛl naalʋ-tẽw, lɛb de a naalʋ kʋ̀ ʋ, a ʋl, a Salomɔ̃ bidɛb.

²²Ɛcɛ Naaŋmɩn tɩ ƴɛ̀r'ɩ a ʋ ƴɛ̀r-manɛ Semaya zie yel ʋ à ŋá:

²³«Ƴɛ̀r a Salomɔ̃ bidɛb Orobowam na ɩ a Zuda tẽw nãà a zie, a Zuda nɩ a Bɛ̃zamɛ nɩbɛ za zie, a nɩbɛ za na cɛ a zie, yel bɛ:

²⁴À ŋá n'a a Sore ƴɛ̀rɛ: “Nyɩ taa cere tɩ zɛbr'ɩ a Ɩsɩrayɛl nɩbɛ ɩ, nyɩ yɛbr nɛbɛ. Ŋa za mɩ́ lɛb kul a ʋ yir, mãa n'ʋ bɔbr so k'a ɩ à à ŋá.”» Lɛ n'a bɛ tɩ sàw a Sore ƴɛ̀rʋ, ɛ́ lɛb kul a bɛ yie pʋɔ, mɛ̃ a lɛ ʋ na yel a.

²⁵A Zerobowam tɩ ƴãw na bɛ mɛ dacine piw nɩ a Sɩsɛm na be a Efarayim tan vuo pʋɔ a, ʋʋ kpɩɛr a be. Ʋ wa yi n a be a pùorí cen tɩ ƴãw bɛ mɛ dacine piw nɩ a Penuwɛl tẽ-kpɛ̃ɛ.

²⁶A Zerobowam tɩ tɩɛr'ɩ ʋ pʋɔ à ŋá: «A yele na ɩ à à ŋá a, a ɩ̃ naalʋ-tẽw nɩbɛ nãà mab'a lɛb tu a Daviir yir.

²⁷Bʋ̃ʋ n'ʋ vɛ̃, bɛlɛ wa cãà cere a Zerizalɛm, tɩ maalɛ a bagɛ a Sore Ŋmɩn-yir-kpɛ̃ɛ pʋɔ a, a bɛ tɩɛrʋ na lɛb'a tu a bɛ nɩ-kpɛ̃ɛ-kʋra, a Zuda tẽw nãà Orobowam. A lɛ pʋɔ a, bɛ na kʋ m'a, ɛ́ lɛb tu a Orobowam.»

²⁸A Zerobowam tɩ bɔ n yã maalɩ salm-zɩɛ nadɛli ayi, ɛ́ yel a nɩbɛ à ŋá: «Nyɩ do n a Zerizalɛm a sɛw. Ɩsɩrayɛl nɩbɛ ɛ, a nyɩ Naaŋmɩn n'ɩ ŋa a ka, ʋl na ɩ nyɩ yi a Eziptɩ tẽw pʋɔ a.»

²⁹A Zerobowam tɩ ƴãw nɩ a nadele kãw Betɛl, ɛ́ ƴãw a ƴen sob Dan.

³⁰À ŋá n'a ʋ tɩ ƴãw a nɩbɛ maalɩ a yel-bier. Nɩ-yaga tɩ bɩɛl'ɩ a nadɛli ayi sob tɩ sãá nɩ a Dan.

³¹A Zerobowam tɩ ƴãw na bɛ ŋma yie a maalʋ-ziir, ʋʋ kaa ír nɩbɛ a nɩbɛ pʋɔ, nɩbɛ na bɛ ɩ a Levi dɔwlʋ nɩbɛ a, ƴãw bɛ ɩ bàwr-maalbɛ.

³²Ʋ tɩ ƴãw nɩ cuw ʋ be a cuwr ani sob bibie pie nɩ anũu daar, cuw na ŋmɛ̃ taa nɩ a ʋl na mɩ́ tɩ maalɩ a Zuda tẽw a, ɛ́ a ʋl mɩŋa tɩ maalɩ bagɛ a bàwr-maal-kuur zu. À ŋá n'a ʋ tɩ ɩ a Betɛl, maalɩ bagɛ kʋ̀ a nadɛli ʋ na tɩ maalɩ a. Ʋ mɩ̀ tɩ ƴãw nɩ a bàwr-maalbɛ ʋ na kaa ír a maalʋ-ziir ƴãw a, a be.

³³A cuwr ani sob bibie pie nɩ anũu daar, a Zerobowam tɩ maal'ɩ cuw a Betɛl, a Ɩsɩrayɛl nɩbɛ ƴãw. Ʋl mɩŋa n'ʋ tɩ kaa ír a bibir ŋa. A cuw maalʋ daar a, ʋl mɩŋa tɩ maal'ɩ bagɛ a bàwr-maal-kuur ʋ na ƴãw bɛ mɛ a zu.