Read Dagara, Northern 1 Na-mɩnɛ 14 Bible Online

1 Na-mɩnɛ 14 - Dagara, Northern bible

1 Na-mɩnɛ 14

¹A lɛn daar, a Zerobowam bidɛb Aviya tɩ ìr'a ɩ bàal.

²A Zerobowam tɩ yel'ɩ a ʋ pɔw: «Ìr lɩɛrɩ a fʋ bʋ̃-suuri, bɛ ta bãw k'aa Zerobowam pɔw nɛ b ɛ, ɛ́ cen Silo. Be n'a a naaŋmɩn-ƴɛ̀r-manɛ Ahiya kpɩɛr, ɛ́ ʋlɛ n'ʋ tɩ yel kʋ̀ m k'ɩ̃ɩ nãà ɩ n a Ɩsɩrayɛl nɩ-bʋʋrɛ nãà.

³Tɛr dipɛ̃ pie, gatori nɩ sɩwr nɩ duwle cen nɩ tɩ nyɛ̃ nɩ ʋ, ʋ na yel'ɩ a ʋlɩ bom nɛ na na ɩ a bie a kʋ̀ b.»

⁴A Zerobowam pɔw tɩ ɩ n a lɛ ʋ na yel a. Ʋ tɩ ìr'a cen a Silo tɩ kpɛ a Ahiya yir. A Ahiya tɩ kor'ɩ yaga, bɛ cãà nyɛrɛ ɩ, ɛ́ mɩ́ yuo a mimie a lɛ.

⁵Ɛcɛ a Sore tɩ de nɩ niwn yel à ŋá kʋ̀ ʋ: «A Zerobowam pɔw waar'a k'ʋʋ wa sowri fʋ a ʋ bidɛb-bàal ƴãw. Sɔw à ŋá nɩ à ŋá kʋ̀ ʋ. Ɛcɛ ʋlɛ wa ta a, ʋ na ɩ na fʋ manɛ kɛ́ nɩ-yũo n'ʋ.»

⁶A Ahiya na dɛ wa wõ a ʋ gbɛcile, ʋ na ta a dɩ̃dɔr nʋɔr a, ʋ yel'a: «Zerobowam pɔw i, kpɛ! Bʋ̃ʋ n'ʋ so fʋ bɔbr kɛ́ fʋ ɩ mɛ̃ nɩ-yũo nɛ b a? Ɩ̃ tɛr'ɩ ƴɛ̀rʋ na kpɛmɛ a na ƴɛ̀r kʋ̀ b.

⁷Cen tɩ yel a Zerobowam: À ŋá n'a a Sore, a Ɩsɩrayɛl Naaŋmɩn, yere a fʋ zie: “Nɩ-sãsaralɛ tɩ nɛ b ɩ̃ kaa ír a nɩbɛ pʋɔ, kɛ́ fʋ ɩ a ɩ̃ nɩ-bʋʋrɛ Ɩsɩrayɛl nɩ-kpɛ̃ɛ.

⁸Ɩ̃ faa nɩ a naalʋ a Daviir yir dem zie kʋ̀ b. Ɛcɛ fʋ bɛ ɩ mɛ̃ a ɩ̃ tõ-tõ-bie Daviir a ɩ. Ʋ tɩ sàwr'ɩ a ɩ̃ nɛ-ƴãwnɩ ɛ́ tone mɛ̃ nɩ a ʋ pʋɔ za, ɛ́ ɩrɛ a lɛ tɛwr na pɛlɩ a ɩ̃ pʋɔ a.

⁹Fʋ maal'ɩ faa zuo a bɛlɩ dem za na de fʋ niwn a: fʋ nyɩl'ɩ kure maal'ɩ ŋmɩn-yoru dasuli, ƴãw a ɩ̃ suur ìr, ɛ́ a mãa fʋ zawrɩ mɛ̃ bɛr.

¹⁰Alɛ n'a so ɩ̃ na ɩ a yel-faa páw a fʋ yir, ɩ̃ na kʋ n a fʋ yir dɛbr za pàw pɛr, a gbãgbaar nɩ a nɩbɛ na so bɛ tʋɔra a a Ɩsɩrayɛl tẽw pʋɔ. Ɩ̃ na ɩ na a fʋ yir nɩbɛ baarɩ cɔ̃cɔ̃cɔ̃, mɛ̃ sagɛ bɛ na pɩɩrɩ wob yi n bɛr a baarɩ a.

¹¹A fʋ yir nɩr za na na kpi a tẽw pʋɔ a, baar'a na 'wɔb ʋ, ɛ́ nɩr za na na kpi a wɩ̀ɛ pʋɔ a, dùme n'a na dɩ ʋ.” A ƴɛ̀rʋ n'ɩ à ŋà a Sore na ƴɛ̀r a.»

¹²A naaŋmɩn-ƴɛ̀r-manɛ tɩ cãà na yel à ŋá: «A fʋ̃ʋ a, lɛb kul a fʋ yir. Fʋ̃ʋ wa tɩ kpɩɛr a tẽw pʋɔ wa báarɛ a, a fʋ bidɛb na kpi na.

¹³A Ɩsɩrayɛl nɩbɛ za na kõ ʋ na, ɛ́ bɛ ũù ʋ. Ʋl ʋ yõ sɩrɩ n'ʋ na tɛr yaa a Zerobowam yir dem pʋɔ. Bʋ̃ʋ n'ʋ vɛ̃, ʋl yõ zie n'a a Sore, a Ɩsɩrayɛl Naaŋmɩn, nyɛ̃ yel-vla a yir ŋa nɩbɛ za pʋɔ.

¹⁴Al pùorí a, a Sore na kaa na ír na-paala a Ɩsɩrayɛl nɩbɛ ƴãw, ɛ́ ʋlɛ n'ʋ na kʋ a Zerobowam yir dem pàw pɛr. Alɛ mɔ̃ mɩ̀ n'ɩ à á ŋá na ɩrɛ a dɩ̃a a, a ƴɛrɛŋa a.

¹⁵Al pùorí, a Sore na ɩ na dɔwrʋ lo a Ɩsɩrayɛl nɩbɛ zu. Bɛ na màwr'a mɛ̃ bàa-kɛkɛɛ na zaalɛ kʋ̃ɔ pʋɔ a. A Sore na ír bɛ nɩ a tẽ-vla ŋa ʋ na kʋ̀ a bɛ sãàkʋm-kore a pʋɔ, ɛ́ diw bɛ yaarɩ a Efaratɩ man gãwn. A na ɩ n à à ŋá a bɛ zie, bɛ na maalɩ dà-barɩ ƴãw a Sore suur ìr a ƴãw.

¹⁶A Sore na jɛ bɛ na bɛr, a Zerobowam na maalɩ a yel-bier, ɛ́ ƴãw a Ɩsɩrayɛl nɩbɛ mɩ̀ maalɩ a ƴãw.»

¹⁷A Zerobowam pɔw tɩ ìr'a lɛb kul a Tɩrsa. Ʋ na tɩ gãwnɛ a dɩ̃dɔr kpɩɛr wa báarɛ a, a bie kpi na.

¹⁸Bɛ tɩ ũù ʋ na, ɛ́ a Ɩsɩrayɛl nɩbɛ za kõ a kuor, mɛ̃ a lɛ a Sore na tɩ ƴãw a naaŋmɩn-ƴɛ̀r-manɛ Ahiya yel a.

¹⁹A Zerobowam yele al na cɛ a, a zɛbr ʋ na zɛb a, a lɛ ʋ na dɩ a naalʋ a, a za sɛb'ɩ a «Ɩsɩrayɛl tẽw na-mɩnɛ ɩ-ɩrɩ sɛbɛ» pʋɔ.

²⁰A Zerobowam tɩ dɩ n a naalʋ yome lɩzɛr'ɩ ayi. Ʋ na wa kpi cen tɩ páw a ʋ sãà mɩnɛ a, a ʋ bidɛb Nadab n'ʋ lɩɛr'ʋ dɩ a naalʋ.

²¹A Salomɔ̃ bidɛb Orobowam tɩ tɛr'ɩ yome lɩz'a ayi nɩ been, a lɛn daar ʋ na tɩ lɩɛbɩ a nãà a. Ʋ tɩ dɩ n a naalʋ yome pie nɩ ayopõi a Zerizalɛm. Bʋ̃ʋ n'ʋ vɛ̃, a tẽ-kpɛ̃ɛ ŋa n'ʋ a Sore tɩ kaa ír a Ɩsɩrayɛl tẽw za pʋɔ, k'ʋʋ tʋ̃ɔ́ mɩ́ wul a be ʋ na be a ʋ nɩ-bʋʋrɛ Ɩsɩrayɛl sɔgɔ a. A Orobowam mã yúor tɩ n'ɩ Naama, na ɩ Amɔ̃ tẽw pɔw a.

²²A Zuda dɔwlʋ nɩbɛ tɩ ɩ n a lɛ na bɛ vɩɛl a, a Sore zie. Bɛ tɩ sãw nɩ a ʋ suur nɩ a bɛ yel-bebe, zuo a lɛ a bɛ sãàkʋm-kore na tɩ ɩ a.

²³Bɛ mɩ̀ tɩ cɔbr'ɩ maalʋ-ziir, bin kʋsɛ-teli nɩ dà-barɩ a tãli za na tɛr tɩ-zimpiri zimpiri a zu.

²⁴Dɛ-yɛmɛ nɩ pɔw-yɛmɛ tɛɛ za tɩ be n a tẽw za pʋɔ. A Zuda dɔwlʋ nɩbɛ tɩ cɔwr'ɩ nɩ a nɩ-bʋʋr-yoru ɩ-faar na bɛ maal'ɩ wob a, a nɩ-bʋʋrɛ bɛ ŋa a Sore na tɩ diw, ɛ́ cɛ a zie kʋ̀ a Ɩsɩrayɛl nɩbɛ a.

²⁵A Orobowam naalʋ-dɩb yome anũu sob a, a Eziptɩ tẽw nãà Sɩsakɩ tɩ wa na wa zɛb'ɩ a Zerizalɛm.

²⁶Ʋ tɩ wob'ɩ a Ŋmɩn-yir-kpɛ̃ɛ nɩ a nãà yir na-bome. Ʋ tɩ wob'ɩ a za pap, baa zuo a za a salm-zɩɛ zɛbr-kur-pãgalɩ a Salomɔ̃ na tɩ ƴãw bɛ maalɩ a.

²⁷A lɛ n'a a Orobowam tɩ maalɩ kur-zɩɛ zɛbr-kur-pãgalɩ lɩɛr'ɩ, ɛ́ de a kʋ̀ a sojarɩ na gùre a nãà yir dɩ̃dɛɛ a nɩ-bɛrɛ.

²⁸Sãw za, a nãà wa cere a Ŋmɩn-yir-kpɛ̃ɛ pʋɔ a, a sojarɩ mɩ́ de nɩ a zɛbr-kur-pãgalɩ, al pùorí bɛ lɛb wa bin a a sojarɩ na gùre a zie a dĩó.

²⁹A Orobowam yele al na cɛ a, a za sɛb'ɩ a «Zuda tẽw na-mɩnɛ ɩ-ɩrɩ sɛbɛ» pʋɔ.

³⁰Zɛbr tɩ be n ʋlɛ nɩ a Zerobowam cara pʋɔ kʋralɛ.

³¹Ʋ na wa kpi cen tɩ páw a ʋ sãà mɩnɛ a, bɛ ũù ʋ nɩ a be bɛ na ũù a ʋ sãàkʋm-kore a, a Daviir Tẽ-kpɛ̃ɛ pʋɔ. A ʋ mã tɩ ɩ n Amɔ̃ tẽw pɔw, ɛ́ bɛ bʋɔlɛ ʋ kɛ́ Naama. A ʋ bidɛb Abiyam tɩ lɩɛr'ʋ na dɩ a naalʋ.