Read Dagara, Northern 1 Na-mɩnɛ 8 Bible Online

1 Na-mɩnɛ 8 - Dagara, Northern bible

1 Na-mɩnɛ 8

¹Al pùorí, a nãà Salomɔ̃ tɩ bʋɔl'ɩ a Ɩsɩrayɛl nɩbɛ nɩ-kore, a Ɩsɩrayɛl dɔwlʋ nɩ-bɛrɛ nɩ a Ɩsɩrayɛl yie nɩ-bɛrɛ kɛ́ bɛ ɓã taa a ʋ zie a Zerizalɛm, bɛ tuo a Sore wõ-taa daga a Daviir Tẽ-kpɛ̃ɛ pʋɔ, bɛ mɩ̀ na bʋɔlɛ Sɩyɔ̃ a, cen nɩ a Ŋmɩn-yir-kpɛ̃ɛ pʋɔ.

²Lɛ n'a a Ɩsɩrayɛl nɩbɛ za, tɩ wa ɓã taa a nãà Salomɔ̃ zie, a cuwr ayopõi sob, Etanim cuw, a Sɛwr cuw maalʋ daar.

³A Ɩsɩrayɛl nɩbɛ nɩ-kore za na wa ta a, a bàwr-maalbɛ tuo nɩ a wõ-taa daga.

⁴Bɛ tɩ tuo nɩ a Sore wõ-taa daga cen nɩ, lãwnɩ a tuor-taa pɛn-sɛw nɩ a bʋ̃-son za na be a ʋ pʋɔ a. A bàwr-maalbɛ nɩ a levitɩ mɩnɛ nɛbɛ tɩ tuo a cen nɩ.

⁵A nãà Salomɔ̃ nɩ a Ɩsɩrayɛl nɩbɛ lãw za, na tɩ wa lãw nɩ ʋ bɛ ɓã taa àr a daga niŋé a, tɩ kʋ n píir nɩ nĩi, na tɩ yãwmɛ nɩr kʋ̃ tʋ̃ɔ́ maal bãw a nʋɔr a, maal'ɩ bagɛ.

⁶Al pùorí, a bàwr-maalbɛ tɩ kpɛ n nɩ a Sore wõ-taa daga, a zie ʋl na tɩ be be a ʋ ƴãw, a dĩo ʋl bɛ na bʋɔlɛ a zi-sõw-za-zi-sõw a pʋɔ, a seribɛ̃ pɩgɛ pile.

⁷Bʋ̃ʋ n'ʋ vɛ̃, a seribɛ̃ tɩ dɔl'ɩ a pɩgɛ a zie nɛ bɛ na na bin a daga a saa-zu, k'aa tʋ̃ɔ́ pàw a daga nɩ a dàar bɛ na mɩ́ tuo nɩ ʋ a.

⁸A dàar á ŋá tɩ wõwme na, fʋ mɩ́ tʋ̃ɔ́ àr a càará fʋ na mɩ́ kpɛ ɛ́ yi kpɛ a zi-sõw-za-zi-sõw pʋɔ a, ɛ́ nyɛ̃ a nyɛɛ. Ɛcɛ fʋ̃ʋ wa be a yẽw a, fʋ bɛ mɩ́ nyɛ̃ a ɩ. A cãà nɩ bɛ nɩ dɩ̃a.

⁹A Naaŋmɩn wulu kʋsɛ-pamɛ ayi a Moyiir na tɩ ƴãw a daga pʋɔ a, al tɛwr'a tɩ be be. A kʋsɛ-pamɛ ʋ na tɩ páw a Orɛb tãw zu a n'a, a lɛn daar a Sore na tɩ maal'ɩ a Ɩsɩrayɛl nɩbɛ wõ-taa, ʋ na tɩ tɛr bɛ yi n a Eziptɩ tẽw baarɩ a.

¹⁰A bàwr-maalbɛ na tɩ lɛb yi a zi-sõw pʋɔ a, zũzuwr tɩ paalɩ a Ŋmɩn-yir-kpɛ̃ɛ.

¹¹A zũzuwr ŋa tɩ ɩ na a bàwr-maalbɛ bɛ tʋ̃ɔ́ cãà cow a bɛ tome ɩ. Bʋ̃ʋ n'ʋ vɛ̃, a Sore yúor-vɩɛlʋ-danʋ tɩ paal'ɩ a Ŋmɩn-yir-kpɛ̃ɛ.

¹²Lɛ n'a a Salomɔ̃ tɩ yel à ŋá: «Sore e, fʋ tɩ yel'a kɛ́ zie na liw a pʋɔ n'a, fʋ na kpɩɛr.

¹³Ɛcɛ mãa a, ɩ̃ ŋmãa nɩ yir-vla vla kʋ̀ b, zie fʋ na na kpɩɛr kʋralɛ a.»

¹⁴A Ɩsɩrayɛl nɩbɛ lãw za tɩ àr'ɩ saaƴẽwn. A Salomɔ̃ tɩ lɩɛb'a puori bɛ.

¹⁵Al pùorí ʋ yel à ŋá: «Ɩ̃ puore nɩ a Sore, a Ɩsɩrayɛl Naaŋmɩn, yãanɩ! Ʋl mɩŋa maal'ɩ a lɛ ʋ na tɩ yel kʋ̀ a ɩ̃ sãà Daviir a. Ʋ tɩ yel ʋ na:

¹⁶“Mãa n'ʋ ɩ a ɩ̃ nɩ-bʋʋrɛ Ɩsɩrayɛl ʋ yi a Eziptɩ tẽw. A ʋlɩ bibir nɛ wa tɔ a dɩ̃a a, ɩ̃ bɛ kaa ír tẽ-kpɛ̃ɛ kãw za, a Ɩsɩrayɛl tẽw tẽ-bɛrɛ za pʋɔ, kɛ́ bɛ ŋmãa Ŋmɩn-yir-kpɛ̃ɛ, ɩ̃ mɩ́ be a be ɩ. Ɛcɛ ɩ̃ kaa na ír fʋ, a fʋ̃ʋ Daviir, kɛ́ fʋ ɩ a ɩ̃ nɩ-bʋʋrɛ Ɩsɩrayɛl nɩ-kpɛ̃ɛ.”

¹⁷Zɩ̃ kɛ́ a ɩ̃ sãà Daviir tɩ tɩɛrɛ na k'ʋʋ ŋmãa Ŋmɩn-yir-kpɛ̃ɛ, a Sore, a Ɩsɩrayɛl Naaŋmɩn, na na so a.

¹⁸Ɛcɛ a Sore tɩ yel ʋ na: “Fʋ bɔbr'a kɛ́ fʋ ŋmãa Ŋmɩn-yir-kpɛ̃ɛ, ɩ̃ so ʋ. A fʋ tɩɛrʋ vɩɛl'a.

¹⁹Ɛcɛ fʋ̃ʋ bɛ n'ʋ na ŋmãa ʋ ɛ, a fʋ bidɛb'ʋ. A fʋ bidɛb fʋ na dɔw a n'ʋ na ŋmãa a Ŋmɩn-yir-kpɛ̃ɛ ŋa a ɩ̃ ƴãw.”»

²⁰A Salomɔ̃ tɩ cãà na yel à ŋá: A Sore tu n a lɛ ʋ na yel a. Ɩ̃ lɩɛr'ɩ a ɩ̃ sãà Daviir, zɩ̃ a Ɩsɩrayɛl naalʋ-dà-kɔw zu, mɛ̃ a lɛ a Sore na tɩ yel a, ɛ́ ŋmãa a Ŋmɩn-yir-kpɛ̃ɛ ŋa, a Sore, a Ɩsɩrayɛl Naaŋmɩn, na so a.

²¹Ɩ̃ cɔbr'ɩ zie a ʋ pʋɔ, a daga na tɛr a Sore wõ-taa ƴɛ̀rʋ a ƴãw. Ʋ tɩ maal'ɩ a wõ-taa ŋa nɩ a tɩ sãàkʋm-kore, a lɛ ʋ na tɩ tɛr bɛ yi n a Eziptɩ tẽw a.

²²Al pùorí, a Salomɔ̃ tɩ àr'ɩ saaƴẽwn a Sore bàwr-maal-kuur niŋé, tori a Ɩsɩrayɛl nɩbɛ lãw za. Ʋ tɩ tur'ɩ a nuru cɔw a salom

²³ɛ́ puori à ŋá: «Sore e, Ɩsɩrayɛl Naaŋmɩn i, Naaŋmɩn bɛ be be mɛ̃ a fʋ̃ʋ, a saa-zu a salom zu ɛ, nɩ a pile a tẽw zu ɛ. Fʋ mɩ́ maal'a tɛr a fʋ wõ-taa nɩ nɔ̃wfʋ a fʋ tõ-tõ-biir zie, a lɛn daar bɛ na mɩ́ sàwr a fʋ nʋɔr nɩ bɛ pʋɔ za a.

²⁴A lɛ fʋ na tɩ ƴɛ̀r a fʋ tõ-tõ-bie ɩ̃ sãà Daviir zie a, fʋ tu na. A lɛ fʋ̃ʋ mɩŋa na tɩ yel kʋ̀ ʋ a, fʋ ɩ ʋ nɩ a dɩ̃a.

²⁵Ƴɛrɛŋa a, Sore e, Ɩsɩrayɛl Naaŋmɩn i, mɩ̀ maalɩ a lɛ fʋ na tɩ ƴãw a nʋɔr a fʋ tõ-tõ-bie ɩ̃ sãà Daviir zie a, a lɛn daar fʋ na tɩ yel ʋ à ŋá a: “A fʋ bʋʋrɛ wa ɩrɛ vla a ɩ̃ zie mɛ̃ a lɛ a fʋ̃ʋ mɩŋa na ɩ a, a bɛ kãw na mɩ́ be n a ɩ̃ niŋé kʋralɛ, dɩrɛ naalʋ a Ɩsɩrayɛl nɩbɛ zu, a fʋ pùorí.”

²⁶Ƴɛrɛŋa a, Ɩsɩrayɛl Naaŋmɩn i, ɩ̃ zɛlɛ fʋ na, maalɩ a lɛ fʋ na yel a fʋ tõ-tõ-bie ɩ̃ sãà Daviir zie a!»

²⁷«Ɛcɛ a Naaŋmɩn na tʋ̃ɔ́ na sɩrɩ kpɩɛr a tẽw zu u? A salom yɛlmɛ na bɛ dɩ vuo ɩ, ɛ́ a Naaŋmɩn kʋ̃ tʋ̃ɔ́ kpɛ a ʋ pʋɔ ɩ. Ɛ́ bʋ̃ʋ baa n'ɩ a Ŋmɩn-yir-kpɛ̃ɛ ŋa ɩ̃ na ŋmãa a!

²⁸Ɛcɛ, Sore ɩ̃ Naaŋmɩn i, cɛlɛ be: a mãa fʋ tõ-tõ-bie, ɩ̃ puore na zɛlɛ nɩ fʋ yãayãa, bɛr wõ a puoru ɩ̃ na puore fʋ nɩ ɩ̃ pʋɔ za a dɩ̃a a.

²⁹Yuo a fʋ mimie! Jɩ́rɛ a Ŋmɩn-yir-kpɛ̃ɛ ŋa tɩ̃ɩsɔw nɩ mʋ̃tɔ̃w, fʋ na yel a ʋ ƴãw à ŋá a: “A ka n'a ɩ̃ na be.” Bɛr wõ a puoru ɩ̃ na puore fʋ a ka a.

³⁰Mɩ́ bɛr wõ mãa nɩ a fʋ nɩ-bʋʋrɛ Ɩsɩrayɛl yãayãa zɛlʋ, tɩmɛ mɩ́ wa puore fʋ a ka a. Sore e, mɩ́ bɛr wõ a salom zu be fʋ na kpɩɛr a, mɩ́ bɛr wõ ɛ́ dɩ suur kʋ̀ tɩ.»

³¹«Bɛlɛ wa tɛr'ɩ nɩr ƴɛ̀rʋ yel k'ʋʋ sãw nɩ a ʋ tɔ sob a, bɛ na ƴãw na ʋ pɔ. Ʋlɛ wa wa, wa pɔ a fʋ yir pʋɔ, a fʋ bàwr-maal-kuur niŋé a,

³²a fʋ̃ʋ a, Sore e, be a salom zu ɛ́ bɛr wõ, ɛ́ tu. Dɩ n a fʋ tõ-tõ-biir a ƴɛ̀rʋ, yel a sãwna sob k'ʋʋ sãw na, ɛ́ ɩ a ʋ sãwna lɛb lo a ʋ zu, ɛ́ yel a yel-mɩŋa sob k'ʋʋ bɛ tɛr sãwna ɩ, ɛ́ a nɩbɛ za ɩrɛ a ʋ zie mɛ̃ nɩr na bɛ tɛr sãwna a.»

³³«A fʋ nɩ-bʋʋrɛ Ɩsɩrayɛl dɔ̃ dem wa zɛb tʋ̃ɔ́ bɛ, bɛ na zawrɩ a fʋ nʋɔr a ƴãw a, bɛlɛ wa lɛb wa a fʋ zie wa danɛ fʋ, wa puore fʋ ɛ́ zɛlɛ fʋ yãayãa a Ŋmɩn-yir-kpɛ̃ɛ ŋa pʋɔ a,

³⁴fʋ̃ʋ a, Sore e, be a salom zu ɛ́ bɛr wõ, dɩ a fʋ nɩ-bʋʋrɛ Ɩsɩrayɛl yel-bebe suur kʋ̀ bɛ. Lɛb tɛr bɛ wa n a tẽw fʋ na kʋ̀ a bɛ sãàkʋm-kore a pʋɔ a.»

³⁵«A salom wa pàw a saa bɛ waar, bɛ na zawrɩ a fʋ nʋɔr a ƴãw a, bɛlɛ wa lɩɛbɩ niwn cɔw a zie ŋa kɛ́ bɛ puori fʋ a, bɛlɛ wa danɛ fʋ ɛ́ ciire a bɛ yel-bebe fʋ na ƴãw bɛ kpɩɛrʋ pʋɔ a ƴãw a,

³⁶a fʋ̃ʋ a, Sore e, be a salom zu ɛ́ bɛr wõ, dɩ a Ɩsɩrayɛl nɩbɛ yel-bebe suur kʋ̀ bɛ, bɛ na ɩ a fʋ tõ-tõ-biir nɩ a fʋ nɩ-bʋʋrɛ a. Wul bɛ, bɛ cere vla, ɛ́ fʋ ɩ a saa ʋ wa ƴãw a tẽw ŋa fʋ na so, ɛ́ de kʋ̀ bɛ bɛ mɩ̀ so a.»

³⁷«Kɔ̃ wa lo a, bɩɩ bàal-faa kãw bɛ na bʋɔlɛ jɛ̀lmɛ̃ a wa kpɛ a tẽw pʋɔ a, a bʋ̃-kʋ́ɔrɩ al na mɩ́ tɛr bie a wa kòre bɩɩ pɔnɛ a dàar zu a, a sãsoge nɩ a sãsow-nãa-nʋrɩ wa wa yaga za a, dɔ̃ dem wa zɛb'ɩ a fʋ nɩbɛ tɩ kpɛ n a tẽ-bɛrɛ al na cɔbrɩ kpɛmɛ a zɛbr ƴãw a pʋɔ a, yel-faa za bɩɩ bàalʋ za wa wa a,

³⁸a Ɩsɩrayɛl nɩbɛ, a fʋ nɩ-bʋʋrɛ, bɛlɛ wa nyɛ̃ kɛ́ bɛl mɩŋa zie n'a a bɛ kpɩɛrʋ yi, ɛ́ puore fʋ, lɔbr nuru zɛlɛ fʋ a, bɛlɛ wa lɩɛbɩ niwn cɔw a Ŋmɩn-yir-kpɛ̃ɛ ŋa, ɛ́ zɛw a nuru puore nɩ fʋ a,

³⁹a fʋ̃ʋ a, Sore e, a salom zu be fʋ na kpɩɛr a, bɛr wõ, dɩ suur kʋ̀ bɛ, ɛ́ ɩ ɩb kãw. Mɩ́ ɩ ŋa za tu n a lɛ a ʋ ɩb na ŋmɛ̃ a, fʋ na faa bãw ŋa za socir a. Bʋ̃ʋ n'ʋ vɛ̃, fʋ̃ʋ n'ʋ bãw nɩsaal za socir.

⁴⁰À ŋá n'a a Ɩsɩrayɛl nɩbɛ na zɔrɛ fʋ kʋralɛ, lɛn daar za bɛ na na kpɩɛr a tẽw fʋ na kʋ̀ a tɩ sãàkʋm-kore a.»

⁴¹«Bɛlɛ wa ƴɛ̀rɛ a fʋ yúor na ɩ kpɛ̃ɛ a ƴɛ̀rʋ a, nɩ a fʋ kpɛnʋ nɩ a fʋ fãw tome ƴɛ̀rʋ a, a nɩ-bʋʋr-yoru tɛɛ za na wõ a na. A lɛ a, sãan na bɛ pʋɔ a fʋ nɩ-bʋʋrɛ Ɩsɩrayɛl pʋɔ a, wa yi tẽ-zãána kãw wa k'ʋʋ wa puori fʋ a Ŋmɩn-yir-kpɛ̃ɛ ŋa pʋɔ a,

⁴²

⁴³a fʋ̃ʋ a, Sore e, be a salom zu fʋ na kpɩɛr a, ɛ́ bɛr wõ a sãan ŋa puoru, ɛ́ kʋ̀ ʋ a ʋlɩ bom nɛ ʋ na zɛlɛ a. À ŋá n'a a tẽw zu nɩ-bʋʋrɛ za na bãw fʋ. Bɛ na zɔrɛ fʋ na, mɛ̃ a lɛ a fʋ nɩ-bʋʋrɛ Ɩsɩrayɛl na zɔrɛ fʋ a. Bɛ mɩ̀ na bãw na kɛ́ fʋ̃ʋ sɩrɩ so a Ŋmɩn-yir-kpɛ̃ɛ ŋa ɩ̃ na ŋmãa a.»

⁴⁴«A Ɩsɩrayɛl nɩbɛ wa cere kɛ́ bɛ tɩ zɛb'ɩ a bɛ dɔ̃ dem, a be fʋ na tõ bɛ a, bɛlɛ wa lɩɛbɩ niwn cɔw a tẽ-kpɛ̃ɛ ŋa fʋ na kaa ír a, nɩ a Ŋmɩn-yir-kpɛ̃ɛ ŋa ɩ̃ na ŋmãa a fʋ ƴãw a, bɛlɛ wa puore fʋ a, a fʋ̃ʋ Sore a,

⁴⁵fʋ̃ʋ cɛlɛ be a salom zu, bɛr wõ a bɛ yãayãa zɛlʋ ɛ́ sõw bɛ.»

⁴⁶«A Ɩsɩrayɛl nɩbɛ wa zawrɩ a fʋ nʋɔr a, nɩsaal na bɛ be be bɛ zawrɛ nʋɔr a ƴãw a, fʋ̃ʋ wa nyɛ̃ nɩ bɛ suur, ƴãw bɛ a bɛ dɔ̃ dem nuru pʋɔ, bɛ tɛr bɛ a gbãgbaalʋ pʋɔ cen nɩ a bɛ ten a, ten na zãá bɩɩ pɩɛlɩ a,

⁴⁷a bɛ gbãgbaalʋ tẽw pʋɔ be, bɛlɛ wa lɛb tɩɛrɩ, ɛ́ zɛlɛ fʋ yãayãa yere nɩ: “Tɩ maal'ɩ yel-bier, tɩ bɛ ɩ vla ɩ, tɩ sãw na!” a,

⁴⁸bɛlɛ wa lɛb wa a fʋ zie nɩ a bɛ pʋɔ za nɩ a bɛ sɩ́ɛ za, a tẽw ʋl pʋɔ bɛ na ɩ a gbãgbaar a, bɛlɛ wa lɩɛbɩ niwn cɔw a tẽw fʋ na kʋ̀ a bɛ sãàkʋm-kore a, a tẽ-kpɛ̃ɛ ŋa fʋ na kaa ír a, nɩ a Ŋmɩn-yir-kpɛ̃ɛ ŋa ɩ̃ na ŋmãa a fʋ ƴãw a,

⁴⁹a fʋ̃ʋ a, a salom zu be fʋ na kpɩɛr a, cɛlɛ be, bɛr wõ a bɛ yãayãa zɛlʋ ɛ́ sõw bɛ.

⁵⁰Dɩ suur kʋ̀ bɛ a yel-bebe bɛ na maalɩ sãw fʋ a ƴãw, dɩ suur kʋ̀ bɛ a fʋ nʋɔr bɛ na zawrɩ a ƴãw. Ɩ a bɛlɩ dem na tɛr bɛ a gbãgbaalʋ pʋɔ a, bɛ zɔ bɛ nɩbaalʋ.

⁵¹Bʋ̃ʋ n'ʋ vɛ̃, bɛ ɩ n a fʋ nɩ-bʋʋrɛ, fʋ̃ʋ so bɛ, bɛl fʋ na ɩ bɛ yi a Eziptɩ tẽw pʋɔ, tuo na bɛ tɛr manʋ a pʋɔ a.»

⁵²«Sore Naaŋmɩn i, yuo a fʋ mimie. Mɩ́ bɛr wõ mãa nɩ a fʋ nɩ-bʋʋrɛ yãayãa zɛlʋ, lɛn daar za tɩ nãà mɩ́ wa ŋmɩɛr a cɛlsɩ cɔwr fʋ a.

⁵³Bʋ̃ʋ n'ʋ vɛ̃, fʋ̃ʋ n'ʋ kaa ír tɩ a tẽw zu nɩ-bʋʋrɛ pʋɔ, kɛ́ tɩ ɩ a fʋ nɩ-sori. Fʋ̃ʋ n'ʋ ƴãw a fʋ tõ-tõ-bie Moyiir yel a lɛ, a lɛn daar fʋ na tɩ ɩ a tɩ sãàkʋm-kore yi a Eziptɩ tẽw a.»

⁵⁴A lɛ a Salomɔ̃ na tɩ puore, ɛ́ zɛlɛ a Sore yãayãa a, dume n'a ʋ tɩ gbĩ a bàwr-maal-kuur niŋé, ɛ́ tur a nuru cɔw a salom. Ʋ na wa puori baar'a, ʋ lɛb'a ìr,

⁵⁵ʋ tɩ àr'ɩ a saaƴẽwn ɛ́ zɛw kɔkɔr, ƴɛ̀r nɔ-vla kʋ̀ a Ɩsɩrayɛl nɩbɛ lãw za. Ʋ tɩ yel'a:

⁵⁶«A Sore tɛr'ɩ puoru! Ʋ kʋ̀ n a ƴã-ɓaarʋ a ʋ nɩ-bʋʋrɛ Ɩsɩrayɛl, mɛ̃ a lɛ ʋ na tɩ yel a. Bʋ̃ʋ n'ʋ vɛ̃, ʋ tu n a lɛ za ʋ na tɩ ƴãw a ʋ tõ-tõ-bie Moyiir yel a.

⁵⁷Ƴɛrɛŋa a, ɩ̃ zɛlɛ nɩ a Sore tɩ Naaŋmɩn, k'ʋʋ be a tɩ zie, mɛ̃ a lɛ ʋ na tɩ be a tɩ sãàkʋm-kore zie a, k'ʋʋ taa zawrɛ tɩ bɛrɛ ɩ, k'ʋʋ taa jɛrɛ tɩ bɛrɛ ɩ,

⁵⁸k'ʋʋ ɩ a tɩ tɩɛrʋ a lɩɛbɩ tu ʋ, kɛ̀ tɩ ɩrɛ mɛ̃ a lɛ ʋ na bɔbr a, sàwr a nɛ-ƴãwnɩ, a wulu nɩ a tub ʋ na kʋ̀ a tɩ sãàkʋm-kore a.

⁵⁹A Sore tɩ Naaŋmɩn, ʋ bãwnɩ a, mʋ̃tɔ̃w nɩ tɩ̃ɩsɔw, ɩ̃ na puori ʋ, ɛ́ zɛlɩ ʋ yãayãa a. Lɛ n'a, bibi-vɩɛrɩ za, ʋ na mɩ́ wa wa maalɩ mɛ̃, a mãa ʋ tõ-tõ-bie, nɩ a ʋ nɩ-bʋʋrɛ Ɩsɩrayɛl.

⁶⁰Lɛ n'a a tẽw zu nɩ-bʋʋrɛ za na bãw k'aa Sore yõ n'ʋ ɩ Naaŋmɩn, kãw bɛ lɛb ka be ɩ.

⁶¹A lɛ a, a Sore tɩ Naaŋmɩn na so nɩ a nyɩ socir za, ʋ sàwr a ʋ wulu nɩ a ʋ nɛ-ƴãwnɩ, mɛ̃ a lɛ nyɩ na ɩrɛ a dɩ̃a a.»

⁶²A nãà Salomɔ̃ nɩ a Ɩsɩrayɛl nɩbɛ za na tɩ be be a tɩ maal'ɩ bagɛ kʋ̀ a Sore.

⁶³A Salomɔ̃ tɩ kʋ n nĩi tùr-lɩzɛr'ɩ ayi (22 000), píir nɩ bʋʋr tùr-lɩz'a ayʋɔb (120 000) maal'ɩ lãw-taa bagɛ. À à ŋá n'a bɛ tɩ de a Ŋmɩn-yir-kpɛ̃ɛ kʋ̀ a Sore.

⁶⁴A ʋlɩ bibir nɛ a, a nãà tɩ maal'ɩ a davʋra, na be a Ŋmɩn-yir-kpɛ̃ɛ niŋé a, sɔwlɩsɔw k'ʋ ɩ sõw. Bʋ̃ʋ n'ʋ vɛ̃, a kur-zɩɛ bàwr-maal-kuur na be a Ŋmɩn-yir-kpɛ̃ɛ dɩ̃dɔr nʋɔr a tɩ ɩ n pʋrɩ zuo a bàwr-maal-bome za binu ƴãw, a tɩ fɛr a Salomɔ̃ ʋ nyɩw a nyɩw-a-za-bagɛ bome, a kukur de-kʋ̀b bome nɩ a lãw-taa bagɛ nɛn-kãánɩ a davʋra pʋɔ.

⁶⁵A ʋlɩ daar nɛ mɩ̀ a, a Salomɔ̃ tɩ maal'ɩ a Sɛwr cuw, ʋlɛ nɩ a Ɩsɩrayɛl nɩbɛ. Bɛ tɩ yi n a tẽw za pʋɔ wa bɛ dɩ vuo ɩ, a Lebo-Hamatɩ, a saa-pɛrɩ́-gʋba-lowr tɩ tɔ a Eziptɩ fʋɔla, a saa-pɛrɩ́-dʋrʋ-lowr. Bɛ tɩ maal'ɩ a cuw a Sore Naaŋmɩn niŋé bibie pie nɩ anaar: bibie ayopõi, lɛ nɩ bibie ayopõi.

⁶⁶A dàrʋ ayi sob bibie ani sob, a nãà tɩ bɛr'ɩ a Ɩsɩrayɛl nɩbɛ kɛ́ bɛ lɛb kul a bɛ yie pʋɔ. Bɛ tɩ puor'ɩ a nãà, ɛ́ lɛb kul a bɛ yie pʋɔ, ɛ́ nʋ̃ɔ̀ ɩrɛ bɛ yaga, a bɛ pʋʋr pɛlɩ, a vla za a Sore na tɩ maalɩ a ʋ tõ-tõ-bie Daviir, nɩ a ʋ nɩ-bʋʋrɛ Ɩsɩrayɛl a ƴãw.