Read Dagara, Northern 2 Na-mɩnɛ 1 Bible Online

2 Na-mɩnɛ 1 - Dagara, Northern bible

2 Na-mɩnɛ 1

¹A nãà Akab kũu pùorí a, a Mowab tẽw dem bɛ tɩ cãà sàw a Ɩsɩrayɛl tẽw naalʋ-dɩb a bɛ zu ɛ.

²Bibir kãw, a Akazɩasɩ na tɩ be a ʋ nãà yir bɔwpɩɛ pʋɔ, a Samaari a, tɩ yi n a tokoro vʋɔrɩ́ lo, sãw zie faa faa. Lɛ n'a ʋ tɩ tõ nɩbɛ, ɛ́ yel bɛ à ŋá: «Nyɩ cen tɩ sowri a Ekiron tẽ-kpɛ̃ɛ ŋmɩn, Baal-Zebub[1], nyɛ̃, ɩ̃ na lɛb'a ìr a ɩ̃ bàalʋ ŋa pʋɔ bɩɩ.»

³Ɛcɛ a Sore malkɩ kãw tɩ wa na, wa páw Eli na yi Tisibe a, yel ʋ: «Ìr, tuori a nɩbɛ a Samaari nãà na to a, yel bɛ à ŋá: “Naaŋmɩn bɛ be a Ɩsɩrayɛl tẽw, nyɩ cere kɛ́ nyɩ tɩ sowri Ekiron tẽw ŋmɩn Baal-Zebub bɩɩ?”

⁴Fʋ na yel'ɩ à ŋá ƴãw pʋɔ: “Nyɛ̃ a lɛ a Sore na yere kʋ̀rɛ a Ɩsɩrayɛl nãà a: Fʋ bɛ ìre a gado zu fʋ na gã a ɩ, fʋ na kpi na, bʋnʋ bɛ ka be ɩ.”» Al pùorí a Eli tɔl cen.

⁵A nɩbɛ a nãà na tõ a tɩ lɛb'a wa a ʋ zie a daadaalɛ, ʋ̀ wa sowri bɛ: «Bʋ̃ʋ n'ʋ so nyɩ lɛb wa?»

⁶Bɛ tɩ sɔw ʋ na: «Nɩr kãw n'ʋ tuori tɩ, yel kɛ́ tɩ lɛb wa a fʋ zie, wa yel fʋ: “À ŋá n'a a Sore yere: Naaŋmɩn bɛ be a Ɩsɩrayɛl tẽw bɩɩ, fʋ tone kɛ́ bɛ tɩ sowri Ekiron tẽw ŋmɩn, Baal-Zebub? A na ɩ à ŋá a, fʋ bɛ ìre a gado zu fʋ na gã a ɩ, fʋ na kpi na!”»

⁷A nãà tɩ sowri bɛ na: «A nɩr ʋl na tuori nyɩ ɛ́ ƴɛ̀r a ƴɛ̀rʋ á ŋá kʋ̀ nyɩ a, ŋmɩŋmɩn n'a ʋ ŋmɛ̃?»

⁸Bɛ tɩ sɔw na: «Ʋ tɩ su n dʋn kɔblʋ kparʋ, ɛ́ 'lẽ nɩ gán kpàwr[2].» Lɛ n'a a nãà tɩ yel: «A Eli na yi Tisibe a n'ʋ!»

⁹A nãà tɩ tõ n sojarɩ lɩz'a ayi nɩ pie nɩ-kpɛ̃ɛ, nɩ a ʋ nɩbɛ lɩz'a ayi nɩ pie, kɛ́ bɛ tɩ nyɔw a Eli. Bɛ tɩ do n a tãw zu-sɔw a Eli na zɩ̃ a. A sojarɩ nɩ-kpɛ̃ɛ tɩ yel ʋ na: «Naaŋmɩn nɩr i, siw! A nãà nʋɔr'ʋ!»

¹⁰A Eli tɩ sɔw ʋ na: «Mãa wa sɩrɩ ɩ Naaŋmɩn nɩr a, vũu, a yi a salom zu, siw dɩ fʋ̃ʋ nɩ a fʋ nɩbɛ lɩz'a ayi nɩ pie!» Vũu tɩ yi n a salom zu daadaalɛ, siw dɩ a sojarɩ nɩ-kpɛ̃ɛ nɩ a ʋ nɩbɛ lɩz'a ayi nɩ pie.

¹¹A nãà tɩ lɛb'a tõ sojarɩ lɩz'a ayi nɩ pie nɩ-kpɛ̃ɛ ƴen sob, nɩ a ʋ nɩbɛ lɩz'a ayi nɩ pie, a Eli zie. A sojarɩ nɩ-kpɛ̃ɛ nɛ tɩ yel'ɩ a Eli: «Naaŋmɩn nɩr i, siw fɔ̃wlɛ! A nãà nʋɔr'ʋ!»

¹²A Eli tɩ sɔw ʋ na: «Mãa wa sɩrɩ ɩ Naaŋmɩn nɩr a, vũu, a yi a salom zu siw dɩ fʋ̃ʋ nɩ a fʋ nɩbɛ lɩz'a ayi nɩ pie!» A Naaŋmɩn vũu tɩ yi n a salom zu siw dɩ a sojarɩ nɩ-kpɛ̃ɛ nɩ a ʋ nɩbɛ lɩz'a ayi nɩ pie.

¹³A nãà tɩ lɛb'a tõ sojarɩ lɩz'a ayi nɩ pie nɩ-kpɛ̃ɛ nɩ a ʋ nɩbɛ lɩz'a ayi nɩ pie, a gb'a ata sob. Bɛ tɩ do n a tãw zu. Ɛcɛ a sojarɩ nɩ-kpɛ̃ɛ na tɩ tarɛ a, ʋ gbĩ n dume a Eli niŋé, ɛ́ zɛlɩ ʋ yãayãa à ŋá: «Naaŋmɩn nɩr i mãa nɩ a ɩ̃ nɩbɛ lɩz'a ayi nɩ pie bɛ ŋa nyɔ-vʋʋrʋ, a ɩ bʋ̃-sɩza a fʋ zie!

¹⁴Ɩ̃ bãwnɩ a na vũu na yi a salom zu siw dɩ a sojarɩ nɩ-bɛrɛ ayi bɛl na de niwn wa a, lãwnɩ a bɛ nɩbɛ a. Ɛcɛ, ɩ̃ zɛlɛ fʋ nɩ yãayãa, a ɩ̃ nyɔ-vʋʋrʋ, ʋ ɩ bʋ̃-sɩza a fʋ zie!»

¹⁵Lɛ n'a a Sore malkɩ tɩ yel a Eli: «Páw ʋ siw, ta zɔrɛ dɛ̃bɩ̃ɛ ɩ.» A Eli tɩ páw nɩ a sojarɩ nɩ-kpɛ̃ɛ siw cen a nãà zie,

¹⁶tɩ yel ʋ: «À ŋá n'a a Sore yere: “Fʋ tõ n nɩbɛ kɛ́ bɛ tɩ sowri a Ekiron tẽw ŋmɩn Baal-Zebub. Naaŋmɩn bɛ be a Ɩsɩrayɛl tẽw bɛ na tʋ̃ɔ́ sowri ɛ? A na ɩ à ŋá a, fʋ bɛ ìre a gado zu fʋ na gã a ɩ, fʋ na kpi na, bʋnʋ bɛ ka be ɩ!”»

¹⁷A Akazɩasɩ tɩ sɩrɩ na kpi, a tu a ƴɛ̀rʋ a Sore na tɩ ƴãw a Eli ƴɛ̀r a. Ʋ na bɛ tɩ tɛr bidɛb a, a ʋ yɛb Yoram n'ʋ tɩ lɩɛr'ʋ dɩ a naalʋ, a Zuda tẽw nãà, Zozafatɩ bidɛb, Yoram, naalʋ-dɩb yome ayi sob daar.

¹⁸A Akazɩasɩ yele al na cɛ a, a sɛb'ɩ a «Ɩsɩrayɛl tẽw na-mɩnɛ ɩ-ɩrɩ sɛbɛ» pʋɔ.