Read Dagara, Northern 2 Na-mɩnɛ 10 Bible Online

2 Na-mɩnɛ 10 - Dagara, Northern bible

2 Na-mɩnɛ 10

¹A Akab bʋʋrɛ lɩz'a ata nɩ pie tɩ kpɩɛr'ɩ a Samaari. A Yehu tɩ tɩr'ɩ sɛb-tʋɔla a Samaari kʋ̀ a Izireyɛl tẽw nɩ-bɛrɛ, a nɩ-kore nɩ a nɩbɛ bɛl na tɩ tɛr a Akab bʋʋrɛ wule a. À ŋá n'a ʋ tɩ sɛb bɛ:

²«Nyɩ kaarɛ nɩ a nãà yir bibiir zie, nyɩ tɛr'ɩ zɛbr-torkori, wie nɩ zɛbr bome, ɛ́ kpɩɛr tẽ-kpɛ̃ɛ bɛ na cɔbrɩ a zɛbr ƴãw ʋ kpɛmɛ a. Nyɩmɛ dɛ wa páwr a sɛb-tʋɔla ŋa a,

³nyɩɩm bɛl a nãà bʋʋrɛ pʋɔ nyɛ̃, buor sob'ʋ na tʋ̃ɔ́, ɛ́ sɛwnɩ a nãà ɩb. Nyɩ zɩɩlɩ ʋ a naalʋ-dà-kɔw zu, ɛ́ zɛb a nãà yir ƴãw.»

⁴Dɛ̃bɩ̃ɛ tɩ kpɛ bɛ nɩ yaga za, bɛ yere kʋ̀rɛ taa: «Na-mɩnɛ ayi[19] bɛ tʋ̃ɔ́ bà gbɛ́r a Yehu niŋé ɩ, ɛ́ ŋmɩŋmɩn n'a tɩɩm na tʋ̃ɔ́?»

⁵Lɛ n'a a nãà yir nɩ-kpɛ̃ɛ, a sojarɩ nɩ-kpɛ̃ɛ na kaarɛ a tẽw a, a nɩ-kore nɩ a nɩbɛ bɛl na tɩ wule a Akab bʋʋrɛ a, tɩ tõ bɛ tɩ sɔw a Yehu à ŋá: «Fʋ tõ-tõ-biir'ɩ tɩ, tɩ na ɩ n a lɛ za fʋ na na yel kʋ̀ tɩ a, tɩ kʋ̃ kaa ír nɩr za ʋ ɩ nãà ɩ. Ɩ lɛ za na pɛlɩ a fʋ pʋɔ a.»

⁶A Yehu tɩ lɛb'a sɛb bɛ sɛb-tʋɔlɩ ayi sob, yel bɛ à ŋá: «Nyɩmɛ wa tu m a, nyɩmɛ wa bɔbr kɛ́ nyɩ sàwr a ɩ̃ nʋɔr a, nyɩɩm ŋma a nãà bʋʋrɛ za zuru, wa páw nɩ mɛ̃ a Izireyɛl, bio a tɛm ŋa pʋɔ.» A nãà bʋʋrɛ lɩz'a ata nɩ pie tɩ kpɩɛr'ɩ a tẽw nɩ-yée yie pʋɔ, bɛ guole bɛ.

⁷A tẽw nɩ-bɛrɛ na wa páw a sɛb-tʋɔla ŋa a, bɛ nyɔw nɩ a nãà bʋʋrɛ kʋ, ƴãw a zuru pɛ̀rʋ ayi pʋɔ tɩr kʋ̀ a Yehu, a Izireyɛl.

⁸Nɩr kãw tɩ wa na wa yel ʋ kɛ́ bɛ wa n nɩ a nãà Akab bʋʋrɛ zuru, a Yehu yel: «Nyɩ põ a ziir ayi bin a tẽw dɩ̃dɔr nʋɔr, tɩ ta n a bio biɓaara.»

⁹A bio daarɩ́ biɓaara a, ʋ tɩ yi n a tẽw pʋɔ àr, ɛ́ yel a nɩbɛ za: «Nyɩɩm a, nyɩ bɛ tɛr sãwna ɩ! Mãa a, mãa n'ʋ wõ taa nɩ nɩbɛ, ɛ́ kʋ a Yoram. Ɛcɛ a bɛ ŋa za a, ãa n'ʋ kʋ bɛ?

¹⁰A na ɩ à ŋá a, nyɩ bãw k'aa ƴɛ̀rʋ al za a Sore na tɩ ƴɛ̀r a Akab yir ƴãw a, a been kãw za bɛ be be bɛ tu ɛ! A Sore tu n a lɛ za ʋ na tɩ ƴãw a ʋ ƴɛ̀r-manɛ Eli yel a[20].»

¹¹A Yehu tɩ báa na kʋ a Akab yir nɩbɛ bɛl na cɛ cãà be a Izireyɛl[21] a, lãwnɩ a ʋ po-tuurbɛ, a ʋ bárɩ nɩ a ʋ bàwr-maalbɛ. Ʋ bɛ tɩ bɛr been za ʋ cãà vʋʋrɛ ɩ.

¹²Al pùorí, a Yehu tɩ yi na lo Samaari sɔ́r. Ʋ na tɩ tarɛ Bɛtɩ-Ekɛdɩ-dɛ-Bɛrze a,

¹³ʋ tuor'ɩ Zuda tẽw nãà, Akazɩasɩ, nɩbɛ. Ʋ tɩ sowri bɛ na: «Ã-mɩnɛ n'ɩ nyɩ?» Bɛ sɔw: «Akazɩasɩ nɩbɛ n'ɩ tɩ. Tɩ cere na kɛ́ tɩ tɩ puori a nãà bidɛbr nɩ a Zezabɛl bibiir.»

¹⁴Lɛ n'a a Yehu tɩ yel: «Nyɩ nyɔw bɛ a nɩ-mimie!» A nɩbɛ na tɩ be a ʋ zie a, tɩ nyɔw bɛ nɩ a nɩ-mimie kʋ, ɛ́ lɔb a bɛ ƴã-gamɛ ƴãw a Bɛtɩ-Ekɛdɩ bule pʋɔ. Bɛ tɩ ɩ n nɩbɛ lɩz'a ayi, ɛ́ a bɛ been kãw za bɛ tɩ cɩ̃ɛ ɩ.

¹⁵A Yehu tɩ yi n a be cere tɩ tuori Erekaavʋ bidɛb, Yonadavʋ, na tuore ʋ a. A Yehu tɩ puor'ʋ na, ɛ́ yel ʋ: «A fʋ pʋɔ de m'a, mɛ̃ a lɛ a ɩ̃ pʋɔ na de fʋ a?» A Yonadavʋ sɔw: «Ʋ̃ʋ.» A Yehu yel ʋ: «Alɛ wa ɩ lɛ a, fʋ̃ʋ ɩ tɩ nyɔw taa nuru, puori taa.» Bɛ tɩ nyɔw nɩ taa nuru, puori taa. Al pùorí a Yehu ƴãw ʋ do kpɛ a ʋ zɛbr-torko pʋɔ.

¹⁶Ʋ tɩ yel'ɩ a Yonadavʋ: «Páw mɛ̃ tɩ cen, ɛ́ fʋ na tɩ nyɛ̃ nɩ a lɛ a ɩ̃ nɔ̃wfʋ na tʋlɛ a Sore ƴãw a.» Ɛ́ tɩ tɛr ʋ a ʋ zɛbr-torko pʋɔ cen nɩ.

¹⁷A Yehu na tɩ ta a Samaari a, ʋ kʋ n a Akab yir nɩbɛ bɛl za na tɩ cãà vʋʋrɛ a be a. Ʋ kʋ n bɛ za pàw pɛr, mɛ̃ a lɛ a Sore na tɩ yel kʋ̀ a naaŋmɩn-ƴɛ̀r-manɛ Eli a.

¹⁸Al pùorí, a Yehu tɩ bʋɔl'ɩ a Samaari tẽw dem za ɓã taa, ɛ́ yel à ŋá: «Blã lɛ tɛwr'a a Akab puori a Báàl, mãa Yehu a, ɩ̃ na puor'ʋ nɩ yaga za.

¹⁹Ƴɛrɛŋa a, nyɩ bʋɔlɩ a Báàl ƴɛ̀r-manbɛ za, a ʋ puor-puorbɛ za, de nɩ a ʋ bàwr-maalbɛ, bɛ wa ɓã taa a ɩ̃ zie. Nɩr bɛ cɩɛr ɛ, bʋ̃ʋ n'ʋ vɛ̃, ɩ̃ bɔbr'a k'ɩ̃ɩ maalɩ bàwr-kpɛ̃ɛ kʋ̀ a Báàl. Sob nɛ za bɛ wa wa a, ʋ kpiir a.» Yã n'a a Yehu tɩ maalɛ, k'ʋʋ kʋ a Báàl puor-puorbɛ pàw pɛr.

²⁰Alɛ n'a so ʋ tɩ yel kɛ́ bɛ bʋɔlɩ lãw kpɛ̃ɛ a Báàl ƴãwfʋ ƴãw. Bɛ tɩ bʋɔl'ɩ a lãw ŋa,

²¹tõ nɩbɛ a Ɩsɩrayɛl tẽw za pʋɔ. A Báàl puor-puorbɛ za tɩ wa na, nɩr bɛ tɩ cɛ bɛ wa ɩ. Bɛ tɩ kpɛ na paalɩ a Báàl yir ɓʋr!

²²Lɛ n'a a Yehu tɩ yel a sob nɛ na kaarɛ a bàwr-maal-kparɩ zie a, k'ʋʋ kʋ̀ kparɩ a Báàl puor-puorbɛ za. Ʋ́ kʋ̀ bɛ a kparɩ.

²³Al pùorí, a Yehu nɩ a Erekaavʋ bidɛb, Yonadavʋ, tɩ kpɛ n a Báàl yir pʋɔ, yel a Báàl puor-puorbɛ: «Nyɩ bɛl vla nyɛ̃, kɛ́ Sore puor-puore kãw za bɛ pʋɔ a nyɩ pʋɔ ɩ, kɛ́ Báàl puor-puorbɛ tɛwr nɛbɛ.»

²⁴A Yehu tɩ ƴãw na bɛ ƴãw sojarɩ lɩz'a anaar a yẽw, ʋʋ yel bɛ: «Ɩ̃ na ƴãw nɩ a nɩbɛ bɛ ŋa za a nyɩ nuru pʋɔ. A nyɩ kãw wa bɛr nɩ-been yõ ʋ zɔ cɩ̃ɛ a, ʋ na lɩɛr'ʋ na kpi.» A Yehu nɩ a Yonadavʋ tɩ taw na ta kɛ́ bɛ maalɩ lãw-taa bagɛ nɩ nyɩw-a-za-bagɛ.

²⁵A Yehu na tɩ maalɩ baar'a, ʋ yel'ɩ a sojarɩ nɩ a bɛ nɩ-bɛrɛ: «Nyɩ kpɛ kʋ a nɩbɛ bɛ ŋa! A bɛ been kãw za taa cɩ̃ɛnɛ ɩ!» Lɛ n'a bɛ tɩ kʋ bɛ, ɛ́ wob a bɛ ƴã-gamɛ yi n a tẽw pʋɔ tɩ lɔb bɛr. Al pùorí bɛ kpɛ a Báàl yir zi-sõw pʋɔ.

²⁶Bɛ tɩ de nɩ a yir kpul-son yi n tɩ nyɩw bɛr,

²⁷ɛ́ ŋmɛ a Báàl kʋsɛ-tela ŋmɛr. Bɛ pãa wa baa na ŋmɛ a Báàl yir tɔr za ŋmɛr, ɛ́ ɩ a zie ʋ lɩɛbɩ bin-bɔwrɩ wa tɔ a dɩ̃a.

²⁸À ŋá n'a a Yehu tɩ ɩ a Báàl puoru baarɩ a Ɩsɩrayɛl naalʋ-tẽw pʋɔ.

²⁹Ɛcɛ ʋ bɛ tɩ bɛr a Nevatɩ bidɛb, Zerobowam, yel-bebe maalʋ ɛ. Bʋ̃ʋ n'ʋ vɛ̃, a Zerobowam n'ʋ tɩ ƴãw a Ɩsɩrayɛl nɩbɛ maalɩ a yel-bier, puori a Betɛl nɩ a Dan salm-zɩɛ náli[22].

³⁰A Sore tɩ yel'ɩ a Yehu: «Fʋ ɩ n vla, fʋ ɩ n a lɛ na tori a, a ɩ̃ zie: fʋ ɩ n a lɛ ɩ̃ na tɩ yel k'ɩ̃ɩ na ɩ n a Akab yir a, alɛ so a fʋ bʋʋrɛ na lɩɛrɛ fʋ dɩrɛ a naalʋ a Ɩsɩrayɛl tẽw pʋɔ, tɩ ta bɛ na dɔw lɩɛrɩ taa gb'a anaar a.»

³¹A na saa ɩ à ŋá a, a Yehu bɛ tɩ sàw a Sore, a Ɩsɩrayɛl Naaŋmɩn, wulu nɩ ʋ pʋɔ za ɩ. Ʋ tɩ cãà na maalɛ a Zerobowam yel-bebe, a yel-bebe a Zerobowam na tɩ ƴãw a Ɩsɩrayɛl nɩbɛ maalɛ a.

³²A ʋlɩ daar nɛ a, a Sore tɩ tĩ na gbɛnɛ a Ɩsɩrayɛl naalʋ-tẽw. Ʋ tɩ sàw na a Siiri tẽw nãà, Hazayɛl, zɛb tʋ̃ɔ́ a Ɩsɩrayɛl nɩbɛ a bɛ tẽw tʋr-bɔwrɩ za ƴãw.

³³À ŋá n'a bɛ bɛ tɩ cãà so a vuo ʋl za na be a Zurdɛ̃ saa-pɛrɩ́ nɩ a Arowɛɛr tẽw saa-pɛrɩ́-gʋba-lowr a ɩ, a Arowɛɛr na be a Arnon bàa nʋɔr a. A na ɩ à ŋá a, bɛ bɛ tɩ cãà so a Galaadɩ nɩ a Basan ten voru, a Urubɛn, a Gadɩ nɩ Manase dɔwlʋ na tɩ kpɩɛr a ɩ.

³⁴A Yehu yele al na cɛ a, a alɩ bome nɛ za ʋ na ɩ a, a ʋ gãda-tome, a sɛb'ɩ a «Ɩsɩrayɛl tẽw na-mɩnɛ yele sɛbɛ» pʋɔ.

³⁵Ʋ na wa kpi cen tɩ páw a ʋ sãà mɩnɛ a, bɛ ũù ʋ nɩ a Samaari. A ʋ bidɛb Yoakaazɩ tɩ lɩɛr'ʋ na dɩ a naalʋ.

³⁶A Yehu tɩ dɩ n a naalʋ a Ɩsɩrayɛl nɩbɛ zu, a Samaari, yome lɩzɛr'ɩ ani.