Read Dagara, Northern 2 Na-mɩnɛ 11 Bible Online

2 Na-mɩnɛ 11 - Dagara, Northern bible

2 Na-mɩnɛ 11

¹A Akazɩasɩ mã, Atali, na tɩ nyɛ̃ a ʋ bidɛb ʋ kpi a, ʋ tɩ yel'a k'ʋʋ na kʋ n a nãà yir dɛbli za.

²Ɛcɛ, bɛ na tɩ kʋrɛ a bibiir a, Yehosɛva, na ɩ a Zuda tẽw nãà Yoram pɔwyaa nɩ a Akazɩasɩ yeepule a, tɩ sɔwl'a ɓáw a ʋ yɛ-dɛb bidɛb kãw, Zowasɩ, cen nɩ tɩ sɔwlɩ, ʋlɛ nɩ a pɔw ʋl na guole ʋ a, a Ŋmɩn-yir-kpɛ̃ɛ di-gana kãw pʋɔ. A Atali bɛ tɩ bãwnɩ a ɩ, ɛ́ bɛ bɛ tɩ kʋ ʋ ɛ.

³Ʋlɛ nɩ a pɔw na guole ʋ a tɩ sɔwl'ɩ a Sore Ŋmɩn-yir-kpɛ̃ɛ pʋɔ yome ayʋɔb, ɛ́ a Atali dɩrɛ a naalʋ a Zuda tẽw pʋɔ.

⁴A yome ayopõi sob daar, a bàwr-maalɛ Yehoyada tɩ ƴãw na bɛ bʋɔlɩ a Kaarɩɛ̃[23] mɩnɛ sojarɩ nɩ-bɛrɛ, nɩ a sojarɩ na gùre a nãà yir nɩ a Sore Ŋmɩn-yir-kpɛ̃ɛ a nɩ-bɛrɛ. Ʋ tɩ tɛr bɛ na cen nɩ a Sore Ŋmɩn-yir-kpɛ̃ɛ pʋɔ, tɩ maal'ɩ bɛ wõ-taa, ƴãw bɛ pɔ, ʋʋ wul bɛ a nãà bidɛb.

⁵Al pùorí ʋ yel à ŋá kʋ̀ bɛ: «Nyɩ nyɛ̃ a lɛ nyɩ na na ɩ a: a nyɩ ŋmaarɛ na dier a tome a pɩ̃ɛnʋ-bibir, ɛ́ na gùre a nãà yir a,

⁶a nyɩ ŋmaarɛ bɛl na na gùre a Súùr dɩ̃dɔr a, nɩ a nyɩ ŋmaarɛ bɛl na na be a dɩ̃dɔr ʋl ƴãw, na be a sojarɩ na gùre a nãà yir nɩ a Ŋmɩn-yir-kpɛ̃ɛ a yir pùorí a, a nyɩ ziir ata nɩbɛ bɛ ŋa na gùre nɩ a nãà yir lɩɛrɛ taa.

⁷A ziir ayi nɩbɛ bɛl na bɛrɛ a tome a pɩ̃ɛnʋ-bibir a na wa na wa gùre a Ŋmɩn-yir-kpɛ̃ɛ, a be a nãà na be a.

⁸A sojarɩ za na àr'a viiri koli a nãà, ɛ́ ŋa mɩ́ tɛr a ʋ zɛbr bom a ʋ nũú. Bɛ na bɩɛlɛ ʋ nɩ zie nɛ za ʋ na cere a. Nɩr za wa tawr pɩɛlɛ nyɩ a, nyɩɩm kʋ ʋ.»

⁹A sojarɩ nɩ-bɛrɛ tɩ ɩ n a lɛ za a bàwr-maalɛ Yehoyada na tɩ yel kʋ̀ bɛ a: bɛ tɩ bʋɔl'ɩ a bɛ sojarɩ ɓã taa, a bɛl na dier a tome a pɩ̃ɛnʋ-bibir a, nɩ a bɛl na báarɛ a ʋlɩ bibir a, bɛ cen a bàwr-maalɛ Yehoyada zie.

¹⁰A bàwr-maalɛ Yehoyada tɩ de nɩ a nãà Daviir kafine nɩ a zɛbr-kur-pãgalɩ na tɩ be a Sore Ŋmɩn-yir-kpɛ̃ɛ pʋɔ a, kʋ̀ a sojarɩ nɩ-bɛrɛ.

¹¹A sojarɩ tɩ àr'a ŋmãa gʋɔ cɛ ŋmãa, a yir nɩ a bàwr-maal-kuur niŋé, tĩ a Ŋmɩn-yir-kpɛ̃ɛ dʋrʋ lowr tɩ tɔ a gʋba lowr. Ŋa za tɩ tɛr'ɩ a zɛbr bom a ʋ nũú, ɛ́ bɛ gù a nãà jil-kolu.

¹²Lɛ n'a a Yehoyada tɩ ƴãw a Zowasɩ yi: ʋ vɔblɩ ʋ a nãà-kpawʋɔ, ɛ́ de a wõ-taa sɛbɛ[24] kʋ̀ ʋ. Al pùorí bɛ cir a kãá ƴãw ʋ a zũú, ɩ k'ʋ ɩ a nãà. Daadaalɛ, a nɩbɛ za tɩ puore nɩ nuru carcarcar, ɛ́ cɩɩrɛ yere nɩ: «A nãà, ʋ vʋʋrɛ!»

¹³A Atali na tɩ wõ a gɔmɛ, a sojarɩ na gùre a zie a, nɩ a nɩbɛ na tɩ ɩrɛ a, ʋ cen na tɩ páw a zu-sɛbla a Sore Ŋmɩn-yir-kpɛ̃ɛ́.

¹⁴Ʋ tɩ jɩ́r'a nyɛ̃ a nãà ʋ àr a Ŋmɩn-yir-kpɛ̃ɛ kpul ƴãw, mɛ̃ a lɛ a tub na tuur a. A sojarɩ nɩ-bɛrɛ nɩ a wɩ-pɛblɛ tɩ àr'a kɔw ʋ. Nʋ̃ɔ̀ tɩ ɩrɛ nɩ a tẽw nɩbɛ za, ɛ́ a bʋ̃-ŋmɩɛrbɛ pɛblɛ a wɩɩr. Lɛ n'a a Atali tɩ taw a ʋ kparɩ cɩɛrɩ, ɛ́ cɩɩrɛ yere: «Mɩlʋ wɛ! Mɩlʋ wɛ!»

¹⁵A Yehoyada na bɛ tɩ bɔbr kɛ́ bɛ kʋ ʋ a Sore Ŋmɩn-yir-kpɛ̃ɛ pʋɔ a, ʋ yel'ɩ a sojarɩ na gùre a zie a nɩ-bɛrɛ: «Nyɩ ɩ ʋ yi zaa a gbɛlɛ pʋɔ! Nɩr wa tuur ʋ a, nyɩ kʋ ʋ!»

¹⁶A sojarɩ tɩ vɩr ʋ na cen nɩ a nãà yir lowr. Ʋʋ na tɩ ta a Wie dɩ̃dɔrɩ́ a, bɛ kʋ ʋ nɩ a be.

¹⁷A Yehoyada tɩ maal'ɩ wõ-taa nɩ a Sore nɩ a nãà nɩ a nɩbɛ, k'aa nɩbɛ tʋ̃ɔ́ ɩ a Sore nɩbɛ. Ʋ mɩ̀ tɩ maal'ɩ wõ-taa a nãà nɩ a nɩbɛ cara pʋɔ.

¹⁸Lɛ n'a a zu-sɛbla za tɩ cen a Báàl yir, tɩ ŋmɛr ʋ bɛr. Bɛ tɩ ŋmɛr'ɩ a Báàl bàwr-maal-kube nɩ a ʋ dasuli bɛr vla vla, ɛ́ kʋ a ʋ bàwr-maalɛ Matan, a bàwr-maal-kube niŋé. Al pùorí, a Yehoyada tɩ ƴãw nɩ nɩbɛ bɛ piwre a Sore Ŋmɩn-yir-kpɛ̃ɛ.

¹⁹A Yehoyada tɩ lɛb'a bʋɔlɩ a sojarɩ nɩ-bɛrɛ, a Kaarɩɛ̃ mɩnɛ, a sojarɩ na gùre a ziir a, nɩ a nɩbɛ za ɓã taa, kɛ́ bɛ tɛr a nãà a Sore Ŋmɩn-yir-kpɛ̃ɛ́, tu n a sojarɩ na gùre a ziir a dɩ̃dɔr ƴãw, yi cen nɩ a nãà yir. A Zowasɩ tɩ zɩ̃ n a na-mɩnɛ naalʋ-dà-kɔw zu a be.

²⁰Nʋ̃ɔ̀ tɩ ɩrɛ nɩ a nɩbɛ za. Bɛ na tɩ kʋ a Atali a nãà yir pʋɔ a, a tẽw tɩ gã nɩ zoom.