Read Dagara, Northern 2 Na-mɩnɛ 12 Bible Online

2 Na-mɩnɛ 12 - Dagara, Northern bible

2 Na-mɩnɛ 12

¹A Zowasɩ na tɩ tɛr yome ayopõi a n'a ʋ lɩɛbɩ a nãà,

²a Ɩsɩrayɛl tẽw nãà, Yehu, naalʋ-dɩb yome ayopõi sob daar. A Zowasɩ tɩ dɩ n a naalʋ yome lɩz'a ayi a Zerizalɛm. A ʋ mã tɩ dɩ na kɛ́ Sɩvɩa, ɛ́ yi Bɛɛr-Seva.

³A Zowasɩ tɩ ɩ n a lɛ na vɩɛl a, a Sore zie, a ʋ nyɔ-vʋʋrʋ daar za, a bàwr-maalɛ Yehoyada na tɩ wul ʋ vla a ƴãw.

⁴Ɛcɛ a maalʋ-ziir tɩ cãà nɩ be, a nɩbɛ tɩ cãà na cere a be tɩ maalɛ a bagɛ, ɛ́ nyɩwr a tɩ-suur-zɔ̃-na-nyùur-vla-vla-a.

⁵A Zowasɩ tɩ yel'ɩ a bàwr-maalbɛ bibir kãw: «Nyɩ mɩ́ de a libie bɛ na waar'ɩ a Ŋmɩn-yir-kpɛ̃ɛ́ a Sore ƴãw a: a been been san bɛ na mɩ́ ŋmãa a libie, bɩɩ libie ŋa na mɩ́ nɔnɛ tɩr a. Nyɩ na mɩ́ ƴãw na a nyɩ libi-binbɛ de a, al pùorí nyɩ maal'ɩ a Ŋmɩn-yir-kpɛ̃ɛ ziir al na sãw a.»

⁷Ɛcɛ a Zowasɩ naalʋ-dɩb yome lɩzɛr'ɩ ata sob a, a bàwr-maalbɛ cãà bɛ tɩ maalɩ a Ŋmɩn-yir-kpɛ̃ɛ ziir al na sãw a ƴãw ɛ.

⁸Lɛ n'a a nãà tɩ bʋɔlɩ a Yehoyada nɩ a bàwr-maalbɛ bɛl na cɛ a, wa sowri bɛ: «Bʋ̃ʋ n'ʋ so nyɩ bɛ maalɛ a Ŋmɩn-yir-kpɛ̃ɛ ƴãwn? Dɩ̃a na ta a, nyɩ bɛ lɛb ƴãwnɛ a nyɩ libi-binbɛ dier a libie ɩ. Nyɩ na mɩ́ bɛr a na, a Ŋmɩn-yir-kpɛ̃ɛ maal-ƴãwfʋ ƴãw.»

⁹A bàwr-maalbɛ tɩ sàw na kɛ́ bɛ ta cãà dier libie a nɩbɛ zie ɩ, ɛ́ mɩ̀ ta cãà kaarɛ a Ŋmɩn-yir-kpɛ̃ɛ maal-ƴãwfʋ zie ɩ.

¹⁰A bàwr-maalɛ Yehoyada tɩ de nɩ daga puo vʋɔr ƴãw a pàwra ƴãw, ɛ́ bin ʋ kɔwlɩ a bàwr-maal-kuur, a dʋrʋ lowr fʋ na mɩ́ kpɛ a Ŋmɩn-yir-kpɛ̃ɛ pʋɔ a. A bàwr-maalɛ na gùre a dɩ̃dɔr a, tɩ ƴãwnɛ nɩ a libie bɛ na waar'ɩ a Ŋmɩn-yir-kpɛ̃ɛ pʋɔ a, a be.

¹¹Bɛ na mɩ́ wa nyɛ̃ a libie a yãwmɛ a daga pʋɔ a, bɛ mɩ́ ƴãw na a nãà sɛ-sɛbrɛ nɩ a bàwr-maalbɛ nɩ-kpɛ̃ɛ wa wa de a libie á ŋá tɩ sɔ́r.

¹²Bɛ na mɩ́ tɩ sɔ́r a libie bãw a nʋɔr a, bɛ mɩ́ de a na kʋ̀ a bɛlɩ dem na kaarɛ a Ŋmɩn-yir-kpɛ̃ɛ tome zie a, bɛ yarɛ nɩ a tõ-tõ-biir na maalɛ a Ŋmɩn-yir-kpɛ̃ɛ ƴãwn a: a dà-fɔwrbɛ, a yir-mɛ-tõ-tõ-biir,

¹³a dacĩ-mɩɛrbɛ, a kʋsɛ-pɛnbɛ. Ɛ́ mɩ̀ dàar'ɩ a dàar nɩ a kʋsɛ-pɛnɩ, nɩ a alɩ bome nɛ za na fɛrɛ a Ŋmɩn-yir-kpɛ̃ɛ maal-ƴãwfʋ ƴãw a.

¹⁴Ɛcɛ a libie á ŋá bɛ na mɩ́ tɩ wa n a Ŋmɩn-yir-kpɛ̃ɛ pʋɔ a, bɛ bɛ mɩ́ tɩ de maal'ɩ salm-pla ku-la-bɛrɛ, vũu-bʋ̃-kpiiri, zɩ̃ɩ lali, wɩɩr, bɩɩ salm-zɩɛ bɩɩ salm-pla bʋ̃-kãw ɛ.

¹⁵Bɛ mɩ́ tɩ de nɩ a libie za kʋ̀ a bɛlɩ dem na tone a tome a, bɛ de maalɛ nɩ a Ŋmɩn-yir-kpɛ̃ɛ ƴãwn.

¹⁶A nɩbɛ bɛl bɛ na mɩ́ tɩ kʋ̀ a libie á ŋá, kɛ́ bɛ ya a tõ-tõ-biir a, bɛ bɛ sowre bɛ bom ɛ, bʋ̃ʋ n'ʋ vɛ̃, bɛ mɩ́ tɩ ɩ n a ɩb a tori.

¹⁷A lɛb-kpɛ-taa bàwr libie nɩ a yel-bier ír-bɛrʋ bàwr libie bɛ tɩ kpɩɛr a daga pʋɔ ɩ, a bàwr-maalbɛ tɩ so a.

¹⁸A ʋlɩ vuo nɛ pʋɔ a, a Siiri tẽw nãà Hazayɛl tɩ wa na wa zɛb'ɩ a Gatɩ tẽ-kpɛ̃ɛ. Ʋ na wa zɛb de ʋ baar'a, ʋ yel'a k'ʋʋ na zɛb'ɩ nɩ a Zerizalɛm.

¹⁹Daadaalɛ, a Zowasɩ tɩ de nɩ a bʋ̃-vɩɛlɩ vɩɛlɩ za a ʋl mɩŋa nɩ a ʋ sãà mɩnɛ Zozafatɩ, Yoram nɩ Akazɩasɩ, a Zuda tẽw na-mɩnɛ, na tɩ de kʋ̀ a Sore a. Ʋ tɩ de nɩ a salm-zɩɛ za na be a Ŋmɩn-yir-kpɛ̃ɛ na-bome dĩó a, nɩ a al na be a nãà yir na-bome dĩó a, tɩr a za bɛ tɩ kʋ̀ a Siiri tẽw nãà Hazayɛl, ʋ bɛr a Zerizalɛm ɛ́ tɔl cen.

²⁰A Zowasɩ yele al na cɛ a, a alɩ bome nɛ za ʋ na ɩ a, a sɛb'ɩ a «Zuda tẽw na-mɩnɛ ɩ-ɩrɩ sɛbɛ» pʋɔ.

²¹A ʋ sojarɩ nɩ-bɛrɛ bɛ tɩ cãà sàw a ʋ naalʋ ɛ, ɛ́ bʋ taa a ʋ kʋb ƴãw. A bɛ ayi kãw, Simeyatɩ bidɛb, Yozavadɩ, nɩ Somɛɛr bidɛb, Yehozavadɩ, tɩ kʋ ʋ nɩ Bɛtɩ-Milo. Bɛ tɩ ũù ʋ nɩ a ʋ sãàkʋm-kore ũufʋ zie, a «Daviir Tẽ-kpɛ̃ɛ» pʋɔ. A ʋ bidɛb, Amazɩasɩ, tɩ lɩɛr'ʋ na dɩ a naalʋ.