Read Dagara, Northern 2 Na-mɩnɛ 15 Bible Online

2 Na-mɩnɛ 15 - Dagara, Northern bible

2 Na-mɩnɛ 15

¹A Ɩsɩrayɛl tẽw nãà, Zerobowam, naalʋ-dɩb yome lɩzɛr'ɩ ayopõi sob'a a Amazɩasɩ bidɛb, Azarɩasɩ, tɩ lɩɛbɩ a Zuda tẽw nãà.

²Ʋ tɩ tɛr'ɩ yome pie nɩ ayʋɔb a lɛn daar, ɛ́ dɩ a naalʋ yome lɩz'a ayi nɩ pie nɩ ayi a Zerizalɛm. A mã tɩ dɩ na kɛ́ Yekolɩyahu, ɛ́ yi a Zerizalɛm.

³A Azarɩasɩ tɩ ɩ n a lɛ na vɩɛl a, a Sore zie, mɛ̃ a lɛ tɔr za a ʋ sãà, Amazɩasɩ, na tɩ ɩ a.

⁴Ɛcɛ ʋ tɩ cãà na bɛr a maalʋ-ziir, a nɩbɛ cãà cere tɩ maalɛ a bagɛ, nyɩwr'ɩ a tɩ-suur-zɔ̃-na-nyùur-vla-vla-a.

⁵A Sore tɩ ɩ na bàal-faa nyɔw a nãà: ʋ tɩ kɔ̃w na tɩ ta a ʋ kũu bibir. A tɩ fɛr'a ʋ kpɩɛr yir ʋ yõ. A ʋ bidɛb, Yotam, na tɩ ɩ a nãà yir nɩ-kpɛ̃ɛ a n'ʋ tɩ kaarɛ a tẽw nɩbɛ zie.

⁶A Azarɩasɩ yele al na cɛ a, a alɩ bome nɛ za ʋ na ɩ a, a sɛb'ɩ a «Zuda tẽw na-mɩnɛ ɩ-ɩrɩ sɛbɛ» pʋɔ.

⁷Ʋ na wa kpi cen tɩ páw a ʋ sãà mɩnɛ a, bɛ ũù ʋ nɩ a ʋ sãàkʋm-kore ũufʋ zie, a «Daviir Tẽ-kpɛ̃ɛ» pʋɔ. A ʋ bidɛb Yotam n'ʋ tɩ lɩɛrɩ ʋ dɩ a naalʋ.

⁸A Zuda tẽw nãà, Azarɩasɩ, naalʋ-dɩb yome lɩzɛr'ɩ pie nɩ ani sob'a a Zerobowam bidɛb, Zakari, tɩ lɩɛbɩ a Ɩsɩrayɛl tẽw nãà, a Samaari, cuwr ayʋɔb.

⁹Ʋ tɩ ɩ n a lɛ na bɛ vɩɛl a, a Sore zie, mɛ̃ a ʋ sãàkʋm-kore a. Ʋ bɛ tɩ bɛr a Nevatɩ bidɛb, Zerobowam, yel-bebe maalʋ ɛ, a Zerobowam na tɩ ƴãw a Ɩsɩrayɛl nɩbɛ maalɩ a yel-bier a.

¹⁰Yavɛsɩ bidɛb, Salum, tɩ bʋ n a ʋ kʋb, kʋ ʋ nɩ-yaga niŋé, ɛ́ lɩɛrɩ dɩ a naalʋ.

¹¹A Zakari yele al na cɛ a, a sɛb'ɩ a «Ɩsɩrayɛl tẽw na-mɩnɛ ɩ-ɩrɩ sɛbɛ» pʋɔ.

¹²À ŋá n'a a ƴɛ̀rʋ ŋa a Sore na tɩ ƴɛ̀r kʋ̀ a Yehu a tɩ tu: «A fʋ bʋʋrɛ na lɩɛrɩ fʋ na zɩ̃ a Ɩsɩrayɛl tẽw naalʋ-dà-kɔw zu, tɩ ta a dɔw-lɩɛr-taa gb'a anaar sob.»

¹³A Zuda tẽw nãà, Azarɩasɩ, naalʋ-dɩb yome lɩzɛr'ɩ piwaɩ sob'a a Yavɛsɩ bidɛb, Salum, tɩ lɩɛbɩ a Ɩsɩrayɛl tẽw nãà. Cuw-been yõ n'ʋ ʋ tɩ dɩ a naalʋ a Samaari.

¹⁴Gadi bidɛb, Menahɛm, tɩ yi n Tɩrsa wa kpɛ a Samaari, kʋ a Salum a be, ɛ́ lɩɛrɩ ʋ dɩ a naalʋ.

¹⁵A Salum yele al na cɛ a, a lɛ ʋ na bʋ a Zakari kʋb a, a sɛb'ɩ a «Ɩsɩrayɛl tẽw na-mɩnɛ ɩ-ɩrɩ sɛbɛ» pʋɔ.

¹⁶A lɛn daar'a a Menahɛm tɩ zɛb'ɩ a Tifɩsa tẽ-kpɛ̃ɛ, kʋ a bɛlɩ dem za na tɩ kpɩɛr a ʋ pʋɔ a, ɛ́ sãw a vuo ʋl za na yi a Tɩrsa tɩ sãá a Tifɩsa a bɛr. Ʋ tɩ zɛb'ɩ nɩ a Tifɩsa tẽ-kpɛ̃ɛ, bɛ na bɛ tɩ yuo a tẽw dɩ̃dɛɛ kʋ̀ ʋ a ƴãw. Ʋ tɩ wɛ̀r'ɩ a pɔw-pée za a be.

¹⁷A Zuda tẽw nãà, Azarɩasɩ, naalʋ-dɩb yome lɩzɛr'ɩ piwaɩ sob'a a Gadi bidɛb, Menahɛm, tɩ lɩɛbɩ a Ɩsɩrayɛl tẽw nãà a Samaari, dɩ a naalʋ yome pie.

¹⁸Ʋ tɩ ɩ n a lɛ na bɛ vɩɛl a, a Sore zie. A ʋ nyɔ-vʋʋrʋ daar za a, ʋ bɛ tɩ bɛr a Nevatɩ bidɛb, Zerobowam, yel-bebe maalʋ ɛ, a Zerobowam na tɩ ƴãw a Ɩsɩrayɛl nɩbɛ maalɩ a yel-bier a.

¹⁹A Asiiri tẽw nãà, Pul, tɩ kpɛ na so a Ɩsɩrayɛl tẽw. Lɛ n'a a Menahɛm tɩ kʋ̀ ʋ salm-pla tɔn lɩzɛr'ɩ pie, k'aa Pul sõw ʋ, ʋ zɩɩlɩ a ʋ naalʋ ʋ kpɛmɛ.

²⁰A Menahɛm tɩ ƴãw nɩ zuru-yar a tɛra dem za zu, k'ʋʋ tʋ̃ɔ́ páw a libie á ŋá. A mɩ́ tɩ fɛr'a ŋa za tɩr salm-pla libie lɩz'a ayi nɩ pie. A Asiiri tẽw nãà na wa páw a libie á ŋá a, ʋ bɛr'ɩ a Ɩsɩrayɛl tẽw, ɛ́ lɛb kul a ʋ tẽw.

²¹A Menahɛm yele al na cɛ a, a alɩ bome nɛ za ʋ na ɩ a, a sɛb'ɩ a «Ɩsɩrayɛl tẽw na-mɩnɛ ɩ-ɩrɩ sɛbɛ» pʋɔ.

²²A Menahɛm na wa kpi cen tɩ páw a ʋ sãà mɩnɛ a, a ʋ bidɛb, Pekaya, lɩɛrɩ ʋ na dɩ a naalʋ.

²³A Zuda tẽw nãà, Azarɩasɩ, naalʋ-dɩb yome lɩz'a ayi nɩ pie sob'a a Menahɛm bidɛb, Pekaya, tɩ lɩɛbɩ a Ɩsɩrayɛl tẽw nãà a Samaari, dɩ a naalʋ yome ayi.

²⁴Ʋ tɩ ɩ n a lɛ na bɛ vɩɛl a, a Sore zie. Ʋ bɛ tɩ bɛr a Nevatɩ bidɛb, Zerobowam, yel-bebe maalʋ ɛ, a Zerobowam na tɩ ƴãw a Ɩsɩrayɛl nɩbɛ maalɩ a yel-bier a.

²⁵Eremalyahu bidɛb, Peka, na ɩ a zɛbr-nɩbɛ nɩ-kpɛ̃ɛ a, tɩ bʋ n a ʋ kʋb. Ʋ tɩ tɛr'ɩ nɩbɛ lɩz'a ayi nɩ pie na yi Galaadɩ tẽw a, wa zɛb'ɩ a Pekaya a nãà yir dĩo kãw pʋɔ. Ʋ tɩ kʋ ʋ na ɛ́ lɩɛrɩ ʋ dɩ a naalʋ.

²⁶A Pekaya yele al na cɛ a, a alɩ bome nɛ za ʋ na ɩ a, a sɛb'ɩ a «Ɩsɩrayɛl tẽw na-mɩnɛ ɩ-ɩrɩ sɛbɛ» pʋɔ.

²⁷A Zuda tẽw nãà, Azarɩasɩ, naalʋ-dɩb yome lɩz'a ayi nɩ pie nɩ ayi sob'a a Eremalyahu bidɛb, Peka, tɩ lɩɛbɩ a Ɩsɩrayɛl tẽw nãà a Samaari, dɩ a naalʋ yome lɩzɛr.

²⁸Ʋ tɩ ɩ n a lɛ na bɛ vɩɛl a, a Sore zie. Ʋ bɛ tɩ bɛr a Nevatɩ bidɛb, Zerobowam, yel-bebe maalʋ ɛ, a Zerobowam na tɩ ƴãw a Ɩsɩrayɛl nɩbɛ maalɩ a yel-bier a.

²⁹A Ɩsɩrayɛl tẽw nãà Peka daar, a Asiiri tẽw nãà, Tɩgɩlatɩ-Pilesɛɛr, tɩ zɛb'a de a tẽ-bɛrɛ á ŋá: Iyon, Avɛl-Bɛtɩ-Maaka, Yanoa, Kedɛsɩ nɩ Hasɔɔr. Ʋ tɩ de nɩ a Galaadɩ tẽw, a Galile tẽw nɩ a Nɛfɩtali tẽw za. Ʋ tɩ ír'ɩ a ziir á ŋá nɩbɛ cen nɩ a Asiiri.

³⁰Ela bidɛb, Oze, tɩ bʋ n a nãà Peka kʋb, kʋ ʋ, ɛ́ lɩɛrɩ ʋ dɩ a naalʋ. A Zuda tẽw nãà, Azarɩasɩ bidɛb, Yotam, naalʋ-dɩb yome lɩzɛr sob daar tɩ n'a.

³¹A Peka yele al na cɛ a, a alɩ bome nɛ za ʋ na ɩ a, a sɛb'ɩ a «Ɩsɩrayɛl tẽw na-mɩnɛ ɩ-ɩrɩ sɛbɛ» pʋɔ.

³²A Ɩsɩrayɛl tẽw nãà, Eremalyahu bidɛb, Peka, naalʋ-dɩb yome ayi sob'a a Azarɩasɩ bidɛb, Yotam, tɩ lɩɛbɩ a Zuda tẽw nãà.

³³Ʋ tɩ tɛr'ɩ yome lɩzɛr'ɩ anũu, ɛ́ dɩ a naalʋ yome pie nɩ ayʋɔb, a Zerizalɛm. A ʋ mã tɩ dɩ na kɛ́ Yerusa, ɛ́ ɩ Sadɔkɩ pɔwyaa.

³⁴A Yotam tɩ ɩ n a lɛ na vɩɛl a, a Sore zie, mɛ̃ a lɛ tɔr za a ʋ sãà Azarɩasɩ na tɩ ɩ a.

³⁵Ɛcɛ ʋ tɩ cãà na bɛr a maalʋ-ziir, a nɩbɛ cãà cere tɩ maalɛ a bagɛ, ɛ́ nyɩwr a tɩ-suur-zɔ̃-na-nyùur-vla-vla-a. A Yotam n'ʋ tɩ mɛ a Sore Ŋmɩn-yir-kpɛ̃ɛ dɩ̃dɔ-kpɛ̃ɛ.

³⁶A Yotam yele al na cɛ a, a alɩ bome nɛ ʋ na ɩ a, a sɛb'ɩ a «Zuda tẽw na-mɩnɛ ɩ-ɩrɩ sɛbɛ» pʋɔ.

³⁷A Yotam naalʋ daar'a a Sore tɩ tĩ bɛr a Siiri tẽw nãà, Eresin, nɩ a Ɩsɩrayɛl tẽw nãà, Peka, bɛ waar a Zuda tẽw ƴãw.

³⁸A Yotam na wa kpi cen tɩ páw a ʋ sãà mɩnɛ a, bɛ ũù ʋ nɩ a ʋ sãàkʋm-kore ũufʋ zie, a «Daviir Tẽ-kpɛ̃ɛ» pʋɔ. A ʋ bidɛb, Akaazɩ, n'ʋ tɩ lɩɛrɩ ʋ dɩ a naalʋ.