Read Dagara, Northern 2 Na-mɩnɛ 17 Bible Online

2 Na-mɩnɛ 17 - Dagara, Northern bible

2 Na-mɩnɛ 17

¹A Zuda tẽw nãà, Akaazɩ, naalʋ-dɩb yome pie nɩ ayi sob'a a Ela bidɛb, Oze, tɩ lɩɛbɩ a Ɩsɩrayɛl tẽw nãà a Samaari, dɩ a naalʋ yome piwaɩ.

²Ʋ tɩ ɩ n a lɛ na bɛ vɩɛl a, a Sore zie. Ɛcɛ a bɛ tɩ ta a Ɩsɩrayɛl tẽw na-mɩnɛ bɛl na de ʋ niwn a ɩb ɛ.

³A Asiiri tẽw nãà, Salmanasaar, tɩ wa na wa zɛb'ɩ a Oze. A tɩ fɛr'a a Oze sàw ʋ na tʋ̃ɔ́ ʋ a, ɛ́ yarɛ yar kʋ̀rɛ ʋ yũon za.

⁴Ɛcɛ a Oze wa ìr'a bʋ a Asiiri tẽw nãà kʋb ƴãw: ʋ tɩ tõ n nɩbɛ a Eziptɩ tẽw nãà So[33] zie, ɛ́ zawrɩ a yũon za yar tɩrʋ ʋ na mɩ́ tɩ tɩr kʋ̀ a Asiiri tẽw nãà a. A Salmanasaar na wa bãwnɩ a a, ʋ ƴãw na bɛ nyɔw a Oze pàw gaso pʋɔ.

⁵Al pùorí, ʋ tɩ wa na wa zɛb'ɩ a Ɩsɩrayɛl tẽw za, ɛ́ piw a Samaari tẽw, yome ata, a ʋ zɛb-deb ƴãw.

⁶A Oze naalʋ-dɩb yome piwaɩ sob'a a Asiiri tẽw nãà[34] de a Samaari tẽw. Ʋ tɩ ír'ɩ a Ɩsɩrayɛl nɩbɛ cen nɩ a Asiiri, tɩ ƴãw bɛ zɩ̃ Hala vuo pʋɔ, Gozan vuo pʋɔ a Habɔɔr man na tɔlɛ a, nɩ a Medi tẽ-bɛrɛ pʋɔ.

⁷A yele á ŋá za tɩ ɩ na, a Ɩsɩrayɛl nɩbɛ na tɩ maalɩ yel-bebe a Sore bɛ Naaŋmɩn zie a ƴãw. Ʋl na tɩ faa bɛ a Eziptɩ tẽw nãà, Faarawɔ̃, nuru pʋɔ, ɛ́ ɩ bɛ yi a tẽw ŋa pʋɔ a, nɩ bɛ na tɩ puori ŋmɩn-yoru a.

⁸Bɛ tɩ tu n a nɩ-bʋʋr-yoru a Sore na tɩ diw a bɛ niŋé a tub, ɛ́ vʋʋrɛ tu n a tub a Ɩsɩrayɛl tẽw na-mɩnɛ na tɩ bin a.

⁹Bɛ tɩ ƴɛ̀r'ɩ ƴɛ̀rʋ na bɛ tɛr sɔ́r a càar'ɩ a Sore bɛ Naaŋmɩn. Bɛ tɩ cɔbr'ɩ maalʋ-ziir a bɛ tẽ-bɛrɛ za pʋɔ, a tẽw-gub ziir tɩ lãwnɩ a tẽ-bɛrɛ bɛ na cɔbrɩ a kpɛmɛ a zɛbr ƴãw a.

¹⁰Bɛ tɩ teli nɩ kʋsɛbɛ, ɛ́ bà dà-barɩ a tãli za zu, nɩ tɩ-zimpiri za pile.

¹¹Bɛ tɩ maal'ɩ bagɛ a maalʋ-ziir za, mɛ̃ a nɩ-bʋʋr-yoru bɛl a Sore na tɩ ír a bɛ niŋé cen nɩ zi-yoru ɛ́ kʋ̀ bɛ a zie a. Bɛ tɩ ɩ n a ɩ-faar ɩ a Sore suur ìr.

¹²Bɛ tɩ maal'ɩ a tɩbɛ, bom a Sore na tɩ yel kɛ́ bɛ taa ɩrɛ a.

¹³A Sore tɩ ƴãw na a naaŋmɩn-ƴɛ̀r-manbɛ za, nɩ a yel-nyɛrbɛ za kpaalɩ a Ɩsɩrayɛl nɩbɛ nɩ a Zuda nɩbɛ à ŋá: «Nyɩ bɛr a nyɩ ɩ-faar, nyɩ sàwr a ɩ̃ nɛ-ƴãwnɩ nɩ a lɛ ɩ̃ na yel a, mɛ̃ a lɛ a na be a wulu ɩ̃ na wul a nyɩ sãàkʋm-kore a pʋɔ a, ɛ́ ƴãw a ɩ̃ ƴɛ̀r-manbɛ, a ɩ̃ tõ-tõ-biir, ɩ nyɩ bãw a a.»

¹⁴Ɛcɛ a nɩbɛ bɛ ŋa bɛ tɩ bɛr wõ ɩ. Bɛ tɩ kpãa nɩ tobr mɛ̃ a bɛ sãàkʋm-kore na bɛ tɩ sàw de a Sore bɛ Naaŋmɩn a.

¹⁵Bɛ tɩ zawr'ɩ a Naaŋmɩn nɛ́ɛ bɛr, nɩ a wõ-taa ʋ na tɩ maal'ɩ a bɛ sãàkʋm-kore a, nɩ a kpaalʋ ʋ na tɩ kpaalɩ bɛ a. Bɛ tɩ tu n ŋmɩmɛ na bɛ ɩ bom za a, mɩ̀ lɩɛbɩ nɩbɛ na bɛ ɩ bom za a. Bɛ tɩ cɔwr'ɩ a nɩ-bʋʋr-yoru na viiri koli bɛ a ɩ-ɩrɩ, a Sore na saa tɩ yel bɛ, kɛ́ bɛ taa ɩrɛ mɛ̃ a bɛl a.

¹⁶Bɛ zawr'ɩ a Sore bɛ Naaŋmɩn nɛ-ƴãwnɩ za bɛr, bɛ nyɩl'ɩ kure maal'ɩ náli ayi[35], bɛ bà n dà-bara, bɛ puor'ɩ a salom zu bʋ̃-nyɩwrɩ za, ɛ́ maalɩ a Báàl.

¹⁷Bɛ nyɩw nɩ a bɛ bidɛbr nɩ a bɛ pɔwyaar maal'ɩ bàwr[36]. Bɛ tu n tɩtɩblʋ nɩ a nɩ-daar-yele-bãwfʋ ɩ-ɩrɩ pùor. Bɛ tu n ɩ-ɩrɩ na bɛ vɩɛl a Sore zie a pùor, sãw a ʋ suur.

¹⁸Lɛ n'a a Sore tɩ nyɛ̃ nɩ a Ɩsɩrayɛl nɩbɛ suur yaga za, ɩ bɛ cen zãá nɩ ʋ. A Zuda dɔwlʋ yõ n'ʋ tɩ cãà be.

¹⁹Ɛcɛ a Zuda tẽw nɩbɛ mɩ̀ bɛ tɩ tu a Sore bɛ Naaŋmɩn nɛ-ƴãwnɩ ɛ. A Ɩsɩrayɛl naalʋ-tẽw nɩbɛ tub'a bɛ tɩ de.

²⁰Alɛ n'a so a Sore tɩ zawrɩ a Ɩsɩrayɛl nɩbɛ za bɛr. Ʋ tɩ siwri bɛ na, bɛr bɛ kʋ̀ a nɩ-farbɛ, ɛ́ wa baa diw bɛ bɛr zãá nɩ ʋ.

²¹A lɛ a Sore na tɩ ŋmãa a Ɩsɩrayɛl tẽw ír a Daviir naalʋ-tẽw pʋɔ a, a Ɩsɩrayɛl tẽw dem tɩ ír'ɩ Nevatɩ bidɛb, Zerobowam, ƴãw k'ʋ ɩ a bɛ nãà. A Zerobowam tɩ ɩ na bɛ zawrɩ a Sore tub, ɛ́ ƴãw bɛ maalɩ yel-bi-faar faar.

²²A lɛn daar za n'a a Ɩsɩrayɛl nɩbɛ cãà maalɛ a yel-bebe al za a Zerobowam na tɩ maalɩ a.

²³A Sore bɛ wa tɩ cãà bɔbr k'ʋʋ mɩ́ nyɛ̃ bɛ a ʋ niŋé ɩ, ɛ́ ƴãw bɛ diw bɛ cen nɩ Asiiri tẽw, bɛ cãà nɩ a be nɩ dɩ̃a. À à ŋá n'a a Sore tɩ tu a lɛ ʋ na ƴãw a ʋ ƴɛ̀r-manbɛ, ʋ tõ-tõ-biir, yel a.

²⁴A Asiiri tẽw nãà tɩ ƴãw na nɩbɛ yi Babɩlɔn, Kutɩ, Awa, Hamatɩ nɩ Sefarwayim, ɛ́ wa zɩ̃ a Samaari tẽw tẽ-bɛrɛ pʋɔ, lɩɛrɩ a Ɩsɩrayɛl nɩbɛ bɛ na tɩ diw cen nɩ zi-yoru a. A nɩbɛ bɛ ŋa tɩ de nɩ a zie só ʋ, ɛ́ kpɩɛr a tẽ-bɛrɛ pʋɔ.

²⁵Ɛcɛ, bɛ na tɩ zɩ̃ a be a paalʋ a, bɛ bɛ tɩ puore a Sore ɩ, a Sore ƴãw gben wa kʋ bɛ mɩnɛ.

²⁶Lɛ n'a bɛ tɩ yel a Asiiri tẽw nãà: «A nɩbɛ fʋ na ír a bɛ ten, ƴãw bɛ wa kpɩɛr a Samaari tẽ-bɛrɛ pʋɔ a, bɛ bɛ bãw a lɛ bɛ na mɩ́ puori a tẽw ŋa ŋmɩn a ɩ. Alɛ n'a so a ŋmɩn ŋa ƴãw gben a wa kʋrɛ bɛ.»

²⁷Lɛ n'a a Asiiri tẽw nãà tɩ yel à ŋá: «A bàwr-maalbɛ ɩ̃ na ír a Samaari cen nɩ a, nyɩ lɛb tɛr a kãw wa n a Samaari, ʋ wa kpɩɛr a be, ɛ́ wul a nɩbɛ a lɛ bɛ na mɩ́ puori a tẽw ŋmɩn a.»

²⁸A bàwr-maalɛ kãw, bɛ na tɩ ír a Samaari cen nɩ a, tɩ lɛb'a wa zɩ̃ Betɛl, wule a nɩbɛ a lɛ bɛ na na puore a Sore a.

²⁹Ɛcɛ a nɩ-bʋʋr-yoru bɛ ŋa tɩ maal'ɩ a bɛ ŋmɩmɛ dasuli ƴãw a puoru yie pʋɔ, a bɛlɩ dem na tɩ dãw kpɩɛr a Samaari a na tɩ ŋma a. Bʋʋrɛ ŋa za mɩ́ tɩ ɩ n à à ŋá a tẽ-bɛrɛ al ʋ na kpɩɛr a pʋɔ.

³⁰A nɩbɛ na tɩ yi a Babɩlɔn wa a, tɩ maal'ɩ Sukotɩ-Benɔtɩ dasule, Kutɩ tẽw dem maalɩ Nɛrgal dasule, Hamatɩ tẽw dem maalɩ Asima dasule.

³¹Awa tẽw dem tɩ maal'ɩ Nɩbaazɩ nɩ Tartakɩ dasuli. Sefarwayim tẽw dem tɩ cãà na nyɩwr a bɛ bidɛbr nɩ a bɛ pɔwyaar, maalɛ nɩ bàwr kʋ̀rɛ a bɛ ŋmɩmɛ Adɩramelɛkɩ nɩ Anamelɛkɩ.

³²A nɩbɛ bɛ ŋa tɩ puore nɩ a Sore, ɛ́ mɩ̀ mɩ́ tɩ cãà kaa ír bàwr-maalbɛ a bɛ pʋɔ, kɛ́ bɛ maalɛ a yele a bɛ yúor ƴãw, a maalʋ-ziir puoru yie pʋɔ.

³³A na ɩ à ŋá a, bɛ tɩ puore nɩ a Sore, ɛ́ mɩ̀ cãà puore a bɛ ŋmɩmɛ, mɛ̃ a lɛ a na tuur a ten al pʋɔ bɛ na yi wa a.

³⁴A dɩ̃a mɩ̀ a, a bɛ bʋʋrɛ cãà na tuur a koro za tub á ŋá. Bɛ bɛ puore a Sore ɩ, bɛ bɛ tuur a bɛl mɩŋa nɛ́ɛ nɩ a bɛl mɩŋa tub ɛ. Bɛ mɩ̀ bɛ tuur a wulu nɩ a nɛ-ƴãwnɩ a Sore na kʋ̀ a Zakɔb bʋʋrɛ a ɩ, a Zakɔb a Sore na por Ɩsɩrayɛl a[37].

³⁵Ɛcɛ a Sore tɩ maal'ɩ nɩ a Zakɔb bʋʋrɛ wõ-taa, ɛ́ yel à ŋá kʋ̀ bɛ: «Nyɩ taa puore ŋmɩn-yoru ɛ, nyɩ taa gbine dume gũune tɩ tʋɔr tẽw a niŋé ɩ, nyɩ taa tone a tome ɩ, ɛ́ taa maalɛ bàwr kʋ̀rɛ a ɩ.

³⁶Mãa yõ n'ʋ nyɩ na puore, a mãa Sore na ɩ n a ɩ̃ fãw nyɩ yi a Eziptɩ tẽw pʋɔ a. Mãa niŋé n'a nyɩ na mɩ́ gbĩ dume gũu tɩ tɔ tẽw, mãa n'ʋ nyɩ na maalɛ bagɛ kʋ̀rɛ.

³⁷Nyɩ na sàwr'ɩ a nɛ-ƴãwnɩ, a tub nɩ a wulu za ɩ̃ na sɛb kʋ̀ nyɩ a, ɛ́ nyɩ na sàwr a nɩ bibie za. Nyɩ kʋ̃ puore ŋmɩn-yoru ɛ.

³⁸Nyɩ taa yiire a wõ-taa ɩ̃ na maal'ɩ nyɩ a bɛrɛ ɩ, ɛ́ taa puore ŋmɩn-yoru ɛ.

³⁹A mãa Sore nyɩ Naaŋmɩn n'ʋ nyɩ na puore, mãa n'ʋ na faa nyɩ a nyɩ dɔ̃ dem za nuru pʋɔ.»

⁴⁰Ɛcɛ a nɩbɛ bɛ ŋa bɛ bɛr wõ ɩ. Bɛ nɩ̃ɛ na tɩ cãà tɛr a bɛ koro za tub.

⁴¹À ŋá n'a bɛ tɩ ƴãwnɛ a Sore, ɛ́ mɩ̀ cãà maalɛ a bɛ tɩbɛ. A bɛ bibiir nɩ a bɛ bʋʋrɛ a bɛ pùorí tɩ cãà na cow ɩrɛ à à ŋá, wa tɔ a dɩ̃a.