Read Dagara, Northern 2 Na-mɩnɛ 19 Bible Online

2 Na-mɩnɛ 19 - Dagara, Northern bible

2 Na-mɩnɛ 19

¹A nãà Ezekɩasɩ na tɩ wõ a bɛ manʋ a, ʋ mɩ̀ taw nɩ a ʋ kparɩ cɩɛrɩ, ɛ́ su vʋɔra kparʋ cen nɩ a Sore Ŋmɩn-yir-kpɛ̃ɛ́.

²Ʋ mɩ̀ tɩ tõ n a nãà yir nɩ-kpɛ̃ɛ Elɩakɩm, a sɛ-sɛbrɛ Sevina nɩ a bàwr-maalbɛ bɛl na kor zuo a bɛ taabɛ a, a naaŋmɩn-ƴɛ̀r-manɛ, Amɔtɩsɩ bidɛb, Ɩzayi, zie. A nɩbɛ bɛ ŋa mɩ̀ tɩ su n vʋɔrɩ kparɩ.

³A Ezekɩasɩ ƴɛ̀rʋ ŋa n'ʋ a tɩ fɛr kɛ́ bɛ tɩ yel kʋ̀ a naaŋmɩn-ƴɛ̀r-manɛ: «A bibir ŋa ɩ n pʋl-vʋ̃ɔ-kpɛ̃ɛ, dɔwrʋ nɩ vĩ bibir a tɩ zie. Mɛ̃ a lɛ bɛ na mɩ́ yel a, a bie ta n yib, ɛ́ a mã bɛ tɛr fãw na ʋ̃ʋ́nɩ ʋ yi ɛ.

⁴A Asiiri tẽw nãà tõ n a ʋ sojarɩ nɩ-kpɛ̃ɛ na mɩ́ be a ʋ zie a, k'ʋʋ wa tʋ a Naaŋmɩn na vʋʋrɛ a. A Sore fʋ Naaŋmɩn nãá wõ a zʋmɛ á ŋá za, ɛ́ dɔwrɩ ʋ a ƴɛ̀rʋ ʋ na ƴɛ̀r a ƴãw! Fʋ̃ʋ a, puori a Sore a ʋ nɩ-bʋʋrɛ na cɛ a ƴãw.»

⁵A nɩbɛ a nãà Ezekɩasɩ na tõ a tɩ cen na tɩ páw a Ɩzayi,

⁶ʋ yel bɛ à ŋá: «Nyɩ cen tɩ yel à à ŋá a Sore na yere a kʋ̀ a nyɩ nɩ-kpɛ̃ɛ: “Fʋ wõ n a zʋmɛ a Asiiri tẽw nãà sojarɩ nɩ-bɛrɛ na tʋ m'a. Ta zɔrɛ dɛ̃bɩ̃ɛ a lɛ bɛ na yel a ƴãw ɛ.

⁷A bɛ nãà na wõ n yel. Lɛ n'a mãa mɩŋa na ƴãw ʋ a tɩɛrʋ k'ʋʋ lɛb kul a ʋ tẽw. Be n'a ɩ̃ na tɩ ƴãw bɛ kʋ ʋ.”»

⁸A Asiiri tẽw dem sojarɩ nɩ-kpɛ̃ɛ, na mɩ́ be a nãà zie a, tɩ wõ na k'aa ʋ nɩ-kpɛ̃ɛ yi n a Lakisɩ cen tɩ zɛbr'ɩ Livina. A be n'a ʋ tɩ cen tɩ páw ʋ.

⁹Ɛcɛ a Asiiri tẽw nãà tɩ wõ na bɛ yere kɛ́ a Eziptɩ tẽw nãà, Tɩraka, na yi Etiopi a, waar'a k'ʋʋ wa zɛb'ɩ ʋ. Lɛ n'a ʋ tɩ tõ kɛ́ bɛ tɩ yel à ŋá kʋ̀ a Ezekɩasɩ,

¹⁰a Zuda tẽw nãà: «Fʋ ƴãw nɩ a fʋ tɩɛrʋ a fʋ Naaŋmɩn ƴãw, ɛ́ tɩɛrɛ k'ʋʋ kʋ̃ bɛr mɛ̃ ɩ̃ zɛb de a Zerizalɛm ɛ, ta bɛr ʋ bɛ̀lɛ fʋ ɛ.

¹¹Fʋ wõ n a lɛ a Asiiri tẽw na-mɩnɛ na ɩ a ten za a: bɛ sãw a na bɛr pẽlẽpẽlẽ. Ɛ́ fʋ̃ʋ tɩɛrɛ kɛ́ fʋ na cɩ̃ɛ na a?

¹²A lɛn daar a na-mɩnɛ na de m niwn a na tɩ sãw a tẽ-bɛrɛ Gozan, Haran, Eresɛfʋ nɩ a Edɛn tẽw dem tẽ-kpɛ̃ɛ, Telasaar, bɛr a, a nɩ-bʋʋrɛ bɛ ŋa ŋmɩmɛ bɛ tɩ tʋ̃ɔ́ gù a tẽ-bɛrɛ á ŋá ɩ.

¹³Nyɩnɛ n'a a Hamatɩ, Arpadɩ, Layiir, Sefarwayim, Hena nɩ Iwa na-mɩnɛ be?»

¹⁴A Ezekɩasɩ tɩ de nɩ a sɛb-tʋɔla, a nɩbɛ bɛ na tõ n a nuru pʋɔ, kanɩ. Al pùorí, ʋ do a Sore Ŋmɩn-yir-kpɛ̃ɛ́, tɩ dɔl a sɛbɛ a Sore niŋé,

¹⁵ɛ́ puori à ŋá: «Sore e, Ɩsɩrayɛl Naaŋmɩn i, fʋ̃ʋ na zɩ̃ a seribɛ̃ mɩnɛ zu-sɔw a, fʋ̃ʋ n'ɩ a tẽ-daa naalʋ-ten za Naaŋmɩn-been yõ, fʋ̃ʋ n'ʋ maalɩ a salom nɩ a tẽw.

¹⁶Sore e, ƴãw tobr bɛr wõ, yuo a mimie bɛl kaa! Wõ a zʋmɛ a Senakerib na tõ a nɩbɛ bɛ wa tʋ b a, fʋ̃ʋ Naaŋmɩn na vʋʋrɛ a!

¹⁷Sore e, sɩza n'a a Asiiri tẽw na-mɩnɛ sãw a nɩ-bʋʋr-yoru nɩ a bɛ ten bɛr.

¹⁸Bɛ lɔb'ɩ a bɛ ŋmɩmɛ ƴãw vũumí, a na bɛ tɩ ɩ Naaŋmɩn a ƴãw. A ɩ n nɩsaalbɛ nuru bʋ̃-maalɩ, dàar nɩ kʋsɛbɛ tɛwr, alɛ n'a so a Asiiri tẽw na-mɩnɛ sãw a bɛr.

¹⁹Ɛcɛ fʋ̃ʋ, Sore tɩ Naaŋmɩn i, faa tɩ a Senakerib nuru pʋɔ. Lɛ n'a a naalʋ-ten za pʋɔ bɛ na bãw kɛ́ fʋ̃ʋ yõ n'ʋ ɩ Naaŋmɩn.»

²⁰Lɛ n'a a Amɔtɩsɩ bidɛb, Ɩzayi, tɩ tõ bɛ tɩ yel a Ezekɩasɩ: «À ŋá n'a a Sore, a Ɩsɩrayɛl Naaŋmɩn, yere: Ɩ̃ wõ n a puoru fʋ na puori mɛ̃, a Asiiri tẽw nãà, Senakerib, ƴãw a.

²¹Wone a ƴɛ̀rʋ ɩ̃ na ƴɛ̀rɛ cáarɛ nɩ ʋ a: A Sɩyɔ̃ tẽw tobr bɛ ka fʋ ƴãw ɛ, ʋ ɩrɛ fʋ na laar. A Zerizalɛm tẽw na vɩɛl'a, kpɔwrɛ fʋ na, ŋmɩwrɛ nɩ ƴãwn.

²²Ãa n'ʋ fʋ tʋ a zʋmɛ? Ãa n'ʋ fʋ ɩ la? Ãa zie n'a fʋ sʋ̃ɔmɩ sàw ƴɛ̀r, ãa n'ʋ fʋ jɩɛlɩ? Mãa n'ʋ, a mãa Ɩsɩrayɛl Naaŋmɩn na ɩ sõw a!

²³Fʋ ƴãw nɩ a fʋ nɩbɛ fʋ na tõ a, bɛ tʋ m, a mãa Sore. Fʋ yel'a: “A mãa Senakerib a, ɩ̃ do n tan saa-zu za, nɩ a ɩ̃ zɛbr-torko-yaga, do tɩ ta a Libã tãw nyʋɔrɩ́, k'ɩ̃ɩ tɩ cɛ̀ a ʋ sɛɛdɩr tɩ-vɩɛlɩ zie, nɩ a ʋ sɩpɩrɛ tɩ-kɛrɩ zie. Ɩ̃ na do na tɩ ta a ʋ nyɔ-ɓɩɩla nɩ a ʋ tuw-zũgulu.

²⁴A mãa a, ɩ̃ tuw nɩ buli, ɛ́ nyũ nɩ-bʋʋr-yoru kʋ̃ɔ. Ɩ̃ na nɛ̃ nɩ gbɛ́r a Eziptɩ tẽw, ɩ a Nɩl man-gbɛ́ɛ a kò!”

²⁵Alɛ, Senakerib i, fʋ bɛ bãwnɩ a ɩ? Mãa n'ʋ cɔbrɩ a yele á ŋá, koro kãw za, daar na bɛ gbʋ́r a n'a ɩ̃ tɩɛrɩ a bin, ƴɛrɛŋa a, ɩ̃ maalɛ nɩ a yele á ŋá. Fʋ̃ʋ n'ʋ ɩ̃ tɩ bãwnɩ, kɛ́ fʋ wa ɩ a tẽ-bɛrɛ, bɛ na cɔbrɩ a kpɛmɛ a zɛbr ƴãw a, a lɩɛbɩ deboru.

²⁶A ten á ŋá nɩbɛ kpãkpamɛ kpi na, dɛ̃bɩ̃ɛ ɩrɛ bɛ na, vĩ nyɔw bɛ na. Bɛ ŋmɛ̃ na mɛ̃ a póru mʋ̃ɔ a, mɛ̃ a mɔ̃-ɓaar a, mɛ̃ a gar zu mʋ̃ɔ na bɛ mɩ́ bul baarɩ ɛ́ ko a.

²⁷Ɩ̃ bãw nɩ a fʋ bom za: fʋ na zɩnɛ a, fʋ na yire bɩɩ fʋ na kpɩɛr a, nɩ fʋ mɩ̀ na nyɛ̃ nɩ mɛ̃ suur a.

²⁸Ɛcɛ fʋ nyɛ̃ nɩ mɛ̃ nɩ suur, ɩ̃ wõ n a fʋ nyɔka-ƴɛ̀rʋ fʋ na ƴɛ̀r a. A lɛ ƴãw a, ɩ̃ na ƴãw fʋ nɩ bãw a nyɔbɔwrɩ́, ɛ́ ƴãw fʋ nɔ-bãw, lɛb tu n fʋ a sɔ́r ʋl fʋ na tu wa a, kul'ɩ a fʋ tẽw.

²⁹Ɛcɛ a fʋ̃ʋ, Ezekɩasɩ a, bãwfʋ ŋa n'ʋ ɩ̃ kʋ̀rɛ fʋ: a yũona a, ble-yɛrɛ n'a a nɩbɛ na dɩ, a vɩɛr a mɩ̀ cãà ɩ a lɛ. Ɛcɛ a yome ata sob a, nyɩ na tʋ̃ɔ́ na bʋ̀rɛ ɛ́ cɩɛr a nyɩ ble, kʋɔr a nyɩ divɛ̃ tɩɩr póru, ɛ́ dɩrɛ a wɔmɛ.

³⁰A Zuda naalʋ-tẽw nɩbɛ bɛl na na cãà vʋʋrɛ a, na lɛb'a ɩ mɛ̃ tɩɛ na tɛ nyɩgɛ kpɛ tẽw, ɛ́ a wuli tɛr wɔmɛ a.

³¹Bʋ̃ʋ n'ʋ vɛ̃, nɩbɛ na cɛ a na yi n a Zerizalɛm, nɩbɛ na cɩ̃ɛ a na ìr'a àr a Sɩyɔ̃ tãw zu.» A Ɩzayi tɩ yel a ƴãw pʋɔ: «À ŋá n'a a Sore na ɩ, a ʋ nɔ̃wfʋ na tʋlɛ a zũú.

³²Ƴɛrɛŋa a, nyɛ̃ a lɛ a Sore na yere a Asiiri tẽw nãà ƴãw a: “Ʋ kʋ̃ kpɛ a tẽ-kpɛ̃ɛ ŋa pʋɔ ɩ, ʋ bɛ tɛbr'ɩ ʋ pime ɩ, ʋ bɛ pine a ʋ zɛbr-kur-pãgalɩ ɛ́ zɛbr'ɩ ʋ ɛ, ʋ bɛ kaalɛ tanɛ gbone a ʋ dacin dob ƴãw ɛ.

³³A sɔ́r ʋl ʋ na de wa a ka a, ʋlɛ n'ʋ ʋ na lɛb de kul, ʋ bɛ kpɩɛr a tẽ-kpɛ̃ɛ ŋa pʋɔ ɩ. A mãa Sore, mãa n'ʋ yere.

³⁴Ɩ̃ na gù n a Zerizalɛm ɛ́ faa ʋ, ɩ̃ na ɩ Naaŋmɩn a ƴãw, nɩ a Daviir ɩ̃ na tu a ƴãw.”»

³⁵A ʋlɩ tɩ̃ɩsɔw nɛ a, a Sore malkɩ tɩ wa n a Asiiri tẽw dem laɩ pʋɔ, wa kʋ nɩbɛ tùr-kʋba dɔwlɩ tùr-lɩz'a anaar nɩ anũu (185 000). A biɓaara a, a sojarɩ tɩ ìr'a nyɛ̃ a kũuni bɛ ŋa za.

³⁶Lɛ n'a a Asiiri tẽw nãà, Senakerib, tɩ ìr lɛb kul a Nɩnɩɩvʋ, tɩ be a be.

³⁷Bibir kãw ʋ na tɩ puore a ʋ ŋmɩn Nɩsɩrɔkɩ yir a, a ʋ bidɛbr ayi kãw, Adɩramelɛkɩ nɩ Saresɛɛr, tɩ kʋ ʋ na ɛ́ zɔ cen Araratɩ. A ʋ bidɛb ƴen sob, Asaradɔ̃, tɩ lɩɛr'ʋ na dɩ a naalʋ.