Read Dagara, Northern 2 Na-mɩnɛ 2 Bible Online

2 Na-mɩnɛ 2 - Dagara, Northern bible

2 Na-mɩnɛ 2

¹Nyɛ̃ a lɛ a Sore na ír a Eli, sɛsɛb-pɩl pʋɔ, do n a salom zu a. Bibir kãw, a Eli nɩ a Elize tɩ yi n a Gilgal cere.

²Bɛ na tɩ ta zie kãw a, a Eli yel'ɩ a Elize: «Ɩ̃ zɛlɛ fʋ na, zɩ̃ a ka, a Sore tone mɛ̃ nɩ Betɛl.» Ɛcɛ a Elize tɩ sɔw ʋ na: «A Sore na vʋʋrɛ a, nɩ fʋ mɩ̀ na vʋʋrɛ a zũú, mãa n'ʋ yere, ɩ̃ bɛ bɛrɛ a fʋ tub ɛ!» Lɛ n'a bɛ tɩ lãw cen a Betɛl.

³A naaŋmɩn-ƴɛ̀r-manbɛ lãw nɩbɛ bɛl na kpɩɛr a Betɛl a, tɩ tuor'ɩ a Elize sowr'ʋ: «Fʋ bãwnɩ a na a Sore na na ír a fʋ nɩ-kpɛ̃ɛ, a dɩ̃a, do n a salom zu a?» A Elize tɩ sɔw na: «Ʋ̃ʋ, ɩ̃ mɩ̀ bãwnɩ a na, ɛcɛ nyɩ ta ƴɛ̀rɛ a ƴɛ̀rʋ a ɩ̃ zie ɩ!»

⁴A Eli tɩ lɛb'a yel a Elize: «Elize e, ɩ̃ zɛlɛ fʋ na, zɩ̃ a ka! A Sore tone mɛ̃ nɩ Zeriko.» Ɛcɛ a Elize tɩ sɔw ʋ na: «A Sore na vʋʋrɛ a, nɩ fʋ mɩ̀ na vʋʋrɛ a zũú, mãa n'ʋ yere, ɩ̃ bɛ bɛrɛ a fʋ tub ɛ!» Lɛ n'a bɛ tɩ lãw cen a Zeriko.

⁵A naaŋmɩn-ƴɛ̀r-manbɛ lãw nɩbɛ bɛl na kpɩɛr a Zeriko a tɩ taw na ta a Elize zie sowr'ʋ: «Fʋ bãwnɩ a na a Sore na na ír a fʋ nɩ-kpɛ̃ɛ, a dɩ̃a, do n a salom zu a?» A Elize tɩ sɔw na: «Ʋ̃ʋ, ɩ̃ mɩ̀ bãwnɩ a na, ɛcɛ nyɩ ta ƴɛ̀rɛ a ƴɛ̀rʋ a ɩ̃ zie ɩ!»

⁶A Eli tɩ cãà na lɛb yel a Elize: «Ɩ̃ zɛlɛ fʋ na, zɩ̃ a ka, a Sore tone mɛ̃ nɩ Zurdɛ̃.» Ɛcɛ a Elize tɩ sɔw na: «A Sore na vʋʋrɛ a, nɩ fʋ mɩ̀ na vʋʋrɛ a zũú, mãa n'ʋ yere, ɩ̃ bɛ bɛrɛ a fʋ tub ɛ!» Lɛ n'a bɛ tɩ lãw lo a sɔ́r cere.

⁷Naaŋmɩn-ƴɛ̀r-manbɛ lɩz'a ayi nɩ pie tɩ páw bɛ na, tɩ tɛw àr zãá nɩ a Eli nɩ a Elize na àr a Zurdɛ̃ nʋɔr a.

⁸A Eli tɩ yaa nɩ a ʋ kpar-kpɛ̃ɛ, puuli, ɛ́ ŋmɛ n a man kʋ̃ɔ, a bʋ́r be dʋrʋ nɩ gʋba, bɛ za ayi gãw nɩ gbɛ-kon.

⁹Bɛ na tɩ gãw baar'a, a Eli yel'ɩ a Elize: «Zɛlɩ a ʋlɩ bom nɛ fʋ na bɔbr k'ɩ̃ɩ ɩ kʋ̀ b a, ɛ́ a Sore bãw ír mɛ̃ a fʋ zie.» A Elize sɔw: «Ɩ̃ nãá tʋ̃ɔ́ páw a fʋ naaŋmɩn-ƴɛ̀r-manɛ vʋʋrʋ ziir ayi[3].»

¹⁰A Eli tɩ sɔw ʋ na: «Fʋ zɛlɛ nɩ bom a páwfʋ na kpɛmɛ a. Ɛcɛ fʋ̃ʋ wa nyɛ̃ m, a lɛn daar bɛ na íre mɛ̃ zãánɛ nɩ fʋ a, a fʋ zɛlʋ na tu na, fʋ̃ʋ bɛ wa nyɛ̃ m a, a fʋ zɛlʋ bɛ tuur ɛ.»

¹¹Bɛ na tɩ ƴɛ̀rɛ cere nɩ a, zɛbr-torko na ɩ vũu ɛ́ wie na ɩ vũu a tawr a, tɩ bʋ́r bɛ na. A Eli tɩ do n a salom zu, sɛsɛb-pɩl pʋɔ.

¹²A Elize tɩ nyɛ̃ na, ɛ́ cɩɩrɛ yere: «Ɩ̃ sãà a! Ɩ̃ sãà a! Fʋ tɩ zɛ̃ na mɛ̃ a Ɩsɩrayɛl zɛbr-torkori za, nɩ a wi-zɔmnbɛ za a!» Al pùorí, ʋ bɛ lɛb cãà nyɛ̃ a Eli ɛ. Lɛ n'a ʋ tɩ nyɔw a ʋ kparɩ taw cɩɛrɩ ziir ayi.

¹³Al pùorí, ʋ ɓáw a Eli kpar-kpɛ̃ɛ na tɩ yi a ʋ bawŋmamɛ zu lo a, lɛb wa n wa àr'ɩ a Zurdɛ̃ nʋɔr.

¹⁴Ʋ tɩ ŋmɛ n a man kʋ̃ɔ nɩ a Eli kpar-kpɛ̃ɛ, ɛ́ yel: «Nyɩnɛ n'a a Sore be, a Eli Naaŋmɩn?» Ɛ́ lɛb ŋmɛ a kʋ̃ɔ. Lɛ n'a a kʋ̃ɔ tɩ bʋ́r, be dʋrʋ nɩ gʋba, ʋ gãw.

¹⁵A Zeriko naaŋmɩn-ƴɛ̀r-manbɛ lãw nɩbɛ na tɩ àr zãá, ɛ́ nyɛ̃ a lɛ a Elize na ɩ a, tɩ yel'a: «A naaŋmɩn-ƴɛ̀r-manɛ vʋʋrʋ na tɩ be a Eli zie a, a Elize zie n'a ʋ be ƴɛrɛŋa.» Bɛ tɩ tuori ʋ na, gbĩ dume gũu tɩ tɔ tẽw a ʋ niŋé,

¹⁶ɛ́ yel ʋ: «Nɩbɛ lɩz'a ayi nɩ pie na tɛr soci-kpɛn a be n a ka. Tɩ na tõ bɛ na bɛ cen tɩ bɔ a fʋ nɩ-kpɛ̃ɛ. Kapaw, a Sore Vʋʋrʋ ɓáw ʋ na cen nɩ tɩ lɔb bɛr tãw kãw zu bɩɩ fʋɔla kãw pʋɔ.» Ɛcɛ a Elize tɩ yel'a kɛ́ bɛ ta tõ bɛ ɩ.

¹⁷Ɛcɛ bɛ tɩ fɛr ʋ nɩ lɛɛɛ, ʋ wa tɩ sàw. A lɛ n'a bɛ tɩ tõ a nɩbɛ lɩz'a ayi nɩ pie bɛl, bɛ tɩ bɔ a Eli bibie ata, ɛ́ bɛ nyɛ̃ ʋ ɛ.

¹⁸Bɛ na tɩ lɛb wa a Elize zie, ʋ na tɩ cãà be a Zeriko a, ʋ tɩ yel bɛ na: «Ɩ̃ bɛ tɩ yel kʋ̀ nyɩ kɛ́ nyɩ ta cen ɛ!»

¹⁹A Zeriko tẽw dem tɩ yel'ɩ a Elize: «Tɩ sore e, mɛ̃ a lɛ fʋ na nyɛ̃ a, a tɩ tẽ-kpɛ̃ɛ ŋa beba zie vɩɛl'a, ɛcɛ a kʋ̃ɔ n'a bɛ vɩɛl ɛ, ɛ́ a tẽsɔw bɛ búle bom za ɩ.»

²⁰A Elize tɩ yel'a: «Nyɩ de lali-paala ƴãw nyaarʋ wa kʋ̀ m». Bɛ wa n wa kʋ̀ ʋ.

²¹A Elize tɩ cen nɩ a bul-nʋɔr pɛr, tɩ ɩ a nyaarʋ lɔb ƴãw a kʋ̃ɔ pʋɔ ɛ́ yel: «À ŋá n'a a Sore yere: “Ɩ̃ ɩ na a kʋ̃ɔ á ŋá a vɩɛl, a bɛ lɛb ɩrɛ a bʋ̃-vʋʋrɩ a kpiir ɛ, ɛ́ a bʋ̃-bule na tʋ̃ɔ́ na lɛb bere be.”»

²²Lɛ n'a a kʋ̃ɔ vɩɛl wa tɔ a dɩ̃a, a tu mɛ̃ a lɛ a Elize na tɩ yel a.

²³A Elize tɩ yi n a Zeriko cere Betɛl. Ʋ na tɩ be a sɔ́r zu a, bibiir kãw na tɩ yi a tẽ-kpɛ̃ɛ pʋɔ wa a, tɩ ɩrɛ ʋ na laar, cɩɩrɛ yere nɩ: «Dúor, zu-kpalɛ ɛ! Dúor, zu-kpalɛ ɛ!»

²⁴Ʋ tɩ lɩɛb'a jɩ́r bɛ kaa, ɛ́ ŋmɛ ƴãw bɛ a Sore yúor ƴãw. Lɛ n'a wɛ-dʋ̃-faar ayi kãw bɛ na bʋɔlɛ ursɩ, ɛ́ a ɩ bʋ̃-nyan a, tɩ yi a tuw pʋɔ taw a bibiir lɩz'a ayi nɩ ayi bɛ ŋa cɩɛrɩ.

²⁵Al pùorí, a Elize tɩ yi n a be cen Karmɛl tãw zu, tɩ yi a Karmɛl lɛb wa a Samaari.