Read Dagara, Northern 2 Na-mɩnɛ 21 Bible Online

2 Na-mɩnɛ 21 - Dagara, Northern bible

2 Na-mɩnɛ 21

¹A Manase tɩ tɛr'ɩ yome pie nɩ ayi a lɛn daar ʋ na tɩ lɩɛbɩ a nãà a, ɛ́ dɩ a naalʋ a Zerizalɛm yome lɩz'a ata ŋmãa anũu. A mã tɩ dɩ na kɛ́ Hefisi-Ba.

²A Manase tɩ ɩ n a lɛ na bɛ vɩɛl a, a Sore zie, cɔwrɩ a nɩ-bʋʋr-yoru ɩ-faar za na bɛ maal'ɩ wob a, a nɩ-bʋʋrɛ bɛl a Sore na tɩ diw a tẽw pʋɔ, ɛ́ ƴãw a Ɩsɩrayɛl nɩbɛ zɩ̃ a.

³Ʋ tɩ lɛb'a mɛ a maalʋ-ziir a ʋ sãà Ezekɩasɩ na tɩ ŋmɛr bɛr a. Ʋ tɩ mɛ n bàwr-maal-kube a ŋmɩn Báàl ƴãw, ɛ́ bà dà-barɩ mɛ̃ a lɛ a Ɩsɩrayɛl tẽw nãà Akab na tɩ dãw ɩ a. Ʋ tɩ puor'ɩ a salom zu bʋ̃-nyɩwrɩ za, ɛ́ maalɩ a.

⁴Ʋ tɩ mɛ n bàwr-maal-kube a Zerizalɛm Ŋmɩn-yir-kpɛ̃ɛ pʋɔ, a yir ŋa ƴãw a Sore na tɩ ƴɛ̀r à ŋá a: «Ka n'a ɩ̃ na mɩ́ wul k'ɩ̃ɩ be na.»

⁵Ʋ mɩ̀ tɩ mɛ n bàwr-maal-kube a Ŋmɩn-yir-kpɛ̃ɛ davʋrɩ a za ayi pʋɔ, a salom zu bʋ̃-nyɩwrɩ za ƴãwfʋ ƴãw.

⁶Ʋ tɩ nyɩw nɩ a ʋ bidɛb maal'ɩ bàwr, ʋ tɩ tu n a tɩtɩblʋ bʋʋrɛ bʋʋrɛ pùor, ɛ́ mɩ́ cen tɩ páw a bɛlɩ dem na kabrɛ a nyãakpɩmɛ a[40]. Ʋ tɩ tɛr a ɩrɛ a lɛ na bɛ vɩɛl a Sore zie a, a Sore suur tɩ ìr.

⁷Ʋ mɩ̀ tɩ maal'ɩ a ŋmɩn-pɔw Asera dasule ƴãw a Ŋmɩn-yir-kpɛ̃ɛ pʋɔ, a yir ŋa ƴãw a Sore na tɩ yel à ŋá a Daviir nɩ a ʋ bidɛb Salomɔ̃ zie a: «A Ŋmɩn-yir-kpɛ̃ɛ ŋa pʋɔ n'a, nɩ a Zerizalɛm ka n'a ɩ̃ na wul k'ɩ̃ɩ be n ka kʋralɛ, a Zerizalɛm ɩ̃ na kaa ír a Ɩsɩrayɛl dɔwlʋ pie nɩ ayi tẽ-bɛrɛ za pʋɔ a.

⁸Ɩ̃ kʋ̃ lɛb ɩ a Ɩsɩrayɛl nɩbɛ yaarɛ gʋɔr, zãá nɩ a tẽw ɩ̃ na kʋ̀ a bɛ sãàkʋm-kore a ɩ, bɛlɛ wa tuur a ɩ̃ nɛ-ƴãwnɩ nɩ a wulu za ɩ̃ na ƴãw a ɩ̃ tõ-tõ-bie Moyiir kʋ̀ bɛ a.»

⁹Ɛcɛ a Zuda tẽw dem bɛ tɩ bɛr wõ a Sore ƴɛ̀rʋ ɛ. A Manase nɩ̃ɛ na tɩ ɩ bɛ bɔr, ɩ a ɩ-faar a tɩ zuo a nɩ-bʋʋrɛ a Sore na kʋ pàw pɛr, ɛ́ kʋ̀ bɛ a zie a, ɩ-faar.

¹⁰Lɛ n'a a Sore tɩ ƴãw a ʋ tõ-tõ-biir, a naaŋmɩn-ƴɛ̀r-manbɛ, ƴɛ̀r à ŋá:

¹¹«A Zuda tẽw nãà, Manase, na ɩ a ɩ-faar á ŋá za na bɛ maal'ɩ wob a, ʋ na ɩ a ɩb a kpɛ faa zuo a lɛ a Amoritɩ mɩnɛ na tɩ dãw ɩ a, ʋ na tɛr a ʋ tɩbɛ ƴãw a Zuda nɩbɛ maalɩ a yel-bier a,

¹²a al ƴãw a, à ŋá n'a a Sore, a Ɩsɩrayɛl Naaŋmɩn, yere: “Ɩ̃ na ɩ na faa na ta faa a páw a Zerizalɛm nɩ a Zuda, kɛ̀ dɛ̃bɩ̃ɛ mɩ́ nyɔw nɩr za na wõ ʋ a.

¹³Ɩ̃ na sãw nɩ a Zerizalɛm bɛr, mɛ̃ a lɛ ɩ̃ na sãw a Samaari nɩ a Akab yir bɛr a. Ɩ̃ na pɩɩrɩ nɩ a Zerizalɛm ʋ yi cãlãcãlã, mɛ̃ laa bɛ na cɩ̃ɩnɩ lɩɛbɩ vɔblɩ[41] a.

¹⁴Ɩ̃ na jɛ n a ɩ̃ nɩ-bʋʋrɛ nɩbɛ bɛl na cɛ a bɛr, ɩ̃ na ƴãw bɛ nɩ a bɛ dɔ̃ dem nuru pʋɔ, bɛ za a bɛ tẽw, fá n a bɛ bome za.

¹⁵Ɩ̃ na ɩ n à à ŋá, a ɩ̃ nɩ-bʋʋrɛ na ɩ a lɛ na bɛ vɩɛl a ɩ̃ zie a kʋralɛ a. Bɛ ɩrɛ nɩ kʋralɛ a ɩ̃ suur ìre, a ʋlɩ bibir a bɛ sãàkʋm-kore na yi a Eziptɩ a, wa tɩ tɔ a dɩ̃a.”»

¹⁶A Manase tɩ ƴãw na bɛ kʋ nɩbɛ na bɛ sãw a, yaga za, a Zerizalɛm tẽw tɩ ɩ zɩ̃ɩ tɛwr. A ɩ-faar á ŋá tɩ wa na wa ƴãw pʋɔ a yel-bebe za ƴãw, ʋ na tɩ ƴãw a Zuda nɩbɛ maalɩ a. Bʋ̃ʋ n'ʋ vɛ̃, ʋ tɩ ɩ na bɛ ɩ a lɛ na bɛ vɩɛl a, a Sore zie.

¹⁷A Manase yele al na cɛ a, a alɩ bome nɛ za ʋ na ɩ a, nɩ a lɛ ʋ na maalɩ a yel-bier a, a za sɛb'ɩ a «Zuda tẽw na-mɩnɛ ɩ-ɩrɩ sɛbɛ» pʋɔ.

¹⁸A Manase na wa kpi cen tɩ páw a ʋ sãà mɩnɛ a, bɛ ũù ʋ nɩ a nãà yir zaadɛ̃ pʋɔ, bɛ mɩ̀ na bʋɔlɛ kɛ́ a «Uza zaadɛ̃» a. A ʋ bidɛb Amɔ̃ n'ʋ tɩ lɩɛr'ʋ dɩ a naalʋ.

¹⁹A Amɔ̃ tɩ tɛr'ɩ yome lɩzɛr'ɩ ayi a lɛn daar ʋ na tɩ lɩɛbɩ a nãà a, ɛ́ dɩ a naalʋ yome ayi, a Zerizalɛm. A mã tɩ dɩ na kɛ́ Mesulemɛtɩ, ɛ́ ɩ Harusi, na yi Yotiva a, pɔwyaa.

²⁰A Amɔ̃ tɩ ɩ n a lɛ na bɛ vɩɛl a, a Sore zie, mɛ̃ a ʋ sãà Manase a.

²¹Ʋ tɩ ɩ n a lɛ tɔr za a ʋ sãà na ɩ a. Ʋ tɩ maal'ɩ a tɩbɛ a ʋ sãà na tɩ maalɛ a, ɛ́ puor'a.

²²Ʋ tɩ zawr'ɩ a Sore, a ʋ sãàkʋm-kore Naaŋmɩn bɛr, ɛ́ bɛ tu a lɛ a Sore na yel a ɩ.

²³A Amɔ̃ sojarɩ nɩ-bɛrɛ tɩ bʋ n taa a ʋ ƴãw, kʋ ʋ a ʋ yir.

²⁴Ɛcɛ a Zuda tẽw dem tɩ kʋ n a bɛlɩ dem za na tɩ bʋ taa kʋ a Amɔ̃ a, ɛ́ ƴãw a ʋ bidɛb, Zozɩasɩ, lɩɛr'ʋ ɩ a nãà.

²⁵A Amɔ̃ yele al na cɛ a, a alɩ bome nɛ ʋ na ɩ a, a sɛb'ɩ a «Zuda tẽw na-mɩnɛ ɩ-ɩrɩ sɛbɛ» pʋɔ.

²⁶Bɛ tɩ ũù ʋ nɩ a ʋ yaa pʋɔ, a “Uza Zaadɛ̃” pʋɔ, ɛ́ a ʋ bidɛb, Zozɩasɩ, lɩɛr'ʋ dɩ a naalʋ.