Read Dagara, Northern 2 Na-mɩnɛ 9 Bible Online

2 Na-mɩnɛ 9 - Dagara, Northern bible

2 Na-mɩnɛ 9

¹Bibir kãw, a naaŋmɩn-ƴɛ̀r-manɛ Elize tɩ bʋɔl'ɩ pɔlbile kãw, a naaŋmɩn-ƴɛ̀r-manbɛ lãw kãw pʋɔ, wa yel ʋ: «Cɔbrɩ fʋ tʋɔra a sɔ́r loba ƴãw. De a kãá nɩ a kole ŋa, cen nɩ Aramɔtɩ tẽw na be Galaadɩ a.

²A be a, fʋ na tɩ páw nɩ Yehu, Zozafatɩ bidɛb nɩ Nimisi yãw. Fʋ na bʋɔl'ʋ na taw yi n a ʋ taabɛ pʋɔ, kpɛ n di-zãána pʋɔ.

³Fʋ na tɩ de nɩ a kãá nɩ a kole cir ƴãw a ʋ zũú, ɛ́ yel: À ŋá n'a a Sore yere: “Ɩ̃ cire nɩ a kãá ƴãwn fʋ, kɛ́ fʋ ɩ a Ɩsɩrayɛl tẽw nãà!” Al pùorí, yuo a pan ɛ́ yi zɔ fɔ̃w fɔ̃w.»

⁴A naaŋmɩn-ƴɛ̀r-man-pɔlbile ʋl tɩ cen nɩ a Aramɔtɩ tẽw na be a Galaadɩ a.

⁵Ʋ na tɩ ta a be a, ʋ nyɛ̃ nɩ a Ɩsɩrayɛl zɛbr-nɩbɛ nɩ-bɛrɛ bɛ zɩ̃. Ʋ tɩ yel'a: «Nɩ-kpɛ̃ɛ ɛ, ɩ̃ tɛr'ɩ ƴɛ̀rʋ a fʋ zie!» A Yehu sowri: «A tɩ buor sob zie?» A naaŋmɩn-ƴɛ̀r-manɛ sɔw: «A fʋ̃ʋ zie n'a, nɩ-kpɛ̃ɛ ɛ!»

⁶A Yehu tɩ ìr'a, tɛr ʋ kpɛ n a yir pʋɔ. A naaŋmɩn-ƴɛ̀r-manɛ tɩ cir'ɩ a kãá ƴãw ʋ a zũú, ɛ́ yel: «À ŋá n'a a Sore, a Ɩsɩrayɛl Naaŋmɩn, yere: “Ɩ̃ cire nɩ a kãá ƴãwn fʋ, kɛ́ fʋ ɩ a ɩ̃ nɩ-bʋʋrɛ Ɩsɩrayɛl nãà.

⁷Fʋ na kʋ n a Akab, na dãw ɩ a fʋ nɩ-kpɛ̃ɛ a, yir dem. À ŋá n'a ɩ̃ na yáa a ɩ̃ ƴɛ̀r-manbɛ za nɩ a ɩ̃ tõ-tõ-biir za kũu san, a bɛl a Zezabɛl na ƴãw bɛ kʋ a.

⁸A Akab yir nɩbɛ za na kpi na, ɩ̃ na kʋ n a ʋ yir dɛbr za, a bibiir nɩ a nɩ-bɛrɛ.

⁹Ɩ̃ na ɩ n a ʋ yir dem, mɛ̃ a lɛ ɩ̃ na ɩ a Nevatɩ bidɛb, Zerobowam, yir dem a, nɩ a Ahiya bidɛb, Baesa, yir dem a.

¹⁰A Zezabɛl ʋl ƴãw a, nɩr bɛ ũùne ʋ ɛ, bʋ̃ʋ n'ʋ vɛ̃, baar na 'wɔb ʋ nɩ a Izireyɛl púo pʋɔ.”» Al pùorí, a naaŋmɩn-ƴɛ̀r-manɛ yuo a pan ɛ́ yi zɔ.

¹¹A Yehu tɩ yi na lɛb cen a nãà sojarɩ nɩ-bɛrɛ bɛl zie, bɛ tɩ sowr'ʋ: «Ɓaarʋ n'a a? Bʋnʋ ƴãw n'a a zu-jɩɩra ŋa wa a fʋ zie?» A Yehu tɩ sɔw na: «Bom za ƴãw bɛ n'a ɩ. Nyɩ bãw nɩ a nɩbɛ bɛ ŋa, nɩ a ƴɛ̀rʋ bɛ na mɩ́ ƴɛ̀rɛ a.»

¹²Bɛ tɩ yel ʋ na: «Ziri n'a fʋ ŋmarɛ! Manɩ a lɛ za na ɩ a kʋ̀ tɩ!» A Yehu sɔw: «À ŋá nɩ à ŋá n'a, ʋ ƴɛ̀r a ɩ̃ zie, ʋ yel mɛ̃ na: Nyɛ̃ a lɛ a Sore na yere a: “Ɩ̃ cire nɩ a kãá ƴãwn fʋ, kɛ́ fʋ ɩ a Ɩsɩrayɛl nɩbɛ nãà!”»

¹³A sojarɩ nɩ-bɛrɛ za tɩ yaar'ɩ a bɛ kpar-bɛrɛ daadaalɛ, yɛ́r ƴãw a gboro saa-zu, a Yehu dɔwlɩ a ʋ gbɛ́ɛ[16]. A wɩ-pɛblbɛ tɩ pɛbl'ɩ a wɩɩr, ɛ́ a nɩbɛ za cáarɛ: «Yehu ɩ n nãà!»

¹⁴A ʋlɩ vuo nɛ pʋɔ a, a Ɩsɩrayɛl zɛbr-nɩbɛ za tɩ gù n a Aramɔtɩ tẽ-kpɛ̃ɛ na be a Galaadɩ, a Siiri tẽw nãà Hazayɛl na wa zɛbr'ɩ a. Ɛcɛ a Yoram na tɩ zɛbr'ɩ a Hazayɛl a, a Siiri tẽw dem tɩ ƴãw ʋ nɩ bàalʋ. Lɛ n'a ʋ tɩ lɛb cen a Izireyɛl kɛ́ bɛ tɩ sanɩ ʋ. A Zozafatɩ bidɛb, Yehu, na ɩ Nimisi yãw a, nɩ a sojarɩ nɩ-bɛrɛ tɩ bʋ n taa a Yoram kʋb ƴãw. Ʋ tɩ yel'ɩ a sojarɩ nɩ-bɛrɛ: «Nyɩmɛ wa tu m a, nɩr za taa yire a tẽw pʋɔ ka, cere a Izireyɛl, k'ʋʋ tɩ yel a ʋlɩ bom nɛ na ɩ a ka a ƴɛrɛŋa a ɩ.»

¹⁶Al pùorí a Yehu do kpɛ a ʋ zɛbr-torko pʋɔ cere a Izireyɛl. A Yoram tɩ be n a be gã, ɛ́ a Zuda tẽw nãà, Akazɩasɩ, wa a ʋ nyɛ́b.

¹⁷A zi-gùre, na be a Izireyɛl yir-cõcowla pʋɔ a, tɩ nyɛ̃ nɩ a zɛbr-nɩbɛ na bɩɛlɛ a Yehu a, ɛ́ ƴãw bɛ yel a nãà: «Ɩ̃ nyɛ̃ nɩ zɛbr-nɩbɛ na waar a.» A Yoram yel ʋ: «Ƴãw wur-zɔmnɛ ʋ tuori bɛ sowri nyɛ̃, ɓaarʋ n'a a.»

¹⁸A wur-zɔmnɛ tɩ tuori bɛ na yel: «A nãà sowre na kɛ́ ɓaarʋ n'a a.» A Yehu sɔw: «Bʋ̃ʋ n'ʋ fʋ ɩrɛ nɩ ƴã-ɓaarʋ? Lɩɛbɩ tuur tɩ!» Lɛ n'a a zi-gùre tɩ yel: «A nɩr bɛ na tõ a cen na tɩ ta a bɛ zie, ɛcɛ ʋ bɛ lɛb waar ɛ.»

¹⁹A Yoram tɩ lɛb'a tõ wi-zɔmnbɛ ayi sob, ʋ tɩ ta a bɛ zie yel bɛ: «A nãà sowre na kɛ́ ɓaarʋ n'a a.» A Yehu sɔw: «Bʋ̃ʋ n'ʋ fʋ ɩrɛ nɩ ƴã-ɓaarʋ? Lɩɛbɩ tuur tɩ!»

²⁰A zi-gùre tɩ yel'a: «A nɩbɛ ayi sob bɛ na tõ a, ʋ ta n a bɛ zie, ɛ́ mɩ̀ bɛ lɛb waar ɛ. Ɛcɛ ɩ̃ nyɛ̃ nɩ Nimisi yãw Yehu bãw, a ʋ zɔba ƴãw: bʋ̃ʋ n'ʋ vɛ̃, ʋ mɩ́ zɔrɛ na mɛ̃ yãyaar sob a.»

²¹Lɛ n'a a nãà Yoram tɩ yel kɛ́ bɛ ƴãw a wie a ʋ zɛbr-torko ƴãw, ʋʋ do kpɛ. A Zuda tẽw nãà, Akazɩasɩ, mɩ̀ tɩ do na kpɛ a ʋ dem pʋɔ. Bɛ tɩ tuore nɩ a Yehu, tɩ páw ʋ a Nabɔtɩ, na yi Izireyɛl a, púo ƴãw.

²²A Yoram na tɩ nyɛrɛ a Yehu wa báarɛ a, ʋ sowr'ʋ na: «Yehu u, ɓaarʋ n'a a?» A Yehu sɔw: «Bʋnʋ yaa? Ŋmɩŋmɩn n'a a na tʋ̃ɔ́ ɩ a ƴã-ɓaarʋ, ɛ́ a fʋ mã Zezabɛl cãà puore a ŋmɩn-yoru, ɛ́ tone a ʋ sɔ-tome?»

²³A Yoram tɩ ƴaw na lɩɛbɩ zɔrɛ, ɛ́ cɩɩrɛ yere a Akazɩasɩ: «Gùre, Akazɩasɩ i! Bɛ mɩl tɩ na!»

²⁴A Yehu tɩ nyɔw nɩ a ʋ tam paalɩ a nũu, ɛ́ tɛ a Yoram a bawŋmamɛ cara pʋɔ, a pĩi tɩ cɔ̀r a socir puo, ɛ́ tɔl yi, ʋ lo kpi a ʋ zɛbr-torko pʋɔ.

²⁵Lɛ n'a a Yehu tɩ yel a ʋ sojarɩ nɩ-kpɛ̃ɛ Bidikaar: «Ɓáw a ʋ kũu lɔb bɛr a Izireyɛl tẽw Nabɔtɩ pu-pʋɔ. Lɛb tɩɛrɩ bãwnɩ a lɛ a Sore na tɩ yel kʋ̀ a ʋ sãà, a nãà Akab, a ʋlɩ bibir tɩ za ayi, mãa nɩ a fʋ̃ʋ, na tɩ be zɛbr-torko pʋɔ tuur ʋ a.

²⁶A Sore tɩ yel'a: “A mãa, a Sore, ɩ̃ zãa nyɛ̃ nɩ a za, a Nabɔtɩ nɩ a ʋ bidɛbr fʋ na ƴãw bɛ kʋ a. A lɛ pʋɔ a, a mãa, a Sore, ɩ̃ yere na kʋ̀rɛ fʋ k'ɩ̃ɩ na ɩ fʋ nɩ a lɛ yáa a san, a púo[17] ŋa tɔr za pʋɔ.” A Yehu tɩ yel'a ƴãw pʋɔ: a na ɩ à ŋá a, ɓáw a Yoram kũu lɔb bɛr a púo ŋa pʋɔ, mɛ̃ a lɛ a Sore na ƴɛ̀r a.»

²⁷A Zuda tẽw nãà na tɩ nyɛ̃ a lɛ a, ʋ zɔ na tu Bɛtɩ-Gan lowr. A Yehu tɩ ta na tu ʋ, ɛ́ yel a bɛlɩ dem na tɩ be a ʋ zie a, kɛ́ bɛ mɩ̀ kʋ a Akazɩasɩ. Bɛ tɩ tɛ ʋ na ƴãw bàalʋ, a ʋ zɛbr-torko zu, a sɔ́r na dúor a Guur a zu, Yivileam tẽw ƴãw. Ɛcɛ ʋ tɩ cãà na zɔ tɩ ta Megido, kpi a be.

²⁸A ʋ tõ-tõ-biir tɩ ƴãw ʋ nɩ a ʋ zɛbr-torko pʋɔ, cen nɩ a Zerizalɛm, tɩ ũù ʋ a ʋ sãàkʋm-kore ũufʋ zie, a «Daviir Tẽ-kpɛ̃ɛ» pʋɔ.

²⁹A Akab bidɛb, Yoram, naalʋ-dɩb yome pie nɩ been sob'a a Akazɩasɩ tɩ lɩɛbɩ a Zuda tẽw nãà.

³⁰A Zezabɛl tɩ wõ n a lɛ a yele za na ɩ a. Lɛ n'a ʋ tɩ ƴãw mimi-laara, ɛ́ maalɩ ʋ tʋɔra tɩ vɩɛl vɩɛl. Ɛ́ a Yehu na wa ta a Izireyɛl a, ʋ cen tɩ àr a tokoro vʋɔr ƴãw.

³¹A Yehu na dɛ wa gãwnɛ a tẽw dɩ̃dɔr wa báarɛ a, ʋ cɩɩr'a yel ʋ: «Zimiri[18] na kʋ a ʋ nãà a, ƴã-ɓaarʋ n'a fʋ waarɩ ɩ?»

³²A Yehu tɩ dʋɔ nɩ a zu a tokoro vʋɔr lowr, ɛ́ yel: «Ãa n'ʋ tu m? Ãa n'ʋ?» Dɛ-vaɩ ayi bɩɩ ata tɩ muul'ɩ a tokoro vɛɛ ƴãw.

³³Ʋ yel bɛ: «Nyɩ nyɔw ʋ lɔb bɛr a tẽw!» Bɛ tɩ nyɔw nɩ a Zezabɛl tur lɔb a tokoro vʋɔrɩ́. A ʋ zɩ̃ɩ tɩ ƴaw na waarɩ a dacin nɩ a wie, ɛ́ a Yehu do nɛ ʋ nɩ a ʋ zɛbr-torko.

³⁴A Yehu tɩ kpɛ n a nãà yir, dɩ kɛ́ nyũ, al pùorí, ʋ yel a nɩbɛ na be a be a: «Nyɩ kaa a pɔw ŋmɛ-ƴãwna ŋa zie, ũù ʋ, ʋ na ɩ nãà pɔwyaa a ƴãw.»

³⁵Bɛ tɩ yi na kɛ́ bɛ tɩ ɓáw ʋ ũù, ɛcɛ a zuŋman, a nuru nɩ a gbɛnaɓɛlɛ tɛwr'a bɛ tɩ nyɛ̃.

³⁶Bɛ tɩ lɛb'a cen tɩ yel kʋ̀ a Yehu, ʋ yel: «À à ŋá tɔr za n'a a Sore tɩ yel'ɩ a naaŋmɩn-ƴɛ̀r-manɛ Eli, na yi Tisibe a, nʋɔr: “Baar na 'wɔb'ɩ a Zezabɛl, a púo na be a Izireyɛl a pʋɔ.

³⁷Ɛ́ a Zezabɛl zarmɛ na yàar'a pàw a púo ŋa mɛ̃ pʋɔrʋ a, bɛ kʋ̃ mɩ́ tʋ̃ɔ́ yel kɛ́: Zezabɛl'ʋ ɛ.”»