Read Dagara, Northern 1 Bibie za yel-manɩ 11 Bible Online

1 Bibie za yel-manɩ 11 - Dagara, Northern bible

1 Bibie za yel-manɩ 11

¹A Ɩsɩrayɛl nɩbɛ za tɩ ɓã n taa a Daviir zie a Ebrɔ̃, ɛ́ yel ʋ à ŋá: «Tɩɩm nɩ fʋ̃ʋ a, zɩ̃ɩ-been nɩbɛ n'ɩ tɩ.

²A koro za a, a Sawul na saa tɩ cãà ɩ a nãà a, fʋ̃ʋ n'ʋ mɩ́ tɩ kaarɛ a Ɩsɩrayɛl sojarɩ zie, mɩ́ tɛr bɛ yi n a zɛbr, ɛ́ lɛb tɛr bɛ wa n. Ɛ́ a Sore fʋ Naaŋmɩn tɩ yel'ɩ à ŋá kʋ̀ b: “Fʋ̃ʋ n'ʋ na cɩ̃ɩnɛ a ɩ̃ nɩ-bʋʋrɛ Ɩsɩrayɛl, fʋ̃ʋ n'ʋ na ɩ a ɩ̃ nɩ-bʋʋrɛ Ɩsɩrayɛl nɩ-kpɛ̃ɛ.”»

³A Ɩsɩrayɛl nɩbɛ nɩ-kore tɩ wa na wa páw a nãà Daviir a Ebrɔ̃, ɛ́ a Daviir tɩ maal'ɩ bɛ nɩ wõ-taa a Ebrɔ̃ be, a Sore niŋé. Bɛ tɩ cir'ɩ a kãá ƴãw a Daviir ʋ ɩ a Ɩsɩrayɛl nãà, a tu a lɛ a Sore na tɩ ƴãw a Samɩɛl yel a.

⁴A Daviir nɩ a Ɩsɩrayɛl nɩbɛ za tɩ ìr'a cen a Zerizalɛm tẽw ƴãw. A tẽw mɩ̀ tɩ dɩ na kɛ́ Zebi, bʋ̃ʋ n'ʋ vɛ̃, a Zebizitɩ mɩnɛ na tɩ kpɩɛr a vuo nɛ pʋɔ a tɩ zɩ̃ n a be.

⁵A Zebizitɩ mɩnɛ tɩ yel'ɩ a Daviir: «Fʋ kʋ̃ kpɛ a ka ɩ.» Ɛcɛ a Daviir tɩ zɛb'a de a Sɩyɔ̃ tẽw zɛbr-yir-kpɛ̃w: a Daviir Tẽ-kpɛ̃ɛ n'ʋ.

⁶A Daviir tɩ yel'a: «Sob nɛ na na de niwn kʋ Zebizitɩ nɩr a, a ʋ sob na ɩ n zɛbr-nɩbɛ nɩ-kpɛ̃ɛ kpɛ̃ɛ.» Zowab, a mã na tɩ dɩ kɛ́ Seruya a, tɩ de nɩ niwn cen tɩ ŋmãa a zɛbr, ɛ́ ʋlɛ n'ʋ tɩ ɩ a zɛbr-nɩbɛ nɩ-kpɛ̃ɛ.

⁷A Daviir tɩ kpɩɛr'ɩ a zɛbr-yir-kpɛ̃w pʋɔ, alɛ so bɛ bʋɔlɛ ʋ kɛ́: «Daviir Tẽ-kpɛ̃ɛ.»

⁸Al pùorí, ʋ tɩ mɛ n a tẽw lõbowr-paalɛ na viiri koli a gbĩgbin bɛ na bʋɔlɛ kɛ́ Milo a, ɛ́ a Zowab lɛb mɛ a tẽw na baa cɛ a.

⁹À ŋá n'a a Daviir fãw tɩ kɛrɛ dɔwlɛ, a Sore, a kpɛnʋ-za-sob, na tɩ be a ʋ zie a ƴãw.

¹⁰Nyɛ̃ a Daviir soja-gãdaar nɩ-bɛrɛ. Bɛlɛ nɩ a Ɩsɩrayɛl nɩbɛ za nɛbɛ tɩ ɩ a Daviir ɩ a nãà, a tu a lɛ a Sore na tɩ yel a ʋ nɩbɛ ƴãw a. Bɛ bɛ tɩ yi a ʋ pùor towtow a ʋ naalʋ-dɩb daar za ɩ.

¹¹A Daviir soja-gãdaar bɛl yée n'ɩ á ŋá: Hakimoni bidɛb Yasoveam na ɩ a soja-zi-gùrbɛ nɩ-kpɛ̃ɛ a. Ʋlɛ n'ʋ tɩ kʋ nɩbɛ kɔbr ata (300), zɛbr been pʋɔ nɩ a ʋ kafin.

¹²Ahowa tẽw Dodo bidɛb Eleazaar'ʋ tɩ tu, ʋ tɩ pʋɔ nɩ a «Nɩbɛ ata lãw» pʋɔ.

¹³Ʋlɛ n'ʋ tɩ be a Daviir zie a Pa-Damim, a lɛn daar a Filisɩtɛ̃ mɩnɛ na tɩ ɓã taa a zɛbr ƴãw a. A Ɩsɩrayɛl zɛbr-nɩbɛ tɩ lɩɛb'a zɔ a Filisɩtɛ̃ mɩnɛ niŋé. Ɔɔzʋ púo kãw tɩ be n a be.

¹⁴A Eleazaar nɩ a ʋ nɩbɛ tɩ cen nɩ a púo sɔwlɩsɔw tɩ zɛb de a púo, ɛ́ pɔb a Filisɩtɛ̃ mɩnɛ. À ŋá n'a a Sore tɩ ɩ a Ɩsɩrayɛl zɛb tʋ̃ɔ́ pẽlẽpẽlẽ.

¹⁵Bibir kãw, a soja-vɩɛlɩ vɩɛlɩ na gùre a Daviir a pʋɔ a, nɩbɛ ata tɩ wa na wa páw a Daviir a pìir na pɩɛlɩ a Adulam tãw bɔw a pɛr. Bʋ̃ʋ n'ʋ vɛ̃, Filisɩtɛ̃ mɩnɛ tɩ maal'ɩ a bɛ laɩ a Erefayitɩ mɩnɛ fʋɔla pʋɔ.

¹⁶A Daviir tɩ be n a ʋ sɔwlʋ zie bɛ na gù vla a pʋɔ, ɛ́ Filisɩtɛ̃ mɩnɛ na-kpɛ̃ɛ-lɩɛrɛ kãw be a Bɛtɩlɛm.

¹⁷Bʋ̃-kãw vʋla wa ùr'a tɛr a Daviir ʋ sowri à ŋá: «Ãa n'ʋ pãa na wa n a Bɛtɩlɛm tẽw dɩ̃dɔr nʋɔr sa-bie-kʋ̃ɔ-bɔw kʋ̃ɔ wa kʋ̀ m ɩ̃ nyũ a?»

¹⁸Lɛ n'a a zɛbr-nɩbɛ ata bɛl tɩ cen tɩ ŋmʋr kpɛ a Filisɩtɛ̃ mɩnɛ laɩ pʋɔ, tɩ 'wɔ̃w a kʋ̃ɔ a sa-bie-kʋ̃ɔ-bɔw na be a Bɛtɩlɛm dɩ̃dɔr nʋɔr a pʋɔ, wa n wa kʋ̀ a Daviir. Ɛcɛ a Daviir tɩ zawr'ɩ a nyub. Ʋ tɩ cir a na bɛr tẽw, de a kʋ̀ a Sore,

¹⁹ɛ́ yel à ŋá: «Ɩ̃ Naaŋmɩn taa sàwr ɩ̃ wa nyuur a kʋ̃ɔ á ŋá ɩ! A ɩ na mɛ̃ a nɩbɛ bɛ ŋa zɩ̃ɩ a, bɛl na cɛ kũu-pire cen tɩ 'wɔ̃w a kʋ̃ɔ á ŋá a!» Ɛ́ tɩ zawrɩ a nyub. À ŋá n'a a zɛbr-nɩbɛ ata bɛ ŋa na kpɛ socir a tɩ ɩ.

²⁰Zowab yɛb Avɩsaɩ tɩ n'ɩ a «Nɩbɛ ata lãw» nɩ-kpɛ̃ɛ. Ʋlɛ n'ʋ tɩ zɛw a ʋ kafin bibir kãw dɔ̃ dem kɔbr ata (300) ƴãw kʋ bɛ. A ʋ yúor tɩ yi n a «Nɩbɛ ata lãw» pʋɔ.

²¹A ʋ yúor tɩ yi na gãw a ayi bɛl na cɛ a yúor, ɛ́ ʋlɛ n'ʋ wa ɩ a bɛ nɩ-kpɛ̃ɛ. Ʋ bɛ tɩ tɛr ʋ tɔ a «Nɩbɛ ata lãw» pʋɔ ɩ.

²²Kaviseyɛl tẽw Yehoyada bidɛb Benaya na tɩ ɩ soja-gãdaa a, tɩ tõ n gãda-tome yaga. Ʋlɛ n'ʋ tɩ kʋ a Mowab tẽw gãdaar ayi. Ʋlɛ mɩ̀ cãà n'ʋ tɩ siw sa-bie-kʋ̃ɔ-bɔw pʋɔ sa-pupure kãw bibir tɩ kʋ gbẽw.

²³Ʋlɛ mɩ̀ cãà n'ʋ kʋ a Eziptɩ tẽw dɔɔ na tɩ kɛrɩ ta mɛtɩr ayi nɩ ŋmãa a, ɛ́ tɛr kafin na bɛrmɛ sɛw pɛn-wobre dà-gbiwligi a. Dabɔl'ʋ ʋ tɩ tɛr ŋmãa nɩ a Eziptɩ tẽw dɔɔ a zɛbr, faa a ʋ kafin a ʋ nũú kʋ n ʋ.

²⁴A Yehoyada bidɛb Benaya gãda-tome n'ɩ à á ŋá. Ʋ tɩ ɩ na a ʋ yúor yi a «Nɩbɛ ata lãw» pʋɔ.

²⁵A «Nɩbɛ lɩzɛr'ɩ pie lãw» pʋɔ a, a ʋ yúor'ʋ tɩ yi zuo a bɛ za dem, ɛcɛ ʋ bɛ tɩ pʋɔ a «Nɩbɛ ata lãw» pʋɔ ɩ. A Daviir tɩ ƴãw na ʋ ɩ a ʋ sojarɩ na gùre ʋ a nɩ-kpɛ̃ɛ.

²⁶A zɛbr-nɩbɛ bɛl na cɛ a tɩ n'ɩ bɛ ŋa: Zowab yɛb Asayɛl, Bɛtɩlɛm tẽw Dodo bidɛb Ɛlhanan,

²⁷Harɔɔr tẽw Samɔtɩ, Palɔ̃ tẽw Helɛsɩ,

²⁸Tekowa tẽw Ɩkɛsɩ bidɛb Ɩra, Anatɔtɩ tẽw Aviezɛɛr,

²⁹Husa tẽw Sibekaɩ, Ahowa tẽw Ɩlaɩ,

³⁰Netofa tẽw Maraɩ, Netofa tẽw Baana bidɛb Helɛdɩ,

³¹Irivaɩ bidɛb Ɩtaɩ na yi a Givea na be a Bɛ̃zamɛ dɔwlʋ tẽw pʋɔ a, Pireaton tẽw Benaya,

³²Gaasɩ tẽw bà-fʋɔlɩ pɛr Huraɩ, Bɛtɩ-Araba tẽw Avɩɛl,

³³Bahurim tẽw Azɩmawɛtɩ, Saalvon tẽw Eliyaba,

³⁴a Bene-Hasɛm na yi Gizon a, Haraar tẽw Sage bidɛb Yonatan,

³⁵Haraar tẽw Sakaar bidɛb Ahiyam, Uur bidɛb Elifal,

³⁶Mekera tẽw Hefɛɛr, Palɔ̃ tẽw Ahiya,

³⁷Karmɛl tẽw Hɛsɩro, Ɛzɩbaɩ bidɛb Naaraɩ,

³⁸Natan yɛb Yowɛl, Hagiri bidɛb Mɩvaar,

³⁹Amɔ̃ tẽw dɔɔ Sɛlɛkɩ, Beerɔtɩ tẽw Naraɩ na mɩ́ tɩ tɛr a Seruya bidɛb Zowab zɛbr bome a,

⁴⁰Ira nɩ Garɛvʋ na yi Yetɛɛr yir a,

⁴¹Hititɩ dɔɔ Uuri, Alaɩ bidɛb Zavadɩ,

⁴²Siza bidɛb Adina na ɩ a Urubɛn dɔwlʋ nɩ-kpɛ̃ɛ kãw a, nɩ sojarɩ lɩzɛr'ɩ pie,

⁴³Maaka bidɛb Hanan nɩ Yosafatɩ na yi Metɛn tẽw a,

⁴⁴Asɩtarɔtɩ tẽw Uziya, Arowɛɛr tẽw Hotam bidɛbr Sama nɩ Yeyɩɛl,

⁴⁵Simiri bidɛb Yediayɛl nɩ a ʋ yɛb Yoha na yi Tisɩ tẽw a,

⁴⁶Mahawa tẽw Elɩɛl, Ɛlnaam bidɛbr Yerivaɩ nɩ Yosawɩa, nɩ Mowab tẽw Yitɩma,

⁴⁷de nɩ Elɩɛl, Ovɛdɩ nɩ Yaasɩɛl na yi Sova tẽw a.