Read Dagara, Northern 1 Bibie za yel-manɩ 16 Bible Online

1 Bibie za yel-manɩ 16 - Dagara, Northern bible

1 Bibie za yel-manɩ 16

¹Bɛ tɩ kpɛ n nɩ a Naaŋmɩn wõ-taa daga tɩ bin a pɛn-sɛw ʋl pʋɔ a Daviir na tɩ maalɩ a ʋ ƴãw a. Al pùorí, bɛ maalɩ nyɩw-a-za-bagɛ nɩ ƴã-ɓaarʋ bagɛ kʋ̀ a Naaŋmɩn.

²A Daviir na tɩ maalɩ a nyɩw-a-za-bagɛ nɩ a ƴã-ɓaarʋ bagɛ baar'a, ʋ tɩ ƴɛ̀r'ɩ nɔ-vla kʋ̀ a nɩbɛ a Sore yúor ƴãw.

³Al pùorí, ʋ tɩ põ nɩ bʋ̃-dɩrɩ a Ɩsɩrayɛl nɩbɛ za, dɛb bɩɩ pɔw za: ŋa za tɩ páw nɩ dipɛ̃-vilovilo been, datɩ tɩ-wɔmɛ gato nɩ divɛ̃ tɩɛ wɔ̃-kon gato been.

⁴A Daviir tɩ ƴãw nɩ a levitɩ bɛ mɩnɛ na tɩ so a tome a, bɛ be a Sore wõ-taa daga niŋé, kɛ́ bɛ tʋ̃ɔ́ zɛwr a Sore, a Ɩsɩrayɛl Naaŋmɩn yúor, ƴãwnɛ ʋ, ɛ́ danɛ ʋ.

⁵Asafʋ n'ʋ tɩ ɩ a bɛ nɩ-kpɛ̃ɛ, ɛ́ Zekarɩa tu a ʋ zu. A pùorí, Azɩɛl, Semiramɔtɩ, Yehɩɛl, Matitɩa, Eliyaavʋ, Benayahu, Ovɛdɩ-Edɔm nɩ Yeyɩɛl tɩ ŋmɩɛr'ɩ pɛ̀nɛ́ nɩ korijom ɛ́ Asafʋ wɔwrɛ sɛ̃sɛgɛ.

⁶A bàwr-maalbɛ Benayahu nɩ Yahazɩɛl tɩ pɛblɛ nɩ wɩɩr kʋrakʋralɛ a Naaŋmɩn wõ-taa daga niŋé.

⁷A ʋlɩ bibir nɛ n'a a Daviir tɩ tĩ yel a Asafʋ nɩ a ʋ taabɛ kɛ́ bɛ danɛ a Sore.

⁸Nyɩ puore a Sore yãanɩ, nyɩ íre a ʋ yúor, nyɩ manɛ a ʋ gãda-tome kʋ̀rɛ a nɩ-bʋʋr-yoru.

⁹Nyɩ yiele a ʋ ƴãw, nyɩ yiele ŋmɩɛr'ɩ bʋ̃-ŋmɩɛrɩ a ʋ ƴãw, nyɩ lɛb manɩ a ʋ nɔ-ɓãa-yele za.

¹⁰Nyɩ nyʋʋr a ʋ ƴãw, ʋl Naaŋmɩn na ɩ sõw a, nyɩɩm na bɔbr a Sore a, nʋ̃ɔ̀ a kpɩɛr nyɩ.

¹¹Nyɩ bɔbr a Sore lãwnɩ a ʋ fãw, nyɩ bɔbr a ʋ niwn nyɛ́b kʋralɛ.

¹²Nyɩɩm, a ʋ tõ-tõ-bie Ɩsɩrayɛl bʋʋrɛ ɛ, nyɩɩm, Zakɔb bibiir, ʋ na kaa ír a, nyɩ lɛb tɩɛrɩ a nɔ-ɓãa-yele ʋ na maalɩ a, nyɩ lɛb tɩɛrɩ a ʋ gãda-tome nɩ a lɛ ʋ na yel k'ʋʋ na ɩ na a.

¹⁴Ʋlɛ n'ɩ a Sore, a tɩ Naaŋmɩn na dɩrɛ naalʋ a tẽ-daa za zu a.

¹⁵Nyɩ cãà bãwnɩ a ʋ wõ-taa na be kʋralɛ a, a ƴɛ̀rʋ ʋ na ƴɛ̀r nɩbɛ tu-tu-túr ƴãw a.

¹⁶A wõ-taa ʋ na maal'ɩ a Abraham a n'ʋ, a pɔb ʋ na pɔ a Ɩzaakɩ zie a n'ʋ.

¹⁷Ʋ ɩ na a wõ-taa ŋa ɩ nʋɔr a Zakɔb zie, wõ-taa na bɛ tɛr baarʋ a a Ɩsɩrayɛl zie,

¹⁸a lɛn daar ʋ na tɩ yel à à ŋá a: «Ɩ̃ na kʋ̀ b'ɩ a Kanãa tẽw, ʋ na ɩ n a nyɩ sób.»

¹⁹A lɛn daar, a tɩ sãàkʋm-kore bɛ tɩ saalɩ ɛ, nʋʋrɩ blãlelɛ tɩ nɛbɛ a tẽw pʋɔ.

²⁰Bɛ mɩ́ tɩ yi n tẽw ŋa cen tẽw ŋa, yi naalʋ-tẽw ŋa cen naalʋ-tẽw ŋa.

²¹Ɛcɛ a Naaŋmɩn bɛ tɩ sàw nɩr dɔwrɩ bɛ ɩ, ʋ tɩ kpãa nɩ na-mɩnɛ a bɛ ƴãw.

²²Ʋ mɩ́ tɩ yere na: «Nyɩ taa tʋɔr a ɩ̃ nɩ-kabrɩ ɛ, nyɩ taa ɩrɛ a kpɩɛr a ɩ̃ ƴɛ̀r-manbɛ ɩ!»

²³Tẽ-daa za nɩbɛ ɛ, nyɩ yiele a Sore ƴãw, nyɩ hiere bibi-vɩɛrɩ za kɛ́ ʋlɛ n'ɩ a faarɛ.

²⁴Nyɩ manɛ a ʋ yúor-vɩɛlʋ-danʋ a nɩ-bʋʋr-yoru sɔgɔ, nyɩ manɛ a ʋ nɔ-ɓã-yel-maalɩ a nɩ-bʋʋrɛ za sɔgɔ.

²⁵A Sore sɩrɩ na ɩ kpɛ̃ɛ ɛ́ sɛwnɩ kɛ́ bɛ danɛ ʋ. Ʋ bɛ tɛr dɩ̃ɛnʋ ɛ, ɛ́ gãw a ŋmɩmɛ za.

²⁶A nɩ-bʋʋr-yoru ŋmɩmɛ ɩ n bʋ̃-zawlɛ, ɛcɛ a Sore n'ʋ maalɩ a salom.

²⁷Vɩɛlʋ nɩ cãà n'a be a ʋ niŋé, kpɛnʋ nɩ dɛpaalʋ n'a be a be ʋ na be a.

²⁸Tẽw zu nɩ-bʋʋrɛ ɛ, nyɩ bãwnɩ a Sore yúor-vɩɛlʋ-danʋ nɩ a ʋ kpɛnʋ.

²⁹Nyɩ íre a ʋ yúor-vɩɛlʋ-danʋ, nyɩ wa n a nyɩ de-kʋ̀b bome a ʋ niŋé. Nyɩ mɩ́ gũu tɩ tɔ tẽw a Sore niŋé, a lɛn daar ʋ na mɩ́ wul a ʋ sonu a.

³⁰Tẽ-daa za nɩbɛ ɛ, nyɩ màwr a ʋ niŋé, a tẽw kpɛmɛ na àr, ʋ kʋ̃ bãw damnʋ ɛ.

³¹A salom, ʋ cɩlɛ, a tẽw, ʋ lɔbr nʋ̃ɔ̀ cɛlsɩ! Bɛ yel kʋ̀ a nɩ-bʋʋrɛ za: «A Sore ɩ n nãà!»

³²A kʋ̃ɔ-kpɛ̃ɛ, ʋ damnɛ, nɩ a bome al za na paalɩ ʋ a. A wɩ̀ɛ, ʋ cɩlɛ lãwnɩ a bome za na be a ʋ pʋɔ a.

³³A tuwr tɩɩr, a lɔbr nʋ̃ɔ̀ cɛlsɩ a Sore niŋé, bʋ̃ʋ n'ʋ vɛ̃, ʋ waar'a k'ʋʋ wa dɩ n a tẽw ƴɛ̀rʋ.

³⁴Nyɩ danɛ a Sore, ʋ na vɩɛl a ƴãw, a ʋ nɔ̃wfʋ na bɛ tɛr baarʋ a ƴãw.

³⁵Nyɩ yel ʋ: «Naaŋmɩn tɩ Faarɛ ɛ, faa tɩ, bʋɔlɩ tɩ ɓã taa ɛ́ faa tɩ a nɩ-bʋʋr-yoru nuru pʋɔ! A fʋ yúor ɩ n sõw. Lɛ n'a tɩ na tʋ̃ɔ́ puore fʋ yãanɩ, ɛ́ nyʋʋr tɩ na danɛ fʋ a.»

³⁶A Sore, a Ɩsɩrayɛl Naaŋmɩn, ʋ tɛr'ɩ puoru yome yome za. A lãw nɩbɛ za tɩ sɔw na: «Amɛn! Aleluya!»

³⁷A Daviir tɩ bɛr'ɩ a Asafʋ nɩ a ʋ taabɛ a Sore wõ-taa daga niŋé be, kɛ́ bɛ tʋ̃ɔ́ tone a bɛ tome kʋralɛ, mɛ̃ a lɛ a na cɔbrɩ bin bibir za ƴãw a.

³⁸Ʋ tɩ kaa na ír Ovɛdɩ-Edɔm nɩ a ʋ yir nɩbɛ lɩz'a ata nɩ ani, bɛ ɩ dɩ̃dɔ-gùrbɛ lãwnɩ Yedutun bidɛb Ovɛdɩ-Edɔm nɩ Hosa.

³⁹A bàwr-maalɛ Sadɔkɩ nɩ a ʋ yir bàwr-maalbɛ nɛbɛ a Daviir tɩ kʋ̀ a Sore pɛn-sɛw na be a Gabaɔ̃ zi-sõw a, kɛ́ bɛ kaarɛ.

⁴⁰A tɩ fɛr'a kɛ́ bɛ mɩ́ maalɩ a nyɩw-a-za-bagɛ a bàwr-maal-kuur zu kʋ̀ a Sore biɓaara nɩ zaanʋɔra, ɛ́ tõ a tõ-nɛ́ɛ al za na be a Wulu pʋɔ a Sore na kʋ̀ a Ɩsɩrayɛl a.

⁴¹Heman nɩ Yedutun tɩ be n a bɛ zie, lãwnɩ a bɛl bɛ na tɩ kaa ír bʋɔlɩ a bɛ yée kɛ́ bɛ yiele danɛ nɩ a Sore, a ʋ nɔ̃wfʋ na be kʋralɛ a ƴãw a.

⁴²Heman nɩ Yedutun tɩ kaarɛ nɩ a wɩɩr nɩ a sɛ̃sɛgɛ zie, lãwnɩ a bʋ̃-ŋmɩɛrɩ al bɛ na mɩ́ ŋmɩɛr yiele nɩ a yiel-son a. Yedutun bidɛbr tɩ ɩ n dɩ̃dɔ-gùrbɛ.

⁴³Al pùorí, ŋa za tɩ lɛb'a kul a ʋ yir, ɛ́ a Daviir mɩ̀ lɛb kul tɩ puori a ʋ yir dem.