Read Dagara, Northern 1 Bibie za yel-manɩ 25 Bible Online

1 Bibie za yel-manɩ 25 - Dagara, Northern bible

1 Bibie za yel-manɩ 25

¹A nɩbɛ bɛ na põ põ bɛ so a puoru yele a nɩ-bɛrɛ tɩ sõw nɩ a Daviir ʋ ƴãw a Asafʋ, a Heman nɩ a Yedutun yir nɩbɛ bɛ tʋɔra zie. Bɛ mɩ́ tɩ tɛr'ɩ korijom, pɛ̀nɛ́ nɩ sɛ̃sɛgɛ yiele nɩ a ʋlɩ bom nɛ a Naaŋmɩn na yel kʋ̀ bɛ a. A nɩbɛ bɛl na tɩ tɛr a tõ-nʋɔr ŋa a yée na tu taa a n'ɩ á ŋá:

²Asafʋ bidɛbr: Zakuur, Yosɛfʋ, Netanɩa nɩ Asarela. A bɛ sãà n'ʋ tɩ kaarɛ a bɛ zie, ʋl na mɩ́ tɩ yiele bom nɛ a Naaŋmɩn na yel kʋ̀ ʋ tuur'ɩ a lɛ a nãà na wule a.

³A Yedutun bidɛbr: Gedalɩahu, Seri, Yesayahu, Hasavɩahu, Matitɩahu nɩ Simeyi. A bɛ sãà n'ʋ tɩ kaarɛ a bɛ za ayʋɔb zie, ʋl na mɩ́ tɩ yiele a Sore danʋ ɛ́ ŋmɩɛr korijom zɛwr'ɩ a ʋ yúor a.

⁴A Heman bidɛbr: Bukiyahu, Matanɩahu, Uzɩɛl, Sevuɛl, Yerimɔtɩ, Hananɩa, Hanani, Eliata, Gidalɩtɩ, Oromamɩtɩ-Ezɛɛr, Yosɩbekasa, Maloti, Hotiir, Mahazɩɔtɩ.

⁵A naaŋmɩn-ƴɛ̀r-manɛ Heman na tɩ ɩ a nãà yã-wule a bidɛbr tɩ n'ɩ a bɛ ŋa za. Ʋlɛ n'ʋ mɩ́ tɩ yel kʋ̀ a Daviir a lɛ a Naaŋmɩn na yel k'ʋʋ ɩ zɛw a ʋ kpɛnʋ a. A Naaŋmɩn tɩ kʋ̀ n bidɛbr pie nɩ anaar nɩ pɔwyaar ata a Heman.

⁶A nɩbɛ bɛ ŋa za mɩ́ tɩ yiele nɩ a Sore Ŋmɩn-yir-kpɛ̃ɛ pʋɔ, ɛ́ a bɛ sãà de bɛ a niwn. Sɛ̃sɛgɛ, pɛ̀nɛ́ nɩ korijom'a bɛ mɩ́ tɩ tɛr yiele nɩ. A nãà ƴãw tɩ n'a bɛ tone à à ŋá, ɛ́ Asafʋ, Yedutun nɩ Heman de bɛ a niwn.

⁷A yiel-yielbɛ bɛ ŋa nɩ a bɛ pal pʋɔ nɩbɛ bɛ na tɩ zanɩ nɩ kɛ́ bɛ tʋ̃ɔ́ yiele a Sore ƴãw a, tɩ ɩ n nɩbɛ kɔbr ayi dɔwlɩ lɩz'a anaar nɩ ani (288) bɛ za. Bɛ tɩ zanɩ nɩ bɛ na bɛ bãw a bɛ yielu vla vla.

⁸Bɛ tɩ ŋmɛ n gbãw bãw a lɛ bɛ na tu taa a tome ƴãw a. Owru bɛ tɩ ka be pɔlbili nɩ dɛb-nyamɛ cara pʋɔ ɩ, yiel-bãw-karɩ nɩ yiel-zã-zanbɛ cara pʋɔ ɩ.

⁹A palɛ palɛ nɩ-bɛrɛ bɛ na ŋmɛ a gbãw wul a, a bɛ yée na tu taa a n'ɩ á ŋá: 1. Asafʋ bidɛb Yosɛfʋ 2. Gedalɩahu 3. Zakuur 4. Yiseri 5. Netanɩahu 6. Bukiyahu 7. Yesarela 8. Yesayahu 9. Matanɩahu 10. Simeyi 11. Azarɛl 12. Hasavɩa 13. Suvayɛl 14. Matitɩahu 15. Yeremɔtɩ 16 Hananɩahu 17. Yosɩbekasa 18. Hanani 19. Maloti 20. Eliyata 21. Hotiir 22. Gidalɩtɩ 23. Mahazɩɔtɩ 24. Oromamɩtɩ-Ezɛɛr Nɩ-kpɛ̃ɛ za nɩ a ʋ yir nɩbɛ bɛ mɩnɛ mɩ́ tɩ ɩ n nɩbɛ pie nɩ ayi a pal-been pʋɔ.