Read Dagara, Northern 2 Bibie za yel-manɩ 1 Bible Online

2 Bibie za yel-manɩ 1 - Dagara, Northern bible

2 Bibie za yel-manɩ 1

¹A Daviir bidɛb, Salomɔ̃, tɩ ɩ n a ʋ naalʋ-dɩb kpɛmɛ dɔwlɛ cere. A Sore ʋ Naaŋmɩn tɩ be n a ʋ zie, ɛ́ zɛw ʋ yaga yaga za.

²A Salomɔ̃ tɩ bʋɔl'ɩ a Ɩsɩrayɛl nɩbɛ za ɓã taa, baa zuo a za, a sojarɩ túre nɩ-bɛrɛ nɩ a sojarɩ kɔbr nɩ-bɛrɛ, a ƴɛ̀r-dɩrbɛ nɩ a Ɩsɩrayɛl nɩbɛ niw-dierbɛ za, a pɛr lɛ k'aa yie nɩ-bɛrɛ.

³A Salomɔ̃ nɩ a lãw nɩbɛ za na tɩ be a ʋ zie a tɩ cen nɩ a maalʋ-zie na tɩ be a Gabaɔ̃[1] a, bʋ̃ʋ n'ʋ vɛ̃, be n'a a Naaŋmɩn tuor-taa pɛn-sɛw tɩ be, a pɛn-sɛw ʋl a Sore tõ-tõ-bie Moyiir na tɩ maalɩ a wɛja-kpalɛ pʋɔ a.

⁴A Naaŋmɩn wõ-taa daga ʋl a, a Daviir tɩ ƴãw na bɛ ɓáw ʋ yi n a Kɩrɩyatɩ-Yeyarim do wa n a Zerizalɛm[2], bʋ̃ʋ n'ʋ vɛ̃, ʋ tɩ maal'ɩ pɛn-sɛw a ʋ ƴãw a Zerizalɛm.

⁵Ɛcɛ a kur-zɩɛ bàwr-maal-kuur a Uuri bidɛb, Besalɛl, na ɩ Huur yãw a na tɩ maalɩ a, a Daviir tɩ bin ʋ nɩ a Gabaɔ̃, a Sore pɛn-sɛw niŋé. Be n'a a Salomɔ̃ nɩ a lãw nɩbɛ za tɩ cen tɩ sowri[3] a Sore.

⁶Be n'a a Salomɔ̃ tɩ kʋ dʋn túr (1 000) maal'ɩ nyɩw-a-za-bagɛ a kur-zɩɛ bàwr-maal-kuur na pɩɛlɩ a tuor-taa pɛn-sɛw a zu, a Sore niŋé.

⁷A ʋlɩ bibir nɛ tɩ̃ɩsɔw a, a Sore tɩ ɩ na a Salomɔ̃ nyɛ̃ ʋ, ʋʋ yel ʋ: «Zɛlɩ bom nɛ fʋ na bɔbr a, a ɩ̃ zie, ɩ̃ɩ na kʋ̀ b a.»

⁸A Salomɔ̃ tɩ sɔw nɩ a Naaŋmɩn: «Fʋ wul'ɩ nɔ̃wfʋ yaga a ɩ̃ sãà Daviir, ɛ́ ɩ ɩ̃ lɩɛr'ʋ dɩ a naalʋ.

⁹Ƴɛrɛŋa a, Sore Naaŋmɩn i, ɩ a lɛ fʋ na yel kʋ̀ a ɩ̃ sãà Daviir a, bʋ̃ʋ n'ʋ vɛ̃, fʋ̃ʋ n'ʋ ɩ ɩ̃ dɩ a naalʋ nɩ-bʋʋrɛ na yãwmɛ mɛ̃ a tẽsɔw tanɛ a zu.

¹⁰A na ɩ à ŋá a, ɩ̃ zɛlɛ fʋ na, kʋ̀ m yã-bãwfʋ nɩ yele bãwfʋ ɩ̃ tʋ̃ɔ́ kaarɛ nɩ a nɩ-bʋʋrɛ bɛ ŋa zie. Alɛ bɛ ɩ lɛ, ãa n'ʋ na tʋ̃ɔ́ kaa a fʋ nɩ-bʋʋrɛ, a nɩ-bʋʋrɛ bɛ ŋa na sɛw à ŋá a zie?»

¹¹A Naaŋmɩn tɩ yel'ɩ a Salomɔ̃: «À ŋá na n'a fʋ bɔbr a, fʋ na faa bɛ zɛlɩ naalʋ, tɛra bɩɩ yúor a, fʋ na bɛ zɛlɩ a fʋ dɔ̃ dem kũu, bɩɩ nyɔ-vʋʋr-wogo a fʋ̃ʋ mɩŋa ƴãw, ɛcɛ zɛlɩ yã-bãwfʋ nɩ yele bãwfʋ kɛ́ fʋ tʋ̃ɔ́ kaarɛ nɩ a ɩ̃ nɩ-bʋʋrɛ, a bɛl zu ɩ̃ na ƴãw fʋ dɩ naalʋ a,

¹²fʋ na páw nɩ a yã-bãwfʋ nɩ a yele bãwfʋ, ɩ̃ɩ mɩ̀ na kʋ̀ b'ɩ naalʋ, tɛra nɩ yúor ƴãw pʋɔ. A na-mɩnɛ na de fʋ niwn a bɛ dãw páw a ɩ, ɛ́ nãà kãw za kʋ̃ lɛb páw a a fʋ pùorí ɛ.»

¹³Lɛ n'a a Salomɔ̃ tɩ yi a Gabaɔ̃ maalʋ-zie, a be a tuor-taa pɛn-sɛw na tɩ be a, lɛb wa a Zerizalɛm wa dɩrɛ a naalʋ a Ɩsɩrayɛl zu.

¹⁴A nãà Salomɔ̃ tɩ bɔ n zɛbr-torkori nɩ wie ɓã taa: ʋ tɩ tɛr'ɩ zɛbr-torkori túr'ɩ kɔbr anaar (1 400) nɩ wie tùr pie nɩ ayi (12 000). Ʋ tɩ tɛr'ɩ a mɩnɛ a ʋ zie a Zerizalɛm, ɛ́ ƴãw a mɩnɛ a tẽ-bɛrɛ al ʋ na tɩ cɔbrɩ a al ƴãw a pʋɔ.

¹⁵A nãà zũú n'a a salm-pla nɩ a salm-zɩɛ tɩ yãwmɛ a Zerizalɛm mɛ̃ kʋsɛbɛ a, ɛ́ a sɛɛdɩr tɩɩr yãwmɛ mɛ̃ a sɩkomɔɔr[4] tɩɩr na be a Ba-Peyi a.

¹⁶Eziptɩ nɩ Silisi ten n'a a Salomɔ̃ wie tɩ yi. Yɛ-yɛrbɛ nɛbɛ mɩ́ tɩ cen tɩ dà a a be a nãà ƴãw.

¹⁷A zɛbr-torko been na mɩ́ tɩ yi a Eziptɩ tẽw wa a dàarʋ mɩ́ tɩ ɩ n salm-pla libie kɔbr ayʋɔb (600), ɛ́ wur-been ɩ salm-pla libie lɩz'a ayopõi nɩ pie (150). A yɛ-yɛrbɛ bɛ ŋa mɩ̀ mɩ́ tɩ ɩ na zɛbr-torkori nɩ wie a wa a Hititɩ mɩnɛ na-mɩnɛ nɩ a Siiri tẽw na-mɩnɛ ƴãw.

¹⁸A Salomɔ̃ tɩ ƴãw na kɛ́ bɛ ŋmãa yir a Sore ƴãwfʋ ƴãw, ɛ́ mɩ̀ ŋmãa nãà yir a ʋl mɩŋa ƴãw.