Read Dagara, Northern 2 Bibie za yel-manɩ 15 Bible Online

2 Bibie za yel-manɩ 15 - Dagara, Northern bible

2 Bibie za yel-manɩ 15

¹Odɛdɩ bidɛb, Azarɩa, a Naaŋmɩn Vʋʋrʋ na tɩ siw a,

²tɩ yi na tuori a Asa yel ʋ: «Asa a, nɩ nyɩɩm Zuda nɩbɛ za nɩ Bɛ̃zamɛ nɩbɛ za a, nyɩ bɛrɛ wone a ɩ̃ ƴɛ̀rʋ! Lɛn daar za nyɩ na be a Sore zie a, a Sore be n a nyɩ zie. Nyɩmɛ wa bɔbr ʋ a, ʋ na sàw na nyɩ nyɛ̃ ʋ, nyɩmɛ wa zawrɩ ʋ bɛr a, ʋ mɩ̀ na zawrɩ nyɩ na bɛr.

³A daar bɛ gbʋ́r ɛ, a Ɩsɩrayɛl nɩbɛ na bɛ tɛr a Naaŋmɩn-sɩza a ɩ, bɛ tɛr bàwr-maalbɛ bɛ na wul bɛ ɩ, bɛ tɛr a Wulu ɛ[24].

⁴Ɛcɛ a bɛ kpɩɛrʋ pʋɔ a, bɛ lɛb'a wa a Sore, a Ɩsɩrayɛl Naaŋmɩn zie. Bɛ bɔ ʋ na, ʋʋ bɛr bɛ nyɛ̃ ʋ.

⁵A ʋlɩ daar nɛ, nɩr bɛ tɩ be na cen ɛ́ lɛb wa n ƴã-ɓaarʋ ɛ, dɛ̃bɩ̃-yaga n'a tɩ nyɔw a tẽw nɩbɛ za.

⁶Tẽ-kpɛ̃ɛ ŋa mɩ́ tɩ ìr'a lo tẽ-kpɛ̃ɛ ŋa zu, tẽw ŋa ìr lo tẽw ŋa zu, bʋ̃ʋ n'ʋ vɛ̃, Naaŋmɩn tɩ dam bɛ na nɩ kpɩɛrʋ bʋʋrɛ bʋʋrɛ za.

⁷Ɛcɛ, nyɩɩm a, ƴɛrɛŋa a, nyɩ kpɛmɛ, nyɩ ta bàl tɩɛ bɛr ɛ. Sã-ya na be n be a nyɩ ton ƴãw!»

⁸A Asa na tɩ wõ a ƴɛ̀r-bie á ŋá nɩ a naaŋmɩn-ƴɛ̀r-manɛ Odɛdɩ ƴɛ̀rʋ a, ʋ tɩ lɛb'a kpɛmɛ ɛ́ ɩ a tɩbɛ za bɔr a Zuda nɩ a Bɛ̃zamɛ ten pʋɔ. Ʋ mɩ̀ tɩ ɩ n a lɛ a ten al ʋ na tɩ zɛb de a Efarayim tan vuo pʋɔ a pʋɔ. Ʋ tɩ lɛb'a maalɩ a Sore bàwr-maal-kuur na be a Ŋmɩn-yir-kpɛ̃ɛ càará dɩ̃dɔrɩ́ a ƴãw.

⁹Ɩsɩrayɛl nɩbɛ yaga yaga na tɩ yi Efarayim dɔwlʋ, Manase dɔwlʋ nɩ Sɩmɩ̃ɔ dɔwlʋ pʋɔ a tɩ wa na wa tu a nãà Asa. Bɛ tɩ kpɩɛr'ɩ a ʋ naalʋ-tẽw pʋɔ a lɛn daar bɛ na tɩ nyɛ̃ k'aa Sore ʋ Naaŋmɩn be n a ʋ zie a. A nãà tɩ bʋɔlɩ bɛ na ɓã taa, bɛlɛ nɩ a Zuda nɩ a Bɛ̃zamɛ nɩbɛ.

¹⁰Bɛ tɩ ɓã n taa a Zerizalɛm, a Asa naalʋ-dɩb yome pie nɩ anũu sob, a cuwr ata sob daar.

¹¹A ʋlɩ bibir nɛ a, bɛ tɩ maal'ɩ bagɛ kʋ̀ a Sore nɩ a dʋn bɛ na tɩ zɛb de a: bɛ tɩ kʋ n nĩi kɔbr ayopõi (700) nɩ píir túr ayopõi (7 000).

¹²Wõ-taa nʋɔr lɛb-puulu pʋɔ a, bɛ tɩ ƴãw nɩ nʋɔr kɛ́ bɛ na bɔbr'ɩ a Sore, a bɛ sãà mɩnɛ Naaŋmɩn nɩ bɛ pʋɔ za, nɩ bɛ sɩ́ɛ za.

¹³Ɛ́ nɩr, pɔl bɩɩ dɛb-nyãw, dɛb bɩɩ pɔw na kʋ̃ʋ wa bɔbr a Sore, a Ɩsɩrayɛl Naaŋmɩn à à ŋá a, a na fɛr'a kɛ́ bɛ kʋ ʋ.

¹⁴Bɛ tɩ zɛw nɩ kɔkɔr pɔ n a Sore zie, lɔbr'ɩ cɛlsɩ, pɛblɛ nɩ ɩ́lɛ́ nɩ wɩɩr.

¹⁵Nʋ̃ɔ̀ tɩ ɩrɛ nɩ a Zuda nɩbɛ za a nʋɔr ŋa bɛ na tɩ ƴãw nɩ bɛ pʋɔ za a. A nɩbɛ za tɩ pɛlɩ nɩ pʋɔ bɔbr a Sore na mɩ́ tɩ sàw bɛ nyɛ̃ ʋ, ʋʋ kʋ̀ bɛ a ƴã-ɓaarʋ a bɛ tẽw tʋr-bɔwrɩ za nʋɔr a.

¹⁶A Asa mɔ̃ mɩ̀ tɩ faa nɩ a «Pɔw-sõw» yúor a ʋ mãkʋm Maaka na tɩ tɛr a, bʋ̃ʋ n'ʋ vɛ̃, a Maaka tɩ ƴãw na bɛ bin a ŋmɩn-pɔw Asera tɩɩb kãw na kpɛ faa yaga za a. A Asa tɩ ƴãw na bɛ sãw a tɩɩb ŋa bɛr, bɛ ŋmɛr ʋ cʋmcʋm nyɩw bɛr a Sedrɔ̃ bà-fʋɔla pʋɔ.

¹⁷Ɛcɛ ʋ bɛ tɩ ír a maalʋ-ziir bɛr a Ɩsɩrayɛl tẽw pʋɔ ɩ, ʋ na saa tɩ tu a Sore nɩ ʋ pʋɔ za a ʋ nyɔ-vʋʋrʋ daar za a.

¹⁸A bome al ʋlɛ nɩ a ʋ sãà na tɩ de kʋ̀ a Naaŋmɩn a: salm-pla, salm-zɩɛ nɩ bʋ̃-pɛ-bʋʋrɛ bʋʋrɛ a, ʋ mɩ̀ ƴãw na bɛ de a wa n a Ŋmɩn-yir-kpɛ̃ɛ pʋɔ.

¹⁹Zɛbr bɛ tɩ lɛb lo ɩ, tɩ ta a Asa naalʋ-dɩb yome lɩz'a ayi ŋmãa nũu daar.