Read Dagara, Northern 2 Bibie za yel-manɩ 16 Bible Online

2 Bibie za yel-manɩ 16 - Dagara, Northern bible

2 Bibie za yel-manɩ 16

¹A Asa naalʋ-dɩb yome lɩzɛr'ɩ pie nɩ ayʋɔb sob daar, a Ɩsɩrayɛl nãà, Baesa, tɩ wa na wa ŋmãa nɩ a Zuda tẽw zɛbr, ɛ́ mɩɛr dacin viire kole a Arama[25] tẽw, k'aa Asa nɩ a Zuda tẽw dem ta mɩ́ lɛb tu a be tɔl ɛ.

²Lɛ n'a a Asa tɩ de a salm-pla nɩ a salm-zɩɛ na tɩ cãà cɛ be a Ŋmɩn-yir-kpɛ̃ɛ na-bome pʋɔ nɩ a nãà na-bome pʋɔ a kʋ̀ a ʋ tõ-tõ-biir, kɛ́ bɛ cen nɩ a Damasɩ tɩ kʋ̀ a Siiri tẽw nãà, Bɛn-Hadadɩ, ɛ́ yel ʋ à ŋá:

³«Ɩ tɩ tɛr wõ-taa, mãa nɩ a fʋ̃ʋ, mɛ̃ a lɛ a ɩ̃ sãà nɩ a fʋ sãà na tɩ tɛr a. Salm-pla nɩ salm-zɩɛ n'ɩ a ŋan ɩ̃ tɩr kɛ́ bɛ wa kʋ̀ b. A na ɩ à ŋá a, cen tɩ sãw fʋ̃ʋ nɩ a Ɩsɩrayɛl tẽw nãà Baesa wõ-taa bɛr, ʋ tʋ̃ɔ́ tɛr a ʋ sojarɩ yi n a ɩ̃ tẽw pʋɔ.»

⁴A Bɛn-Hadadɩ tɩ sàw nɩ a nãà Asa ƴɛ̀rʋ, ɛ́ tõ a ʋ zɛbr-nɩbɛ nɩ-bɛrɛ a Ɩsɩrayɛl tẽw tẽ-bɛrɛ ƴãw. Bɛ tɩ zɛb'a de Iyon, Dan, Avɛl-Mayim[26] nɩ a Nɛfɩtali tẽ-bɛrɛ al za pʋɔ bɛ na tɩ bin a bʋ̃-dɩrɩ gùre nɩ a nɩdaar a.

⁵A Baesa na tɩ wõ à à ŋá a, ʋ bɛr'ɩ a dacin ʋ na tɩ mɩɛr jile kole a Arama a.

⁶Lɛ n'a a nãà Asa tɩ bʋɔlɩ a Zuda tẽw nɩbɛ za ɓã taa. Bɛ tɩ wob'ɩ a kʋsɛbɛ nɩ a wɛwr a Baesa na tɩ mɩɛr'ɩ a dacin jile kole a Arama a cen nɩ tɩ mɛ n dacine viiri koli a Geva nɩ Misɩpa.

⁷A lɛn daar, a naaŋmɩn-ƴɛ̀r-manɛ Hanani tɩ wa na wa páw a Zuda tẽw nãà Asa yel ʋ: «Fʋ na faa ɩrɛ ƴãwn Aram tẽw nãà ƴãw, ɛ́ bɛ ɩrɛ ƴãwn a Sore fʋ Naaŋmɩn ƴãw a, fʋ kʋ̃ tʋ̃ɔ́ a Aram tẽw nãà zɛbr-nɩbɛ ɩ.

⁸A Etiopi tẽw dem nɩ a Libi tẽw dem bɛ tɩ ɩ zɛbr-nɩbɛ na kpɛmɛ ɛ́ tɛr zɛbr-torkori nɩ soja-wi-zɔmnbɛ na bɛ tɛr nʋɔr a ɩ? Ɛcɛ fʋ na tɩ ɩrɛ ƴãwn a Sore ƴãw a, ʋ ɩ na fʋ so bɛ.

⁹Sɩza n'a, a Sore jɩ́rɛ nɩ a tẽw zu ziir za k'ʋʋ sõw a bɛlɩ dem na nɔnɛ ʋ nɩ bɛ pʋɔ za a. Ɛcɛ ƴɛrɛŋa ʋl a, fʋ ɩ n dãbol-ɩb, alɛ so, dɩ̃a na ta a, zɛbr na lore nɩ a fʋ zu.»

¹⁰A Asa tɩ nyɛ̃ nɩ nɩ a naaŋmɩn-ƴɛ̀r-manɛ suur, ƴãw bɛ nyɔw ʋ lɔb ƴãw gaso pʋɔ, a ʋ ƴɛ̀r-bie na tɩ ɩ a ʋ suur ìr a ƴãw. A lɛn daar mɩ̀ a, a Asa tɩ tĩ na dɔwrɛ a ʋ nɩ-bʋʋrɛ nɩbɛ bɛ mɩnɛ.

¹¹A Asa ɩ-ɩrɩ al na cɛ a, a de niwn dem tɩ ta a pɛ-baarɩ a, a za sɛb'ɩ a «Zuda nɩ a Ɩsɩrayɛl ten na-mɩnɛ ɩ-ɩrɩ sɛbɛ»[27] pʋɔ.

¹²A Asa naalʋ-dɩb yome lɩzɛr'ɩ pie nɩ awaɩ daar, gbɛ́ɛ bàal-faa kãw tɩ nyɔw ʋ na, ɛcɛ ʋ tɩ bɛr'ɩ a Sore sõwfʋ bɔb, ɛ́ bɔbr sanʋ a dɔwtarɩ zie.

¹³A Asa tɩ kpi n a ʋ naalʋ-dɩb yome lɩz'a ayi nɩ been sob daar.

¹⁴Bɛ tɩ ũù ʋ nɩ yaa kãw pʋɔ ʋ na tɩ ƴãw bɛ tuw a «Daviir Tẽ-kpɛ̃ɛ» pʋɔ a. Gado na paalɩ parfɛ̃ nɩ bʋ̃-nyuure vla vla yaga yaga a zu n'a bɛ tɩ gaalɩ a ʋ kũu. Nɩbɛ na bãw a parfɛ̃ yele a nɛbɛ tɩ sʋ̃ɔmɩ bul cɔbrɩ a. Bɛ tɩ nyɩw nɩ a parfɛ̃ a mɩnɛ a ʋ ƴãw.