Read Dagara, Northern 2 Bibie za yel-manɩ 2 Bible Online

2 Bibie za yel-manɩ 2 - Dagara, Northern bible

2 Bibie za yel-manɩ 2

¹A Salomɔ̃ tɩ de nɩ nɩbɛ tùr lɩz'a ata nɩ pie (70 000) bɛ tuore a bome, nɩbɛ tùr lɩz'a anaar (80 000) bɛ pɛnɛ a kʋsɛbɛ a tãw zu, ɛ́ nɩbɛ túr ata dɔwlɩ kɔbr ayʋɔb (3 600) piwre a tõ-tõ-biir bɛ ŋa.

²A Salomɔ̃ tɩ tõ na bɛ tɩ yel a Tɩ́ɩ̀r tẽw nãà Hiram: «Fʋ kʋ̀ n sɛɛdɩr tɩɩr dàar a ɩ̃ sãà Daviir ʋ tʋ̃ɔ́ ŋmãa nɩ a ʋ yir-kpɩɛra. Mɩ̀ lɛb ɩ a lɛ a ɩ̃ zie.

³Bʋ̃ʋ n'ʋ vɛ̃, mãa n'ɩ ŋan bɔbr k'ɩ̃ɩ ŋmãa yir kʋ̀ a Sore ɩ̃ Naaŋmɩn, Ŋmɩn-yir-kpɛ̃ɛ ʋ na na so a. A ʋ pʋɔ n'a bɛ na mɩ́ nyɩw a parfɛ̃ ɛ́ bin a dipɛ̃-son kʋralɛ. Be n'a bɛ na maalɛ a nyɩw-a-za-bagɛ biɓaarɛ nɩ zaanʋɔrɛ, a pɩ̃ɛnʋ-bibie, cuw-paalɛ daar nɩ a Sore tɩ Naaŋmɩn cuwr al za na cɛ a daar. A nɛ́ɛ á ŋá na ƴãw kʋ̀ a Ɩsɩrayɛl nɩbɛ a na tuur'ɩ kʋralɛ.

⁴Ɛ́ a Ŋmɩn-yir-kpɛ̃ɛ ɩ̃ na bɔbr k'ɩ̃ɩ ŋmãa a na ɩ n kpɛ̃ɛ, bʋ̃ʋ n'ʋ vɛ̃, a tɩ Naaŋmɩn ɩ n kpɛ̃ɛ zuo a ŋmɩmɛ za.

⁵A salom yɛlmɛ na, ɛ́ bɛ saalɩ a ʋ kpɛb ƴãw ɛ, ɛ́ ãa n'ʋ na tʋ̃ɔ́ ŋmãa yir kʋ̀ ʋ? Ɛ́ a mãa tɔr za a, ãa nɛ m na ŋmãa yir kʋ̀ ʋ? Zie bɛ na na maalɛ bàwr kʋ̀rɛ ʋ a tɛwr'ʋ ɩ̃ bɔbr k'ɩ̃ɩ ŋmãa.

⁶A na ɩ à ŋá a, kʋ̀ m bãw-bãwnɛ na tone a salm-pla, a salm-zɩɛ, a kur-zɩɛ nɩ a kure a, na bãw a lɛ bɛ na mɩ́ mʋɔlɩ a pɛnɛ a ɩ zɩɛ-ɓõɓõ, zɩɛ-wʋlʋlʋ bɩɩ zɩɛ-kãbala a, ɛ́ mɩ̀ bãw wib a. Ʋlɛ nɩ a ɩ̃ mɩŋa bãw-bãwnbɛ nɛbɛ na tone, a bɛl a ɩ̃ sãà Daviir na cɔbrɩ ɛ́ bɛ kpɩɛr a Zuda nɩ a Zerizalɛm a.

⁷Mɩ̀ kʋ̀ m Libã tẽw sɛɛdɩr tɩɩr dàar nɩ sɩpɩrɛ tɩɩr dàar nɩ sãtal tɩɩr dàar. Ɩ̃ bãwnɩ a na a fʋ tõ-tõ-biir na bãw a Libã tẽw dàar cɛb a. A ɩ̃ tõ-tõ-biir na sõw nɩ a fʋ tõ-tõ-biir

⁸bɛ lãw bɔ a dàar a yãwmɛ yaga yaga, bʋ̃ʋ n'ʋ vɛ̃, a yir ɩ̃ na bɔbr k'ɩ̃ɩ ŋmãa a na ɩ n kpɛ̃ɛ tɛr yúor.

⁹A mãa a, ɩ̃ na kʋ̀ n a dà-cɩɛrbɛ na cɩɛr a dàar a ble zɔ̃ tɔn túr ayʋɔb (6 000), ɔɔzʋ zɔ̃ tɔn túr ayʋɔb (6 000), divɛ̃ litɩr tùr kɔbr ani (800 000) nɩ kãá litɩr tùr kɔbr ani (800 000).»

¹⁰A Tɩ́ɩ̀r tẽw nãà, Hiram, tɩ sɛb'a sɔw a Salomɔ̃ à ŋá: «A Sore na nɔnɛ a ʋ nɩ-bʋʋrɛ a n'a so ʋ ƴãw fʋ ɩ a bɛ nãà.

¹¹A Sore, a Ɩsɩrayɛl Naaŋmɩn, tɛr'ɩ puoru, ʋl na ír a salom nɩ a tẽw a. Bʋ̃ʋ n'ʋ vɛ̃, ʋlɛ n'ʋ kʋ̀ bidɛb a nãà Daviir, ʋ tɛr yã-bãwfʋ, bãw maal-ɩb ɛ́ tɛr yã na na tʋ̃ɔ́ ŋmãa Ŋmɩn-yir-kpɛ̃ɛ kʋ̀ a Sore, ɛ́ ŋmãa nãà yir a ʋl mɩŋa ƴãw a.

¹²A na ɩ à ŋá a, ƴɛrɛŋa a, ɩ̃ kʋ̀rɛ fʋ nɩ Hiram-Abi[5] na ɩ bãw-bãwnɛ na tɛr yã a.

¹³Tɩ́ɩ̀r tẽw n'a a ʋ sãà yi, ɛ́ a ʋ mã ɩ Dan dɔwlʋ nɩr. Ʋ bãw nɩ a salm-zɩɛ nɩ a salm-pla tome, a kur-zɩɛ, a kure, a kʋsɩɛr nɩ a dàa tome, ʋ bãw nɩ a pɛnɛ mʋɔlʋ mɩ́ mʋɔlɩ a ɩ zɩɛ, zɩɛ-kãbala nɩ zɩɛ-wʋlʋlʋ nɩ lɛ̃ pɛnɛ yele. Ʋ bãw nɩ wib bʋʋrɛ za, ʋ na tʋ̃ɔ́ na maalɩ bom nɛ za bɛ na na yel k'ʋʋ maalɩ a. Ʋ na lãw nɩ nɩ a fʋ bãw-bãwnbɛ nɩ a fʋ sãà, a ɩ̃ sore Daviir, bãw-bãwnbɛ tone.

¹⁴A ble nɩ a ɔɔzʋ, a kãá nɩ a divɛ̃ fʋ na yel kɛ́ fʋ na tɩr'a a, tɩr a kʋ̀ tɩ.

¹⁵Tɩɩm a, tɩ na cɛ n a Libã tɩɩr sɛw lɛ za na pɛlɩ a fʋ pʋɔ a. Tɩ na 'lẽ a na ɓã taa ƴãw a kʋ̃ɔ-kpɛ̃ɛ zu a duwre tɩ ta a Zafa, fʋ ƴãw bɛ de a do n a Zerizalɛm.»

¹⁶A nʋʋrɩ bɛl za na tɩ kpɩɛr a Ɩsɩrayɛl tẽw a, a Salomɔ̃ tɩ de bɛ nɩ a tome, a bɛl a ʋ sãà Daviir na tɩ sɔ́r a: bɛ tɩ ɩ n nɩbɛ tùr lɩz'a ayopõi nɩ pie nɩ ata dɔwlɩ nɩbɛ kɔbr ayʋɔb (153 600).

¹⁷Ʋ tɩ kaa na ír nɩbɛ tùr lɩz'a ata nɩ pie (70 000) bɛ tuore a tuor, nɩbɛ tùr lɩz'a anaar (80 000) pɛnɛ a kʋsɛbɛ a tãw zu, ɛ́ nɩbɛ túr ata dɔwlɩ kɔbr ayʋɔb (3 600) piwre a nɩbɛ bɛ ŋa za tome.