Read Dagara, Northern 2 Bibie za yel-manɩ 28 Bible Online

2 Bibie za yel-manɩ 28 - Dagara, Northern bible

2 Bibie za yel-manɩ 28

¹A Akaazɩ tɩ tɛr'ɩ yome lɩzɛr a lɛn daar ʋ na tɩ lɩɛbɩ a nãà a, ɛ́ dɩ a naalʋ yome pie nɩ ayʋɔb a Zerizalɛm. Ʋ bɛ tɩ ɩ a lɛ na pɛlɩ a Sore pʋɔ, mɛ̃ a lɛ a ʋ sãà Daviir na tɩ ɩ a ɩ.

²Ɛcɛ ʋ nɩ̃ɛ na tɩ cɔwr'ɩ a Ɩsɩrayɛl na-mɩnɛ. Ʋ mɔ̃ mɩ̀ tɩ maal'ɩ tɩbɛ a Báàl mɩnɛ ƴãw.

³Ʋl mɩŋa tɩ tɩr'ɩ tɩ-suur-zɔ̃-na-nyùur-vla-vla-a de-kʋ̀b bom a Bɛn-Hinom[46] fʋɔla pʋɔ, ɛ́ ƴãw bɛ nyɩw a ʋ bidɛbr maal'ɩ bàwr. A nɩ-bʋʋrɛ bɛl a Sore na tɩ diw k'aa Ɩsɩrayɛl nɩbɛ tʋ̃ɔ́ de a tẽw a, a bɛ ɩ-faar na bɛ maal'ɩ wob a, alɛ n'a a nãà Akaazɩ tɩ cɔwrɛ.

⁴Ʋ tɩ maal'ɩ bagɛ ɛ́ nyɩw tɩ-suur-zɔ̃-na-nyùur-vla-vla-a a maalʋ-ziir, a tãli zu nɩ tɩ-zimpiri za pile.

⁵A Sore ʋ Naaŋmɩn tɩ de ʋ na ƴãw a Aram tẽw nãà nuru pʋɔ, ʋ zɛb tʋ̃ɔ́ ʋ, ɛ́ nyɔw a ʋ nɩbɛ yaga bɛ ɩ nɩ-pàwrɩ ʋ cen nɩ a Damasɩ. Ʋ mɩ̀ tɩ lo n a Ɩsɩrayɛl nãà, Peka na ɩ Eremalyahu bidɛb a nuru pʋɔ, ʋ zɛb tʋ̃ɔ́ ʋ pẽlẽpẽlẽ:

⁶bibir been yõ, a Peka tɩ kʋ n a Zuda soja-gãdaar tùr lɩz'a ayʋɔb (120 000), bɛ na tɩ zawrɩ a Sore, bɛ sãà mɩnɛ Naaŋmɩn, bɛr a ƴãw.

⁷Efarayim[47] dɔwlʋ pʋɔ gãdaa kãw na dɩ Zikiri a tɩ kʋ n a nãà bidɛb, Maaseyahu, nɩ a nãà yir nɩ-kpɛ̃ɛ, Azirikam, nɩ Ɛlkana na tu a nãà zu a.

⁸A Saa-pɛrɩ́-gʋba-lowr naalʋ-tẽw sojarɩ tɩ nyɔw nɩ nɩbɛ tùr kɔbr ayi (200 000) a bɛ yɛbr nɩ a bɛ yeepuuli na ɩ a Zuda nɩbɛ a pʋɔ: pɔwbɛ, bibiir, dɛbli nɩ powli. Bɛ mɩ̀ tɩ faa nɩ na-bome na bɛ dɩ vuo a a bɛ zie, cen nɩ a Samaari.

⁹A Samaari a, Sore ƴɛ̀r-manɛ kãw na dɩ Odɛdɩ a tɩ be n be. Ʋ tɩ yi na tuori a Ɩsɩrayɛl zɛbr-nɩbɛ na tɩ tarɛ a Samaari a, yel bɛ: «A Sore, a nyɩ sãà mɩnɛ Naaŋmɩn tɩ nyɛ̃ nɩ nɩ a Zuda nɩbɛ suur. Alɛ so ʋ de bɛ ƴãw a nyɩ nuru pʋɔ. Nyɩ kʋ bɛ na nɩ po-to-fãw-ɩb na bɛ vɩɛl a, a ɩb ŋa yele do tɩ ta a salom zu.

¹⁰Lɛb waar, a Zerizalɛm nɩ a Zuda dɛbr nɩ pɔwbɛ bɛ ŋa a, nyɩ tɩ́ɛrɛ na kɛ́ nyɩ ɩ bɛ lɩɛbɩ a nyɩ gbãgbaar. Nyɩmɛ wa ɩ à à ŋá a, a nyɩɩm tɛɛ za kʋ̃ ɩ sãwna dem a Sore nyɩ Naaŋmɩn niŋé ɩ?

¹¹A na ɩ à ŋá a, nyɩ bɛr wõ a ɩ̃ ƴɛ̀rʋ, ɛ́ lɛb bɛr a nɩ-pàwrɩ bɛ ŋa nyɩ na nyɔw a nyɩ yɛbr pʋɔ a, bʋ̃ʋ n'ʋ vɛ̃, a Sore nyɛ̃ nɩ nyɩ nɩ suur bɛ dɩ vuo ɩ.»

¹²Lɛ n'a a Efarayim dɔwlʋ nɩ-bɛrɛ bɛ mɩnɛ tɩ ìr lo a bɛl na yi a zɛbr zie lɛb waar a zu: Yehohanan bidɛb, Azarɩahu, nɩ Mesilemɔtɩ bidɛb, Berekɩahu, nɩ Salum bidɛb, Yehizikiyahu, nɩ Hadɩlaɩ, bidɛb Amasa tɩ nɛbɛ.

¹³Bɛ tɩ yel bɛ na: «Nyɩ ta wa n a nɩ-pàwrɩ bɛ ŋa a ka ɩ! Nyɩ na ɩ na tɩ tɛr sãwna kpɛ̃ɛ a Sore zie. A tɩ sãwna tɩbrɛ na zuo baarɩ, ɛ́ a Sore nyɛ̃ nɩ a Ɩsɩrayɛl suur, nyɩ bɔbr'a kɛ́ nyɩ ɩ a tɩ sãwna ʋ lɛb bãw tɩbrɛ dɔwlɩ bɩɩ?»

¹⁴A nɩ-bɛrɛ niŋé nɩ a zu-sɛbla za niŋé a, a sojarɩ tɩ lɛb'a bɛr a nɩ-pàwrɩ ɛ́ mɩ̀ bɛr a zɛbr na-bome bɛ na tɩ fa a.

¹⁵Bɛ tɩ kaa na ír nɩbɛ bʋɔlɩ a bɛ yée, bɛ ìr mɔwlɩ a nɩ-pàwrɩ: bɛ tɩ de nɩ bʋ̃-suuri a zɛbr bome bɛ na fa a pʋɔ su a bɛlɩ dem na tɩ ɩ ƴã-gã-zawlɛ a, ɛ́ ƴãw bɛ nafawr, ɛ́ kʋ̀ bɛ za dɩb bɛ dɩ ɛ́ nyũ, ɛ́ bɛ sanɩ a bàalbɛ, al pùorí, bɛ wob a bɛlɩ dem za na bɛ tʋ́ɔr cere a dɔwlɩ bòn zu, ɛ́ lɛb tɛr a nɩbɛ bɛ ŋa za cen nɩ a bɛ tẽ-bi-taabɛ zie, a Zeriko, a Kpãkparmɛ tɩɩr tẽw. Al pùorí bɛ lɛb wa a Samaari.

¹⁶A lɛn daar, a nãà Akaazɩ tɩ tõ na bɛ tɩ zɛlɩ sõwfʋ a Asiiri tẽw na-mɩnɛ zie.

¹⁷Bʋ̃ʋ n'ʋ vɛ̃, a Edɔm tẽw nɩbɛ tɩ lɛb'a wa wa zɛb tʋ̃ɔ́ a Zuda naalʋ-tẽw, ɛ́ nyɔw nɩ-pàwrɩ.

¹⁸A Filisɩtɛ̃ mɩnɛ mɩ̀ tɩ ìr'a kpɛ so a Ba-Peyi nɩ a Zuda naalʋ-tẽw saa-pɛrɩ́-gʋba-lowr tẽ-bɛrɛ: bɛ tɩ zɛb'a de Bɛtɩ-Semɛsɩ, Ayalon, Gederɔtɩ, lãwnɩ Soko, Timina, Gimizo nɩ a tẽ-kpɔwlɩ, ɛ́ kpɛ zɩ̃ a be.

¹⁹A Sore tɩ sɩrɩ na siwri a Zuda naalʋ-tẽw a Ɩsɩrayɛl nãà Akaazɩ zũú, ʋl na tɩ ƴãw a ʋ nɩbɛ ɩrɛ faa ɛ́ a ʋl mɩŋa bɛ tu a Sore a.

²⁰A Asiiri tẽw nãà Tilgatɩ-Pilnesɛɛr, nãá sõw a Akaazɩ a, ʋ tɩ bɛr'a ɛ́ ŋmãa nɩ ʋ zɛbr.

²¹A Akaazɩ tɩ de nɩ a Ŋmɩn-yir-kpɛ̃ɛ na-bome a mɩnɛ nɩ a nãà yir na-bome a mɩnɛ nɩ a nɩ-bɛrɛ na-bome a mɩnɛ kʋ̀ a Asiiri tẽw nãà, ɛcɛ ʋ cãà bɛ tɩ páw bom za a pʋɔ ɩ.

²²A kpɩɛrʋ daar ŋa pʋɔ a, a Akaazɩ tɩ cãà bɛ tu a Sore ɩ:

²³ʋ tɩ maal'ɩ bagɛ kʋ̀ a Damasɩ tẽw ŋmɩmɛ na tɩ zɛb tʋ̃ɔ́ ʋ a, ɛ́ yel: «A Asiiri tẽw na-mɩnɛ ŋmɩmɛ n'a sõwne bɛ. A na ɩ lɛ a, ɩ̃ mɩ̀ na maal'ɩ bagɛ kʋ̀ a, k'aa tʋ̃ɔ́ mɩ̀ sõw mɛ̃.» Ɛcɛ a ŋmɩmɛ á ŋá n'a nɩ̃ɛ ɩ ʋlɛ nɩ a Ɩsɩrayɛl nɩbɛ za lo.

²⁴A Akaazɩ tɩ wob'ɩ a Ŋmɩn-yir-kpɛ̃ɛ bʋ̃-son za ɓã taa ɛ́ pɔb a ŋmɛr, al pùorí ʋ kpa a Ŋmɩn-yir-kpɛ̃ɛ pamɛ ɛ́ ƴãw bɛ mɛ bàwr-maal-kube a Zerizalɛm sɔ-carɩ za pʋɔ.

²⁵A Zuda naalʋ-tẽw tẽ-kpɛ̃ɛ za pʋɔ a, ʋ tɩ ƴãw nɩ maalʋ-ziir mɩ́ nyɩw a tɩ-suur-zɔ̃-na-nyùur-vla-vla-a a ŋmɩn-yoru ƴãw. À ŋá n'a ʋ tɩ ɩrɛ a Sore, a ʋ sãà mɩnɛ Naaŋmɩn, suur ìr.

²⁶A Akaazɩ ɩ-ɩrɩ al na cɛ a, a tib daar dem tɩ ta n a baarʋ daar dem, a sɛb'a ƴãw a Zuda nɩ a Ɩsɩrayɛl na-mɩnɛ ɩ-ɩrɩ sɛbɛ pʋɔ.

²⁷Ʋ na wa kpi a, bɛ ũù ʋ nɩ a Zerizalɛm tẽ-kpɛ̃ɛ pʋɔ, ɛcɛ bɛ bɛ tɩ ũù ʋ a na-mɩnɛ yarʋ pʋɔ ɩ. A ʋ bidɛb Ezekɩasɩ tɩ lɩɛrɩ ʋ na dɩ a naalʋ.