Read Dagara, Northern 2 Bibie za yel-manɩ 3 Bible Online

2 Bibie za yel-manɩ 3 - Dagara, Northern bible

2 Bibie za yel-manɩ 3

¹A Salomɔ̃ tɩ tĩ nɩ a Sore Ŋmɩn-yir-kpɛ̃ɛ ŋmãafʋ a Zerizalɛm, a Moriya[6] tãw zu, a be a Sore na tɩ ɩ a ʋ sãà Daviir nyɛ̃ ʋ a. A Daviir tɩ cɔbr'ɩ a zie a Ɔrnan na ɩ Zebi bʋʋrɛ a ble vab gbãgbalá.

²A Salomɔ̃ naalʋ-dɩb yome anaar sob a cuwr ayi sob daar'a a tome tɩ tĩ.

³A Ŋmɩn-yir-kpɛ̃ɛ pɛr a Salomɔ̃ na sʋ̃ɔ́ a zɛ̃a n'ɩ à ŋá: a wogo tɩ ɩ n mɛtɩr lɩzɛr'ɩ pie, ɛ́ a yɛ̀lʋ ɩ mɛtɩr pie.

⁴A zawle, a wogo na tɩ sɛw a Ŋmɩn-yir-kpɛ̃ɛ yɛ̀lʋ a, wogo tɩ ɩ n mɛtɩr pie, ɛ́ a kɛrʋ ɩ mɛtɩr lɩz'a ata. A Salomɔ̃ tɩ ƴãw na bɛ nyɩl salm-zɩɛ mɩŋa mɩŋa pàw a ʋ pʋɔ za.

⁵Sɩpɩrɛ tɩɛ dà-pãgalɩ n'a bɛ tɩ kpa pàw a càará dacine, ɛ́ nyɩl salm-zɩɛ mɩŋa mɩŋa pàw, ɛ́ wi kpãkparmɛ tɩɛ wuli nɩ bãzɔlɩ ƴãw.

⁶Bɛ mɩ̀ tɩ cãà na ƴãw a dĩo ŋa pɩ̃ɛmɛ nɩ kʋsɛ-bi-nyɩlɩ nyɩlɩ. Ɛ́ a salm-zɩɛ a, Parwayim tẽw n'a a tɩ yi.

⁷Bɛ tɩ nyɩl'ɩ salm-zɩɛ pàw a kpule, a dɩ̃dɛɛ, a dacine nɩ a pamɛ, ɛ́ wi seribɛ̃ mɩnɛ ƴãw a dacine zu.

⁸Al pùorí, bɛ tɩ ŋmãa nɩ a zi-sõw-za-zi-sõw: a ʋ wogo na tɩ sɛw a Ŋmɩn-yir-kpɛ̃ɛ yɛ̀lʋ a, tɩ ɩ n mɛtɩr pie, ɛ́ a ʋ yɛ̀lʋ mɩ̀ ɩ mɛtɩr pie. Bɛ tɩ de nɩ salm-zɩɛ mɩŋa mɩŋa tɔn lɩzɛr nyɩl pàw a pʋɔ.

⁹A salm-zɩɛ pĩi-bie tɩbrʋ tɩ ɩ n kilo[7] põ-zɛ̃-taa. Mɔ̃ mɩ̀ bɛ tɩ nyɩl'ɩ salm-zɩɛ pàw a saa-zu diru.

¹⁰Bɛ tɩ nyɩl'ɩ bome maal'ɩ seribɛ̃ ayi ƴãw a zi-sõw-za-zi-sõw pʋɔ, ɛ́ nyɩl salm-zɩɛ pàw a.

¹¹A seribɛ̃ pɩgɛ za na ɓã taa a, a wogo tɩ ɩ n mɛtɩr pie: a dãw-niwn sob pɩwr kãw, a wogo na tɩ ɩ mɛtɩr ayi nɩ ŋmãa a tɩ tɩɛ nɩ a Ŋmɩn-yir-kpɛ̃ɛ dacin, ɛ́ a pɩwr kãw, a wogo mɩ̀ na ɩ mɛtɩr ayi nɩ ŋmãa a tɩ tɩɛ a seribɛ̃ ŋanɩ sob.

¹²A seribɛ̃ ayi sob pɩwr, a wogo na tɩ ɩ mɛtɩr ayi nɩ ŋmãa a tɩ tɩɛ nɩ a Ŋmɩn-yir-kpɛ̃ɛ dacin, ɛ́ a pɩwr kãw, a wogo mɩ̀ na ɩ a mɛtɩr ayi nɩ ŋmãa a tɩɛ a seribɛ̃ dãw-niwn sob.

¹³A seribɛ̃ á ŋá pɩgɛ tɩ yɛ́r'a pàw mɛtɩr pie zie, ɛ́ a tɩ ìr àr'ɩ gbɛ́ɛ, ɛ́ lɩɛbɩ a niŋe tori a di-pʋɔ.

¹⁴Bɛ tɩ wób'ɩ pɛn-yawla nɩ lɛ̃ pɛn-vʋlvʋl bɛ na mʋ̀ɔlɩ ʋ ɩ kãbala, zɩɛ nɩ zɩɛ-ɓõɓõ, ɛ́ bɛ maw seribɛ̃ ƴãw a.

¹⁵Bɛ tɩ maal'ɩ kpule ayi a Ŋmɩn-yir-kpɛ̃ɛ niŋé: a kɛ̀rʋ́ tɩ ɩ n mɛtɩr pie nɩ ayopõi, ɛ́ a zu-kpãakpule na tɩ be a nyʋɔrɩ́ a, kɛrʋ ɩ mɛtɩr ayi nɩ ŋmãa.

¹⁶Bɛ tɩ maal'ɩ bãzɔlɩ ƴãw a kpule nyʋɔrɩ́, ɛ́ maalɩ pɩ̃ɛmɛ na ɩ girenadɩ tɩɛ wɔmɛ a ƴãw a bãzɔlɩ ƴãw.

¹⁷Bɛ tɩ bà n a kpule a Ŋmɩn-yir-kpɛ̃ɛ niŋé, kãw a dʋrʋ lowr, ɛ́ kãw a gʋba lowr. A dʋrʋ lowr kpul tɩ dɩ na kɛ́ Yakin, a pɛr lɛ kɛ́: “Ŋmɩn n'ʋ tɩrɛ a fãw”, ɛ́ a gʋba lowr kpul dɩ kɛ́ Bowaazʋ, a pɛr lɛ kɛ́: “Ŋmɩn n'ɩ a fãw.”