Read Dagara, Northern 2 Bibie za yel-manɩ 30 Bible Online

2 Bibie za yel-manɩ 30 - Dagara, Northern bible

2 Bibie za yel-manɩ 30

¹A nãà Ezekɩasɩ tɩ bʋɔl'ɩ a Ɩsɩrayɛl naalʋ-tẽw nɩ a Zuda naalʋ-tẽw nɩbɛ kɛ́ bɛ wa a Zerizalɛm a Sore yir-kpɛ̃ɛ́ wa maalɩ a Sore, a Ɩsɩrayɛl Naaŋmɩn, Tɔl-gãw cuw. Ʋ tɩ sɛb'ɩ sɛb-tʋɔlɩ kʋ̀ a Efarayim nɩ a Manase dɔwlʋ nɩbɛ.

²A nãà, a ʋ tõ-tõ-bi-bɛrɛ nɩ a Zerizalɛm lãw nɩbɛ tɩ sàw na k'aa Tɔl-gãw cuw ŋa maalɩ a cuwr ayi sob daar.

³Bʋ̃ʋ n'ʋ vɛ̃, bɛ bɛ tɩ tʋ̃ɔ́ maalɩ ʋ a ʋ maalʋ daar ɛ, a bàwr-maalbɛ na bɛ tɩ yãwmɛ a sɛw so a bɛ dɛwr bɛr a, nɩ a nɩbɛ na bɛ tɩ ɓã taa a Zerizalɛm a ƴãw.

⁴A yel ŋa tɩ pɛlɩ nɩ a nãà nɩ a nɩbɛ za pʋɔ,

⁵bɛ yel kɛ́ bɛ na hieri na yel a Ɩsɩrayɛl tẽw za pʋɔ, a Bɛɛr-Seva tɩ sãá nɩ a Dan, k'aa nɩbɛ wa a Zerizalɛm wa maalɩ a Sore, a Ɩsɩrayɛl Naaŋmɩn, Tɔl-gãw cuw, bʋ̃ʋ n'ʋ vɛ̃, nɩbɛ blãlelɛ nɛbɛ tɩ maalɩ ʋ mɛ̃ a lɛ a na sɛw a.

⁶A nɩbɛ bɛ na tõ a tɩ zɔ na cɔlɩ a Ɩsɩrayɛl naalʋ-tẽw nɩ a Zuda naalʋ-tẽw nɩ a sɛb-tʋɔlɩ a nãà nɩ a ʋ tõ-tõ-bi-bɛrɛ na tɩ sɛb a. A nãà tɩ yel'a kɛ́ bɛ hieri yel à ŋá: «Ɩsɩrayɛl nɩbɛ ɛ, nyɩɩm na cɩ̃ɛ a Asiiri tẽw nãà bɛ páw nyɩ kʋ a, nyɩ lɛb wa a Sore, a Abraham Naaŋmɩn, a Ɩzaakɩ Naaŋmɩn nɩ a Zakɔb Naaŋmɩn zie, ʋʋ na lɛb'a wa a nyɩ zie.

⁷Nyɩ ta ɩ mɛ̃ a nyɩ sãà mɩnɛ nɩ a nyɩ yɛbr a ɩ, bɛ zawr'ɩ a Sore, a bɛ sãà mɩnɛ Naaŋmɩn, bɛr, ʋ bɛr bɛ bɛ lo mɛ̃ à ŋá nyɩ na nyɛ̃ a.

⁸Nyɩ mɩ̀ ta gaarɩ mɛ̃ a nyɩ sãà mɩnɛ a ɩ: nyɩ bɛr a Sore so nyɩ, nyɩ lɛb wa ʋ zi-sõw pʋɔ ʋ na ɩ ʋ ɩ sõw a nʋɔr kʋ a, ɛ́ nyɩ tone a Sore nyɩ Naaŋmɩn. Lɛ n'a a ʋ su-tʋlʋ a nyɩ ƴãw na ɓãá.

⁹Nyɩmɛ wa lɛb wa a Sore zie a, a bɛlɩ dem na tɛr a nyɩ tẽ-bi-taabɛ nɩ a nyɩ yie dem cen nɩ a tẽ-yũo a na wul'ɩ nɔ̃wfʋ a bɛ zie, ɛ́ bɛr bɛ bɛ lɛb wa a tẽw ŋa pʋɔ. A Sore nyɩ Naaŋmɩn kʋ̃ ŋmɛlɩ kpaar cɔw nyɩ, nyɩmɛ wa lɛb wa a ʋ zie a ɩ, bʋ̃ʋ n'ʋ vɛ̃, ʋ ɩ n nɔ̃wfʋ ɛ́ zɔrɛ nɩbaalʋ.»

¹⁰A nɩbɛ bɛ na tõ a tɩ cɔlɩ nɩ a Efarayim nɩ a Manase ten, mɩ́ yi tẽw ŋa tɩ sãá tẽw ŋa tɩ tɔ a Zabulɔ̃ dɔwlʋ. Ɛcɛ a nɩbɛ tɩ kpɔwrɛ bɛ na ɩrɛ nɩ bɛ laar.

¹¹Ɛcɛ Asɛɛr dɔwlʋ nɩ Manase dɔwlʋ nɩ Zabulɔ̃ dɔwlʋ nɩbɛ bɛ mɩnɛ tɩ sàw nɩ a bɛ sãwna ɛ́ lɛb wa a Zerizalɛm.

¹²A Zuda naalʋ-tẽw pʋɔ a, a Sore tɩ ɩ na a nɩbɛ lãw taa sàw tu a lɛ a nãà nɩ a ʋ tõ-tõ-bi-bɛrɛ na tɩ yel a.

¹³Zu-sɛbla tɩ ɓã n taa a Zerizalɛm, a dipɛ̃ na bɛ ƴãw dãbɩl a cuw ƴãw, a cuwr ayi sob daar. Zu-sɛbla na bɛ dɩ vuo a tɩ nɛbɛ.

¹⁴Bɛ tɩ da n a bàwr-maal-kube na tɩ be a Zerizalɛm a lɔb, lãwnɩ a tɩ-suur-zɔ̃-na-nyùur-vla-vla-a bàwr-maal-kube, ɛ́ lɔb a za ƴãw a Sedrɔ̃ bà-fʋɔla pʋɔ.

¹⁵A cuwr ayi sob bibie pie nɩ a anaar sob daar, bɛ tɩ kʋ n a Tɔl-gãw cuw dʋn. Vĩ tɩ nyɔw nɩ a bàwr-maalbɛ nɩ a levitɩ mɩnɛ, bɛ so a bɛ dɛwr bɛr kɛ́ bɛ tʋ̃ɔ́ wa n a nyɩw-a-za-bagɛ a Sore yir-kpɛ̃ɛ́.

¹⁶Bɛ tɩ be n a bɛ beba zie mɛ̃ a lɛ a Naaŋmɩn nɩr Moyiir Wulu na ƴãw a: a levitɩ mɩnɛ mɩ́ tɩ de nɩ a dʋn zɩ̃ɩ bɛ na kʋ maal'ɩ a bàwr a kʋ̀ a bàwr-maalbɛ bɛ cir a ƴãw a bàwr-maal-kuur zu.

¹⁷Nɩ-yaga a lãw pʋɔ na bɛ tɩ so a bɛ dɛwr bɛr a zũú a, a levitɩ mɩnɛ tɩ lɩɛr'ɩ a bɛlɩ dem na tɩ tɛr a dɛwr a, ŋmarɛ a dʋn kɔkɛɛ, bɛ na tɩ cãà tɛr dɛwr kʋ̃ tʋ̃ɔ́ maalɩ bàwr kʋ̀ a Sore a ƴãw.

¹⁸Bʋ̃ʋ n'ʋ vɛ̃, nɩ-yaga, báa zuo a za a Efarayim, a Manase, a Ɩsakaar nɩ a Zabulɔ̃ dɔwlʋ nɩbɛ bɛ tɩ so a bɛ dɛwr bɛr ɛ, ɛcɛ bɛ tɩ cãà na dɩ a Tɔl-gãw cuw, a na saa bɛ tɩ tu a lɛ na sɛb a. Ɛcɛ a Ezekɩasɩ tɩ puor'a zɛlɩ a bɛ ƴãw yel: «A Sore na ɩ nɩ-vla a, ʋ dɩ suur kʋ̀

¹⁹a bɛlɩ dem na ƴãw fãw bɔbr a Naaŋmɩn, a Sore, a bɛ sãà mɩnɛ Naaŋmɩn, nɩ bɛ pʋɔ za a, bɛlɛ saa bɛ tɛr a vɩɛlʋ al na sɛwnɩ a.»

²⁰A Sore tɩ de nɩ a Ezekɩasɩ puoru, ɛ́ bɛ dɔwrɩ bɛ ɩ.

²¹A Ɩsɩrayɛl nɩbɛ bɛl na tɩ be a Zerizalɛm a tɩ maal'ɩ a dipɛ̃ na bɛ ƴãw dãbɩl a cuw bibie ayopõi nɩ nʋ̃ɔ̀, ɛ́ a levitɩ mɩnɛ nɩ a bàwr-maalbɛ danɛ a Sore bibie za nɩ bɛ fãw za.

²²A Ezekɩasɩ ƴɛ̀r-bie tɩ tɔ n a levitɩ mɩnɛ bɛl za na tɩ tɛr tɩɛr-vɩɛlɩ a Sore ƴãw a. Bɛ tɩ cow nɩ a cuw bibie ayopõi, maalɛ nɩ ƴã-ɓaarʋ bàwr ɛ́ danɛ a Sore, a bɛ sãà mɩnɛ Naaŋmɩn.

²³Al pùorí, a lãw nɩbɛ za tɩ sàw na k'aa cuw cãà maalɩ bibie ayopõi ƴãw pʋɔ, ɛ́ bɛ lɛb tɩ maalɩ a cuw bibie ayopõi ƴãw pʋɔ nɩ nʋ̃ɔ̀.

²⁴Bʋ̃ʋ n'ʋ vɛ̃, a Zuda nãà Ezekɩasɩ tɩ kʋ̀ n a lãw nadɛɛ túr (1 000) nɩ píir túr ayopõi (7 000), ɛ́ a nɩ-bɛrɛ tɩr nadɛɛ túr (1 000) nɩ píir túr pie (10 000). Bàwr-maalbɛ na bɛ dɩ vuo a tɩ so n a bɛ dɛwr bɛr.

²⁵Nʋ̃ɔ̀ tɩ ɩrɛ nɩ a nɩbɛ za: a Zuda nɩbɛ, a bàwr-maalbɛ nɩ a levitɩ mɩnɛ, lãwnɩ a Saa-pɛrɩ́-gʋba-lowr naalʋ-tẽw nɩbɛ, a bɛl na tɩ sʋ̃ɔmɩ bul wa a cuw a, nɩ a bɛl na zɩ̃ a Zuda tẽw a.

²⁶Nʋ̃ɔ̀ tɩ ɩrɛ nɩ a Zerizalɛm tẽw dem yaga za, bʋ̃ʋ n'ʋ vɛ̃, a Daviir bidɛb Salomɔ̃ na ɩ a Ɩsɩrayɛl nãà a daar za a, yel ŋa tɔ bɛ lɛb tɩ maalɩ a Zerizalɛm ɛ.

²⁷A baarʋ daar, a levitɩ mɩnɛ bɛl na ɩ bàwr-maalbɛ[48] a tɩ ìr'a zɛlɩ a Naaŋmɩn k'ʋʋ maalɩ a nɩbɛ. A bɛ puoru tɩ do na tɩ ta a salom zu, a Naaŋmɩn kpɛb zie, ɛ́ a Naaŋmɩn tɩ sàw de a bɛ puoru.