Read Dagara, Northern 2 Bibie za yel-manɩ 33 Bible Online

2 Bibie za yel-manɩ 33 - Dagara, Northern bible

2 Bibie za yel-manɩ 33

¹A Manase tɩ tɛr'ɩ yome pie nɩ ayi a lɛn daar ʋ na tɩ lɩɛbɩ a nãà a, ɛ́ dɩ a naalʋ a Zerizalɛm yome lɩz'a ata ŋmãa nũu.

²Ʋ tɩ ɩ n a lɛ na bɛ pɛlɩ a Sore pʋɔ a, cɔwrɩ a nɩ-bʋʋr-yoru ɩ-faar za na bɛ maal'ɩ wob a, a nɩ-bʋʋr-yoru bɛl a Sore na tɩ diw a tẽw pʋɔ, ɛ́ ƴãw a Ɩsɩrayɛl nɩbɛ zɩ̃ a.

³Ʋ tɩ lɛb'a mɛ a maalʋ-ziir a ʋ sãà Ezekɩasɩ na tɩ ŋmɛr bɛr a. Ʋ tɩ mɛ n bàwr-maal-kube a ŋmɩn Báàl ƴãw, ɛ́ ba dà-barɩ, ɛ́ puori a salom zu bʋ̃-nyɩwrɩ.

⁴Ʋ tɩ mɛ n bàwr-maal-kube a Zerizalɛm Ŋmɩn-yir-kpɛ̃ɛ pʋɔ, a yir ŋa ƴãw a Sore na tɩ ƴɛ̀r à ŋá a: «Ka n'a ɩ̃ na mɩ́ wul k'ɩ̃ɩ be n be.»

⁵Ʋ mɩ̀ tɩ mɛ n bàwr-maal-kube a Ŋmɩn-yir-kpɛ̃ɛ davʋrɩ a za ayi pʋɔ, a salom zu bʋ̃-nyɩwrɩ za ƴãwfʋ ƴãw.

⁶Ʋ tɩ nyɩw nɩ a ʋ bidɛbr maal'ɩ bàwr[55] a Bɛn-Hinom fʋɔla pʋɔ, ʋ tɩ tu n tɩtɩblʋ bʋʋrɛ bʋʋrɛ pùor, ɛ́ mɩ́ cen tɩ páw a bɛlɩ dem na kabrɛ a nyãakpɩmɛ a. Ʋ tɩ tɛr'a ɩrɛ a lɛ na bɛ vɩɛl a Sore zie a, a Sore suur tɩ ìr.

⁷Ʋ mɩ̀ tɩ maal'ɩ tɩɩb kãw ƴãw a Ŋmɩn-yir-kpɛ̃ɛ pʋɔ, a yir ŋa ƴãw a Sore na tɩ yel à ŋá kʋ̀ a Daviir nɩ a ʋ bidɛb Salomɔ̃ a: «A Ŋmɩn-yir-kpɛ̃ɛ ŋa pʋɔ n'a, nɩ a Zerizalɛm ka n'a ɩ̃ na mɩ́ wul k'ɩ̃ɩ be n ka kʋralɛ, a Zerizalɛm ɩ̃ na kaa ír a Ɩsɩrayɛl dɔwlʋ tẽ-bɛrɛ za pʋɔ a.

⁸A Ɩsɩrayɛl nɩbɛ wa tuur a ɩ̃ nɛ-ƴãwnɩ nɩ a wulu al za ɩ̃ na ƴãw a ɩ̃ tõ-tõ-bie Moyiir kʋ̀ bɛ a, ɩ̃ kʋ̃ lɛb ɩ bɛ zãá nɩ a tẽw ɩ̃ na kʋ̀ a bɛ sãàkʋm-kore a ɩ.»

⁹Ɛcɛ a Manase tɩ bɛlɩ nɩ a Zerizalɛm nɩ a Zuda nɩbɛ ƴãw bɛ ɩrɛ ɩ-faar zuo a nɩbɛ bɛl na tɩ dãw kpɩɛr a tẽw a, a bɛl a Sore na tɩ kʋ pàw pɛr ɛ́ kʋ̀ a zie a ʋ nɩ-bʋʋrɛ a.

¹⁰A Sore tɩ ƴɛ̀r'ɩ a Manase nɩ a ʋ nɩ-bʋʋrɛ zie, ɛcɛ nɩr za bɛ tɩ cɛlɩ be ɩ.

¹¹Lɛ n'a a Sore tɩ ƴãw a Asiiri tẽw zɛbr-nɩbɛ nɩ-bɛrɛ wa a bɛ ƴãw. Bɛ tɩ nyɔw nɩ a Manase, cɔ̀r pĩ-nɔ-gori ƴãw ʋ a kokamɛ ƴãw, 'lẽ ʋ nɩ kur-zɩɛ bamɛ, ɛ́ tɛr ʋ cen nɩ a Babɩlɔn[56].

¹²A ʋ kpɩɛrʋ pʋɔ a, a Manase tɩ lɔb'ɩ nuru zɛlɩ nɩ a Sore ʋ Naaŋmɩn: ʋ tɩ sàw nɩ a ʋ sãwna a ʋ sãà mɩnɛ Naaŋmɩn niŋé,

¹³ɛ́ zɛlɩ ʋ k'ʋʋ zɔ ʋ nɩbaalʋ. A Naaŋmɩn tɩ bɛr'ɩ a ʋ puoru tɔ ʋ: ʋ tɩ sàw na de a ʋ zɛlʋ, ɛ́ lɛb tɛr ʋ wa n a Zerizalɛm lɛb wa zɩɩlɩ ʋ a ʋ naalʋ pʋɔ. Lɛ n'a a Manase tɩ bãw k'aa Sore n'ɩ a Naaŋmɩn-been yõ sɩza.

¹⁴A yele á ŋá pùorí, a Manase tɩ yi na zaa a «Daviir Tẽ-kpɛ̃ɛ» pʋɔ tɩ mɛ dacin na kɛrɩ yaga yaga a. Ʋ tɩ tu na tɔl a Gihon bule mʋ̃tɔ̃w-kpɛb-lowr ɛ́ lanɩ a Sedrɔ̃ bà-fʋɔla tɩ ŋmãa jil a Ofɛl[57], ɛ́ ta a Zʋ́mɛ́ dɩ̃dɔrɩ́. Ʋ mɩ̀ tɩ ƴãw nɩ sojarɩ nɩ-bɛrɛ a Zuda tẽ-kpɛn kpɛn za pʋɔ.

¹⁵Ʋ tɩ ƴãw na bɛ ír a ŋmɩn-yoru bɛr a Ŋmɩn-yir-kpɛ̃ɛ pʋɔ, nɩ a tɩɩb ʋl ʋ na tɩ pɛnɩ ƴãw a. Ʋ tɩ ƴãw na bɛ ŋmɛr a bàwr-maal-kube ʋ na tɩ mɛ a Ŋmɩn-yir-kpɛ̃ɛ tãw zu nɩ a Zerizalɛm pʋɔ a bɛr, ɛ́ de a bʋ̃-ŋmɛrsɩ a tẽw pʋɔ yi n tɩ lɔb bɛr.

¹⁶Ʋ tɩ lɛb'a mɛ a Sore bàwr-maal-kuur, maalɩ lãw-taa nɩ danʋ bàwr a ʋ zu, ɛ́ yel k'aa Zuda nɩbɛ puore a Sore, a Ɩsɩrayɛl Naaŋmɩn.

¹⁷A nɩbɛ tɩ cãà na maalɛ a bagɛ a maalʋ-ziir, ɛ́ a tɩ ɩ a Sore bɛ Naaŋmɩn ƴãw.

¹⁸A Manase ɩ-ɩrɩ al na cɛ a, a ʋ Naaŋmɩn ʋ na puori a, a ƴɛ̀rʋ al a naaŋmɩn-ƴɛ̀r-manbɛ na ƴɛ̀r a ʋ zie, a Sore, a Ɩsɩrayɛl Naaŋmɩn, yúor ƴãw a, a za be n a Ɩsɩrayɛl na-mɩnɛ ɩ-ɩrɩ sɛbɛ pʋɔ.

¹⁹A ʋ puoru nɩ a lɛ a Naaŋmɩn na sàw de a a, a ʋ yel-bebe nɩ a lɛ za ʋ na zawrɩ a Naaŋmɩn bɛr a, a ziir al ʋ na ƴãw a maalʋ-ziir, ɛ́ bà dà-barɩ nɩ ŋmɩmɛ dasuli ɛ́ wa bãw sàw a ʋ sãwna a Naaŋmɩn niŋé a, a za sɛb'a ƴãw a Hozaɩ ɩ-ɩrɩ sɛbɛ pʋɔ.

²⁰A Manase na wa kpi a, bɛ ũù ʋ nɩ a ʋ yir pʋɔ. A ʋ bidɛb Amɔ̃ n'ʋ tɩ lɩɛrɩ ʋ dɩ a naalʋ.

²¹A Amɔ̃ tɩ tɛr'ɩ yome lɩzɛr'ɩ ayi a lɛn daar ʋ na tɩ lɩɛbɩ a nãà a, ɛ́ dɩ a naalʋ yome ayi a Zerizalɛm.

²²Ʋ tɩ ɩ n a lɛ na bɛ pɛlɩ a Sore pʋɔ a, mɛ̃ a ʋ sãà Manase a: ʋ tɩ maal'ɩ bagɛ kʋ̀ a tɩbɛ a ʋ sãà Manase na tɩ maalɩ a, ɛ́ puori a.

²³Ɛcɛ ʋ bɛ sàw a ʋ sãwna a Sore niŋé ɩ, mɛ̃ a lɛ a ʋ sãà Manase na tɩ ɩ a. Ʋ nɩ̃ɛ na maalɩ yel-bebe yaga yaga zuo ʋ.

²⁴A ʋ sojarɩ nɩ-bɛrɛ tɩ bʋ n taa a ʋ ƴãw ɛ́ kʋ ʋ a ʋ yir pʋɔ.

²⁵Ɛcɛ a Zuda tẽw dem tɩ ƴãw na bɛ kʋ a bɛlɩ dem na tɩ bʋ taa kʋ a nãà. Bɛ tɩ kaa na ír a ʋ bidɛb Zozɩasɩ ʋ lɩɛrɩ ʋ.