Read Dagara, Northern 2 Bibie za yel-manɩ 34 Bible Online

2 Bibie za yel-manɩ 34 - Dagara, Northern bible

2 Bibie za yel-manɩ 34

¹A Zozɩasɩ tɩ tɛr'ɩ yome ani a lɛn daar ʋ na tɩ ɩ a nãà a, ɛ́ dɩ a naalʋ yome lɩzɛr'ɩ pie nɩ been a Zerizalɛm.

²Ʋ tɩ ɩ n a lɛ na pɛlɩ a Sore pʋɔ a, ɛ́ cɔwrɩ a ʋ sãàkʋm-kʋra bɛ bɩɛ dʋrʋ bɩɩ gʋba ɩ.

³A ʋ naalʋ-dɩb yome ani sob daar, ʋ na saa tɩ cãà ɩ pɔlbile a, ʋ tɩ tĩ na bɔbr a ʋ sãàkʋm-kʋra Daviir Naaŋmɩn pʋ-tɩɛrʋ. A ʋ naalʋ-dɩb yome pie nɩ ayi sob, ʋ tɩ tĩ na íre a Zuda nɩ a Zerizalɛm dɛwr bɛrɛ: ʋ tɩ sãw nɩ a maalʋ-ziir bɛr, cɛ a dà-barɩ nɩ a ŋmɩn-bɛlɛbɛlɛ dasuli lɔb.

⁴Bɛ tɩ ŋmɛr'ɩ a Báàl bàwr-maal-kube a ʋ niŋé, ɛ́ mɩ̀ da parfɛ̃ nyɩwfʋ zie na tɩ be a bàwr-maal-kube zu a lɔb, ɛ́ cɛ a dà-barɩ lɔb ɛ́ ŋmɛr ŋmɛr a tɩbɛ bɛr. Bɛ tɩ ƴɛ́r a na ŋmɛr, yaarɩ a zɔ̃ ƴãw a bɛlɩ dem na tɩ maalɩ a bagɛ á ŋá a yarʋ zu.

⁵Bɛ tɩ nyɩw nɩ a bàwr-maalbɛ kɔbɛ a bɛ bàwr-maal-kube zu. À ŋá n'a a Zozɩasɩ tɩ ír a Zerizalɛm nɩ a Zuda dɛwr bɛr.

⁶A pùorí, ʋ tɩ cen nɩ a Manase, a Efarayim nɩ a Sɩmɩ̃ɔ tẽ-bɛrɛ pʋɔ nɩ a Nɛfɩtali mɔ̃ mɩ̀ tẽ-bɛrɛ pʋɔ nɩ a tẽ-kpɔwlɩ pʋɔ

⁷tɩ ŋmɛr a bàwr-maal-kube bɛr, ɛ́ cɛ a dà-barɩ nɩ a tɩbɛ kar cʋmcʋm, ɛ́ da a parfɛ̃ nyɩwfʋ zie lɔb a Saa-pɛrɩ́-gʋba-lowr naalʋ-tẽw dɔwlʋ za pʋɔ. Al pùorí, ʋ lɛb wa a Zerizalɛm.

⁸A Zozɩasɩ naalʋ-dɩb yome pie nɩ ani sob daar, ʋ na tɩ ír a tẽw nɩ a Ŋmɩn-yir dɛwr bɛr baarɩ a, ʋ tɩ tõ n Asalɩahu bidɛb, Safan, a tẽw nɩ-kpɛ̃ɛ Maaseyahu nɩ a nãà ƴɛ̀r-manɛ Yoa na ɩ Yoahaazɩ bidɛb a, kɛ́ bɛ cen tɩ lɛb maalɩ a ʋ Sore Naaŋmɩn yir ƴãw.

⁹A nɩbɛ bɛ ŋa tɩ cen na tɩ páw a bàwr-maal-kara Hɩlkɩahu. Bɛ tɩ kʋ̀ ʋ nɩ a libie a levitɩ mɩnɛ dɩ̃dɔ-gùrbɛ na tɩ páw a, a tɩ ɩ n a bʋ̃-kʋ̀rɩ a Manase nɩbɛ nɩ a Efarayim nɩbɛ nɩ a Saa-pɛrɩ́-gʋba-lowr dɔwlʋ al na cɛ a, lãwnɩ a Zuda nɩ a Bɛ̃zamɛ nɩ a Zerizalɛm nɩbɛ na tɩ tɩr a.

¹⁰Bɛ tɩ de a na ƴãw a bɛlɩ dem na tɩ tone a nuru pʋɔ, a bɛl na tɩ kaarɛ a Sore yir-kpɛ̃ɛ zie a. A nɩbɛ bɛ ŋa na tɩ tone a Sore yir-kpɛ̃ɛ pʋɔ a tɩ de a na tu n a Sore yir-kpɛ̃ɛ lɛb maalʋ pùor.

¹¹Lɛ n'a bɛ tɩ de a libie kʋ̀ a dà-fɔwrbɛ nɩ a yir-mɩɛrbɛ kɛ́ bɛ da n kʋsɛbɛ na ta kʋsɛbɛ a, nɩ dàar na na nyɔw nyɔw taa, ɛ́ lɛb ɩ a yie a Zuda na-mɩnɛ na tɩ bɛr a sãw a, a lɛb kpɛmɛ a.

¹²A tõ-tõ-biir tɩ tone nɩ a bɛ tome nɩ bɛ pʋɔ za. Levitɩ mɩnɛ bɛ ŋa nɛbɛ tɩ kaarɛ a bɛ zie: Merari dɔwlʋ pʋɔ: Yahatɩ nɩ Ovadɩahu. Kehatɩ dɔwlʋ pʋɔ: Zekarɩa nɩ Mesulam. Levitɩ bɛ mɩnɛ na tɩ bãw yielu bʋ̃-ŋmɩɛrɩ ŋmɛb a

¹³tɩ kaarɛ nɩ a dɩ̃dɔ-gùrbɛ zie nɩ a tõ-tõ-biir za zie, ŋa za a ʋ tõ-nʋɔr pʋɔ. A levitɩ mɩnɛ pʋɔ a, bɛ mɩnɛ tɩ ɩ n sɛ-sɛbrbɛ, bɛ mɩnɛ ɩ bʋ̃-kaarbɛ, bɛ mɩnɛ ɩ dɩ̃dɔ-gùrbɛ.

¹⁴A lɛn daar bɛ na tɩ kpowre a libie na tɩ be a daga pʋɔ a Ŋmɩn-yir-kpɛ̃ɛ ƴãw a, a bàwr-maal-kara Hɩlkɩahu tɩ nyɛ̃ nɩ a Sore Wulu sɛbɛ[58] a Sore na tɩ ƴãw a Moyiir tɩr a.

¹⁵A Hɩlkɩahu tɩ yel'ɩ à ŋá kʋ̀ a sɛ-sɛbrɛ Safan: «Ɩ̃ nyɛ̃ nɩ a Wulu sɛbɛ a Sore yir-kpɛ̃ɛ pʋɔ.» Ɛ́ tɩ kʋ̀ a sɛbɛ a Safan.

¹⁶A Safan tɩ cen nɩ nɩ a sɛbɛ tɩ kʋ̀ a nãà, ɛ́ pɩl manɩ a yele kʋ̀ ʋ yel à ŋá: «A fʋ tõ-tõ-biir be n a tome al za fʋ na kʋ̀ bɛ a zu tone.

¹⁷A bàwr-maalbɛ kpowr'ɩ nɩ a Ŋmɩn-yir-kpɛ̃ɛ pʋɔ daga libie de a kʋ̀ a bɛlɩ dem na kaarɛ a tome zie a, nɩ a tõ-tõ-biir.»

¹⁸Al pùorí, ʋ tɩ yel ƴãw pʋɔ: «A bàwr-maal-kara Hɩlkɩahu kʋ̀ m'ɩ sɛbɛ ŋa.» Ɛ́ tɩ kanɩ a sɛbɛ kʋ̀ a nãà.

¹⁹A nãà Zozɩasɩ na tɩ wõ a Naaŋmɩn wulu sɛbɛ ƴɛ̀r-bie a, a dam ʋ na, ʋ taw a ʋ kparɩ cɩɛrɩ.

²⁰Al pùorí, ʋ tɩ ƴãw na bɛ bʋɔlɩ Hɩlkɩahu nɩ Safan bidɛb, Ahikam, nɩ Mɩka bidɛb Avidon, nɩ a sɛ-sɛbrɛ Safan nɩ a ʋ tõ-tõ-bi-nɩ-kpɛ̃ɛ Asaya, ʋ wa yel bɛ à ŋá:

²¹«Nyɩ cen tɩ sowri a Sore kaa, a mãa nɩ a Ɩsɩrayɛl nɩbɛ na cɛ a nɩ a Zuda nɩbɛ ƴãw. Nyɩ sowri bãw a sɛbɛ ŋa bɛ na nyɛ̃ a ƴɛ̀r-bie pɛr. Bʋ̃ʋ n'ʋ vɛ̃, a tɩ sãàkʋm-kore bɛ sàw a nɛ-ƴãwnɩ na be a ʋ pʋɔ a ɩ, alɛ so a Sore suur ìr a tɩ ƴãw bɛ dɩ vuo ɩ.»

²²Lɛ n'a a Hɩlkɩahu nɩ a bɛl a nãà na tɩ kaa ír a tɩ cen a pɔw-naaŋmɩn-ƴɛ̀r-manɛ Hulida na tɩ kpɩɛr a Zerizalɛm tẽli-paala pʋɔ a zie. A ʋ sɩr Salum na ɩ Tokatɩ bidɛb, ɛ́ ɩ Hasira yãw a tɩ n'ɩ a Ŋmɩn-yir-kpɛ̃ɛ kpar-son kaarɛ. A nɩbɛ bɛ ŋa tɩ manɩ nɩ a yel kʋ̀ a pɔw-naaŋmɩn-ƴɛ̀r-manɛ.

²³Lɛ n'a a Hulida tɩ tõ bɛ kɛ́ bɛ tɩ yel à ŋá kʋ̀ a nãà:

²⁴«À ŋá n'a a Sore, a Ɩsɩrayɛl Naaŋmɩn, yere: “Ɩ̃ na ɩ na faa páw a Zerizalɛm nɩ a ʋ nɩbɛ mɛ̃ a lɛ bɛ na sɛb a sɛbɛ a Zuda tẽw nãà na kanɩ a pʋɔ a.

²⁵A Zerizalɛm tẽw dem zawrɩ mɛ̃ na bɛr, bɛ nyɩw nɩ tɩ-suur-zɔ̃-na-nyùur-vla-vla-a kʋ̀ ŋmɩn-yoru. A lɛ za bɛ na ɩ a ɩ na a ɩ̃ suur ír. Alɛ so a ɩ̃ suur bɛrmɛ a tẽw ŋa ƴãw, ɛ́ kʋ̃ ɓãá ɩ.

²⁶A Zuda tẽw nãà na tõ nyɩ kɛ́ nyɩ wa sowri mɛ̃ kaa a, nyɩ na tɩ yel'ɩ à ŋá kʋ̀ ʋ: À ŋá n'a a mãa, a Sore, a Ɩsɩrayɛl Naaŋmɩn, yere: Fʋ wõ n a sɛbɛ ŋa ƴɛ̀rʋ.

²⁷A dam'ɩ a fʋ socir, fʋ siwri fʋ tʋɔra a ɩ̃ niŋé, fʋ na wõ a lɛ ɩ̃ na yel a Zerizalɛm nɩ a ʋ nɩbɛ ƴãw a zũú, fʋ taw nɩ a fʋ kparɩ cɩɛrɩ ɛ́ kõ cir mʋta-kʋ̃ɔ. A na ɩ à ŋá a, a mãa mɩ̀ a, ɩ̃ wõ n a fʋ dem, mãa n'ʋ yere kʋ̀rɛ fʋ,

²⁸ɩ̃ na bɛr fʋ na fʋ kpi n ƴã-ɓaarʋ. Fʋ na siw nɩ a bɔw pʋɔ ɛ́ bɛ nyɛ̃ a faa al za ɩ̃ na na ɩ a páw a Zerizalɛm a ɩ.”» A bàwr-maal-kara Hɩlkɩahu nɩ a ʋ taabɛ tɩ lɛb'a wa n a sɔwfʋ ŋa wa yel kʋ̀ a nãà Zozɩasɩ.

²⁹Daadaalɛ, a nãà tɩ bʋɔl'ɩ a Zuda nɩ a Zerizalɛm ten nɩ-kore za a ʋ zie.

³⁰Bɛ tɩ lãw na cen a Ŋmɩn-yir-kpɛ̃ɛ́, bɛlɛ nɩ a Zerizalɛm nɩ a Zuda ten nɩbɛ, a bàwr-maalbɛ, a levitɩ mɩnɛ, nɩ a nɩ-pɛ-bʋʋrɛ za. Al pùorí, a nãà tɩ kanɩ nɩ a wõ-taa sɛbɛ[59] bɛ na nyɛ̃ a Ŋmɩn-yir-kpɛ̃ɛ pʋɔ a kʋ̀ bɛ za.

³¹A nãà tɩ àr'ɩ saaƴẽwn, a ʋ àrʋ zie, ɛ́ lɛb puuli a wõ-taa nɩ a Sore. Ŋa za n'ʋ a fɛrɛ k'ʋʋ tuur a Sore, sàwr a ʋ nɛ-ƴãwnɩ, a ʋ wulu, nɩ a lɛ ʋ na yel a, nɩ ʋ pʋɔ za, nɩ ʋ sɩ́ɛ za, ɛ́ sàwr a ƴɛ̀rʋ al za na sɛb a wõ-taa sɛbɛ pʋɔ a.

³²A nãà tɩ ƴãw na a Zerizalɛm nɩbɛ za nɩ a Bɛ̃zamɛ dɔwlʋ nɩbɛ ƴãw a nʋɔr ŋa. A lɛn daar za n'a a Zerizalɛm tẽw dem tɩ tuur a wõ-taa bɛ na maal'ɩ a bɛ sãà mɩnɛ Naaŋmɩn a.

³³A Zozɩasɩ tɩ ɩ na a ɩ-ɩrɩ al za na bɛ maal'ɩ wob na tɩ ɩrɛ a Ɩsɩrayɛl tẽw a, a baarɩ, ʋʋ fɛr a nɩbɛ za ƴãw bɛ puore a Sore bɛ Naaŋmɩn. A ʋ nyɔ-vʋʋrʋ daar za a, a bɛ kãw za bɛ tɩ lɛb ŋmɛlɩ kpaar cɔw a Sore, a bɛ sãà mɩnɛ Naaŋmɩn ɛ.