Read Dagara, Northern Ɛsɩdɩrasɩ 3 Bible Online

Ɛsɩdɩrasɩ 3 - Dagara, Northern bible

Ɛsɩdɩrasɩ 3

¹A yũon[6] pʋɔ cuwr ayopõi sob na wa ta a, a Ɩsɩrayɛl nɩbɛ za na tɩ zɩ̃ a bɛ tẽ-bɛrɛ pʋʋr baar'a tɩ wõ n taa wa ɓã taa a Zerizalɛm.

²A bàwr-maalɛ Zozue na ɩ Yosadakɩ bidɛb a, nɩ a ʋ yɛbr bàwr-maalbɛ, de nɩ Saltɩɛl bidɛb Zorobabɛl nɩ a ʋ yir dem, tɩ ír'a nyɔw a Ɩsɩrayɛl Naaŋmɩn bàwr-maal-kuur lɛb-mɛb, kɛ́ bɛ tʋ̃ɔ́ mɩ́ maalɩ nyɩw-a-za-bagɛ, mɛ̃ a lɛ bɛ na sɛb a Naaŋmɩn nɩr Moyiir wulu pʋɔ a.

³Bɛ tɩ zɔrɛ nɩ a nɩbɛ bɛ na diw bɛ cen nɩ baarɩ ɛ́ bɛ wa zɩ̃ a tẽw[7] pʋɔ a dɛ̃bɩ̃ɛ, ɛcɛ, bɛ tɩ cãà na lɛb mɛ a bàwr-maal-kuur ŋa a be a pɛr na tɩ dãw sʋ̃ɔ́ a, ɛ́ maalɩ a biɓaara nɩ a zaanʋɔra nyɩw-a-za-bagɛ kʋ̀ a Sore.

⁴Al pùorí, a Ɩsɩrayɛl nɩbɛ tɩ maal'ɩ a Sɛwr cuw mɛ̃ a lɛ na sɛb a. Bibir za, bɛ mɩ́ tɩ maal'ɩ a nyɩw-a-za-bagɛ lɛ nʋɔr na ƴãw a.

⁵Al pùorí, bɛ tɩ maalɛ nɩ a bibi-vɩɛrɩ za bagɛ kʋralɛ, a cuw za bibi-dãw-niwn sob bagɛ, a Sore cuwr maalʋ daar bagɛ, nɩ a al a bɛlɩ dem na mɩ́ nɔnɛ maalɩ a.

⁶À ŋá n'a a cuwr ayopõi sob bibi-dãw-niwn sob, bɛ lɛb tɩ tĩ maalɛ a nyɩw-a-za-bagɛ kʋ̀rɛ a Sore, ɛ́ a ʋ yir-kpɛ̃ɛ-paala pɛr bɛ sʋ̃ɔ́ sɛr ɛ.

⁷Al pùorí, bɛ tɩ ya n tõ-tõ-biir kɛ́ bɛ pɛnɩ kʋsɛbɛ nɩ wɛwr. Bɛ mɩ̀ tɩ kʋ̀ n bʋ̃-dɩrɩ, bʋ̃-nyúuri nɩ kãá a Sɩdɔ̃ tẽw dem nɩ a Tɩ́ɩ̀r tẽw dem, kɛ́ bɛ tʋ̃ɔ́ tɩr Libã sɛɛdɩr dàar kʋ̀ bɛ, a tu a kʋ̃ɔ-kpɛ̃ɛ wa ta Zafa. Bɛ tɩ ɩ n à à ŋá za a Pɛrsɩ tẽw nãà Siirisɩ na tɩ tɩr a sɔ́r a ƴãw.

⁸A yũon ʋl na tu a bɛ lɛb-waa yũon a Naaŋmɩn yir tẽ-kpɛ̃ɛ pʋɔ a Zerizalɛm a, a cuwr ayi sob daar, a Saltɩɛl bidɛb Zorobabɛl, a Yosadakɩ bidɛb Zozue, a bɛ yɛbr bàwr-maalbɛ, a levitɩ mɩnɛ nɩ a bɛlɩ dem za na tɩ yi a diw-cenu zie lɛb wa a, bɛ tɩ nyɔw nɩ a tome. Bɛ tɩ kaa na ír a levitɩ mɩnɛ bɛl na tɛr yome lɩzɛr'ɩ dɔwlɛ a, ƴãw kɛ̀ bɛ kaarɛ a Sore yir-kpɛ̃ɛ mɛb tome zie.

⁹A Zozue na ɩ levitɩ a nɩ a ʋ bidɛbr nɩ a ʋ yɛbr, nɩ Kadɩmɩɛl mɩ́ na ɩ levitɩ a, nɩ a ʋ bidɛbr na ɩ Zuda dɔwlʋ nɩbɛ a, tɩ lãw na kaarɛ a tõ-tõ-biir na tone a Naaŋmɩn yir mɛb tome a zie. A levitɩ mɩnɛ bɛl na ɩ a Henadadɩ dɔwlʋ nɩbɛ a tɩ sõwne bɛ na.

¹⁰A yir-mɩɛrbɛ na tɩ sʋ̃ɔ́ a Sore yir-kpɛ̃ɛ pɛr baar'a, bɛ ƴãw na a bàwr-maalbɛ na su a bɛ tõ-tõ-kparɩ tɛr'ɩ wɩɩr a, bɛ taw ta, a levitɩ mɩnɛ na ɩ a Asafʋ bʋʋrɛ ɛ́ tɛr sɛ̃sɛgɛ a, mɩ̀ taw ta, kɛ́ bɛ danɩ a Sore mɛ̃ a lɛ a Ɩsɩrayɛl nãà Daviir na ƴãw a nʋɔr a.

¹¹Bɛ tɩ cáarɛ na ɛ́ danɛ a Sore yiele nɩ a sɔwfʋ ŋa lɩɛrɛ taa: «A Sore vɩɛl'a, ɛ́ a ʋ nɔ̃wfʋ a Ɩsɩrayɛl ƴãw bɛ tɛr baarʋ ɛ!» A nɩbɛ za mɩ̀ tɩ ŋmɩɛr'ɩ kuryii danɛ nɩ a Sore bɛ na tɩ bine a ʋ yir-pɛr a ƴãw.

¹²Bàwr-maalbɛ, levitɩ mɩnɛ nɩ yie nɩ-bɛrɛ yaga na tɩ kor kor ɛ́ nyɛ̃ a Ŋmɩn-yir-kpɛ̃ɛ dãw-niwn sob a, tɩ vaa nɩ kɔkɔr kone nɩ ɛ́ bɛ sʋ̃ɔ́nɛ a Ŋmɩn-yir-kpɛ̃ɛ-paala pɛr a bɛ mimié. Ɛcɛ nɩ-yaga mɩ̀ tɩ ŋmɩɛr'ɩ kuryii a nʋ̃ɔ̀ na tɩ ɩrɛ bɛ a ƴãw.

¹³À ŋá n'a bɛ bɛ tɩ tʋ́ɔr bãwnɛ a nʋ̃ɔ̀ cáarʋ bɛ mɩnɛ na tɩ cáarɛ a, nɩ a kon a bɛ mɩnɛ na tɩ kone a ɩ, bʋ̃ʋ n'ʋ vɛ̃, a nɩbɛ za tɩ ŋmɩɛr'ɩ cɛlsɩ na mɩ́ tɩ yi zi-zãána zãána a.