Read Dagara, Northern Ɛsɩdɩrasɩ 4 Bible Online

Ɛsɩdɩrasɩ 4 - Dagara, Northern bible

Ɛsɩdɩrasɩ 4

¹A Zuda tẽw nɩ a Bɛ̃zamɛ tẽw Zifʋ mɩnɛ dɔ̃ dem[8] tɩ wõ na k'aa bɛlɩ dem na yi a diw-cenu zie lɛb wa a, lɛb'a mɩɛr Ŋmɩn-yir-kpɛ̃ɛ a Sore, a Ɩsɩrayɛl Naaŋmɩn ƴãw.

²Bɛ tɩ wa na wa páw a Zorobabɛl nɩ a yie nɩ-bɛrɛ yel bɛ à ŋá: «Tɩ bɔbr'a kɛ́ tɩ sõw nyɩ, nyɩ ŋmãa a Ŋmɩn-yir-kpɛ̃ɛ ŋa, bʋ̃ʋ n'ʋ vɛ̃, a Naaŋmɩn-been n'ʋ tɩ puore mɛ̃ a nyɩɩm a, ɛ́ maalɛ bagɛ kʋ̀rɛ ʋ, a lɛn daar za a Asiiri tẽw nãà Asaradɔ̃[9] na diw tɩ wa n a ka a.»

³Ɛcɛ a Zorobabɛl, a Zozue nɩ a Ɩsɩrayɛl yie nɩ-bɛrɛ bɛl na cɛ a tɩ sɔw bɛ na: «A bɛ sɛw kɛ́ nyɩ sõw tɩ tɩ ŋmãa yir a tɩ Naaŋmɩn ƴãw ɛ[10]. Tɩɩm tɛwr nɛbɛ a fɛr kɛ́ tɩ ŋmãa ʋ, bʋ̃ʋ n'ʋ vɛ̃, ʋ na ɩ n a Sore, a Ɩsɩrayɛl Naaŋmɩn yir. A Pɛrsɩ tẽw nãà Siirisɩ mɩŋa n'ʋ yel à à ŋá.»

⁴Lɛ n'a a tẽw dem tɩ ɩ lɛ za bɛ na tʋ̃ɔ́ a, k'aa Zuda tẽw Zifʋ mɩnɛ bàl ɛ́ tɩɛ a tome bɛr. Bɛ tɩ bɔbr'a kɛ́ bɛ ƴãw bɛ dɛ̃bɩ̃ɛ diw a Ŋmɩn-yir-kpɛ̃ɛ lɛb-mɛb tome bɛr.

⁵A Pɛrsɩ tẽw nãà Siirisɩ naalʋ-dɩb daar za tɩ ta n a Daarisɩ[11] naalʋ-dɩb daar a, bɛ tɩ ŋmɛ n a nãà yã-wulbɛ nɛ́ɛ, kɛ́ bɛ ɩ a Zifʋ mɩnɛ pʋ-tɩɛrʋ ta maalɩ ɛ.

⁶A nãà Zɛrsɛsɩ[12] naalʋ-dɩb tib daar, a Zifʋ mɩnɛ dɔ̃ dem tɩ tɩr'ɩ sɛbɛ kʋ̀ ʋ, manɩ a Zerizalɛm nɩ a Zuda ten dem sãwna.

⁷A Pɛrsɩ tẽw nãà Artazɛrsɛsɩ[13] naalʋ-dɩb daar, Bisɩlam, Mitɩredatɩ, Taveyɛl nɩ a bɛ taabɛ mɩ̀ tɩ sɛb'ɩ a nãà. A bɛ sɛb-tʋɔla tɩ sɛb'ɩ nɩ arameyɛ̃ sɛbrʋ nɩ a arameyɛ̃ kɔkɔr.

⁸A vuo ʋl na-kpɛ̃ɛ-lɩɛrɛ Erehum nɩ a ʋ tuure Sɩmsaɩ mɩ̀ tɩ sɛb'ɩ sɛb-tʋɔla kʋ̀ a nãà Artazɛrsɛsɩ a Zerizalɛm ƴãw. À ŋá n'a a sɛb-tʋɔla ŋa tɩ tĩ:

⁹«Sɛb-tʋɔla, a vuo na-kpɛ̃ɛ-lɩɛrɛ Erehum, a ʋ tuure Sɩmsaɩ, nɩ a bɛ taabɛ na kaarɛ a Din, Afarɩsatakɩ, Tarpɛl, Afarasɩ, Uurukɩ, Babɩlɔn, Siizɩ, Deha nɩ Elam voru zie a, na sɛb a.

¹⁰A nɩ-bʋʋrɛ ŋmãa bɛl a Asɩnapaar[14] na tɩ ɩ na-kpɛ̃ɛ na tɛr yúor a, na diw wa n a yúor ƴãw, bɛl na zɩ̃ a Samaari tẽ-bɛrɛ pʋɔ nɩ a vuo ʋl za na be a Efaratɩ gãwn, a mʋ̃tɔ̃w-kpɛb-lowr a...»

¹¹A bɛ sɛb-tʋɔla ƴɛ̀r-bie n'ɩ á ŋá: «A ʋ tõ-tõ-biir, a nɩbɛ na be a Efaratɩ gãwn vuo pʋɔ a, bɛlɛ nɛbɛ sɛbr a nãà Artazɛrsɛsɩ...»

¹²«Tɩ yere na kʋ̀rɛ a fʋ̃ʋ, na-kpɛ̃ɛ, k'aa Zifʋ mɩnɛ bɛl na yi a fʋ zie wa ta a tɩ sɔgɔ a Zerizalɛm a, bɛ lɛb'a mɩɛr a tẽ-kpɛ̃ɛ-gaara, a tẽ-kpɛ̃ɛ-faa ŋa. A dacĩ-pɛ́ɛ na tɩ sʋ̃ɔ́ a, bɛ lɛb'a maalɛ a ƴãwn ɛ́ mɩɛr a dacine.

¹³A fɛr'a k'aa nãà bãwnɩ a, a tẽ-kpɛ̃ɛ ŋa nɩ a ʋ dacine wa lɛb mɛ a, a tẽw dem kʋ̃ cãà yarɛ a yar-bʋʋrɛ bʋʋrɛ nɩ a zuru-yar nɩ a tu-tɔlʋ yar ɛ, ɛ́ a nãà libie daga n'ʋ a na mal.

¹⁴Alɛ n'a so, a tɩɩm na tone a nãà tome a ɩ yúor, ɛ́ bɛ sàwr kɛ́ bɛ ɩ a nãà la a, tɩ yere na kʋ̀rɛ ʋ

¹⁵k'ʋʋ ƴãw bɛ bɔ a bɛl na de ʋ niwn a yel-kore sɛbɛ pʋɔ. Ʋ na nyɛ̃ nɩ a be a ɩ yel-mɩŋa, k'aa tẽ-kpɛ̃ɛ ŋa, a Zerizalɛm, gaarɛ nɩ kʋralɛ: kʋralɛ n'a ʋ tɩ malɛ a na-mɩnɛ nɩ a tẽ-ŋma-kʋ̀rɩ na-kpɛ̃ɛ-lɩɛrbɛ, ɛ́ ìre nɩ a zɛbr a koro kãw za. À à ŋá n'a so bɛ tɩ ŋmɛr ʋ bɛr.

¹⁶Tɩ bɔbr'a kɛ́ tɩ páw yel kʋ̀ a nãà: a tẽ-kpɛ̃ɛ ŋa nɩ a ʋ dacine wa lɛb mɛ a, ʋ kʋ̃ cãà so a Efaratɩ gãwn ka ɩ.»

¹⁷A nãà tɩ tɩr'ɩ a ʋ sɔwfʋ à ŋá: «A na-kpɛ̃ɛ-lɩɛrɛ Erehum, a ʋ tuure Sɩmsaɩ nɩ a bɛ taabɛ na kpɩɛr a Samaari nɩ a Efaratɩ gãwn vuo na cɛ be a mʋ̃tɔ̃w-kpɛb-lowr a pʋɔ a, bɛlɛ so a ƴɛ̀rʋ.» «Ɩ̃ puore nyɩ na...»

¹⁸«A sɛb-tʋɔla nyɩ na tɩr kʋ̀ m a, bɛ lɩɛb'ʋ na ɛ́ kanɩ ʋ kʋ̀ m.

¹⁹Ɩ̃ ƴãw na bɛ bɔ kaa, ɛ́ bɛ̀ sɩrɩ na nyɛ̃ kɛ́ koro za n'a a Zerizalɛm mɩ́ ìr zɛbr'ɩ a na-mɩnɛ ɛ́ a ʋ nɩbɛ mɩ́ tɛr a damnʋ nɩ a gaarʋ.

²⁰Na-mɩnɛ na kpɛmɛ a tɩ dãw na be a Zerizalɛm so a Efaratɩ gãwn vuo za na be a mʋ̃tɔ̃w-kpɛb-lowr a, a nɩbɛ tɩ yarɛ nɩ yar-bʋʋrɛ bʋʋrɛ nɩ zuru-yar nɩ sɔr-yar kʋ̀rɛ bɛ.

²¹Ƴɛrɛŋa a, nyɩ yel a Zifʋ mɩnɛ kɛ́ bɛ bɛr a bɛ tome: a Zerizalɛm kʋ̃ lɛb mɛ, mãa mɩŋa bɛ wa tɩr a sɔ́r a ɩ.

²²Nyɩ gù vla taa ƴãwnɛ dɩ̃ɛnʋ a yel ŋa ƴãw ɛ, a yele taa sãwnɛ tɔlɛ nidaa wa waar'ɩ bom a nãà naalʋ-dɩb pʋɔ ɩ.»

²³A Erehum, a ʋ tuure Sɩmsaɩ nɩ a bɛ taabɛ na dɛ wa bãw a Artazɛrsɛsɩ sɛb-tʋɔla ƴɛ̀rʋ a, bɛ ìr'ɩ fɔ̃wlɛ cen a Zerizalɛm tɩ ɩ n fãw a Zifʋ mɩnɛ bɛr a tome.

²⁴A Zerizalɛm a, a Ŋmɩn-yir-kpɛ̃ɛ lɛb-mɛb tome tɩ tɛw na. A tɩ tɛw na tɩ ta a Pɛrsɩ tẽw nãà Daarisɩ naalʋ-dɩb yome ayi sob daar.