Read Dagara, Northern Ɛsɩdɩrasɩ 6 Bible Online

Ɛsɩdɩrasɩ 6 - Dagara, Northern bible

Ɛsɩdɩrasɩ 6

¹A nãà Daarisɩ tɩ ƴãw na bɛ bɔ a Babɩlɔn tẽw pʋɔ, a diru al pʋɔ bɛ na mɩ́ bin a sɛb-kore nɩ a bʋ̃-vɩɛlɩ vɩɛlɩ a.

²Ɛcɛ, Ɛkɩbatan[18] na ɩ a Medi tẽ-ŋmãa-kʋ̀ra tẽ-kpɛ̃ɛ a, zɛbr-yir-kpɛ̃w pʋɔ n'a bɛ tɩ nyɛ̃ gán sɛbɛ na pili pili, ɛ́ tɛr a ƴɛ̀r-bie á ŋá a: «Yel na manɩ bin a.»

³«A nãà Siirisɩ naalʋ-dɩb yũon-dãw-niwn sob a, ʋ tɩr'ɩ nʋɔr ŋa: a fɛr'a k'aa Naaŋmɩn yir lɛb mɛ a Zerizalɛm, ɩ a bagɛ maalʋ-zie. A ʋ dacĩ-pɛ-kore zu n'a bɛ na lɛb mɛ ʋ. A ʋ kɛrʋ na ɩ n mɛtɩr lɩzɛr'ɩ pie ɛ́ a yɛ̀lʋ mɩ̀ ɩ a mɛtɩr lɩzɛr'ɩ pie.

⁴Bɛ na mɩ́ ƴãw nɩ kʋsɛ-pɛnɩ gbɛlɛ atarɩ nɩ dàar wɛwr gbɛl-beƴeni lɩɛrɩ taa. A nãà daga libie so a san na ya.

⁵A Zerizalɛm Ŋmɩn-yir salm-zɩɛ nɩ salm-pla bome a Nabikodonozɔɔr na tɩ tuo cen nɩ a Babɩlɔn a, a fɛr'a kɛ́ bɛ lɛb tuo a wa n a Zerizalɛm Ŋmɩn-yir-kpɛ̃ɛ pʋɔ, ɛ̀ bom za mɩ́ lɛb wa bin a ʋ binu zie.»

⁶Lɛ n'a a Daarisɩ tɩ sɛb sɛb-tʋɔla ŋa kʋ̀ a Tatɩnaɩ, na ɩ a na-kpɛ̃ɛ-lɩɛrɛ be a tẽ-ŋmãa-kʋ̀ra ʋl na be a Efaratɩ gãwn mʋ̃tɔ̃w-kpɛb-lowr a pʋɔ a, nɩ a Setaar-Bozɩnaɩ nɩ a bɛ tõ-tõ-nɩ-bɛr-taabɛ: «Nyɩ ír nũu a yel ŋa pʋɔ.

⁷Nyɩ bɛr a Zifʋ mɩnɛ zaa zoom bɛ lɛb mɛ a Naaŋmɩn yir: a Zifʋ mɩnɛ na-kpɛ̃ɛ-lɩɛrɛ nɩ a Zifʋ mɩnɛ nɩ-bɛrɛ na lɛb'a mɛ ʋ a ʋ zi-kʋra pʋɔ.

⁸A na ɩ à ŋá a, ɩ̃ yere na kʋ̀rɛ nyɩ kɛ́ nyɩ sõwne a Zifʋ mɩnɛ nɩ-bɛrɛ a Ŋmɩn-yir-kpɛ̃ɛ lɛb-mɛb ƴãw. A samɛ bɛ na kpɩɛr a, nyɩ na mɩ́ ya n a za daadaalɛ nɩ a nãà libie na yire a tẽ-ŋmãa-kʋ̀ra zuru-yar pʋɔ a.

⁹Nyɩ na mɩ́ kʋ̀ n a Zerizalɛm bàwr-maalbɛ a alɩ bome nɛ bɛ na bɔbr a, bibie za, mɛ̃ a lɛ bɛ na na mɩ́ yel kʋ̀ nyɩ a: a nadɛ-pɔlɛ, a pʋ́rɩ nɩ a peli a nyɩw-a-za-bagɛ bɛ na mɩ́ maalɩ kʋ̀ a Naaŋmɩn na be a salom zu a ƴãw. Nyɩ mɩ̀ na mɩ́ kʋ̀ bɛ nɩ a ble, a nyaarʋ, a divɛ̃ nɩ a kãá.

¹⁰À ŋá n'a bɛ na mɩ́ tɩr de-kʋ̀b bome, a zʋ̀ʋ́r na nyùur vla vla a, kʋ̀ a Naaŋmɩn na be a salom zu a, ɛ́ puori a nãà nɩ a ʋ bibiir nyɔ-vʋʋrʋ ƴãw.

¹¹Nɩr wa zawrɩ a ɩ̃ nʋɔr ŋa tub a, bɛ de a ʋ yir dà-cɩlʋ kãw tuw ba ɛ́ ɓáw ʋ cɔ̀r ba a dàa zu, al pùorí, bɛ ɩ a ʋ yir lɩɛbɩ tãpúo.

¹²A Naaŋmɩn na wule k'ʋʋ be n a Zerizalɛm a, ʋ dɔwrɩ nãà za bɩɩ nɩ-bʋʋrɛ za nãà wa zawrɩ a ɩ̃ nʋɔr, ɛ́ yel k'ʋʋ na ŋmɛr'ɩ a Ŋmɩn-yir-kpɛ̃ɛ ŋa bɛr a. A mãa Daarisɩ n'ʋ yel à à ŋá: bɛ tu ʋ vla vla!»

¹³A Tatɩnaɩ na be a Efaratɩ gãwn a mʋ̃tɔ̃w-kpɛb-lowr ɩ a na-kpɛ̃ɛ-lɩɛrɛ a, Setaar-Bozɩnaɩ nɩ a bɛ taabɛ, bɛ tɩ tu n a lɛn tɔr za a nãà Daarisɩ na tɩ yel a.

¹⁴A naaŋmɩn-ƴɛ̀r-manbɛ Aze de nɩ Zakari[19] na ɩ Ido bidɛb a ƴɛ̀rʋ tɩ sõwne nɩ a Zifʋ mɩnɛ nɩ-bɛrɛ bɛ cãà mɩɛr a yir ɛ́ a tome cere vla. Bɛ tɩ baar'ɩ a mɛb mɛ̃ a lɛ a Ɩsɩrayɛl Naaŋmɩn na yel a, nɩ a lɛ a Pɛrsɩ tẽw na-mɩnɛ Siirisɩ, Daarisɩ nɩ Artazɛrsɛsɩ na yel a.

¹⁵A Ŋmɩn-yir-kpɛ̃ɛ tɩ baar'ɩ a Adaar cuw[20] bibie lɩzɛr'ɩ ata sob, a Daarisɩ naalʋ-dɩb yome ayʋɔb sob daar.

¹⁶A Zifʋ mɩnɛ, a bàwr-maalbɛ, a levitɩ mɩnɛ nɩ a nɩbɛ bɛl na tɩ yi a diw-cenu zie lɛb wa a, tɩ maal'ɩ cuw de a yir kʋ̀ a Naaŋmɩn nɩ nʋ̃ɔ̀.

¹⁷A cuw ŋa ƴãw a, bɛ tɩ kʋ n nadɛɛ kʋba (100), pʋ́rɩ kɔbr ayi (200) nɩ peli kɔbr anaar (400) maal'ɩ bàwr. Bɛ mɩ̀ tɩ kʋ n bʋrɩ pie nɩ ayi, dɔwlʋ za bʋra, k'aa Naaŋmɩn dɩ a Ɩsɩrayɛl nɩbɛ za yel-bebe suur kʋ̀ bɛ.

¹⁸Bɛ tɩ põ nɩ a bàwr-maalbɛ nɩ a levitɩ mɩnɛ palɛ palɛ, a Naaŋmɩn na be a Zerizalɛm a tome tob ƴãw, mɛ̃ a lɛ bɛ na sɛb a Moyiir sɛbɛ pʋɔ a.

¹⁹A bɛlɩ dem za na tɩ yi a diw-cenu zie lɛb wa a tɩ maal'ɩ a Tɔl-gãw cuw a yũon ʋl na tu a, a cuw-dãw-niwn sob bibie pie nɩ anaar sob daar.

²⁰A bàwr-maalbɛ nɩ a levitɩ mɩnɛ tɩ lãw na so a bɛ dɛwr bɛr, ɛcɛ a nɩbɛ na cɛ a bɛ tɩ ɩ a lɛ ɩ. A na ɩ à ŋá a, a levitɩ mɩnɛ na tɩ vɩɛl bɛ za a, bɛlɛ nɛbɛ tɩ ŋma a Tɔl-gãw peli kɔkɛɛ a nɩbɛ ƴãw, a bɛ yɛbr bàwr-maalbɛ ƴãw nɩ a bɛl mɩŋa ƴãw.

²¹A Ɩsɩrayɛl nɩbɛ za tɩ dɩ n a Tɔl-gãw cuw, a bɛl na tɩ yi a diw-cenu zie lɛb wa a, nɩ a bɛl na tɩ zawrɩ a tẽw nɩbɛ na ɩ dɛwr dem a ɩ-ɩrɩ tub a. A bɛ ŋa nɛbɛ tɩ lãw nɩ a bɛ Ɩsɩrayɛl tẽ-bi-taabɛ kɛ́ bɛ tone a Sore, a Ɩsɩrayɛl Naaŋmɩn tome.

²²Al pùorí, bɛ tɩ maal'ɩ a dipɛ̃ na bɛ ƴãw dãbɩl a cuw nɩ nʋ̃ɔ̀ bibie ayopõi. A Sore tɩ ɩ na nʋ̃ɔ̀ kpɛ bɛ yaga za, ʋ na tɩ lɩɛbɩ a Asiiri tẽw nãà[21] socir a bɛ vla ƴãw a. A tɩ ɩ na bɛ ƴãw fãw lɛb nyɔw a tome a Ɩsɩrayɛl Naaŋmɩn yir lɛb-mɛb ƴãw.