Read Dagara, Northern Neemi 11 Bible Online

Neemi 11 - Dagara, Northern bible

Neemi 11

¹A nɩbɛ nɩ-bɛrɛ tɩ kpɩɛr'ɩ a Zerizalɛm tẽw pʋɔ. A nɩbɛ na cɛ a pʋɔ a, bɛ tɩ ŋmɛ n a gbãw mɩ́ kaa ír nɩ-been nɩbɛ pie pʋɔ k'ʋʋ cen tɩ kpɩɛr a Zerizalɛm, a tẽ-sõw pʋɔ, ɛ́ a piwaɩ bɛl na cɛ a kpɩɛr a tẽw tẽ-bɛrɛ pʋɔ.

²A nɩbɛ tɩ puor'ɩ a bɛlɩ dem na tɩ nɔnɛ cen tɩ kpɩɛr a Zerizalɛm a yãanɩ.

³A Zuda tẽ-ŋmãa-kʋ̀ra pʋɔ nɩ-bɛrɛ tɩ kpɩɛr'ɩ a Zerizalɛm, ɛ́ a Ɩsɩrayɛl nɩbɛ ŋmaarɛ, a bàwr-maalbɛ, a levitɩ mɩnɛ, a Ŋmɩn-yir-kpɛ̃ɛ tõ-tõ-biir, a Salomɔ̃ tõ-tõ-biir bʋʋrɛ bɛl kpɩɛr a bɛ tẽ-bɛrɛ pʋɔ, ŋa za a ʋ zi-sóra pʋɔ.

⁴Ɛcɛ, Zuda nɩ Bɛ̃zamɛ nɩbɛ bɛ mɩnɛ tɩ kpɩɛr'ɩ a Zerizalɛm. A Zuda nɩbɛ pʋɔ a, Ataya tɩ n'ʋ. A Ataya tɩ ɩ n Uziya bidɛb, a Uziya ɩ Zekarɩa bidɛb, a Zekarɩa ɩ Amarɩa bidɛb, a Amarɩa ɩ Sefatɩa bidɛb, a Sefatɩa ɩ Mahalalɛl bidɛb a Perɛsɩ bibiir pʋɔ,

⁵de nɩ Maaseya na ɩ Barukɩ bidɛb a, ɛ́ a Barukɩ ɩ Kol-Hoze bidɛb, a Kol-Hoze ɩ Hazaya bidɛb, a Hazaya ɩ Adaya bidɛb, a Adaya ɩ Yoyarivʋ bidɛb, a Yoyarivʋ ɩ Zekarɩa bidɛb, a Zekarɩa ɩ Ha-Siloni bidɛb.

⁶A Zerizalɛm nɩbɛ pʋɔ a, a Perɛsɩ dɔwlʋ nɩbɛ tɩ ɩ n kɔbr anaar dɔwlɩ lɩz'a ata nɩ ani (468), nɩbɛ na kpɛ socir a.

⁷A Bɛ̃zamɛ nɩbɛ pʋɔ: Salu tɩ ɩ n Mesulam bidɛb, a Mesulam ɩ Yowɛdɩ bidɛb, a Yowɛdɩ ɩ Pedaya bidɛb, a Pedaya ɩ Kolaya bidɛb, a Kolaya ɩ Maaseya bidɛb, a Maaseya ɩ Ɩtɩɛl bidɛb, a Ɩtɩɛl ɩ Yesaya bidɛb,

⁸de nɩ Gabaɩ nɩ Salaɩ. A Bɛ̃zamɛ nɩbɛ tɩ ɩ n túr vʋ̃ɔ kʋba dɔwlɩ lɩzɛr'ɩ a ani (928).

⁹Zikiri bidɛb Yowɛl'ʋ tɩ ɩ a nɩbɛ bɛ ŋa nɩ-kpɛ̃ɛ, ɛ́ Ha-Senua bidɛb Yehuda ɩ a tẽ-kpɛ̃ɛ nɩ-kpɛ̃ɛ-tuure.

¹⁰A bàwr-maalbɛ pʋɔ: Yoyarivʋ bidɛb Yedaya, Yakin

¹¹nɩ Seraya. A Seraya tɩ ɩ n Hɩlkɩa bidɛb, a Hɩlkɩa ɩ Mesulam bidɛb, a Mesulam ɩ Sadɔkɩ bidɛb, a Sadɔkɩ ɩ Merayɔtɩ bidɛb, a Merayɔtɩ ɩ a bàwr-maal-kara Ahituvʋ bidɛb,

¹²de nɩ a bɛ dɔwlʋ nɩbɛ kɔbr ani dɔwlɩ lɩzɛr'ɩ ayi (822), na tɩ so a tome a Naaŋmɩn yir pʋɔ a. Adaya tɩ ɩ n Yeroham bidɛb, a Yeroham ɩ Pelalɩa bidɛb, a Pelalɩa ɩ Amisi bidɛb, a Amisi ɩ Zekarɩa bidɛb, a Zekarɩa ɩ Pasehuur bidɛb, a Pasehuur ɩ Malkɩa bidɛb,

¹³nɩ a yie nɩ-bɛrɛ kɔbr ayi dɔwlɩ lɩz'a ayi nɩ ayi (242) na ɩ a ʋ dɔwlʋ nɩbɛ a. Amasɩsaɩ tɩ ɩ n Azarɛl bidɛb, a Azarɛl ɩ Azaɩ bidɛb, a Azaɩ ɩ Mesilemɔtɩ bidɛb, a Mesilemɔtɩ ɩ Ɩmɛɛr bidɛb,

¹⁴de nɩ a bɛ yɛbr na kpɛ socir a, bɛ za ɩ nɩbɛ kɔbr ayi dɔwlɩ lɩzɛr'ɩ ani (228). A nɩbɛ bɛ ŋa nɩ-kpɛ̃ɛ tɩ n'ɩ Ha-Gedolim bidɛb Zavɩdɩɛl.

¹⁵A levitɩ mɩnɛ pʋɔ: Semaya tɩ ɩ n Hasuvʋ bidɛb, a Hasuvʋ ɩ Azirikam bidɛb, a Azirikam ɩ Hasavɩa bidɛb, a Hasavɩa ɩ Buni bidɛb,

¹⁶de nɩ a levitɩ mɩnɛ nɩ-bɛrɛ Sabɩtaɩ nɩ Yozavadɩ na so a Naaŋmɩn yir tome al na ɩ a yẽw tome a.

¹⁷Matanɩa tɩ ɩ n Mɩka bidɛb, a Mɩka ɩ Zavidi bidɛb, a Zavidi ɩ Asafʋ bidɛb. A Matanɩa ŋa n'ʋ tɩ sɛw k'ʋʋ mɩ́ cɛ̀ a danʋ yielu a puoru daar. Bakɩbukɩa na ɩ a Matanɩa yɛb kãw a n'ʋ tɩ sõwne ʋ, de nɩ Avɩda na ɩ Samua bidɛb, ɛ́ ɩ Galal yãw ɛ́ ɩ Yedutun yãw-suwle a.

¹⁸A levitɩ mɩnɛ za tɩ ɩ n nɩbɛ kɔbr ayi dɔwlɩ lɩz'a anaar nɩ anaar (284) a tẽ-sõw pʋɔ.

¹⁹A dɩ̃dɔ-gùrbɛ, Akuvʋ nɩ Talmon tɩ be n be so a dɩ̃dɛɛ piwru, bɛlɛ nɩ a bɛ nɩbɛ. Bɛ za tɩ ɩ n nɩbɛ lɩz'a ani nɩ pie nɩ ayi (172).

²⁰A Ɩsɩrayɛl nɩbɛ bɛl na cɛ a, a bàwr-maalbɛ nɩ a levitɩ mɩnɛ, tɩ kpɩɛr'ɩ a Zuda tẽw tẽ-bɛrɛ al na cɛ a pʋɔ, ŋa za a ʋ zi-sóra pʋɔ.

²¹A Ŋmɩn-yir-kpɛ̃ɛ tõ-tõ-biir tɩ kpɩɛr'ɩ a Zerizalɛm lowr ʋl bɛ na bʋɔlɛ kɛ́ Ofɛl a. Siha nɩ Gisɩpa nɛbɛ tɩ ɩ a bɛ nɩ-bɛrɛ.

²²A Zerizalɛm levitɩ mɩnɛ nɩ-kpɛ̃ɛ tɩ n'ɩ Uzi na ɩ Bani bidɛb, ɛ́ a Bani ɩ Hasavɩa bidɛb, ɛ́ a Hasavɩa ɩ Matanɩa bidɛb, ɛ́ a Matanɩa ɩ Mɩka bidɛb a Asafʋ dɔwlʋ pʋɔ a. Bɛlɛ tɩ so a yielu yele a Naaŋmɩn yir pʋɔ.

²³A tɩ fɛr'ɩ a yiel-yielbɛ kɛ́ bɛ tuur nʋɔr a nãà na ƴãw a, nɩ a tub al na be be a bɛ bibi-vɩɛrɩ za tome ƴãw a.

²⁴Mesezaveɛl bidɛb Petaya na ɩ Zuda bidɛb Zera dɔwlʋ nɩr a n'ʋ tɩ ɩ a Ɩsɩrayɛl bʋʋrɛ lɩɛrɛ a Pɛrsɩ tẽw nãà yir pʋɔ.

²⁵A Zuda dɔwlʋ yie a mɩnɛ nɩbɛ tɩ kpɩɛr'ɩ a kura pʋɔ ziir za: Kɩrɩyatɩ-Arba nɩ a tẽli-kpɔwlɩ, Divon nɩ a tẽli-kpɔwlɩ, Yekaviseyɛl nɩ a tẽli,

²⁶Yesua, Molada, Bɛtɩ-Pelɛtɩ,

²⁷Hasaar-Sual, Bɛɛr-Seva nɩ a tẽli-kpɔwlɩ,

²⁸Sɩkɩlagɩ, Mekona nɩ a tẽli-kpɔwlɩ,

²⁹Ɛɩn-Irimon, Sorea, Yarmutɩ,

³⁰Zanoa, Adulam nɩ a zi-kpɔwlɩ, Lakisɩ nɩ a voru, Azeka nɩ a tẽli-kpɔwlɩ. A na ɩ lɛ a, bɛ tɩ zɩ̃ n a Bɛɛr-Seva na be saa-pɛrɩ́-dʋrʋ-lowr a, nɩ a Hinom fʋɔla na be a saa-pɛrɩ́-gʋba-lowr a cara pʋɔ.

³¹A Bɛ̃zamɛ dɔwlʋ yie nɩbɛ tɩ kpɩɛr'ɩ Geva, Mikɩmasɩ, Aya, Betɛl nɩ a tẽli-kpɔwlɩ,

³²Anatɔtɩ, Nɔvʋ, Ananɩa,

³³Hasɔɔr, Arama, Gitayim,

³⁴Hadidɩ, Sevoyim, Nebalatɩ,

³⁵Lɔdɩ, Ono, nɩ a nuru tõ-tõ-biir fʋɔla.

³⁶A levitɩ bɛ mɩnɛ tɩ yi n a Zuda tẽw cen tɩ kpɩɛr a Bɛ̃zamɛ tẽw.