Read Dagara, Northern Neemi 13 Bible Online

Neemi 13 - Dagara, Northern bible

Neemi 13

¹A lɛn daar, bɛ tɩ kanɛ nɩ a Moyiir sɛbɛ kʋ̀rɛ a nɩbɛ za, tɩ ta zie kãw bɛ na sɛb k'aa Amɔ̃ tẽw dem nɩ a Mowab tẽw dem bɛ be za na kpɛ a bɛlɩ dem na puore a Naaŋmɩn a lãw pʋɔ ɩ[30].

²Bʋ̃ʋ n'ʋ vɛ̃, a koro za a, bɛ bɛ tɩ tuori a Ɩsɩrayɛl nɩbɛ nɩ bʋ̃-dɩrɩ nɩ kʋ̃ɔ ɩ. Mɔ̃ mɩ̀, a Mowab tẽw dem tɩ ya n Balaam k'ʋʋ wa ŋmɛ ƴãw a Ɩsɩrayɛl nɩbɛ, ɛcɛ, a tɩ Naaŋmɩn tɩ lɩɛb'ɩ a ŋmɛ-ƴãw ʋ ɩ maalʋ[31].

³A Ɩsɩrayɛl nɩbɛ na tɩ wõ a wulu ŋa a, bɛ yel'a kɛ́ bɛ na diw nɩ a sãanbɛ za bɛr a bɛ lãw pʋɔ.

⁴A yele á ŋá na bɛ tɩ ɩ sɛr a, bɛ tɩ kaa na ír a bàwr-maalɛ Ɛlyasivʋ k'ʋʋ kaarɛ a tɩ Naaŋmɩn yir diru zie. A Ɛlyasivʋ na tɩ ɩ a Toviya nɩr a,

⁵ʋ tɩ cɔbr'ɩ di-yɛlʋ kãw kʋ̀ ʋ, a be bɛ na tɩ bine a kukur de-kʋ̀b bome, a tɩ-suur-zɔ̃-na-nyùur-vla-vla-a, nɩ a Ŋmɩn-yir-kpɛ̃ɛ labɛ a, de nɩ a bome bɛ na mɩ́ kʋ̀ a bàwr-maalbɛ a, a ble, a divɛ̃-paala nɩ a kãá ziir pie sob, a levitɩ mɩnɛ, a yiel-yielbɛ nɩ a dɩ̃dɔ-gùrbɛ na mɩ́ so a.

⁶A yele á ŋá na tɩ ɩrɛ a lɛn daar a, ɩ̃ bɛ tɩ be a Zerizalɛm ɛ: ɩ̃ tɩ cen nɩ a Babɩlɔn tẽw nãà Artazɛrsɛsɩ[32] zie, a ʋ naalʋ-dɩb yome lɩzɛr'ɩ pie nɩ ayi sob daar. Ɩ̃ na tɩ kɔwrɩ blã, ɛ́ a nãà mɩ̀ kʋ̀ m sɔ́r a zũú,

⁷ɩ̃ tɩ lɛb'a cen a Zerizalɛm. Ɩ̃ tɩ nyɛ̃ nɩ a yel-faa a Ɛlyasivʋ na maalɩ a, ʋ na tɩ kʋ̀ a Toviya dĩo, a dɩ̃dɔr na be a Ŋmɩn-yir-kpɛ̃ɛ davʋra pʋɔ a.

⁸Ɩ̃ tɩ nyɛ̃ nɩ suur bɛ dɩ vuo ɩ, ɛ́ ƴãw bɛ wob a Toviya bome za lɔb bɛr yẽw.

⁹Al pùorí, ɩ̃ ƴãw bɛ tu a dɛwr-so-bɛrʋ tub a diru ƴãw, ɛ́ ƴãw bɛ lɛb de a Ŋmɩn-yir-kpɛ̃ɛ labɛ, a de-kʋ̀b bome nɩ a tɩ-suur-zɔ̃-na-nyùur-vla-vla-a, wa bin a be.

¹⁰Bɛ mɩ̀ tɩ yel'a kʋ̀ m k'aa levitɩ mɩnɛ bɛ páwr a bome a na fɛr kɛ́ bɛ mɩ́ kʋ̀ bɛ a ɩ. Alɛ n'a so bɛlɛ nɩ a yiel-yielbɛ tɩ bɛr a bɛ tome ɛ́ zɔ, ŋa mɩ́ tɩ zɩ̃ a ʋ tẽsɔw pʋɔ.

¹¹Ɩ̃ tɩ nyɔw nɩ a nɩ-bɛrɛ yere ɛ́ sowri bɛ: «Bʋ̃ʋ n'ʋ so bɛ zawrɩ a Naaŋmɩn yir bɛr ʋ gã?» Al pùorí, ɩ̃ bʋɔlɩ a levitɩ mɩnɛ nɩ a yiel-yielbɛ wa ƴãw bɛ lɛb de a bɛ tome.

¹²Lɛ n'a a Zifʋ mɩnɛ tɩ lɛb waar'ɩ a ble, a divɛ̃-paala nɩ a kãá ziir pie sob a diru al na tɩ be be a bome á ŋá binu ƴãw a pʋɔ.

¹³Ɩ̃ tɩ kaa na ír a bàwr-maalɛ Selemɩa, a sɛ-sɛbrɛ Sadɔkɩ nɩ a levitɩ Pedaya, kɛ́ bɛ kaarɛ a diru á ŋá zie, ɛ́ Zakuur bidɛb Hanan, mɩ̀ na ɩ Matanɩa yãw a, sõwne bɛ. Bɛ tɩ ɩ n nɩbɛ na tɛr yel-mɩŋa a, a nɩbɛ zie. A bɛ tome tɩ ɩ n a de-kʋ̀b bome pob, bɛlɛ nɩ a bɛ taabɛ cara pʋɔ.

¹⁴«Ɩ̃ Naaŋmɩn i, cãà bãwnɩ mɛ̃ à à ŋá ƴãw! Taa yiire a nɔ̃wfʋ ɩ̃ na tɛr tõ n a fʋ yir ƴãw a ɩ, ɩ̃ na tɛr a fʋ tome tob ƴãw a ɩ.»

¹⁵A lɛn daar, ɩ̃ tɩ nyɛ̃ nɩ a Zuda tẽw pʋɔ nɩbɛ bɛ nɛbr divɛ̃ tɩɩr wɔmɛ ŋmɛrɛ a nɛbrʋ ziir a pɩ̃ɛnʋ-bibir. Bɛ mɩnɛ tɩ tuore nɩ ble, ɛ́ tuore divɛ̃, divɛ̃ tɩɩr wɔmɛ, kãkamɛ nɩ bʋ̃-yaga yaga a mɩnɛ a bɛ bòn kɛ́ bɛ kpɛ n a Zerizalɛm. A ʋlɩ bibir bɛ na tɩ kʋɔrɛ a bɛ yɛ̀rʋ́ bome a, ɩ̃ tɩ yel'a kɛ́ bɛ gùre bɛ tʋɔra[33].

¹⁶Lɛb waar, a Tɩ́ɩ̀r tẽw dem na tɩ kpɩɛr a Zerizalɛm a mɩ́ tɩ ƴãw na bɛ wa n zʋ́mɛ́ nɩ bʋ̃-kʋ̀ɔrɩ a mɩnɛ bɛ wa kʋɔrɩ nɩ a Zerizalɛm nɩ a Zuda tẽw dem, a pɩ̃ɛnʋ-bibir.

¹⁷Ɩ̃ tɩ nyɔw nɩ a Zuda tẽw nɩ-bɛrɛ yere à ŋá: «Nyɩ maal'a bãw a yel-faa nyɩ na maalɩ a? Nyɩ bɛ de a pɩ̃ɛnʋ-bibir ʋ ɩ bibi-sõw ɛ.

¹⁸À à ŋá n'a a nyɩ sãàkʋm-kore tɩ ɩ, ɛ́ a alɛ n'a so a tɩ Naaŋmɩn ɩ a kpɩɛrʋ na sɛw à ŋá a[34], ʋ páw tɩɩm nɩ a tɩ tẽ-kpɛ̃ɛ Zerizalɛm. Ɛ́ a nyɩɩm a, nyɩ na bɛ de a pɩ̃ɛnʋ-bibir k'ʋ ɩ sõw a, nyɩ lɛb'a damnɛ a Naaŋmɩn suur ƴãwnɛ a Ɩsɩrayɛl!»

¹⁹Lɛ n'a ɩ̃ tɩ ƴãw kɛ́ bɛ mɩ́ pàw a Zerizalɛm dɩ̃dɛɛ, a zie na sɔbr a, ɛ́ a pɩ̃ɛnʋ-bibir bãw tĩ, ɛ́ taa yuore a, ɛ́ a pɩ̃ɛnʋ-bibir bɛ baarɩ sɛr ɛ. Ɩ̃ tɩ ƴãw nɩ a ɩ̃ lãw-tõ-taabɛ bɛ mɩnɛ bɛ pɩɛlɩ a dɩ̃dɛɛ, gù kɛ́ yɛ̀rʋ́ bom za taa kpɩɛr a tẽw pʋɔ a pɩ̃ɛnʋ-bibir ɛ.

²⁰Gb'a been bɩɩ gb'a ayi ƴãw a, yɛ-yɛrbɛ nɩ bʋ̃-bʋʋrɛ za kʋ̀ɔrbɛ tɩ gã nɩ a yẽw.

²¹Ɩ̃ tɩ ƴɛ̀rɛ nɩ à ŋá yere kɛ́ bɛ gùre bɛ tʋɔra: «Bʋ̃ʋ n'ʋ so nyɩ mɩ́ gã a tẽw dacine ƴãw? Nyɩmɛ wa lɛb ɩ a lɛ, ɩ̃ na ƴãw na bɛ nyɔw nyɩ.» A na tĩ a lɛ a n'a bɛ bɛ mɩ́ lɛb tɩ wa a pɩ̃ɛnʋ-bibir ɛ.

²²Lɛ n'a ɩ̃ tɩ ƴãw k'aa levitɩ mɩnɛ so a bɛ dɛwr bɛr, ɛ́ cen tɩ piwre a tẽw dɩ̃dɛɛ, k'aa nɩbɛ tʋ̃ɔ́ mɩ́ de a pɩ̃ɛnʋ-bibir ʋ ɩ bibi-sõw. «Ɩ̃ Naaŋmɩn i, cãà bãwnɩ mɛ̃, à á ŋá ƴãw mɩ̀. Zɔ ɩ̃ nɩbaalʋ a fʋ nɔ̃wfʋ na bɛrmɛ a ƴãw!»

²³A ʋlɩ daar nɛ cãà n'a ɩ̃ tɩ nyɛ̃ Zifʋ mɩnɛ na kul pɔwbɛ na yi Asɩdɔdɩ, Amɔ̃ bɩɩ Mowab[35] a.

²⁴A bɛ bibiir põ-zɛ̃-taa tɩ ƴɛ̀rɛ nɩ a Asɩdɔdɩ tẽw dem ƴɛ̀rʋ, bɛ mɩnɛ ƴɛ̀rɛ nɩ-bʋʋrɛ bɛ ŋa bɩɩ nɩ-bʋʋrɛ bɛ ŋa ƴɛ̀rʋ, ɛcɛ a bɛ been kãw za bɛ tɩ cãà wone a Zifʋ mɩnɛ ƴɛ̀rʋ ɛ.

²⁵Ɩ̃ tɩ yere bɛ na, ɛ́ ŋmɛ ƴãw bɛ. Ɩ̃ mɔ̃ mɩ̀ tɩ pɔb'ɩ a dɛbr bɛ mɩnɛ ɛ́ taw a bɛ zukɔbɛ vɔ̃. Al pùorí, ɩ̃ ƴãw bɛ pɔ n a Naaŋmɩn yúor kɛ́ bɛ kʋ̃ lɛb kʋ̀ a bɛ pɔwyaar nɩ-bʋʋr-yoru nɩbɛ bɛ kul ɛ, ɛ́ mɩ̀ kʋ̃ lɛb de nɩ-bʋʋr-yoru pɔwyaar a bɛ bidɛbr ƴãw bɩɩ a bɛl mɩŋa ƴãw ɛ.

²⁶Ɩ̃ tɩ sowri bɛ na: «À á ŋá bɛ n'a tɩ ƴãw a Ɩsɩrayɛl nãà, Salomɔ̃, maalɩ a yel-bier ɛ? A nɩ-bʋʋr-yoru za pʋɔ a, nãà bɛ ka be ta ʋ ɛ. A Naaŋmɩn tɩ nɔnɛ ʋ na, ɛ́ ƴãw k'ʋ ɩ a Ɩsɩrayɛl tẽw za nãà. Ɛcɛ ʋ tɩ bɛr'ɩ ʋ tʋɔra a nɩ-bʋʋr-yoru pɔwbɛ taw ʋ ƴãw a yel-bier pʋɔ[36].

²⁷Tɩ bɛ bɔbr kɛ́ tɩ lɛb wõ bɛ yel kɛ́ nyɩ maal'ɩ a yel-bier-kpɛ̃ɛ ŋa tɔ ɩ: nyɩ na bɛ tu a tɩ Naaŋmɩn, ɛ́ kul nɩ-bʋʋr-yoru pɔwbɛ a.»

²⁸A Yehoyada bidɛb kãw na ɩ a bàwr-maal-kara Ɛlyasivʋ yãw a, tɩ ɩ n a Sanbalatɩ na yi Bɛtɩ-Horon[37] a pɔwyaa sɩr. Alɛ n'a so ɩ̃ tɩ diw ʋ bɛr a Zerizalɛm tẽw pʋɔ.

²⁹«Ɩ̃ Naaŋmɩn i, taa yiire towtow a vĩ bɛ na ƴãw a bàwr-maalbɛ tõ-nʋɔr a ɩ, nɩ a wõ-taa fʋ na maal'ɩ a bàwr-maalbɛ nɩ a levitɩ mɩnɛ a ɩ.»

³⁰Ɩ̃ tɩ ɩ na a nɩbɛ bɛ cãà jɛr'ɩ nɩ-bʋʋr-yoru ɛ, lɛb vɩɛl, ɛ́ lɛb ƴãw a tub a na fɛr k'aa bàwr-maalbɛ nɩ a levitɩ mɩnɛ tuur a kʋ̀ bɛ.

³¹Lɛ n'a ɩ̃ mɩ̀ tɩ ɩ a dàar de-kʋ̀b tɩrʋ ƴãw, a na fɛr kɛ́ bɛ mɩ́ wa n a tɛm ʋl bɛ na ƴãw a, nɩ a kɔb bʋ̃-dan de-kʋ̀b ƴãw. «Ɩ̃ Naaŋmɩn i, cãà bãwnɩ mɛ̃, ɛ́ maalɛ mɛ̃ vla!»