Read Dagara, Northern Neemi 2 Bible Online

Neemi 2 - Dagara, Northern bible

Neemi 2

¹A nãà Artazɛrsɛsɩ naalʋ-dɩb yome lɩzɛr sob, a Nɩsã[4] cuw bibir kãw a, a nãà tɩ zɩ̃ na dɩrɛ. Ɩ̃ tɩ de nɩ divɛ̃ pʋr ƴãw ʋ. Pʋ-sãwna tɩ tɛr mɛ̃ na. A yel ŋa tɔ bɛ tɩ dãw ta m a ʋ niŋé ɩ.

²Lɛ n'a a nãà tɩ sowri mɛ̃: «Bʋ̃ʋ n'ʋ so fʋ sãw a niwn à ŋá? Fʋ ɩ n bàal bɩɩ? Bʋ̃ʋ pʋ-sãwna n'a tɛr fʋ?» Dɛ̃bɩ̃ɛ tɩ nyɔw mɛ̃ na bɛ dɩ vuo ɩ.

³Ɛcɛ ɩ̃ tɩ cãà na tʋ̃ɔ́ yel a nãà: «Nãà a, a fʋ nyɔ-vʋʋrʋ, ʋ be be kʋralɛ! Ŋmɩŋmɩn n'a ɩ̃ na ɩ bɛ tɛr pʋ-sãwna? A tẽ-kpɛ̃ɛ ʋl pʋɔ bɛ na ũù a ɩ̃ sãàkʋm-kore a, bɛ ŋmɛr'ɩ ʋ za bɛr, ɛ́ a ʋ pamɛ za dɩ vũu[5]!»

⁴A nãà tɩ sowri mɛ̃ na: «Bʋ̃ʋ n'ʋ fʋ bɔbr a ɩ̃ zie?» Daadaalɛ, ɩ̃ tɩ puor'ɩ a Naaŋmɩn na be a salom zu a,

⁵ɛ́ sɔw a nãà: «Nãà a, fʋ̃ʋ wa sàw a, a fʋ pʋɔ mɩ̀ wa pɛlɩ a ɩ̃ ƴãw a, fʋ̃ʋ kʋ̀ m sɔ́r, ɩ̃ cen a Zuda tẽ-ŋmãa-kʋ̀ra pʋɔ, a tẽ-kpɛ̃ɛ ʋl pʋɔ bɛ na ũù a ɩ̃ sãàkʋm-kore a, tɩ lɛb mɛ ʋ.»

⁶A nãà, a pɔw na tɩ zɩ̃ kɔwlɩ a, tɩ sowri mɛ̃ na: «A fʋ sɔ́r na cɛlɩ na tɩ ta debor? Debor'a, fʋ na lɛb wa?» A na ɩ lɛ a, a nãà tɩ bɛr mɛ̃ nɩ a sɔ́r k'ɩ̃ɩ cen, ɩ̃ɩ tɩ ƴãw a ɩ̃ lɛb-waa dàa kʋ̀ ʋ.

⁷Ɩ̃ tɩ yel'a ƴãw pʋɔ: «Nãà a, ɩ̃ zɛlɛ na kɛ́ fʋ ƴãw bɛ kʋ̀ m sɛb-tʋɔlɩ a na-kpɛ̃ɛ-lɩɛrbɛ na be a Efaratɩ gãwn a mʋ̃tɔ̃w-kpɛb-lowr a ƴãw, bɛ tʋ̃ɔ́ bɛr mɛ̃ sɔ́r ɩ̃ tɔl tɩ ta a Zuda tẽw.

⁸Bɛ mɩ̀ kʋ̀ m sɛb-tʋɔla ɩ̃ tɩ kʋ̀ a Asafʋ na kaarɛ a nãà tuwr zie a, ʋ tʋ̃ɔ́ kʋ̀ m dàar, a zɛbr-yir-kpɛ̃w na pɩɛlɩ a Ŋmɩn-yir-kpɛ̃ɛ a pamɛ ƴãw, a tẽ-kpɛ̃ɛ dacine ƴãw nɩ a yir ɩ̃ na na kpɩɛr a ƴãw.» A nãà tɩ sàw na kʋ̀ m a sɛb-tʋɔlɩ á ŋá, a ɩ̃ Naaŋmɩn na tɩ gù m a ƴãw.

⁹Lɛ n'a ɩ̃ tɩ cen a na-kpɛ̃ɛ-lɩɛrbɛ na be a Efaratɩ gãwn a mʋ̃tɔ̃w-kpɛb-lowr a zie, k'ɩ̃ɩ tɩ kʋ̀ bɛ a nãà sɛb-tʋɔlɩ. A nãà tɩ ƴãw na sojarɩ nɩ-bɛrɛ nɩ wi-zɔmnbɛ bɛ bɩɛlɛ mɛ̃.

¹⁰Sanbalatɩ[6] na yi Bɛtɩ-Horon nɩ a ʋ tuure Toviya na yi Amɔ̃ tẽw a tɩ wõ na k'ɩ̃ɩ tarɛ na. Nʋ̃ɔ̀ bɛ tɩ ɩrɛ bɛ towtow, nɩr na waar k'ʋʋ wa tu a Ɩsɩrayɛl nɩbɛ yele pùor a bɛ vla ƴãw a ɩ.

¹¹Ɩ̃ tɩ ta n a Zerizalɛm maalɩ bibie ata,

¹²ɛ́ bɛ yel a lɛ a Naaŋmɩn na tɩ ƴãw mɛ̃ a tɩɛrʋ a tẽw ƴãw a kʋ̀ nɩr za ɩ. Al pùorí, ɩ̃ tɩ ìr'ɩ tɩ̃ɩsɔw mãa nɩ nɩbɛ blã. A bõw ɩ̃ na mɩ́ zɔm a, ʋl yõ n'ɩ a dʋ̃w ɩ̃ na tɩ tɛr yi n a.

¹³A tɩ̃ɩsɔw a, ɩ̃ tɩ tu n a Bà-fʋɔla dɩ̃dɔr ƴãw yi a tẽw pʋɔ, tu a Wa-bɩɛ bule nɩ a Pʋɔrʋ dɩ̃dɔr lowr. Ɩ̃ tɩ bɛl bɛl'ɩ a Zerizalɛm dacine nyɛ̃ a ɩ vɛɛ tɛwr, ɛ́ vũu dɩ a pamɛ.

¹⁴Ɩ̃ tɩ cãà na lo a sɔ́r cere a Bule dɩ̃dɔr nɩ a nãà gbãtar lowr, ɛcɛ a bõw ɩ̃ na tɩ zɔm a, bɛ tɩ cãà nyɛrɛ tɔlʋ zie ɩ.

¹⁵Lɛ n'a a tɩ cãà ɩ a tɩ̃ɩsɔw, ɩ̃ɩ lanɩ a Sedrɔ̃ bà-fʋɔla do, ɛ́ cãà bɛlɛ a dacine, al pùorí, ɩ̃ lɩɛbɩ pɛr-tul wa tu a Bà-fʋɔla dɩ̃dɔr ƴãw kpɛ.

¹⁶A tẽ-kpɛ̃ɛ nɩ-bɛrɛ bɛ tɩ bãw be ɩ̃ na cen a ɩ, nɩ a ʋlɩ bom nɛ ɩ̃ na ɩ a ɩ, bʋ̃ʋ n'ʋ vɛ̃, wa tɩ tɔ a lɛn daar a, ɩ̃ bɛ tɩ yel bom za kʋ̀ a Zifʋ mɩnɛ, a bàwr-maalbɛ, a tẽw nɩ-yée, a tẽw nɩ-bɛrɛ tɛɛ za bɩɩ a nɩbɛ bɛ mɩnɛ na tɩ kaarɛ a tome zie a ɩ.

¹⁷Ɩ̃ tɩ ƴɛ̀r'ɩ à ŋá a bɛ zie: «Nyɩ nyɛ̃ nɩ a wʋ̀ʋr tɩ na ɩrɛ a: a Zerizalɛm lo n ʋ za, ɛ́ a ʋ pamɛ dɩ vũu! Nyɩ ɩ tɩ lɛb mɛ a Zerizalɛm dacine, ta cãà nyɛrɛ a vĩ ɛ.»

¹⁸Ɩ̃ tɩ man nɩ a lɛ a Naaŋmɩn na gù m a kʋ̀ bɛ, nɩ a lɛ a nãà na tɩ yel kʋ̀ m a. Lɛ n'a bɛ tɩ yel à ŋá: «Nyɩ ɩ tɩ ìr lɛb mɛ a tẽw!» Ɛ́ bɛ tɩ cɔbr'a gù a tõ-vla ŋa tob ƴãw.

¹⁹Sanbalatɩ na yi Bɛtɩ-Horon nɩ a ʋ tuure Toviya na yi Amɔ̃ tẽw, nɩ Gɛsɛm na ɩ Arabʋ a tɩ wõ n a yel ŋa. Bɛ tɩ ɩrɛ tɩ na laar ɛ́ nyɛ̃ tɩ bɛ ɩ bom za ɩ. Bɛ tɩ sowri tɩ na: «Bʋ̃ʋ n'ʋ nyɩ ɩrɛ? A nãà n'ʋ nyɩ bɔbr kɛ́ nyɩ zawrɩ bɛr bɩɩ?»

²⁰Ɩ̃ tɩ sɔw nɩ à ŋá kʋ̀ bɛ: «A Naaŋmɩn na be a salom zu a n'ʋ na ɩ tɩ tʋ̃ɔ́. A tɩɩm na ɩ a ʋ tõ-tõ-biir a, tɩ na ìr'a nyɔw a tome lɛb mɛ a tẽw. Ɛcɛ a nyɩɩm a, nyɩ bɛ tɛr sɔ́r na so bom kãw za a Zerizalɛm ka ɩ, nyɩ bɛ dɩrɛ nɩ-kpɛ̃ɛnʋ kãw za a ʋ pʋɔ ɩ, nɩr za mɩ̀ taa tɛrɛ a nyɩ tɩɛrʋ a tẽ-kpɛ̃ɛ ŋa pʋɔ towtow ɛ!»