Read Dagara, Northern Neemi 4 Bible Online

Neemi 4 - Dagara, Northern bible

Neemi 4

¹Ɛcɛ a Sanbalatɩ, a Toviya, a Arabʋ mɩnɛ, a Amɔ̃ tẽw dem nɩ a Asɩdɔdɩ tẽw dem na tɩ wõ k'aa Zerizalɛm dacĩ-kpɛ̃ɛ lɛb-mɛb tome cere nɩ vla vla, ɛ́ a vɛɛ tĩ fɔbr a, bɛ tɩ nyɛ̃ nɩ suur mab,

²ɛ́ wõ taa kɛ́ bɛ lãw taa wa zɛb'ɩ a Zerizalɛm, ɛ́ ƴãw damnʋ a tẽw pʋɔ.

³Lɛ n'a tɩ tɩ puori a tɩ Naaŋmɩn ɛ́ ƴãw nɩbɛ bɛ gùre tɩ, mʋ̃tɔ̃w nɩ tɩ̃ɩsɔw, a tɩ dɔ̃ dem bɛ ŋa ƴãw.

⁴Ɛcɛ a Zuda tẽw dem tɩ yere nɩ à ŋá: «A tõ-tonbɛ fãw za baar'a, a kʋsɛbɛ na gbõ gbõ taa a yãwmɛ na zuo. Tɩ bɛ be za na tʋ̃ɔ́ lɛb mɛ a dacĩ-kpɛ̃ɛ ŋa ɩ!»

⁵A tɩ dɔ̃ dem yere na: «A Zifʋ mɩnɛ bɛ bãw kɛ́ tɩ na zɛb'ɩ bɛ na ɩ, bɛ kʋ̃ nyɛ̃ a tɩ waa ɩ, lɛ n'a tɩ na kʋ bɛ, ɛ́ ɩ a tome a baarɩ.»

⁶A Zifʋ mɩnɛ bɛl na tɩ kpɩɛr pɩɛlɩ a tɩ dɔ̃ dem[8] a, tɩ wa na ta gb'aa pie wa yel kʋ̀ tɩ kɛ́ tɩ gùre tɩ tʋɔra. Bɛ tɩ yere na: «Nyɩ lɛb wa a tɩ zie.»

⁷Lɛ n'a ɩ̃ tɩ nyɛ̃ ziir na pĩ a, a pile blã a dacĩ-kpɛ̃ɛ pùorí, ɛ́ ƴãw sojarɩ a be, bɛ ɓã taa dɔwlʋ dɔwlʋ, ɛ́ tɛr zɛbr-sɔ-bɛrɛ, kafine nɩ tamɛ.

⁸Ɩ̃ na tɩ bɛl a lɛ bɛ na gù a ziir baarɩ a, ɩ̃ yel'ɩ a nɩ-yée nɩ a nɩ-bɛrɛ nɩ a nɩbɛ za na tɩ be a be a: «Nyɩ ta zɔrɛ a nyɩ dɔ̃ dem dɛ̃bɩ̃ɛ ɩ! Nyɩ lɛb tɩɛrɩ a Sore na ɩ kpɛ̃ɛ ɛ́ bɛ tɛr dɩ̃ɛnʋ a. Nyɩ zɛbr a nyɩ yɛbr, a nyɩ bidɛbr, a nyɩ pɔwyaar, a nyɩ pɔwbɛ nɩ a nyɩ yie ƴãw.»

⁹A tɩ dɔ̃ dem tɩ wõ na kɛ́ tɩ bãwnɩ a na, nɩ kɛ́ Naaŋmɩn ɩ na a bɛ tɩɛrʋ wɛ. Lɛ n'a tɩ za tɩ lɛb cen a dacĩ-kpɛ̃ɛ pɛr, ŋa za mɩ́ lɛb tɩ nyɔw a ʋ tome.

¹⁰A na tɩ tĩ a ʋlɩ bibir nɛ a, a ɩ̃ lãw-tõ-taabɛ põ-zɛ̃-taa zie tɛwr nɛbɛ tɩ pʋɔ a tome pʋɔ. A ŋmãa bɛl na cɛ a tɩ tɛr'ɩ kafine, zɛbr-kur-pãgalɩ, tamɛ nɩ zɛbr-nyãa-kpali. A nɩ-bɛrɛ tɩ gùre nɩ a Zuda tẽw nɩbɛ za.

¹¹A bɛlɩ dem na mɩɛr a dacin a, nɩ a bɛl na wobr a kʋsɛbɛ waar'ɩ a, tɩ tone nɩ nɩ nũ-been, ɛ́ a nũ-been tɛr zɛbr bom.

¹²A dacĩ-mɩɛrbɛ tɩ sɛ n zɛbr-sɔ-bɛrɛ a sɩɛmɩ́ mɩɛr'ɩ. Nɩr tɩ tuur mɛ̃ na, ɛ́ cɔbrɩ gù a wɩ́ɛ pɛblʋ.

¹³Ɩ̃ tɩ yel'a kʋ̀ a nɩ-yée, a nɩ-bɛrɛ nɩ a bɛlɩ dem za na tɩ be be a: «A dacĩ-kpɛ̃ɛ tome cãà na yãwmɛ, ɛ́ tɩ be zi-yaga zãá taa.

¹⁴Zie nɛ za nyɩ na be a, nyɩmɛ wa wõ a wɩ́ɛ ʋ pɛblɩ a, nyɩɩm zɔ wa ɓã taa a ɩ̃ zie. A tɩ Naaŋmɩn na zɛb'a ƴãw tɩ.»

¹⁵À ŋá n'a tɩ mɩ́ tɩ tõ a zi-wɛl-paala tɩ ta n a tɩ̃ɩsɔw, ɛ́ a tɩ ŋmãa tɛr kafine a nurú.

¹⁶A lɛn daar'a ɩ̃ tɩ yel a nɩbɛ à ŋá: «Tõ-tõ-nɩ-kpɛ̃ɛ za nɩ a ʋ nɩbɛ na mɩ́ gã nɩ a Zerizalɛm a tɩ̃ɩsɔw. Lɛ n'a bɛ na mɩ́ gù tɩ a tɩ̃ɩsɔw, ɛ́ a mʋ̃tɔ̃w bɛ tone a tome.»

¹⁷A mãa mɩŋa, a ɩ̃ nɩbɛ, a ɩ̃ lãw-tõ-taabɛ nɩ a zi-gùrbɛ na tɩ bɩɛlɛ mɛ̃ a, tɩ bɛ mɩ́ tɩ yaa a tɩ bʋ̃-suuri bɛr ɛ, alɛ bɛ wa ɩ a kʋ̃ɔ sob ƴãw a.