Read Dagara, Northern Neemi 6 Bible Online

Neemi 6 - Dagara, Northern bible

Neemi 6

¹A Sanbalatɩ, a Toviya nɩ a Gɛsɛm na ɩ Arabʋ a nɩ a tɩ dɔ̃ dem[10] ŋmãa na cɛ a, tɩ wõ na k'ɩ̃ɩ lɛb'a mɛ a tẽw dacĩ-kpɛ̃ɛ, kɛ́ vɛɛ bɛ tɩ cãà be ɩ. Ɛcɛ a lɛn daar a, ɩ̃ bɛ tɩ ƴãw a dɩ̃dɛɛ pamɛ sɛr ɛ.

²Lɛ n'a a Sanbalatɩ nɩ a Gɛsɛm tɩ tõ nɩr k'ʋʋ wa bʋɔlɩ mɛ̃, mãa nɩ bɛl nyɛ̃-taa ƴãw, Kefiirim[11] tẽw, a Ono bà-fʋɔla pʋɔ. Bɛ tɩ bɔbr'a kɛ́ bɛ maalɩ mɛ̃ faa.

³Ɛcɛ ɩ̃ tɩ tõ n nɩbɛ kɛ́ bɛ tɩ yel bɛ à ŋá: «Ɩ̃ cãà na tɛr tome yaga, ɩ̃ kʋ̃ tʋ̃ɔ́ wa a nyɩ zie ɩ. Mãa yel k'ɩ̃ɩ wa tɩ wa nyɛ̃ taa a, a tome na gã na.»

⁴Bɛ tɩ bʋɔlɩ mɛ̃ nɩ a bʋɔl-been nɛ gb'a anaar, ɛ́ a gb'a anaar za ɩ̃ mɩ́ tɩr a sɔwfʋ been nɛ kʋ̀ bɛ.

⁵A gb'a anũu sob a, a Sanbalatɩ tɩ tõ n a ʋ lãw-tõ-tɔ kãw nɩ sɛb-tʋɔla a nɩbɛ za ƴãw.

⁶À ŋá n'a bɛ tɩ sɛb a sɛb-tʋɔla pʋɔ: «Bɛ ƴɛ̀rɛ nɩ a nɩ-bʋʋr-yoru pʋɔ, ɛ́ Gɛsɛm mɩ̀ yel a lɛ, kɛ́ fʋ̃ʋ nɩ a fʋ yɛbr Zifʋ mɩnɛ bɔbr'a kɛ́ nyɩ zawrɩ a nãà nɩ-kpɛ̃ɛnʋ a nyɩ zu, alɛ n'a so fʋ lɛb mɩɛr a dacĩ-kpɛ̃ɛ. Bɛ yel'a kɛ́ fʋ bɔbr'a kɛ́ fʋ ɩ a bɛ nãà.

⁷Bɛ mɔ̃ mɩ̀ yel'a kɛ́ fʋ kaa na ír ƴɛ̀r-manbɛ baarɩ kɛ́ bɛ hieri yel a Zerizalɛm pʋɔ kɛ́ fʋ lɩɛbɩ a Zuda tẽw nãà. A Pɛrsɩ tẽw nãà kʋ̃ yaa kɛ́ wõ a yel ŋa ɩ. A lɛ pʋɔ a, wa tɩ wa ƴɛ̀r sɔw taa.»

⁸Ɩ̃ tɩ tõ na bɛ tɩ yel ʋ à ŋá: «Zir-pla n'ɩ à à ŋá fʋ na ŋmarɛ a, fʋ̃ʋ n'ʋ tɩɛrɩ a za yel.»

⁹Bɛ za tɩ sɩrɩ na bɔbr kɛ́ bɛ ɩ dɛ̃bɩ̃ɛ nyɔw tɩ. Bɛ tɩ tɩɛrɛ kɛ́ tɩ na bàl'a tɩɛ a tome bɛr. «Sore e, kʋ̀ m fãw a ton ŋa ƴãw!»

¹⁰Bibir kãw, ɩ̃ tɩ cen na tɩ páw Delaya bidɛb Semaya mɩ̀ na ɩ Mehetaveyɛl yãw a, bʋ̃ʋ n'ʋ vɛ̃, ʋ bɛ tɩ tʋ̃ɔ́ wa a ɩ zie ɩ. Ʋ tɩ yel mɛ̃ na: «Tɩ lãw kpɛ a Ŋmɩn-yir-kpɛ̃ɛ pʋɔ, a zi-sõw pʋɔ, ɛ́ pàw a pamɛ vla, bʋ̃ʋ n'ʋ vɛ̃, a fʋ dɔ̃ dem na wa n tɩ̃ɩsɔw wa kʋ b.»

¹¹Ɩ̃ tɩ sɔw ʋ na: «Dɛb na ɩ dɛb mɛ̃ mãa a na zɔ na a? Lɛb waar mɩ̀, mãa ŋa tɔ na tʋ̃ɔ́ na kpɛ a zi-sõw pʋɔ ɛ́ cãà a[12]? Ɩ̃ bɛ cere ɩ!»

¹²Ɩ̃ tɩ bãwnɩ a na kɛ́ Naaŋmɩn bɛ n'ʋ tõ ʋ a ɩ̃ zie ɩ. Ɛcɛ a Toviya nɩ Sanbalatɩ nɛbɛ tɩ ya ʋ ƴãw k'ʋʋ ƴɛ̀r à à ŋá a ɩ̃ zie.

¹³Bʋnʋ ƴãw pãa n'a bɛ tɩ ya ʋ a? K'ɩ̃ɩ zɔ dɛ̃bɩ̃ɛ tu a lɛ ʋ na yel a, maalɩ yel-bier. A lɛ pʋɔ a, bɛ na tʋ̃ɔ́ na sãw a ɩ̃ yúor, ɩ k'ɩ̃ nyɛ̃ vĩ.

¹⁴«Ɩ̃ Naaŋmɩn i, cãà bãwnɩ a Toviya nɩ a Sanbalatɩ ɩ-ɩrɩ, mɩ̀ cãà bãwnɩ a pɔw-naaŋmɩn-ƴɛ̀r-manɛ Nowadɩa nɩ a ƴɛ̀r-manbɛ bɛl na cɛ a, na tɩ yel kɛ́ bɛ ɩ ɩ̃ zɔ dɛ̃bɩ̃ɛ a.»

¹⁵A dacĩ-kpɛ̃ɛ tɩ baar'ɩ a Elul[13] cuw bibie lɩzɛr'ɩ anũu sob daar. A tome tɩ tõ n bibie lɩz'a ayi nɩ pie nɩ ayi.

¹⁶A tɩ dɔ̃ dem na tɩ be a tẽ-kpɔwlɩ pʋɔ a na wa wõ a yel ŋa a, dɛ̃bɩ̃ɛ tɩ ɩrɛ bɛ na, ɛ́ vĩ nyɔw bɛ yaga. Bɛ tɩ nyɛ̃ na bãw k'aa Naaŋmɩn n'ʋ sõw a ton ŋa ʋ tõ.

¹⁷A vuo ʋl za pʋɔ n'a a Zuda nɩ-yée nɩ a Toviya tɩ sɛb sɛbr kʋ̀ taa yaga za.

¹⁸Bʋ̃ʋ n'ʋ vɛ̃, ʋlɛ nɩ Zifʋ yaga tɩ pɔ na kɛ́ bɛ na tɛr'ɩ wõ-taa, ʋ na tɩ ɩ Aara bidɛb Sekanɩa dɩɛm a ƴãw, ɛ́ a ʋ mɩŋa bidɛb, Yehohanan, tɩ kul Berekɩa bidɛb Mesulam pɔwyaa a.

¹⁹A nɩbɛ tɩ mʋʋrɛ ʋ nɩ a ɩ̃ niŋé, ɛ́ mɩ́ lɛb tɩ manɩ a ɩ̃ ƴɛ̀rʋ kʋ̀ ʋ. A Toviya mɩŋa tɩ tʋɔlɛ nɩ sɛbr kʋ̀rɛ mɛ̃ k'ʋʋ ƴãw mɛ̃ dɛ̃bɩ̃ɛ.