Read Dagara, Northern Neemi 9 Bible Online

Neemi 9 - Dagara, Northern bible

Neemi 9

¹A cuwr ayopõi sob bibie lɩzɛr'ɩ anaar sob daar, a Ɩsɩrayɛl nɩbɛ tɩ ɓã n taa kɛ́ bɛ tɛr mʋta-tuo. Bɛ tɩ su n vʋɔrɩ kparɩ ɛ́ 'wɔ̃w tanɛ ƴãw a bɛ zurú[20].

²Bɛ tɩ ow na yi a bɛlɩ dem za na bɛ ɩ Zifʋ mɩnɛ a pʋɔ, ɛ́ yere kɛ́ bɛ maal'ɩ yel-bebe, bɛlɛ nɩ a bɛ sãàkʋm-kore.

³Al pùorí, bɛ tɩ ìr'a àr saaƴẽwn, ɛ́ bɛr wõ a Sore bɛ Naaŋmɩn wulu sɛbɛ kanʋ tɛm ɓile ata. Bɛ tɩ gbĩ n dume a Sore bɛ Naaŋmɩn niŋé tɛm ɓile ata mɩ̀, zɛlɩ a bɛ sãwna suur.

⁴Yesua, Bani, Kadɩmɩɛl, Sevanɩa, Buni, Serevɩa, Bani nɩ Kenani tɩ ìr'ɩ a levitɩ mɩnɛ gboro zu ɛ́ zɛlɩ a Sore bɛ Naaŋmɩn kpɛ̃w kpɛ̃w za.

⁵Al pùorí, a levitɩ bɛ ŋa: Yesua, Kadɩmɩɛl, Bani, Hasavɩneya, Serevɩa, Hodiya, Sevanɩa nɩ Petaya tɩ yel'ɩ kpɛ̃w kpɛ̃w za: «Nyɩ ìr àr! Nyɩ puore a Sore nyɩ Naaŋmɩn yãanɩ kʋralɛ, ɛ́ taa bɛrɛ ɩ!» «Sore e, ŋa za, ʋ mɩ́ puore fʋ yãanɩ, fʋ na ɩ yúor-vɩɛlʋ-danʋ tɛwr'a ƴãw, fʋ ɩ n kpɛ̃ɛ zuo yãanɩ puoru za nɩ danʋ za!

⁶Fʋ̃ʋ n'ɩ a Sore, fʋ̃ʋ yõ tẽtẽ! Fʋ maal'ɩ a salom na bɛ dɩ vuo a, nɩ a ŋmar-bie za, a tẽw nɩ bom za na be a ʋ zu a, a kʋ̃ɔ-bɛrɛ nɩ bom za na be a pʋɔ a. Fʋ kʋ̀rɛ nɩ nyɔ-vʋʋrʋ bʋ̃-íra za. A saa-zu kpɛnʋ siwre nɩ a tʋɔra a fʋ niŋé.

⁷Sore Naaŋmɩn i, fʋ̃ʋ n'ʋ kaa ír a Abram. Fʋ̃ʋ n'ʋ ƴãw k'ʋ yi ɛ́ bɛr a Uur a Kalde tẽw, ɛ́ fʋ por ʋ a yúor Abraham[21].

⁸Fʋ nyɛ̃ na ʋ tu b, lɛ so fʋ maal'ɩ ʋ wõ-taa: fʋ yel'a kɛ́ fʋ na kʋ̀ ʋ nɩ a Kanãa tẽw dem tẽw, a Hititɩ mɩnɛ, a Amoritɩ mɩnɛ nɩ a Perizitɩ mɩnɛ ten, a Zebi tẽw dem tẽw nɩ a Gɩrgasitɩ mɩnɛ tẽw[22], ʋlɛ nɩ a ʋ bʋʋrɛ. Fʋ tu n a lɛ fʋ na yel a, fʋ na ŋmɛ̃ fʋ ŋmɛ̃a ƴãw.

⁹Fʋ nyɛ̃ nɩ a tɩ sãàkʋm-kore wʋ̀ʋr a Eziptɩ tẽw, fʋ wõ n a bɛ cɛlsɩ a Bàa-kɛkɛɛ kʋ̃ɔ-kpɛ̃ɛ nʋɔr[23].

¹⁰Fʋ maal'ɩ nɔ-ɓãa-yele nɩ yel-bãw-guuri càar'ɩ a Eziptɩ tẽw nãà, a nɩbɛ na lãw kpɩɛr'ɩ ʋ a, nɩ a ʋ tẽw nɩbɛ za, bʋ̃ʋ n'ʋ vɛ̃, fʋ tɩ bãw nɩ a Eziptɩ tẽw dem pɔ̀l-ɩb bɛ na ɩ a tɩ sãàkʋm-kore zie a. Fʋ ɩ n a fʋ yúor yi cãà wa tɩ tɔ a dɩ̃a.

¹¹Fʋ ɓar'ɩ a kʋ̃ɔ-kpɛ̃ɛ a Ɩsɩrayɛl nɩbɛ niŋé, bɛ kpɛ gãw ʋ nɩ gbɛ-kon. Fʋ lɔb'ɩ a nɩbɛ na tɩ diwr bɛ a ƴãw a kʋ̃ɔ-kpɛ̃ɛ pɛrɩ́, bɛ tɔl'a siw a kʋ̃ɔ-zulu pʋɔ mɛ̃ kʋsɩɛr a.

¹²A mʋ̃tɔ̃w a, fʋ de nɩ a fʋ nɩ-bʋʋrɛ niwn ɩ zũzuwr na ɩ mɛ̃ kpul a, ɛ́ a tɩ̃ɩsɔw fʋ de bɛ niwn ɩ vũu na ɩ mɛ̃ kpul a caalɛ bɛ a sɔ́r.

¹³Fʋ yi n a salom zu siw wa ƴɛ̀r a bɛ zie a Sinayi tãw zu: fʋ kʋ̀ bɛ nɩ tub na tɛr yel-mɩŋa a, wulu na ɩ sɩza a, wulu nɩ nɛ-ƴãwnɩ na vɩɛl a za a.

¹⁴Fʋ tu n a fʋ tõ-tõ-bie Moyiir, ɩ bɛ bãw a pɩ̃ɛnʋ-bibir fʋ na so a, fʋ kʋ̀ bɛ nɩ nɛ-ƴãwnɩ, tub nɩ a wulu.

¹⁵Fʋ bàl'ɩ a bɛ kɔ̃ nɩ a dipɛ̃ na yi a salom zu a, fʋ ɓãá nɩ a bɛ kʋ̃ɔ-nyúur nɩ kʋ̃ɔ fʋ na ɩ a tɛ yi pìir pʋɔ a. Fʋ ƴãw na bɛ cen tɩ de a tẽw ʋl fʋ na pɔ yel kɛ́ fʋ na kʋ̀ bɛ na a.

¹⁶Ɛcɛ a tɩ sãàkʋm-kore dɩ n pɔ̀lʋ, bɛ ɩ n bɛ-won ɩb, bɛ bɛ bɛr wõ a fʋ nɛ-ƴãwnɩ ɛ.

¹⁷Bɛ zawr'ɩ a nʋɔr-sàwfʋ, bɛ yiir'ɩ a nɔ-ɓãa-yele fʋ na maalɩ a bɛ ƴãw a. Bɛ kpãa nɩ tobr, ɛ́ yel kɛ́ bɛ na lɛb'a cen a Eziptɩ tẽw a bɛ gbãgbaalʋ pʋɔ. Ɛcɛ, fʋ̃ʋ a, fʋ bɛ tɩ jɛ bɛ bɛr ɛ, fʋ na ɩ Naaŋmɩn na dɩrɛ suur a ƴãw, Naaŋmɩn-vla na zɔrɛ nɩbaalʋ a, a suur na bɛ pawr, ɛ́ fʋ ɩ nɔ̃wfʋ tɛwr a.

¹⁸Bɛ nyɩl'ɩ kure maal'ɩ nále ɛ́ yel: “Nyɛ̃ a tɩ Naaŋmɩn na ɩ tɩ yi a Eziptɩ tẽw a[24]!” A bɛ ɩb ŋa bɛ tɩ vɩɛl towtow ɛ.

¹⁹A na saa tɩ ɩ à ŋá a, fʋ̃ʋ a, a fʋ nɔ̃wfʋ na bɛ tɛr baarʋ a pʋɔ a, fʋ bɛ tɩ jɛ bɛ bɛr a wɛja-kpalɛ pʋɔ ɩ: a zũzuwr na ɩ mɛ̃ kpul a, ɛ́ wule bɛ a sɔ́r a mʋ̃tɔ̃w a, bɛ cen ɛ́ bɛr bɛ ɩ. A vũu na ɩ mɛ̃ kpul a tɩ cãà na caalɛ bɛ a sɔ́r a tɩ̃ɩsɔw.

²⁰A fʋ nɔ̃wfʋ pʋɔ, fʋ kʋ̀ bɛ nɩ a fʋ vʋʋrʋ kɛ́ bɛ tɛr yã. Fʋ kʋ̀ bɛ nɩ a mãan a bɛ dɩb ƴãw, nɩ kʋ̃ɔ a bɛ kʋ̃ɔ-nyúur ɓãafʋ ƴãw.

²¹Fʋ kaa nɩ a bɛ zie vla yome lɩz'a ayi, bɛ bɛ bɔ bom gù a wɛja-kpalɛ pʋɔ ɩ. A bɛ bʋ̃-suuri bɛ zaw ɛ, a bɛ gbɛ́ɛ bɛ pi ɛ.

²²Fʋ de nɩ naalʋ-ten nɩ nɩ-bʋʋrɛ kʋ̀ bɛ: bɛ zɛb'a de ten na pɩɛlɩ bɛ a, Sihon na ɩ Hɛsɩbon tẽw nãà a, tẽw, nɩ Ɔgɩ na ɩ Basan nãà a, tẽw.

²³Fʋ kʋ̀ bɛ nɩ bʋʋrɛ bɛ yãwmɛ mɛ̃ a saa ŋmar-bie a. Fʋ tɛr bɛ na kpɛ n a Kanãa tẽw, fʋ na tɩ yel a bɛ sãàkʋm-kore kɛ́ bɛ cen tɩ zɛb de a.

²⁴Bɛ kpɛ n a be de ʋ, so ʋ. Fʋ ɩ na bɛ so a tẽw dem, a Kanãa tẽw dem. Fʋ ƴãw bɛ nɩ a bɛ nuru pʋɔ, bɛlɛ nɩ a bɛ na-mɩnɛ nɩ a bɛ nɩ-bʋʋrɛ. A tɩ sãàkʋm-kore tɩ ɩ bɛ nɩ lɛ bɛ na bɔbr a.

²⁵Bɛ zɛb'a de tẽ-bɛrɛ bɛ na gù vla a, tẽsɔw-vɩɛlɩ, yie na paalɩ bʋ̃-vɩɛlɩ bʋʋrɛ za a, buli na tuw a, divɛ̃ tɩɩr, olivʋ tɩɩr nɩ tɩ-wɔnɩ yaga. A fʋ nɔ̃wfʋ na ɩ kpɛ̃ɛ a zũú a, bɛ dɩ na tɩw, bɛ 'wɔr'a, bɛ wõ n nʋ̃ɔ̀.

²⁶Ɛcɛ bɛ bɛ sàw a fʋ nʋɔr ɛ, bɛ gaar'ɩ nɩ a fʋ zie, bɛ gur'ɩ pùor cɔw a fʋ wulu. Bɛ kʋ n a fʋ ƴɛ̀r-manbɛ na zɛlɛ bɛ kɛ́ bɛ lɛb wa a fʋ zie a. A bɛ ɩb bɛ tɩ vɩɛl towtow ɛ.

²⁷Lɛ n'a fʋ bɛr bɛ kʋ̀ a bɛ dɔ̃ dem, bɛ dɔwrɩ bɛ. A kpɩɛrʋ á ŋá daar a, bɛ kõ na bʋɔlɩ fʋ, ɛ́ a fʋ̃ʋ a, fʋ be n a salom zu ɛ́ bɛr wõ bɛ. A fʋ nɔ̃wfʋ na bɛ tɛr baarʋ a pʋɔ a, fʋ tõ n faarbɛ bɛ wa faa bɛ a bɛ dɔ̃ dem nuru pʋɔ.

²⁸Ɛcɛ, bɛ na mɩ́ tɩ tɛr a ƴã-ɓaarʋ wa báarɛ a, bɛ mɩ́ lɛb'a tĩ ɩrɛ a faa a fʋ niŋé. Fʋ mɩ́ lɛb'a bɛr a bɛ dɔ̃ dem so bɛ. Lɛ n'a bɛ mɩ́ lɛb kone bʋɔlɛ nɩ fʋ, ɛ́ a fʋ̃ʋ a, fʋ mɩ́ lɛb'a wõ a, a salom zu fʋ na be a. A fʋ nɔ̃wfʋ pʋɔ a, fʋ faa bɛ nɩ a gb'aa yaga za.

²⁹Fʋ zɛlɩ bɛ na kɛ́ bɛ lɛb tuur a fʋ wulu, ɛcɛ a bɛ pɔ̀lʋ zũú a, bɛ bɛ bɛr wõ a fʋ nɛ-ƴãwnɩ ɛ. Bɛ zawr'ɩ a tub fʋ na ƴãw kʋ̀ bɛ a bɛr, ɛcɛ alɛ n'a kʋ̀rɛ a nyɔ-vʋʋrʋ a bɛlɩ dem na tuur a a. Bɛ kpãa nɩ tobr ɛ́ gaarɩ, bɛ bɛ bɛr wõ b towtow ɛ.

³⁰Fʋ nyɔw nɩ fʋ tʋɔra a bɛ ƴãw, yome yaga ƴãw. A fʋ ƴɛ̀r-manbɛ na tɩ tɛr a fʋ vʋʋrʋ a, tɩ zɛlɛ bɛ nɩ a fʋ yúor ƴãw, ɛcɛ bɛ bɛ bɛr wõ ɩ. Lɛ n'a fʋ tɩ bɛr bɛ kʋ̀ nɩ-bʋʋr-yoru bɛ so bɛ.

³¹Ɛcɛ, a fʋ nɔ̃wfʋ na bɛ tɛr baarʋ a zũú, fʋ bɛ kʋ bɛ pàw pɛr ɛ, fʋ bɛ jɛ bɛ bɛr ɛ, bʋ̃ʋ n'ʋ vɛ̃, fʋ ɩ n Naaŋmɩn na ɩ nɔ̃wfʋ ɛ́ ɩ nɩbaal-zɔrɛ a.

³²Fʋ̃ʋ tɩ Naaŋmɩn i, fʋ ɩ n kpɛ̃ɛ, fʋ tɛr'ɩ fãw ɛ́ bɛ tɛr dɩ̃ɛnʋ ɛ, fʋ tɛr'ɩ a wõ-taa fʋ na maal'ɩ tɩ a vla. Cɛlɛ a kpɩɛrʋ a fʋ nɩ-bʋʋrɛ, a tɩ na-mɩnɛ nɩ a tɩ nɩ-bɛrɛ, a tɩ bàwr-maalbɛ, tɩ naaŋmɩn-ƴɛ̀r-manbɛ, a tɩ sãàkʋm-kore nɩ a tɩɩm tɛɛ za na nyɛ̃ a zie, a Asiiri na-mɩnɛ[25] daar za wa tɩ tɔ a dɩ̃a a.

³³Fʋ tu n mɩnʋ nɩ yel-mɩŋa, a yele za na ta tɩ a pʋɔ, ɛ́ tɩɩm maalɩ faa.

³⁴A tɩ na-mɩnɛ nɩ a tɩ nɩ-bɛrɛ, a tɩ bàwr-maalbɛ nɩ a tɩ sãàkʋm-kore bɛ tɩ sàw a fʋ wulu ɛ. Bɛ bɛ cɛlɩ a fʋ nɛ-ƴãwnɩ zie, nɩ a kpaalʋ fʋ na kpaalɛ bɛ a ɩ.

³⁵Bɛ na tɩ be a bɛ naalʋ-tẽw pʋɔ, tɛr a fʋ maalʋ yaga za, nɩ fʋ na tɩ ƴãw bɛ zɩ̃ a tẽw na yɛlmɛ ɛ́ a tẽsɔw kpɛ a pʋɔ a, bɛ bɛ tõ a fʋ tome ɩ, bɛ bɛ bɛr a bɛ tõ-faar ɛ.

³⁶Dɩ̃a bio a, tɩmɛ n'ɩ bɛ ŋa ɩ gbãgbaar! Tɩ ɩ n gbãgbaar a tẽw ʋl pʋɔ fʋ na kʋ̀ a tɩ sãàkʋm-kore kɛ́ bɛ dɩrɛ a ʋ bʋ̃-kʋ́ɔrɩ wone nʋ̃ɔ̀ a.

³⁷A tẽw ŋa bʋ̃-vɩɛlɩ yaga yaga a, a na-mɩnɛ bɛl fʋ na bɛr bɛ so tɩ a tɩ yel-bebe zũú a, bɛlɛ so a. Bɛ ɩrɛ nɩ tɩɩm nɩ a tɩ dʋn lɛ za bɛ na bɔbr a. Kpɩɛrʋ na ta kpɩɛrʋ a pʋɔ n'a tɩ be!»