Read Dagara, Northern Tobi 1 Bible Online

Tobi 1 - Dagara, Northern bible

Tobi 1

¹Nyɛ̃ a Tobi yele. A Tobi tɩ ɩ n Tobiyɛl bidɛb, a Tobiyɛl ɩ Ananiyɛl bidɛb, a Ananiyɛl ɩ Aduwɛl bidɛb, a Aduwɛl ɩ Gabayɛl bidɛb, a Gabayɛl ɩ Arafayɛl bidɛb, a Arafayɛl ɩ Araguwɛl bidɛb na ɩ Arɩɛl bʋʋrɛ na yi Nɛfɩtali[1] dɔwlʋ pʋɔ a.

²Ʋ tɩ kpɩɛr'ɩ Nɛfɩtali tẽw pʋɔ, a Galile saa-zu, Tisibe tẽ-kpɛ̃ɛ na be Kadɛsɩ na be a saa-pɛrɩ́-gʋba-lowr nɩ Asɔɔr na be a mʋ̃tɔ̃w-kpɛb-lowr, nɩ Fogɔɔr na be a saa-pɛrɩ́-dʋrʋ-lowr a cara pʋɔ a, a be n'a bɛ wa diw ʋ cen nɩ a Asiiri tẽw, a nãà Salmanasaar[2] daar.

³A mãa Tobi, ɩ̃ tu n a yel-mɩŋa sɔ́r, ɛ́ tõ tõ-vɩɛlɩ a ɩ̃ cãafʋ daar za. Gb'aa yaga za a, ɩ̃ kʋ̀ n libie a ɩ̃ yɛbr na ɩ a ɩ̃ bʋʋrɛ a, a bɛl bɛ na tɩ lãw diw nɩ mɛ̃ cen nɩ a Asiiri tẽw, a Nɩnɩɩvʋ a.

⁴A ɩ̃ daar za, ɩ̃ na tɩ cãà kpɩɛr a ɩ̃ tẽw Ɩsɩrayɛl a, a Nɛfɩtali dɔwlʋ na ɩ a ɩ̃ sãàkʋm-kʋra dɔwlʋ a bɛ tɩ cãà lãw nɩ a nãà Daviir yir nɩ a Zerizalɛm ɛ[3]. Ɛcɛ a tẽ-kpɛ̃ɛ ŋa yõ n'ʋ a Naaŋmɩn tɩ kaa ír a Ɩsɩrayɛl dɔwlʋ pʋɔ, k'aa dɔwlʋ za waar a be wa maalɛ a bagɛ. A be n'a a Ŋmɩn-yir-kpɛ̃ɛ nɩ a Naaŋmɩn kpɛb zie bɛ na de kʋ̀ a Naaŋmɩn a tɩ be kʋralɛ, a nɩbɛ na na dɔwr lɩɛrɛ taa a ƴãw.

⁵A Galile tan za zu a, a ɩ̃ yir dem nɩ a Nɛfɩtali na ɩ a ɩ̃ sãàkʋm-kʋra a dɔwlʋ nɩbɛ tɩ maalɛ nɩ bagɛ kʋ̀rɛ a nadɛr a Ɩsɩrayɛl nãà Zerobowam na tɩ ƴãw bɛ maal'ɩ salm-zɩɛ bin a Dan tẽw zi-sõw pʋɔ a.

⁶A na ɩ lɛ a, gb'aa yaga za a, ɩ̃ yõ n'ʋ mɩ́ tɩ cen a Zerizalɛm a cuwr bibie daar, mɛ̃ a lɛ a wulu na ƴãw a Ɩsɩrayɛl nɩbɛ za ƴãw kʋralɛ a[4]. Ɩ̃ mɩ́ tɩ cen nɩ nɩ a ɩ̃ kukur bʋ̃-dan, a ɩ̃ dʋn bil-dãw-dɔwrɩ, a ɩ̃ dʋn ziir pie sob nɩ a ɩ̃ píir kɔbl-dan

⁷tɩ kʋ̀ a bàwr-maalbɛ, a Aarɔ̃ bʋʋrɛ, a bàwr maalʋ ƴãw. Ɩ̃ mɩ́ tɩ tɩr'ɩ a ble, a divɛ̃, a olivʋ tɩ-wɔmɛ, a girenadɩ tɩ-wɔmɛ, a kãkamɛ nɩ a tɩ-wɔ̃-yoru, a za ziir pie sob kʋ̀ a levitɩ mɩnɛ na be a Zerizalɛm tone a. A tɛra ziir pie gb'a ayi sob a, ɩ̃ mɩ́ tɩ kʋ̀ɔrɩ a na a ɩ libie ɩ̃ cen nɩ yũon za a Zerizalɛm tɩ dɩ.

⁸Ɩ̃ mɩ́ tɩ báa na tɩr a ɩ̃ tɛra ziir pie gb'a ata sob kʋ̀ a bi-kpebe, a pɔw-kɔbɛ nɩ a nɩbɛ bɛl za na tɩ sàw de a Ɩsɩrayɛl Naaŋmɩn a. Ɩ̃ mɩ́ tɩ cen nɩ a na a yome atarɩ za daar, kɛ́ tɩ tɩ lãw dɩ a, mɛ̃ a lɛ a Moyiir wulu na tɩ ƴãw a, nɩ a lɛ a ɩ̃ sãà mã, Debora, na tɩ wul mɛ̃ a. Bʋ̃ʋ n'ʋ vɛ̃, a ɩ̃ sãà Ananiyɛl tɩ kpi na ɛ́ bɛr mɛ̃ ɩ̃ ɩ bi-kpieb.

⁹Ɩ̃ na wa ta dɛb a, ɩ̃ kul'ɩ pɔw a ɩ̃ dɔwlʋ pʋɔ. Ʋ tɩ dɔw nɩ bie kʋ̀ m, ɩ̃ por a yúor kɛ́ Tobɩasɩ.

¹⁰A pùorí, bɛ na wa diw tɩ cen nɩ a Asiiri tẽw a, ɩ̃ tɩ wa na wa kpɩɛr Nɩnɩɩvʋ tẽw. A ɩ̃ yɛbr za nɩ a ɩ̃ bʋʋrɛ nɩbɛ tɩ dɩrɛ nɩ a nɩ-bʋʋr-yoru bʋ̃-dɩrɩ.

¹¹Ɛcɛ mãa a, ɩ̃ tɩ gù n ɩ̃ tʋɔra a nɩ-bʋʋr-yoru bʋ̃-dɩrɩ ƴãw.

¹²Ɩ̃ tɩ tu n a Naaŋmɩn nɩ a ɩ̃ socir za bɛ lɛb pùor ɛ.

¹³Alɛ n'a so a Naaŋmɩn-na-do-saa-bɛ-pɩɛl-a tɩ ɩ ɩ̃ pɛlɩ a nãà Salmanasaar pʋɔ, ɛ́ tɩ dàar a alɩ bome nɛ za ʋ na mɩ́ tɩ bɔbr a kʋ̀rɛ ʋ.

¹⁴Tɩ ta n a ʋ kũu daar a, ɩ̃ mɩ́ tɩ cen nɩ a Medi[5] tẽw tɩ dà a ʋ bʋ̃-daarɩ wa kʋ̀ ʋ. À ŋá n'a ɩ̃ tɩ bin salm-pla libi-ɓɛlɛ kilo[6] kɔbr ata (300) na ƴãw vʋʋra pʋɔ a, Gabiri yɛb Gabayɛl zie a Medi tẽw.

¹⁵A nãà Salmanasaar na wa kpi a, a ʋ bidɛb Senakerib n'ʋ tɩ lɩɛr'ʋ ɩ a nãà. A Medi tẽw sɛ́ɛ bɛ tɩ cãà tɛr tub ɛ, lɛ n'a ɩ̃ tɩ bɛr a be cenu.

¹⁶A nãà Salmanasaar daar a, ɩ̃ mɩ́ tɩ kʋ̀ n libie a ɩ̃ bʋʋrɛ nɩbɛ.

¹⁷Ɩ̃ mɩ́ tɩ ɩ n a ɩ̃ bʋ̃-dɩrɩ kʋ̀ a kɔ̃ dem, ɛ́ kʋ̀ bʋ̃-suuri a bɛlɩ dem na ɩ ƴã-gã-kpãkpole a. Ɩ̃ na mɩ́ tɩ nyɛ̃ a ɩ̃ tẽ-bi-tɔ kũu bɛ lɔb bɛr a Nɩnɩɩvʋ tẽw dapùorí a, ɩ̃ mɩ́ tɩ de ʋ na tɩ ũù.

¹⁸Ɩ̃ mɩ́ tɩ ũù nɩ a bɛlɩ dem a Senakerib na kʋ a. A Zuda tẽw a, a Senakerib tɩ tʋ n a Naaŋmɩn na be a salom zu a. A ʋ kpãàfʋ ƴãw a, a Naaŋmɩn tɩ fɛr ʋ na ʋ ùr zɔ kɛ́ bɛr a tẽw ŋa[7]. A Senakerib na wa lɛb wa a Nɩnɩɩvʋ tẽw a, ʋ kʋ n a Ɩsɩrayɛl nɩbɛ yaga nɩ suur. Mãa n'ʋ mɩ́ tɩ sɔwlɩ wob a bɛ ƴã-gamɛ tɩ ũù. A nãà mɩ́ tɩ ƴãw na bɛ lɛb yi bɔ a, bɛ nyɛ̃ a ɩ.

¹⁹Nɩnɩɩvʋ tẽw nɩr kãw tɩ cen na tɩ yel kʋ̀ a nãà, kɛ́ mãa n'ʋ ũùne a kũuni, a lɛ n'a ɩ̃ tɩ sɔwlɩ. Ɛcɛ ɩ̃ na tɩ wõ k'aa nãà bãw nɩ a ɩ̃ yele, ɛ́ ƴãw bɛ bɔbr mɛ̃ a kʋb ƴãw a, dɛ̃bɩ̃ɛ tɩ nyɔw mɛ̃ na, ɩ̃ zɔ.

²⁰Bɛ tɩ faa nɩ a ɩ̃ bʋ̃-tɛrɩ za ƴãw a nãà na-bome pʋɔ. A alɩ bome nɛ tɛwr na tɩ cɛ m a tɩ n'ɩ a ɩ̃ pɔw Ana nɩ a ɩ̃ bidɛb Tobɩasɩ.

²¹A pùorí, a bɛ tɩ ta bibie lɩz'a ayi ɛ, ɛ́ a nãà bidɛbr ayi kãw tɩ kʋ ʋ, ɛ́ zɔ cen Araratɩ[8] tan pʋɔ. A ʋ bidɛb Asaradɔ̃ tɩ lɩɛr'ʋ na dɩ a naalʋ. Ʋ tɩ kʋ̀ n a ʋ naalʋ-tẽw kaafʋ nɩ a ʋ libie kaafʋ yele Ahikaar na ɩ a ɩ̃ yɛb Anayɛl bidɛb a.

²²A lɛ n'a a Ahikaar tɩ ƴɛ̀r faa mɛ̃, ɩ̃ lɛb siw a Nɩnɩɩvʋ tẽw. Bʋ̃ʋ n'ʋ vɛ̃, a Ahikaar'ʋ tɩ kaarɛ a nãà bʋ̃-nyúuri zie. Ʋlɛ n'ʋ tɩ kaarɛ a ƴɛ̀rʋ-dɩb nɩ a libie yele zie, ɛ́ ɩ a Asiiri tẽw nɩ-bɛrɛ za nɩ-kpɛ̃ɛ. A Asaradɔ̃ tɩ lɛb'a kʋ̀ ʋ a ʋ tõ-nɛ́ɛ. Lɛb waar mɩ̀, a Ahikaar tɩ ɩ n a ɩ̃ nɩr, a ɩ̃ yɛb bidɛb.