Read Dagara, Northern Tobi 11 Bible Online

Tobi 11 - Dagara, Northern bible

Tobi 11

¹Bɛ na tɩ pɩɛlɛ Kaserin tẽ-kpɛ̃ɛ na tori a Nɩnɩɩvʋ tẽw a, a Arafayɛl tɩ yel'ɩ a Tobɩasɩ:

²«Fʋ bãw nɩ a lɛ a na tɩ ŋmɛ̃ a fʋ sãà zie ɛ́ tɩ yi a.

³Ɩ tɩ de a fʋ pɔw niwn tɩ cɔbrɩ a yir, ɛ́ ʋlɛ nɩ a nɩbɛ na cɛ a waar.»

⁴Bɛ za ayi tɩ lãw na cen. A Arafayɛl tɩ yel'ɩ a Tobɩasɩ: «Ɩ a zʋ́m kalɩ̃kaar ʋ pɩɛlɩ.» A baa[36] tɩ tuur bɛ na.

⁵Ɛcɛ a Ana tɩ zɩ̃ na piwre a sɔ́r ʋl a ʋ bie na na tu wa a.

⁶Bɛ wa bere na ʋ nyɛ̃ ʋ ʋ wɩɛr tɩ waar, ʋ yel a sɩr: «A fʋ bidɛb'ɩ ŋan tarɛ, ʋlɛ nɩ a sob ʋl na bɩɛlɩ ʋ a!»

⁷A Arafayɛl tɩ yel'ɩ à ŋá kʋ̀ a Tobɩasɩ ɛ́ bɛ bãw ta a ʋ sãà zie: «A fʋ sãà mimie na yuo na! Bʋnʋ bɛ ka be ɩ.

⁸Tɩ̀ ɩ a zʋ́m kalɩ̃kaar ƴãw a ʋ mimie pʋɔ: a tɩ̃ɩ na ɩ n a bʋ̃-pɛlɛ al 'lawrɛ bɩɛlbɩɛl tɩ yi a za. Al pùorí, a fʋ sãà na lɛb'a nyɛrɛ nyɛ̃ a cãà.»

⁹A Ana tɩ zɔ na cen tɩ nyɔw a ʋ bie weri, ɛ́ kone yere nɩ: «Ɩ̃ bie e, ɩ̃ lɛb'a nyɛ b! Ƴɛrɛŋa a, ɩ̃ na tʋ̃ɔ́ na kpi nɩ su-nʋ̃ɔ̀![37]»

¹⁰A Tobi tɩ ìr'a gbõgbori yi a davʋra dɩ̃dɔr ƴãw.

¹¹A Tobɩasɩ tɩ ƴãw nɩ a zʋ́m kalɩ̃kaar a ʋ nũú tuor'ɩ a ʋ sãà. Ʋ tɩ pɛbl'ɩ a sãà mimie zu, ɛ́ nyɔw ʋ tɛr kpɛ̃w za ɛ́ yel ʋ: «Ɩ̃ sãà a, dɩ kanyir!» Ʋ tɩ ɩ n a tɩ̃ɩ ƴãw ʋ a mimie pʋɔ ɛ́ bɛr a a tone.

¹²Al pùorí, ʋ tɩ 'lawr'ɩ a bʋ̃-pɛlɛ al a mimi-kõkowe ƴãw bɛr nɩ a ʋ nuru a za ayi.

¹³Lɛ n'a a Tobi tɩ nyɔw ʋ weri kone yere nɩ: «Ɩ̃ bie e, ɩ̃ lɛb'a nyɛ b, fʋ̃ʋ na ɩ a ɩ̃ mimie cãà a!»

¹⁴Ʋ tɩ yel'a ƴãw pʋɔ: «Naaŋmɩn so danʋ! A ʋ yúor na tɛr vɩɛlʋ-danʋ a so danʋ! A ʋ malkɩ son so danʋ! A yúor-vɩɛlʋ-danʋ Naaŋmɩn, ʋ gùre tɩ kʋralɛ! A ʋ malkɩ son za so danʋ a yome yome za! Bʋ̃ʋ n'ʋ vɛ̃, ʋlɛ n'ʋ tɩ ƴãw mɛ̃ a kpɩɛrʋ ŋa, ɛcɛ ƴɛrɛŋa a, ɩ̃ na tʋ̃ɔ́ na lɛb nyɛ̃ a ɩ̃ bidɛb Tobɩasɩ!»

¹⁵A Tobɩasɩ tɩ kpɛ n a yir nɩ nʋ̃ɔ̀ ɛ́ tɩ zɛw kɔkɔr danɛ nɩ a Sore. Ʋ tɩ man nɩ a ʋ sɔ́r kʋ̀ a ʋ sãà yel à ŋá: «A ɩ̃ sɔ́r vɩɛl'a. Ɩ̃ lɛb'a wa n a libie na tɩ bin a Gabayɛl yir a. Ɩ̃ kul'ɩ a Araguwɛl pɔwyaa Saara. Ʋ waar'a, ʋ ta n a Nɩnɩɩvʋ tẽw dɩ̃dɔr ƴãw.»

¹⁶Nʋ̃ɔ̀ tɩ ɩrɛ nɩ a Tobi, ʋ danɛ a Naaŋmɩn tuore nɩ a ʋ bie-pɔw a Nɩnɩɩvʋ tẽw dɩ̃dɔr lowr. A Nɩnɩɩvʋ tẽw dem na tɩ nyɛ̃ ʋ ʋ kpɛmɛ cere ɛ́ nɩr bɛ tawr ʋ a, nʋɔr tɩ ɓãa bɛ na. A Tobi tɩ yere nɩ a bɛ za niŋé kɛ́ Naaŋmɩn zɔ n a ʋ nɩbaalʋ ɛ́ yuo ʋ a mimie.

¹⁷Ʋ na tɩ ta pɩɛlɩ a ʋ bidɛb Tobɩasɩ pɔw Saara a, ʋ tɩ ƴɛ̀r'ɩ nɔ-vla kʋ̀ ʋ à ŋá: «Ɩ̃ pɔwyaa a, a fʋ waa yãanɩ! A fʋ Naaŋmɩn na tɛr fʋ wa n a tɩ zie a so danʋ! A fʋ sãà, ʋ nyɛ̃ maalʋ! A ɩ̃ bidɛb Tobɩasɩ, ʋ nyɛ̃ maalʋ nɩ a fʋ̃ʋ mɩ̀ ɩ̃ pɔwyaa a! Kpɛ a fʋ yir pʋɔ, a fʋ waa a ʋ pʋɔ vɩɛl'a! Wa kpɛ a ʋ pʋɔ vʋʋrɛ nɩ nʋ̃ɔ̀ nɩ a Naaŋmɩn maalʋ!»

¹⁸A ʋlɩ bibir a, a tɩ ɩ n nʋ̃ɔ̀ kʋ̀ a Zifʋ mɩnɛ bɛl za na kpɩɛr a Nɩnɩɩvʋ tẽw a.

¹⁹A Ahikaar[38] nɩ a Nadã na tɩ ɩ a Tobi arbili a, tɩ wa na wa lãwnɩ ʋ cɩlɛ.