Read Dagara, Northern Tobi 12 Bible Online

Tobi 12 - Dagara, Northern bible

Tobi 12

¹A kul-taa cuw na wa baar'a, a Tobi tɩ bʋɔl'ɩ a ʋ bidɛb Tobɩasɩ wa yel ʋ: «Ɩ̃ bie e, ƴãw fãw ya a fʋ sɔr-bɩɛlɛ a ʋ yar, ɛ́ dɔwl'ʋ bom ƴãw pʋɔ.»

²A Tobɩasɩ tɩ sɔw nɩ a ʋ sãà: «Ɩ̃ sãà a, a ŋmɩn sã-ya n'a ɩ na ya ʋ? Mãa saa na kʋ̀ ʋ a bome ʋ na sõw mɛ̃ tɩ lɛb wa n a põ-zɛ̃-taa zie a, ɩ̃ cãà kʋ̃ lo ɩ.

³Bʋ̃ʋ n'ʋ vɛ̃, ʋ lɛb'a wa n mɛ̃ nɩ ƴã-ɓaarʋ, ʋ sanɩ nɩ a ɩ̃ pɔw, ʋ sõw mɛ̃ na ɩ̃ lɛb wa n a libie, ʋ sanɩ fʋ na: a ŋmɩn n'a ɩ̃ pãa na kʋ̀ ʋ à á ŋá za ƴãw a?»

⁴A Tobi tɩ yel ʋ na: «Ɩ̃ bie e, a sɛw na k'ʋʋ de a alɩ bome nɛ za ʋ na lɛb wa n a põ-zɛ̃-taa zie.»

⁵A Tobɩasɩ tɩ bʋɔl'ɩ a Arafayɛl wa yel ʋ: «De a alɩ bome nɛ za fʋ na lɛb wa n a põ-zɛ̃-taa zie, a ɩ a fʋ yar, ɛ́ fʋ lɛb kul'ɩ ƴã-ɓaarʋ.»

⁶Lɛ n'a a Arafayɛl tɩ de bɛ bɛ za ayi bɛ tɛwr zie yel bɛ: «Nyɩ puori Naaŋmɩn yãanɩ, ɛ́ manɩ a alɩ bome nɛ ʋ na maalɩ kʋ̀ nyɩ a, a nɩ-vʋʋrɩ za niŋé, kɛ̀ bɛ tʋ̃ɔ́ danɛ a ʋ yúor. Nyɩ ɩ a nɩsaalbɛ za bãw a Naaŋmɩn tome mɛ̃ a lɛ a na sɛwnɩ a. Nyɩ taa wa bɛrɛ a ʋ danʋ ɛ.

⁷A vɩɛl'a kɛ́ bɛ mɩ́ sɔwlɩ a nãà yel-sɔwlɩ, ɛcɛ a Naaŋmɩn tome a, a fɛr'a kɛ́ bɛ mɩ́ manɛ a ɛ́ ɩrɛ kɛ̀ bɛ bãw a. Nyɩ manɛ a mɛ̃ a lɛ a na sɛw taa nɩ a. Nyɩ ɩrɛ a vla, ɛ́ faa kãw za kʋ̃ páw nyɩ ɛ.

⁸A puoru na tu yel-mɩŋa a nɩ a nɩbɛ sõwfʋ na tu mɩnʋ a sa n naalʋ fʋ na kpɛ ɛ́ a bɛ tu a sɔ́r a. À ɩ-kʋ̀ a nan dem sa a salm-zɩɛ fʋ na bɔ gbõ taa a.

⁹A nɩbɛ sõwfʋ faarɛ nɩ a kũu pʋɔ, ɛ́ pɛ́wr yel-bier za dɛwr bɛrɛ. A bɛlɩ dem na sõwne a nɩbɛ a mɩ́ vʋʋr'a cɛlɩ.

¹⁰Ɛcɛ a bɛlɩ dem na maalɛ a yel-bebe ɛ́ bɛ tuur a mɩnʋ a ɩ n a bɛl mɩŋa dɔ̃ dem.

¹¹Ƴɛrɛŋa a, ɩ̃ na yel'ɩ a yel-mɩŋa za kʋ̀ nyɩ, bɛ sɔwlɩ nyɩ bom ɛ. Mɛ̃ a lɛ ɩ̃ na yel a ƴɛrɛŋa kʋ̀ nyɩ a, a vɩɛl'a kɛ́ bɛ mɩ́ sɔwlɩ a nãà yel-sɔwlɩ, ɛ́ mɩ́ ɩ a Naaŋmɩn tome vɩɛlʋ za sãá.

¹²Nyɛ̃: a lɛn daar a fʋ̃ʋ Tobi na tɩ puore ɛ́ a Saara mɩ̀ puore a ʋ zie a, mãa n'ʋ mɩ́ tɩ de a nyɩ puoru cen nɩ a Sore na tɛr yúor-vɩɛlʋ-danʋ a niŋé. Ɩ̃ mɩ̀ mɩ́ tɩ wul ʋ nɩ a fʋ tome a lɛn daar fʋ na tɩ ũùne a kũuni a[39].

¹³A lɛn daar fʋ na bɛ tɩ bʋnɩ a fʋ tabal pɛr, ɛ́ bɛr a fʋ bʋ̃-dɩrɩ ɛ́ cen tɩ ũù a kũu a, a lɛn daar'a a Naaŋmɩn tɩ tõ m k'ɩ̃ɩ wa ɩ fʋ kaa.

¹⁴Ɛcɛ a Naaŋmɩn mɩ̀ tɩ tõ m'ɩ a pɛr nɛ pʋɔ k'ɩ̃ɩ wa sanɩ fʋ lãwnɩ a fʋ bie-pɔw Saara.

¹⁵Mãa n'ɩ a Arafayɛl, a malkɩ mɩnɛ ayopõi bɛl kãw, a bɛl na mɩ́ àr a Sore na tɛr yúor-vɩɛlʋ-danʋ a niŋé, gù kɛ́ bɛ tone ʋ a[40].»

¹⁶A tɩ dam'ɩ a Tobi nɩ a ʋ bidɛb, bɛ lo vɔblɩ muru, ɛ́ dɛ̃bɩ̃ɛ nyɔw bɛ.

¹⁷Ɛcɛ a malkɩ tɩ yel bɛ na: «Nyɩ ta zɔrɛ dɛ̃bɩ̃ɛ ɩ! A ƴã-ɓaarʋ, ʋ be a nyɩ zie! Nyɩ puore a Naaŋmɩn yãanɩ kʋralɛ!

¹⁸A lɛn daar ɩ̃ na tɩ be a nyɩ zie a, a ɩ̃ ɩ-vɩɛlɩ zũú bɛ tɩ n'a ɩ, a Naaŋmɩn pʋ-tɩɛrʋ tɩ n'a. Ʋlɛ n'ʋ nyɩ sɛw kɛ́ nyɩ puore yãanɩ ɛ́ danɛ a nyɩ cãafʋ daar za.

¹⁹Nyɩ na mɩ́ tɩ tɩɛrɛ kɛ́ nyɩ nyɛ̃ m'a ɩ̃ dɩrɛ a, ɩ̃ bɛ mɩ́ tɩ sɩrɩ dɩrɛ ɩ, sãáfʋ n'a a mɩ́ tɩ sãá.

²⁰A lɛ ƴãw a, nyɩ danɛ a Sore a tẽw ŋa zu, ɛ́ manɛ a Naaŋmɩn na ɩ kpɛ̃ɛ a. Mãa ƴãw a, ɩ̃ lɛb'a cere a ʋlɩ sob na tõ m a zie. Ɛ́ a nyɩɩm a, nyɩ sɛb a yele al za na ta nyɩ a.» Al pùorí a Arafayɛl tɩ ìr'a do a salom zu.

²¹A Tobi nɩ a ʋ bidɛb tɩ lɛb'a ìr, ɛ́ bɛ lɛb nyɛ̃ ʋ ɛ.

²²Bɛ tɩ yiele na danɛ nɩ a Naaŋmɩn, ɛ́ tɩ puore ʋ yãanɩ a yel-bɛrɛ ʋ na tɩ maalɩ a ƴãw: Naaŋmɩn malkɩ kãw tɩ ɩ na bɛ nyɛ̃ ʋ.