Read Dagara, Northern Tobi 14 Bible Online

Tobi 14 - Dagara, Northern bible

Tobi 14

¹À ŋá n'a a Tobi danʋ yielu tɩ baarɩ.

²A Tobi tɩ kpi n ƴã-ɓaarʋ pʋɔ a ʋ yome kʋba nɩ pie nɩ ayi (112) daar, ɛ́ bɛ tɩ ũù ʋ nɩ ƴãwfʋ a Nɩnɩɩvʋ tẽw. Ʋ tɩ tɛr'ɩ yome lɩz'a ata nɩ ayi a lɛn daar ʋ na tɩ zɔ̃w a. A ʋ sanʋ pùorí a, ʋ tɩ vʋʋr'ɩ tɛra yaga pʋɔ, ɛ́ mɩ́ tɩ ɩ kʋ̀ a nan dem bɛ zʋmnɛ nɩ ɛ. Ʋ tɩ cãà na cow danɩ a Naaŋmɩn ɛ́ zɛw ʋ ʋ na ɩ kpɛ̃ɛ a.

³A Tobi kũu na wa cɛ kerkerlɛ a, ʋ tɩ bʋɔl'ɩ a ʋ bidɛb Tobɩasɩ wa kʋ̀ ʋ a wulu á ŋá: «Ɩ̃ bie e, tɛr a fʋ bibiir cen nɩ.

⁴Cen fɔ̃w a Medi[44] tẽw. Bʋ̃ʋ n'ʋ vɛ̃, ɩ̃ sàw na de a Naaŋmɩn ƴɛ̀rʋ a ʋ ƴɛ̀r-manɛ Nahum na tɩ ƴɛ̀r càar'ɩ a Nɩnɩɩvʋ tẽw a: a za na tu na, ɛ́ lo a Asuur tẽw nɩ a Nɩnɩɩvʋ tẽw zu. A lɛ za a Ɩsɩrayɛl tẽw naaŋmɩn-ƴɛ̀r-manbɛ a Naaŋmɩn na tɩ tõ bɛ yel a na ta n a za. Bom za bɛ íre bɛrɛ a bɛ ƴɛ̀rʋ za pʋɔ ɩ, a za na ta na, a daar wa ta a. A Medi tẽw a, fʋ na be n ƴã-ɓaarʋ pʋɔ zuo a Asiiri nɩ a Babɩlɔn ten pʋɔ. Bʋ̃ʋ n'ʋ vɛ̃, ɩ̃ bãwnɩ a na, ɛ́ sàw k'aa lɛ a Naaŋmɩn na yel a na tu n a za tɩ ɓɩɩlɩ. Bɛ na diw nɩ a tɩ yɛbr bɛl na cãà kpɩɛr a Ɩsɩrayɛl tẽw pʋɔ a yaarɩ, ɛ́ tɛr bɛ a tẽ-vla ŋa pʋɔ cen nɩ tẽ-zãána bɛ tɩ ɩ gbãgbaar. Nɩr kʋ̃ cãà kpɩɛr a Ɩsɩrayɛl tẽw ɛ, a Samaari nɩ a Zerizalɛm ten na ga nɩ zawlɛ, ɛ́ a Naaŋmɩn yir dɩ vũu ɛ́ lɩɛbɩ debuo tɩ ta tɛm kãw.

⁵Ɛcɛ a Naaŋmɩn na lɛb'a zɔ a bɛ nɩbaalʋ, ɛ́ ƴãw bɛ lɛb wa a Ɩsɩrayɛl tẽw. Bɛ na lɛb'a mɛ a ʋ Yir, ɛcɛ ʋ kʋ̃ ŋmɛ̃ taa nɩ a dãw-niwn sob ɛ, ɛ́ gù a daar na ƴãw a tɩ ta. Al pùorí, a Ɩsɩrayɛl nɩbɛ za na yi n a bɛ diw-cenu zie lɛb wa, wa mɛ a Zerizalɛm nɩ dɛpaalʋ. A Naaŋmɩn Yir na lɛb'a mɛ a be mɛ̃ a lɛ a naaŋmɩn-ƴɛ̀r-manbɛ na tɩ yel a.

⁶A tẽ-daa za nɩbɛ na tu n a Naaŋmɩn ɛ́ ƴãwnɛ ʋ yel-mɩŋa. Bɛ za na zawr'ɩ a bɛ ŋmɩn-bɛlɛbɛlɛ na ƴãwnɛ bɛ tulu pʋɔ a bɛr, ɛ́ bɛ na danɛ nɩ a Naaŋmɩn na be kʋralɛ a nɩ ɩ-ɩrɩ na tu mɩnʋ a.

⁷A lɛn daar a, a Naaŋmɩn na faa nɩ a Ɩsɩrayɛl nɩbɛ bɛl na tu ʋ bɛ lɛb pùor a. Ʋ na ɓã bɛ nɩ taa ɛ́ tɛr bɛ lɛb wa n a Zerizalɛm. Ʋ na ɩ na bɛ vʋʋrɛ a Abraham tẽsɔw zu. Bɛ na kpɩɛr'ɩ a ʋ pʋɔ kʋralɛ ɛ́ bɛ bãw damnʋ ɛ. A bɛlɩ dem na sɩrɩ nɔnɛ a Naaŋmɩn a na be n nʋ̃ɔ̀ pʋɔ, ɛcɛ a yel-bier-maalbɛ nɩ a bɛlɩ dem na bɛ tu ʋ a na bɔr'ɩ a tẽw zu.

⁸Ɛ́ ƴɛrɛŋa a, ɩ̃ bibiir i, a ɩ̃ wulu n'ɩ ŋa: Nyɩ tone a Naaŋmɩn tome nɩ yel-mɩŋa, ɛ́ ɩrɛ a lɛ na pɛlɩ a ʋ pʋɔ a. Nyɩ wul a nyɩ bibiir bɛ ɩ nɩ-mɩn ɛ́ sõwne a nan dem, bɛ tu a Naaŋmɩn ɛ́ danɛ ʋ a yele za pʋɔ, nɩ yel-mɩŋa nɩ a bɛ fãw za. Fʋ̃ʋ ƴãw a, ɩ̃ bie Tobɩasɩ i, yi a Nɩnɩɩvʋ tẽw pʋɔ, ta be a ka ɩ. Fʋ̃ʋ wa ũù a fʋ mã pɩɛlɩ mɛ̃ baar'a, fʋ̃ʋ ta lɛb gã tɩ̃ɩsɔw-been a zie ŋa ɩ. Bʋ̃ʋ n'ʋ vɛ̃, ɩ̃ nyɛ̃ ʋ na, faa n'a yɛ́r pàw ʋ, ɛ́ bɛ̀lɩ-taa tɛwr'a a nɩbɛ bɛ̀lɛ taa bɛ zɔrɛ nɩ vĩ ɛ.

¹⁰Ɩ̃ bie e, lɛb tɩɛrɩ a lɛ za a Nadã na tɩ ɩ a ʋ sãà-guole Ahikaar[45] a. Ʋ tɩ ƴãw na bɛ ũù ʋ mimir. Ɛcɛ a Naaŋmɩn tɩ ɩ na k'ʋ ya a ɩ-faa ŋa na bɛ maal'ɩ wob a san a ʋ sãà mimirí. A Ahikaar tɩ lɛb'a yi a cãà pʋɔ, ɛ́ a Nadã kpɛ lige na be kʋralɛ a pʋɔ, bʋ̃ʋ n'ʋ vɛ̃, ʋ tɩ bɔbr'a k'ʋʋ kʋ a Ahikaar. A nɩbɛ a Ahikaar na tɩ sõwne a zũú a, ʋ tɩ yi n a kũu bɛra pʋɔ a Nadã na tɩ ƴãw ʋ a. Ɛcɛ a Nadã tɩ lo n a bɛra ŋa pʋɔ kpi.

¹¹A na ɩ à ŋá a, ɩ̃ bibiir i, nyɩ nyɛ̃ bom nɛ a nan dem sõwfʋ na waar'ɩ a, nɩ bom nɛ a yel na bɛ tu sɔ́r na waar'ɩ a: a yel na bɛ tu sɔ́r a waar'ɩ nɩ kũu. Ƴɛrɛŋa a, a vʋʋrʋ bɛ cãà siwr mɛ̃ ɩ.» A ʋ bibiir tɩ gaal'ʋ nɩ gado zu, ʋ kpi. Bɛ tɩ ũù ʋ na nɩ ƴãwfʋ.

¹²A Tobɩasɩ mã na wa kpi a, ʋ tɩ ũù ʋ na pɩɛlɩ a ʋ sãà Tobi[46]. Al pùorí, ʋ tɩ cen nɩ nɩ a ʋ pɔw a Medi tẽw, tɩ kpɩɛr a Ɛkɩbatan a ʋ dɩɛm-sãà Araguwɛl zie[47].

¹³Ʋ tɩ kaa nɩ a ʋ dɩɛm-sãà nɩ a ʋ dɩɛm-mã zie nɩ ƴãwfʋ a bɛ koru pʋɔ. Bɛ na wa kpi a, ʋ ũù bɛ nɩ a Ɛkɩbatan, ɛ́ dɩ a Araguwɛl gbãw, mɛ̃ a lɛ ʋ na tɩ dɩ a ʋ sãà Tobi dem a.

¹⁴Ʋ tɩ nyɛ̃ nɩ ƴãwfʋ yaga a nɩbɛ zie tɩ kpi n a ʋ yome kʋba nɩ pie nɩ ayopõi (117) sob daar.

¹⁵Ʋ bɛ tɩ kpi sɛr ɛ, ɛ́ wõ a Nɩnɩɩvʋ tẽw loba. Ʋ tɩ nyɛ̃ nɩ a Nɩnɩɩvʋ tẽw nɩbɛ bɛl a Medi tẽw nãà Sɩasaar na tɩ diw wa n a Medi tẽw a. Ʋ tɩ danɩ nɩ a Naaŋmɩn a lɛ za ʋ na tɩ ɩ a Nɩnɩɩvʋ nɩ Asuur ten nɩbɛ zie a ƴãw. Nʋ̃ɔ̀ tɩ kpɛ ʋ nɩ a Nɩnɩɩvʋ tẽw loba ƴãw. A ʋ cãafʋ daar za a, ʋ tɩ puor'ɩ a Sore Naaŋmɩn na sɛwnɩ danʋ kʋralɛ a yãanɩ.